 |
| From Senior General Min Aung Hlaing's facebook |
တူမောင်ညို - သေနတ် = ဥပဒေ = သေနတ် = ဥပဒေ
နိုဝင်ဘာ ၂၀၊ ၂၀၁၅
အဓိကပြဿနာက “၂၀၀၈ အခြေခံဥပဒေ” ဖြစ်ပါတယ်။ ဒါ့အပြင် အခြားသော“တည်ဆဲဥပဒေ” ဆိုတာတွေကိုလည်း ထည့် သွင်းစဉ်းစားရမှာပါ။ ဒါတွေက “စည်းကမ်းပြည့်ဝသော ဒီမိုကရေစီစည်းဝိုင်း” ထဲမှာ ရပ်တည်လှုပ်ရှားနေရတဲ့ ဘယ်နိုင်ငံရေးပါတီမဆို “လေးစားလိုက်နာ/ထိန်းသိမ်းကာကွယ်” ရမယ့်ကိစ္စတွေ ဖြစ်ပါတယ်။ ဒီလို “လေးစားလိုက်နာ - ထိန်းသိမ်းကာကွယ်”ပါ့မယ်လို့ နိုင်ငံရေး ပါတီအဖြစ်မှတ်ပုံတင်ရာမှာရော လွှတ်တော်ထဲဝင်တဲ့အခါမှာပါ ဝန်ခံချက်လက်မှတ်ထိုးရတာ - ကျမ်းကျိန်ရတာတွေကို ပြဋ္ဌာန်းထားတဲ့ ဥပဒေလုပ်ထုံးနဲ့အညီလုပ်ခဲ့ကြရတာမဟုတ်လား။
တကယ်တော့ “၂၀၀၈ အခြေခံဥပဒေ”ရဲ့ အနှစ်သာရဟာ စစ်အာဏာရှင်စနစ်ကို ဒီမိုကရေစီအရေခြုံပေးပြီး စစ်အုပ်စု အာဏာ ချုပ်ကိုင်ထားမှုကို ရေရှည်ထိန်းသိမ်းကာကွယ်ပြီး၊ တိုးချဲ့စေနိုင်ဖို့သာဖြစ်ပါတယ်။
အခု (NLD) ပါတီက ၂၀၁၅ ရွေးကောက်ပွဲမှာ ကြံ့ဖွံ့ပါတီအပေါ် အပြတ်အသတ်အနိုင်ရခဲ့ပြီ။ ဒါ့ကြောင့် ၂၀၁၀ ရွေးကောက်ပွဲ ပြီးနောက် ပေါ်လာခဲ့ဖူးတဲ့ အစီအစဉ်အတိုင်းသာဆိုရင် (NLD)ပါတီက ဦးဆောင်မယ့် လွှတ်တော်နဲ့အစိုးရသစ်ဟာ ၂၀၁၆ ခုနှစ် မတ်လ ကုန် ဧပြီလဆန်းပိုင်းမှာ ပေါ်ပေါက်လာဖွယ်ရာရှိနေပါတယ်။
ပေါ်ပေါက်လာတဲ့ လွှတ်တော်နဲ့အစိုးရဟာ “၂၀၀၈ အခြေခံဥပဒေ/အခြားတည်ဆဲဥပဒေ” ဆိုတာတွေနဲ့အညီ တိုင်းပြည်ကို စီမံ အုပ်ချုပ်သွားရတော့မှာပါ။ ဒီတော့လွှတ်တော်သစ်နဲ့အစိုးရသစ်အဖို့ လွှတ်တော်တွင်း/လွှတ်တော်ပ၊ အစိုးရအတွင်း/အစိုးရပြင်ပ စိန်ခေါ် မှုတွေ၊ အကဲစမ်းမှုတွေ၊ ပွတ်တိုက်မှုတွေကိုအချွန်နဲ့မခြင်း၊ အဆင်းဘီးတပ်ခြင်းစတဲ့ နည်းမျိုးစုံနဲ့ကြုံရဆုံရ ရင်ဆိုင်တွေ့ကြရတော့မှာဖြစ်ပါ တယ်။
စစ်အုပ်စုရဲ့ အတိတ်၊ ပစ္စုပ္ပန်၊ အနာဂတ်အကျိုးစီးပွားအတွက် ဒေါင့်စေ့ကွက်စေ့ စိတ်ကြိုက်ရေးဆွဲထားတဲ့ ၂၀၀၈ အခြေခံ ဥပဒေ/ ရာစုနှစ်ဝက်ကျော်ကြာ အခြေတည်ထားခဲ့တဲ့ စစ်ဗျူရိုကရေစီအုပ်ချုပ်ရေးယန္တယားကြီးကို မပြောင်းမလဲ/မပြင်ဆင်နိုင်ဘဲ (NLD) ပါတီကဦးဆောင်တဲ့ လွှတ်တော်နဲ့အစိုးရသစ်က ဝင်ရောက်ကိုင်တွယ်ထိန်းချုပ်ပြီး လိုရာခရီးကိုရောက်အောင် မောင်းနှင်နိုင်ဖို့ ဆိုတာ တော်တော် မလွယ်ကူတဲ့ ကိစ္စကြီးဖြစ်ပါတယ်။
