ဇင်လင်း - ရွေးကောက်ပွဲ နဲ့ စတုတ္ထမဏ္ဍိုင်


ဇင်လင်း - ရွေးကောက်ပွဲ နဲ့ စတုတ္ထမဏ္ဍိုင်
(မိုးမခ) ဇူလိုင် ၂၊ ၂၀၁၅


၂၀၁၅ အထွေထွေရွေးကောက်ပွဲ ကျင်းပမယ့်ရက် တဖြည်းဖြည်းနီးကပ်လာနေပါပြီ။ နိုဝင်ဘာမှာ အစီအစဉ်အတိုင်း အမှန်တကယ်ကျင်းပနိုင်မယ်ဆိုရင် ရွေးကောက်ပွဲဟာ (၄)လလောက်သာ လိုပါတော့တယ်။ ရွေးကောက်ပွဲကို လွတ်လပ် တရားမျှတတဲ့ ထုံးနည်းတွေနဲ့အညီ ကျင်းပဖို့ လက်ရှိ ဦးသိန်းစိန်အစိုးရအနေနဲ့ရည်မှန်းချက်ရှိတယ်ဆိုရင် ဘက်ပေါင်းစုံ (နိုင်ငံရေး၊ စီးပွားရေး၊ လူမှုရေး၊ ပညာရေး နဲ့ သတင်းလွတ်လပ်ရေး) ကဏ္ဍအသီးသီး တည်ငြိမ်မှုရှိအောင် စီမံ ဆောင်ရွက် ချိန်တန်ပါပြီ။ ဒါပေမယ့် လက်ငင်း ဖြစ်စဉ်တွေကို လေ့လာကြည့်တဲ့အခါ၊ တရုတ်-မြန်မာနယ်စပ် ကိုးကန့်ဒေသမှာ တုိုက်ပွဲတွေ ဆက်ဖြစ်နေတာ၊ ကချင်ပြည်နယ် ဖားကန့်ဒေသမှာ  အစိုးရတပ်နဲ့ ကချင် KIA တပ်ရင်း (၆) တို့တိုက်ပွဲတွေ ဆက်ဖြစ်နေတာ တွေကို ကြည့်ရင် နိုင်ငံရေးတည်ငြိမ်မှု မရှိတာ ပြည်သူအများ သိနေကြပါတယ်။

စီးပွားရေးကဏ္ဍကို ကြည့်ရင်လည်း နိုင်ငံခြားငွေလဲနှုန်း (Foreign Exchange Rate) တည်ငြိမ်မှုမရှိတဲ့အတွက်  စားသုံးသူ လူထုအတွက် ကုန်ဈေးနှုန်းတည်ငြိမ်မှု (Consumer Price Stability) လုံးဝမရှိတဲ့အခြေအနေကို ရင်ဆိုင်နေရပြန်တယ်။ လူမှုရေးမငြိမ်သက်မှု (Social Unrest)ကလည်း ပုံသဏ္ဍာန် အမျိုးမျိုးနဲ့ပေါ်ပေါက်နေတယ်။ မြေယာတွေ တရားလက်လွတ် သိမ်းယူမှုတွေကြောင့် ဒေသအနှန့်မှာ ဆန္ဒပြမှုတွေပေါ်ပေါက်နေတာတွေ့ရတယ်။ အလုပ်သမားတွေရဲ့ အနိမ့်ဆုံး လုပ်ခ လစာကိစ္စကို ဖြေရှင်းမပေးနိုင်တာကြောင့်လည်း မကျေနပ်မှုတွေ တနေ့တခြားများပြားလာနေတယ်။

ပညာရေးကိစ္စ ကြည့်ပြန်တော့လည်း  လွန်ခဲ့တဲ့ မတ်လ ၁၀ ရက်နေ့က လက်ပံတန်းမြို့ ကျောင်းသားသပိတ်စစ်ကြောင်းကို ရဲတပ်ဖွဲ့က အကြမ်းဖက်ဖြိုခွဲပြီး ကျောင်းသားကျောင်းသူ အများအပြားကို စာနာမှုကင်းစွာ ဖမ်းဆီးခဲ့တယ်။ နောက် နိုင်ငံတော် အကြည်ညိုပျက်စေမှု၊ ပြည်သူ့ဝန်ထမ်းကို နာကျင်စေမှု ဥပဒေမဲ့လူစုလူဝေးမှာ ပါဝင်မှုစတဲ့ ပုဒ်မ ၅ခုနဲ့   သာယာဝတီ အကျဉ်းထောင်မှာ ကျောင်းသားကျောင်းသူတွေနဲ့ ကူညီသူ စုစုပေါင်း  ၇၂ ဦးကို ဖမ်းဆီးထိန်းသိမ်း တရားစွဲ ခဲ့တယ်။ ဒါကြောင့် ဒီမိုကရေစီပညာရေး ပြုပြင်ပြောင်းလဲမှုကိစ္စကလည် အစိုးရနဲ့ ကျောင်းသားကျောင်းသူတွေ အကြား ဆက်လက်တင်းမာနေဆဲ ဖြစ်တယ်။

