အောင်ခက်မင်း - စာနာမှုကို ဘာသာပြန်လိုက်သော်

အောင်ခက်မင်း - စာနာမှုကို ဘာသာပြန်လိုက်သော်
(မိုးမခ) စက်တင်ဘာ ၃၀၊ ၂၀၁၅

ခရစ်နှစ် ၂၀၁၅ ခုနှစ် မိုးဥတုသည် မြန်မာပြည်အတွက် ကံမကောင်းသောဥတု အကြောင်းမလှသောရာသီဟုဆိုရပေမည် ။ အများသိပြီးဖြစ်သည့်အတိုင်း ရေဘေးကပ်ဆိုးကြီးက မြန်မာပြည်၏တစ်ကိုယ်လုံးနီးပါးကို ကိုက်ခဲဝါးမျိုပစ်လိုက်သည်။ရေဘေးသင့်ပြည်သူများအားကယ်ဆယ်ရေးနှင့်ပြန်လည်ထူထောင်ရေးအတွက် ကြိုးပမ်းအားထုတ်မှုများတွင်"ရှိုက်သံ"အမည်ရ ရေဘေးသင့်စာနာမှုကဗျာစာအုပ်သည်လည်းတစ်ခုအပါအဝင်ဖြစ်သည်။ သည်စာအုပ်ကို စာပေချစ်သူများအဖွဲ့ စာပေနှင့် ပရဟိတကွန်ရက်က စီစဉ်ထုတ်ဝေခြင်းဖြစ်သည် ။

"ရှိုက်သံ"ကဗျာစာအုပ်အမှာစာတွင် စာပေချစ်သူများအဖွဲ့ စာပေနှင့် ပရဟိတကွန်ရက် အထွေထွေတာဝန်ခံ ပီတိ(ပေကြီး)က အဖွဲ့၏ရေဘေးကယ်ဆယ်ရေးလုပ်ဆောင်မှုများနှင့် ကဗျာစာအုပ်ထုတ်ဝေရခြင်းအကြောင်းကို ရှင်းလင်းပြည့်စုံစွာဖော်ပြထားသည် ။ သည်စာအုပ်မှာ ကဗျာဆရာ ကဗျာရေးသူ (၁၀၂) ဦး၏ ကဗျာ (၁၀၂) ပုဒ်တိတိပါဝင်သည် ။ ကဗျာရေးသူများမှာ ထင်ရှားကျော်ကြားသော ကဗျာဆရာများသာမက လူငယ်ပွင့်သစ် ကဗျာရှင်များလည်းပါဝင်သည် ။ လူကြီး လူလတ် လူငယ် အရွယ်စုံ။ ပြည်ပရောက်ကဗျာဆရာများ(ခင်လွန်းနှင့်အောင်ဝေး)သာမက ပြည်တွင်းမှ ကဗျာဆရာများ။ နေရာစုံ ။ သည်အ ချက်ကိုထင်ရှားစေသည့် ကလောင်အမည်များမှာ မြင်းမူမောင်နိုင်မိုး မောင်စိန်ဝင်း (ပုတီးကုန်း) ဇော်မျိုးဟန် (ငါးသိုင်းချောင်း) မောင်နိုင်လင်း (ကောလင်း) ကလင့်(မန္တလေး) မောင်သစ်ဦး(မြစ်ခြေ) မောင်ခန့်မြေ(ထီလာ) ကိုထက်(ရေဦး)မောင်မှိုင်းလွင်(အင်းဝ) စသည်..စသည် ။ မြန်မာပြည်မှာသာတွေ့ရှိနိုင်သည့် ကလောင်အမည်ပေးဟန်ဖြစ်သည်။ ပိုမိုဆန်းသစ်သော ကလောင်အမည်များကိုလည်းတွေ့ရသေးသည်။ Sai Mg Mg Oo တဲ့ ။ Ko Aung တဲ့ ။ စာနယ်ဇင်းများသာမက ကလောင် အမည်များကိုပါ အင်္ဂလိပ်ဘာသာဖြင့်မှည့်ခေါ်လာပြီဖြစ်ကြောင်း သတိပြုမှတ်သားစရာဖြစ်သည်။

ကဗျာပုံသဏ္ဍန်များလည်းစုံလင်သည်ကိုတွေ့ရသည် ။ စကားပြေညှပ်ဒွေးချိုးငိုချင်းကြီးလို ဂန္ထဝင်ဟန် နဝခေတ်စမ်းဟန် နှင့် ခေတ်ပေါ်ဟန် ။အကြောင်းအရာနှင့်ခံစားမှုလည်းစုံလင်သည်။ ရေဘေးနှင့်တိုက်ရိုက်မသက်ဆိုင်သော ခေတ်ပြိုင်ခံစားမှု ။မတူညီသော အတွေး ရှုထောင့် အမြင် အဖွဲ့နှင့် ရေဘေးခံစားမှု ။ အဓိကအစု (၂) စုခွဲခြားနိုင်သည် ။