သတင်းမီဒီယာ လွတ်လပ်ခွင့်နဲ့ ပတ်သက်တဲ့ အရေးကလည်း အလားတူ တည်ငြိမ်မှုမရှိ ရင်လေးဖွယ်ရာဖြစ်နေတာ  တွေ့နေရပြန်တယ်။ လတ်တလောမှာ The Daily Eleven သတင်းစာမှ အယ်ဒီတာ ၁၇ ဦးကို တရားရုံးမထီမဲ့မြင်ပြုမှုနဲ့၊ မန္တလေးတိုင်းဒေသကြီး တရားလွှတ်တော်မှာ၊ ပြန်ကြားရေးဝန်ကြီးဌာနက တရားစွဲဆိုထားတဲ့ ကိစ္စဟာ ထင်ရှားတဲ့ မီဒီယာဖိနှိပ်မှု တခုလို့ ဆိုနိုင်ပါ တယ်။  အဲဒီ ကိစ္စနဲ့ ပတ်သက်တဲ့ သတင်းစာရှင်းလင်းပွဲကို ဇွန် ၂၀ရက် (စနေနေ့) မွန်းလွဲ ၁ နာရီက ရန်ကုန်မြို့ ပြည်လမ်း Novotel ဟိုတယ် ပုသိမ်ခန်းမမှာ ပြုလုပ်ခဲ့တာတွေ့ရတယ်။ အဆိုပါရှင်းလင်းပွဲသို့ နိုင်ငံရေးပါတီများမှ ခေါင်းဆောင်များ၊ လွှတ်တော်ကိုယ်စားလှယ်များ၊ လွှတ်တော်ရေးရာကော်မတီ အဖွဲ့ဝင်အချို့၊ နိုင်ငံရေး တက်ကြွလှုပ်ရှားသူများ၊ စီးပွားရေး၊ လူမှုရေး၊ စာပေနှင့် အနုပညာနယ်ပယ်မှ ထင်ရှားသူများ၊ ပြည်တွင်း ပြည်ပ သတင်းမီဒီယာများ၊ မီဒီယာ လွတ်လပ်ခွင့် အတွက် ဆောင်ရွက်နေကြတဲ့ အဖွဲ့အစည်းများမှ ကိုယ်စားလှယ်များ တက်ရောက်ခဲ့ကြတယ်။ အခုလို အလွှာစုံ ထောင့်စုံက ပုဂ္ဂိုလ်တွေ ဒီ သတင်းစာရှင်းပွဲကို တက်လာကြတာက ထူးခြားပါ တယ်။ Eleven Media Group ကိစ္စ ဆိုပေမယ့် သတင်းမီဒီယာအားလုံးရဲ့ လွတ်လပ်ရေးနဲ့ သက်ဆိုင်နေတာကြောင့် သတင်းဂျာနယ် တွေအစ၊ နိုင်ငံရေးပါတီတွေအဆုံး ကဏ္ဍစုံက ကိုယ်စားလှယ်တွေ တက်ရောက်ခဲ့ကြတာ သတိပြုမိပါ တယ်။

ဒီတော့ အခြေအနေအားလုံးကို ခြုံငုံသုံးသပ်ကြည့်တဲ့အခါ ရွေးကောက်ပွဲအလွန်နီးနေတဲ့ အခုလို အချိန်ကာလမျိုးမှာ လက်ရှိ အာဏာရ ပါတီနဲ့ အစိုးရဟာ တိုင်းပြည်ကို အဖက်ဖက်က တည်ငြိမ်အောင် ကြိုးစားဆောင်ရွက်ပေးရမယ့် အစား၊ တည်ငြိမ်မှု ပျက်ပြားအောင်များ ဖန်တီးနေသလားလို့ ထင်မြင်စရာတွေဖြစ်လာတယ်။ အကြောင်းကတော့ ဒီမိုကရေစီ ရွေးကောက်ပွဲ ရဲ့ အဓိကမဏ္ဍိုင်က လွတ်လပ်စွာ ဖွင့်ဟထုတ်ဖေါ်ပြောဆိုခွင့် နဲ့ သတင်းမီဒီယာလွတ်လပ်ခွင့် (Freedom of Expression & Freedom of Press) အပြည့်အ၀ ရရှိဖို့လိုပါတယ်။ ဒါဟာ ဒီမိုကရေစီစနစ်ရဲ့ အသက်ဝိဥာဉ်ပါပဲ။ သတင်းမီဒီယာ လွတ်လပ်ခွင့် မပေးတဲ့ ရွေးကောက်ပွဲဟာ လွတ်လပ်ပြီး တရားမျှတတဲ့ ရွေးကောက်ပွဲ ဘယ်နည်းမှ မဖြစ်မြောက်နိုင်ပါဘူး။