ရေဘေးကိုအကြောင်းပြု၍ထုတ်ဝေသောကဗျာစာအုပ်တွင် ရေဘေးနှင့်ပတ်သက်၍ မတူကွဲပြားခြားနားသော ချဉ်းကပ်ပုံနှင့်ဖွဲ့ဆိုကြသည်ကိုစိတ်ဝင်စားဖွယ်တွေ့ရှိရသည် ။ တနည်းအားဖြင့် ရေဘေးဟူသောအကြောင်းအရာထုကြီးထည်ကြီးကိုအမျိုးမျိုးသောကဗျာဆရာများက အစုံစုံသောဖွဲ့နွဲ့ပုံများဖြင့် ခံစားရေးဖွဲ့ကြသည်ကိုဖော်ထုတ်တင်ပြချင်ပါသည် ။

ရှေးဦးစွာ သည်လိုကပ်ဆိုးကြီးဘာကြောင့်ဖြစ်ပေါ်ရပါသလဲ ။ သည်ကပ်ဆိုးကြီးဖြစ်ပွားရခြင်း၏ အကြောင်းရင်းကဘာပါလဲ ။ ပြဿနာ၏ဇာစ်မြစ်ကိုကဗျာဆရာများက ဘယ်လိုထုတ်ဖော်လင်းပြကြပါသလဲ ။

ဥတုရာသီ
တစ်တောလုံးညို့မှ
တစ်မြို့လုံးမှာမိုးရွာခဲ့ ။

တစ်တောလုံးပြောင်
တစ်တောင်လုံးလင်းတဲ့နှစ်မှ
မြို့တွင်းမှာပင်လယ်ဖြစ်
ရေနစ်သတဲ့ ။              ။

မောင်စိန်ဝင်း( ပုတီးကုန်း )

အဖြေကရှင်းပါသည်။ ဥတုရာသီ တောကိုမှီပါသည်။ သဘာဝရေမြေတောတောင်တို့ပျက်စီးသော် ရာသီဥတုလည်းဖောက်ပြန် ကာ သဘာဝကပ်ဆိုးများလည်း ကျရောက်တော့သည် ။ သည်လိုဆိုလျင် သဘာဝရေမြေတော တောင် တနည်းဆိုရသော်သဘာဝသယံဇာတများကို မည်သူတွေကဖျက်ဆီးကြပါသလဲ ။

ခါးကိုပိုင်းပြတ် ကန့်လန့်ဖြတ်
ဓားရာနဲ့ရေအားလျှပ်စစ်လို့
ပြောနေကြရဲ့
မြစ်မင်းရဲ့မျှော်လင့်ရည်မှန်းချက်ကိုတားမြစ်
တားမြစ်ပိတ်ခဲ့တဲ့ကွန်ကရစ်
ကွန်ကရစ်ရေကာတာကြီးတွေ
ဒုက္ခိတဘဝရောက်ရသူမြစ်မင်းဟာ
ဝိသမလောဘသားတွေရဲ့
လက်ခုပ်ထဲကရေ . .

ဇော်ထိန်
"ခြေရာပျောက်မြစ်များ"
=======
ကျွန်သပေါက်တွေကြီးစိုးတဲ့...ဒီခေတ်
နည်းစနစ်အမှားတွေနဲ့
လူဖြစ်ရတာ...မဆန်းပါဘူး
ဒီဆည်ကိုဆောက်ရင်
ဒီမိုးသောက်ဖို့ လုံလောက်ပါ့မလား
ဒီဆည်ကျိုးရင်
ဒီမျိုးတွေရှင်သန်ပါ့မလား ။

တော်ဝင်နှင်းဆီ
( စာပေချစ်သူများအဖွဲ့ )
======
ငါတို့မုန်းတာ
မေတ္တာတရားမရှိတဲ့သူတွေ
ကြင်နာတရားမရှိတဲ့သူတွေ
စာနာတရားမရှိတဲ့သူတွေ ။

ငါတို့မုန်းတယ်..မုန်းတယ်..ငါတို့မုန်းတယ်
ငါတို့ဟာလူတွေဖြစ်တယ်
လူအမည်ခံပြီးလူမပီသတွေ
မုန်းတယ်...။

ဇွဲမာန်(အင်းဝ)
"သမ္ဗာန်တင်"
======
ဝါးမျှစ်ချိုချိုမှသည် ကျွန်းသစ်စိမ်းညိုညို
လိုလိုပိုပို
အမြစ်လှန်မြေကြွင်းမကျန်ရောင်း
ဟောင်းလောင်းဖြစ်ရမြန်မာ့ဂေဟစနစ်...

မင်းတာရာ
(စာပေချစ်သူများအဖွဲ့ )


"ဒီမိုးဒီရေ ဒီလူတွေနဲ့"

တိုင်းပြည်သယံဇာတများကိုလွဲမှားသောစီမံခန့်ခွဲမှုဖြင့် ဆင်ခြင်တုံတရားကင်းမဲ့စွာ ထုတ်ယူသုံးစွဲရောင်းစားလေသောလူတစုကြောင့် များရာစုပြည်သူလူထုမှာရေဘေးအန္တရာယ်ဆိုးကြီးကိုကြံဆုံလိုက်ရပေသည်။ သည်အချက်ကို ကဗျာဆရာများက ကြည်လင်ပြတ်သားစွာ မီးမောင်းထိုးပြနိုင်ကြသည် ။

မလွမ်းပါနဲ့ကွယ်

မင်းစောင့်ခဲ့တဲ့သခင့်အိမ်လေး
မင်းဆော့ခဲ့တဲ့လယ်ကွင်းလေး
မင်းနေခဲ့တဲ့ဒီရွာလေး
မင်းချစ်ခဲ့တဲ့ မင်းFriလေး
လွမ်းလို့နေလား
ဟိုးအဝေးငေးမျှော်ကြည့်နေ
မင်းပုံလေးက
မြင်သူ့ရင်မှာကိုယ်ချင်းစာနာနေရတယ် ။

ရေကျရင်ဖြင့်
သေချာအိမ်ပြန်ရပေါ့
မလွမ်းနဲ့တော့ ကလေးရယ် ။         ။

ကြည်သိမ့်
(စာပေချစ်သူများအဖွဲ့)

သည်ကဗျာတိုတိုလေးကရေဘေးဒဏ်သင့်ဒုက္ခအဖုံဖုံတို့၏မြင်ကွင်းကျယ်ကြီးကိုအနှစ်ချုပ်ပေးလိုက်သလိုရှိသည် ။ သက်ရှိသက်မဲ့များစွာ၏ပျက်စီးဆုံးရှုံးရမှုများကို မြင်ကွင်းလေးတစ်ခု အထီးကျန်အိမ်မွေးတိရ စ္ဆာန်လေးတစ်ကောင်နှင့်သင်္ကေတပြုထားသည် ။ စာနာမှု မေတ္တာတရား မျှော်လင့်ချက် အနာဂတ် စသည်တို့ကိုလည်း ကဗျာ၏ဒုတိယပိုဒ်မှာ စကားကြီးစကားကျယ်တွေမသုံးပဲရိုးရိုးလေးပြောသွားသည် ။ ပထမပိုဒ်က အပြ ။ ဒုတိယပိုဒ်က အပြော ။ လှလှပပပေါင်းစပ်ရေးဖွဲ့ထားသည့် ကဗျာကောင်းလေးတစ်ပုဒ်ပင်။ တစ်ခုပဲပြောစရာရှိသည် ။ ဆွမ်းဆန်ထဲကြွက်ချေးတွေ့ဆိုသလို"Fri"ဆိုသော သိုးဆောင်း စကားက ငါးရိုးမျက်သလိုခံစားရစေသည် ။

ရေဘေးအန္တရာယ်ကြီးခံစားရသည့်ပြည်သူများကို ကယ်ဆယ်ကူညီ စာနာအားပေးသူအများစုမှာလည်း ပြည်သူများပင်ဖြစ် သည် ။ ပြည်သူကသာပြည်သူချင်းစာနာကူညီ ။ ဒုက္ခသေးသူက ဒုက္ခကြီးသူကို နှစ်သိမ့်အားပေး ။ အရွယ်စုံ အလွာစုံ အဖွဲ့စုံ လူမျိုးစုံ ပြည်သူများ ။

ပြည်သူ
တစ်ယောက်ရဲ့မျက်ရည်ကို
တစ်ယောက်ကရင်ဘတ်နဲ့ခံတယ် ။

တစ်ဦးရဲ့ဒုက္ခကို
တစ်ဦးကပုခုံးနဲ့ထမ်းတယ် ။

တစ်ယောက်ရဲ့သောကကို
တစ်ယောက်ကမေတ္တာနဲ့အုပ်တယ် ။

တစ်ဦးနဲ့တစ်ယောက်
အပြန်အလှန်နားလည်မှုနဲ့
ကျွန်တော့်ခေါင်းစဉ်လေး
ချစ်စရာပိုကောင်းခဲ့ပါတယ် ။           ။