တကယ်တော့ ရွေးကောက်ပွဲနဲ့ ပတ်သက်လို့သတင်းမီဒီယာသမားတွေ စောင့်ကြည့်ရမယ့် အခြေအနေ (၃)ရပ်ရှိပါတယ်။ (၁) ရွေးကောက်ပွဲမတိုင်မီ၊ (၂) ရွေးကောက်ပွဲနေ့၊(၃) ရွေးကောက်ပွဲ ပြီးနောက် ဆိုတဲ့ အခြေအနေတွေဖြစ်ပါတယ်။

၂၀၀၈ ဖွဲ့စည်းပုံအခြေခံဥပဒေကို အခြေခံပြီး ပြင်ဆင်ထားတဲ့ ရွေးကောက်ပွဲဟာ ဒီမိုကရေစီနည်းကျဖို့ မဖြစ်နိုင်တာ က တော့  သေချာပါတယ်။ ဒါကြောင့် ရွေးကောက်ပွဲကာလ သတင်းအမှန်ကို သိရှိနှိုင်ရေးအတွက် သတင်းမီဒီယာသမား တွေရဲ့  အခန်းကဏ္ဍဟာ အလွန်အရေးပါလာတာတွေ့ရပါလိမ့်မယ်။ ဒီ အချက်ကို သတင်းသမားတွေကိုယ်တိုင် သဘောပေါက် ဖို့လိုပါတယ်။ ရွေးကောက်ပွဲ မတိုင်မီကာလမှာ မီဒီယာက လူထုကို သတင်းအချက်အလက် ပြည့်ပြည့်စုံစုံ ပေးဖို့လိုပါတယ်။ ရွေးကောက်ပွဲဥပဒေများအကြောင်း၊ ပါဝင်ယှဉ်ပြိုင်မယ့် ပါတီများနှင့် ကိုယ်စားလှယ်များအကြောင်း၊ သူတို့ရဲ့ စီးပွားရေးနဲ့ ပစ္စည်းဥစ္စာပိုင်ဆိုင်မှုအခြေအနေ၊ ပါတီမူဝါဒနှင့် ပါတီခေါင်းဆောင်များရဲ့ နောက်ခံ ကိုယ်ရေးသမိုင်း များ၊  သူတို့ရဲ့ သီးခြားပြောဆိုချက် အမြင်အယူအဆများ၊ စသဖြင့် လူထုစဉ်းစားချိန်ဆနိုင်ဖို့အတွက် မီဒီယာက သတင်း အချက်အလက်တွေပေးရမှာ ဖြစ်ပါတယ်။ ဂျာနယ်တစောင် မီဒီယာတခုဟာ အစိုးရရဲ့ လက်ဝေခံသော်၎င်း၊ အခြားပါတီ တခုခုရဲ့ လက်ကိုင်ဒုတ်သော်၎င်း၊ မဖြစ်ဖို့ အထူးသတိပြုရမှာ ဖြစ်ပါတယ်။

ဒီနေရာမှာ ရွေးကောက်ပွဲ ကော်မရှင်အကြောင်းလည်း လူထုသိအောင် မီဒီယာက သတင်းပေးဖို့လိုပါတယ်။ လွတ်လပ်တဲ့ ကော်မရှင် ဟုတ် မဟုတ်၊ ကော်မရှင် နောက်ကွယ်မှာ အစိုးရအာဏာပိုင်တို့ စွက်ဖက်မှုရှိ မရှိ၊ မဲဆန္ဒရှင်မှတ်ပုံတင်         စာရင်းများ၊ ကိုယ်စားလှယ်စာရင်းများ၊ စနစ်တကျပြုစု ဆောင်ရွက်ထားမှု ရှိ မရှိ၊ အဂတိလိုက်စားပြီး ပါတီတခု လူပုဂ္ဂိုလ် တဦးတယောက်ကို မျက်နှာသာပေးမှု ရှိ မရှိ၊ ကော်မရှင်ဝန်ထမ်းများ ကျွမ်းကျင်မှု ရှိ မရှိ။ ရွေးကောက်ပွဲအတွက် လိုအပ်တဲ့ ပုံစံ စာရွက်စာတမ်း ပစ္စည်းပစ္စယများ အချိန်မီ အလုံအလောက် ဖြန့်ဖြူးပေးနိုင်ခြင်း ရှိ မရှိ  စသည့် ကိစ္စရပ်တွေကိုလည်း မီဒီယာက စောင့်ကြည့် သတင်းပေးရမှာဖြစ်တယ်။

စစ်ဖက်သြဇာလွှမ်းမိုးမှု ရှိနေဆဲဖြစ်တဲ့ ရွေးကောက်ပွဲအတွင်း ဥပဒေချိုးဖောက်မှု၊ အာဏာအလွဲသုံးမှု၊ လူ့အခွင့်အရေး ချိုးဖောက်မှု၊ သတင်းလွတ်လပ်ခွင့် ပိတ်ပင်တားမြစ်မှု၊ မဲလိမ် မဲခိုးမှု အစရှိတဲ့ ဖြစ်ရပ်တွေ ဖြစ်နေဆဲ ရှိနေဆဲ ဖြစ်ပါတယ်။ သမိုင်းမှာ အရေးကြီးတဲ့ ဖြစ်စဉ်တွေကို သတင်းမီဒီယာသမားများက အမိအရ မှတ်တမ်းတင်နိုင်အောင် ရွေးကောက်ပွဲနေ့ မှာ  မဲစတင်မပေးမီ မဲပုံးတွေ အလွတ်ဗလာ ဖြစ်နေရဲ့လား၊ မဲရုံထားရှိမှု စနစ်ကျရဲ့လား၊ မဲစာရွက် အလုံအလောက်ရှိ ရဲ့လား၊ မဲရုံတာဝန်ကျ ပုဂ္ဂိုလ်များ တာဝန်ကို မှန်မှန်ကန်ကန် ဆောင်ရွက်ရဲ့လား၊ မဲရုံပတ်ဝန်းကျင်မှာ မဲဆွယ်မှု၊ မဲဝယ်မှု၊ လာဘ်ပေးလာဘ်ယူမှု၊ ခြိမ်းခြောက်မှု၊ နှောက်ယှက်မှု ရှိ မရှိ စတာတွေကို မီဒီယာက စောင့်ကြည့်ဖို့ တာဝန်ရှိပါတယ်။ အရေးအကြီးဆုံး အချိန်ကတော့ မဲရေတွက်ချိန်မှာ စည်းမျဉ်းဥပဒေနဲ့အညီ မှန်မှန်ကန်ကန် တိတိကျကျ ပွင့်လင်းမြင်သာမှု ရှိရှိ မဲရေတွက်မှု လုပ် မလုပ် မီဒီယာက အချိန်နဲ့တပြေးညီ စောင့်ကြည့် သတင်းပေးရမှာဖြစ်ပါတယ်။ ရွေးကောက်ပွဲပြီးတဲ့ နောက် ပါတီကိုယ်စားလှယ်တွေရဲ့ အနိုင်အရှုံးစာရင်း သတင်းကြေညာမှု၊ လွှတ်တော် မည်သည့်အချိန်တွင်ခေါ်မည်၊  အစိုးရ မည်သို့ဖွဲ့မည်၊  အာဏာမည်သို့ လွှဲမည် အစရှိတဲ့ သတင်းများ လူထုသိရှိအောင် ပို့ပေးရမှာ ဖြစ်တယ်။ အရေးကြီး တာက ရွေးကောက်ပွဲ မတိုင်မီနဲ့ ရွေးကောက်ပွဲနေ့ ဖြစ်စဉ်တွေကို သတင်းမီဒီယာသမားများ မိမိရရ မှတ်တမ်းတင်နိုင်ဖို့ အားထုတ် ကြိုးစားရမှာဖြစ်ပါတယ်။