မောင်ခန့်မြေ (ထီလာ)

ရေဘေးအန္တရာယ်ကယ်ဆယ်ရေးမှသည် ခေတ်ပြိုင်နိုင်ငံရေးခံစားမှုဆီဖြန့်ထွက်ခံစားရေးဖွဲ့မှုကို ခင်လွန်း၏"ဆယ်ယူခြင်းအနာဂတ်"တွင်တွေ့ရှိရသည် ။
                        

အကယ်၍များ
နွံတွေနုန်းတွေအောက်
နှစ်များစွာကနစ်သွားခဲ့တဲ့
ငတို့ရဲ့ဇန်နဝါရီပင်ပျိုကလေး
တဖန်ဆယ်ယူလို့များရခဲ့ရင်
ရေဘေးကယ်သလို ပြည့်အရေးလည်းကယ်ဖို့
( ၂၀၁၆ အမီ )
မြန်မာပြည်ကို
ကမ္ဘာတည်အောင် ပြန်လည်စိုက်ပျိုးကြဦးစို့။             ။

ရေဘေးကပ်ဆိုးကြီးထဲမှ သမိုင်းဒဿန လောကအမြင်တစ်ရပ် ထိုးထွင်းဖော်ထုတ်ပြထားသည်ကို ရန်လင်းေ အာင်၏"တံတွေး နစ်ရင် ဘာဝယ်ရောင်းမှ မကယ်နိုင်ဘူး" တွင် တွေးဆဆင်ခြင်ဖွယ်ဖတ်ရှုရသည် ။
                  

လူတောထဲနေပြီး
ဟိုလူက ထွီခနဲ
ဒီလူက ထွမ်ခနဲ
သူများတံတွေးခွက်ထဲများ
မြူးလို့ကောင်း ကူးလို့ကောင်း
မထူးဇာတ်နဲ့မှုန်နံ့သာခြယ်
လူမဆန်လေတဲ့ကောင်
ကူးရာကပက်လက်မျော
မျောရာကကျွမ်းထိုးမှောက်ခုံနစ်လို့ကတော့
မရှူနိုင် မကယ်နိုင် ပျာတာပဲ
ဘယ်သူဘာရောင်းလို့ ဘယ်သူဝယ်
သဒ္ဓါမပေါက် အာပေါက်သေမယ်
တံတွေးနစ်ရင်
ဘာဝယ်ရောင်းမှ မကူနိုင်ဘူး ။          ။

အဆိုးထဲမှအကောင်း အရှုံးထဲကအမြတ်ဟု ဆိုစရာတစ်ခုတော့ရှိသည် ။

သည်လိုရေဘေးကပ်ဆိုးကြီးပေါ်ပေါက်သောအခါ ပြည်သူ့ဒုက္ခကိုစာနာခံစားနိုင်သူမှာပြည်သူဖြစ်သည် ပြည်သူသာလျင်ပြည်သူ၏ကယ်တင်ရှင်ဟူသောသဘောတရားသည်ကြည်လင်ထင်ရှားလာလေသည် ။ ပြည်သူတို့၏ပရဟိတနှလုံးသားများက တုနှိုင်းမမီအနုပညာများအဖြစ် ရှင်သန်အားကောင်းလာသည် ။ စာနာမှုကိုဘာသာပြန်ဆိုချက်သဖွယ်ဖြစ်သော"ရှိုက်သံ"ကဗျာစာအုပ်သည်ပင်လျင် ကပ်ဆိုးထဲကအနုပညာဖြစ်သွားပြီမဟုတ်ပါလား ။ ကျွန်တော်၏ သည်အရေးအသားများကို ခက်ဦး ၏ "ကပ်ဆိုးထဲကအနုပညာ" မှ နောက်ဆံုးကဗျာစာသားများဖြင့် ဂုဏ်ယူစွာအဆုံးသတ်လိုက်ချင်ပါသည် ။
                                       

ပရဟိတနှလုံးသားများ
ရနံ့သစ် အသွင်သစ်နဲ့ သမိုင်းဆိုးထဲကခုန်နေပုံက
ဘယ်လို မှော်အောင်ထားတဲ့အနုပညာသမားမှ
တုပစပ်ဆို ခြယ်မှုန်းမဖျော်ဖြေတတ်တော့အောင်
မွှေးမွှေးမြမြ ပေါ့ပါးလှပနေတော့ရဲ့ ။             ။

ချစ်သောပြည်သူများ ချစ်သောကဗျာဆရာများရှိုက်သံများမှ ကင်းလွတ်ပါစေသတည်း။         ။

အောင်ခက်မင်း