ဒါကြောင့် လက်ငင်း အခြေအနေ အချိန်အခါအရ စတုတ္ထမဏ္ဍိုင်ဖြစ်တဲ့ သတင်းမီဒီယာဟာ တာဝန်အကြီးဆုံး အရေး အပါ ဆုံး အခန်းကဏ္ဍမှာ ရောက်ရှိနေပါတယ်။ စတုတ္ထမဏ္ဍိုင်ရဲ့ တာဝန်က အခြား မဏ္ဍိုင်(၃)ရပ်ရဲ့ လုပ်ငန်းဆောင်တာတွေကို စောင့်ကြည့်ရမှာ ဖြစ်ပါတယ်။ အုပ်ချုပ်ရေးမဏ္ဍိုင် တော်တည့်မှန်ကန်မှုရှိရဲ့လား၊ ဖေါက်လွှဲဖေါက်ပြန်ဖြစ်နေသလား၊ တရားရေးမဏ္ဍိုင် ဖြောင့်မှန်ရဲ့လား၊ ကိုယ်ကျင့်ပျက်ပြားလျှက် တရားစီရင်နေသလား….ဆိုတာတွေကို ပြည်သူလူထုသိရှိ နိုင်အောင် စောင့်ကြည့်ဖေါ်ထုတ်ပြရမှာက စတုတ္ထမဏ္ဍိုင်ရဲ့ ပဓါနတာဝန်ပါပဲ။ ဒါမှသာ နိုင်ငံနဲ့ပြည်သူ့အကျိုးစီးပွားကို ကာကွယ်တဲ့ Professional Media လို့ခေါ်ဆိုနိုင်မှာလည်းဖြစ်ပါတယ်။ အစိုးရအာဘော် မီဒီယာများလို မင်းလိုလိုက် မင်းကြိုက် လုပ်နေသမျှ Professional Media, Independent Media လို့ မခေါ်နိုင်ပါ။ ဒီတော့ ဒီကနေ့ မြန်မာနိုင်ငံမှာ သတင်းမီဒီယာသမားတွေကို အစိုးရက ဖမ်းဆီး တရားစွဲ ထောင်ချ စသဖြင့် တိုးမြှင့်လုပ်ဆောင်လာတာဟာ အစိုးရ အကြိုက် မလိုက်လို့လား…လို့မေးစရာဖြစ်လာပါတယ်။ ရွေးကောက်ပွဲမတိုင်ခင် မီဒီယာတွေကို အစိုးရက ခြိမ်းခြောက် လာတာလားလို့လည်း ထင်စရာဖြစ်လာပါတယ်။ သတင်းမီဒီယာသမားတွေ သတင်းအလုပ်လုပ်တာဟာ ရာဇ၀တ်မှုကျူး လွန်တာ မဟုတ်ဘဲ၊ အပြည်ပြည်ဆိုင်ရာ လူ့အခွင့်အရေးကြေညာစာတမ်း (UDHR) အပိုဒ် ၁၉ ကခွင့်ပြုတဲ့ အခွင့်အရေးနဲ့ အညီ လူထု သိသင့် သိထိုက်တဲ့ သတင်းတွေကို ဖေါ်ထုတ်တင်ပြခြင်းသာ ဖြစ်ပါတယ်။ ဒါကြောင့် ရွေးကောက်ပွဲမတိုင်မီ ကာလမှာ သတင်းစာလွတ်လပ်ခွင့် တည်ငြိမ်မှုရှိဖို့ အစိုးရက တာဝန်ခံရမှာ ဖြစ်ပါတယ်။ ဒီမိုကရေစီလို့ ကြွေးကြော်ချင်ရင် သတင်းမီဒီယာ လွတ်လပ်ခွင့် မပေးချင်လို့မရ။ သတင်းစာကို ဖိနှိပ် ခြိမ်းခြောက်နေရင် ဘယ်လိုမှ ဒီမိုကရေစီ မဟုတ်နိုင်။

ဒါကြောင့် ၂၀၁၅ ရွေးကောက်ပွဲကို တာဝန်ယူကျင်းပမယ့် ဦးသိန်းစိန်အစိုးရအနေနဲ့ လွတ်လပ်ပြီး တရားမျှတတဲ့ ရွေးကောက်ပွဲ အင်္ဂါရပ်နဲ့ ပြည့်စုံစေဖို့ စတုတ္ထမဏ္ဍိုင်ကို သူ့တာဝန် သူ၊ လွတ်လပ်ပြီး ဘက်လိုက်မှုကင်းစွာ တာဝန်ထမ်းဆောင်ခွင့်ပြုစေလိုကြောင်းပါ။

((၂၀၁၅ ဇွန်လ (၂၉) တနင်္လာနေ့ထုတ် ဒီလှိုင်းဂျာနယ်))