အာဏာရှင်စနစ်ကနေ တာဝန်ခံမှုစနစ်ကိုပြောင်းဖို့ဆိုတာ အုပ်စိုးသူတွေရဲ့ အတွေးအခေါ်နဲ့အမူအကျင့်အပိုင်းကို သာမက အုပ်ချုပ်မှုယန္တယားနဲ့ အဆောက်အုံပိုင်းကိုပါ လုံးလုံးလျားလျားလှည့်ပြောင်းပစ်ရမယ့် အင်မတန်တာဝန်ကြီးလှတဲ့ လုပ်ငန်းစဉ်ကြီးဖြစ်ပါ တယ်။ ဒါဟာ အမှန်တကယ်ပြောင်းလဲရေးရဲ့ အဓိကပစ်မှတ်လည်းဖြစ်ပါတယ်။
ဒါကြောင့် “ဒေါင့်စေ့ကွက်စေ့ စိတ်ကြိုက်ရေးဆွဲထားတဲ့ ၂၀၀၈ အခြေခံဥပဒေ/ရာစုနှစ်ဝက်ကျော်ကြာ အခြေကျနေတဲ့ စစ်ဗျူရိုကရေစီအုပ်ချုပ်ရေးယန္တယားကြီး” ဆိုတဲ့ “ဘောင်” ထဲကနေ အာဏာရှင်စနစ်အုပ်စိုးမှုကို ဒီမိုကရေစီတာဝန်ခံမှုစနစ်ဖြစ်လာ အောင် အမှန်တကယ်ပြောင်းလဲပစ်နိုင်ဖို့ (NLD) ပါတီ စွမ်းနိုင်ပါ့မလားဆိုပြီး အလေးအနက် စိုးရိမ်မိပါတယ်။
နိုဝင်ဘာလ ၁၆ ရက်နေ့က သံတောင်ကြီးတပ်နယ်မှာ ကာချုပ်ပြောသွားစကားတွေကတော့ ပေါ်ပေါက်လာမယ့် လွှတ်တော်နဲ့ အစိုးရသစ်အတွက် ဝင်ဝင်ခြင်း ဆောက်နဲ့ထွင်းနေတဲ့ စိန်ခေါ်မှုတွေပဲလို့ ပြောရမယ်ထင်ပါတယ်။
ကာချုပ်က (NLD) ပါတီဥက္ကဋ္ဌရဲ့ တွေ့ဆုံ ဆွေးနွေးရေး ကမ်းလှမ်းမှုကို တိတိကျကျအကြောင်းမပြန်ပေမယ့်၊ “သမ္မတအထက် မှာ ကျမ ရှိမယ်” ဆိုတဲ့ စကားကိုတော့ ခပ်ဆတ်ဆတ်ကလေး အခုလို တုန့်ပြန်ထားပါတယ်။
“ဥပဒေမှာ နိုင်ငံသားအားလုံးအတွက် ပြဋ္ဌာန်းချက်ဖြစ်ကြောင်း၊ ဥပဒေကိုလေးစားလိုက်နာရမည်ဖြစ်ကြောင်း၊ ဥပဒေအထက် တွင်မည်သူမျှမရှိကြောင်း၊ ဥပဒေချိုးဖောက်မှု၊ မသိကျိုးကျွန်ပြုမှု၊ လက်တစ်လုံးခြားပြုမှုများသည် ဥပဒေအရ ညှိစွန်းပါက အရေးယူရမည် ဖြစ်ကြောင်း၊ ဖွဲ့စည်းပုံအခြေခံဥပဒေ ပုဒ်မ ၂၀ တွင် တပ်မတော်မှ အခြေခံဥပဒေကို ကာကွယ်စောင့်ရှောက်ရန်ရှိသဖြင့် အခြေခံဥပဒေ ကို ထိပါးလာမည့် ကိစ္စရပ်များနှင့် ဒို့တာဝန်အရေးသုံးပါးကို စောင့်ရှောက်ရမည်ဖြစ်ကြောင်း ” စသဖြင့် ပြောသွားပါတယ်။
ကာချုပ်သုံးထားတဲ့ စကားလုံးတွေကို ကြည့်ရင် ဒေါ်အောင်ဆန်းစုကြည်အပေါ်ထားတဲ့ အညှိုးအတေးအာဃာတတွေကို အထင်းသားအကွင်းသားမြင်တွေ့ရမှာဖြစ်ပါတယ်။ ကာချုပ်လိုသဘောထားမျိုးတွေကို သမ္မတဦးသိန်းစိန်ကလည်း သူ့ရဲ့ပါးစပ်ပေါက်တွေ ဖြစ်တဲ့ ပြန်ကြားရေးဝန်ကြီး ဦးရဲထွဋ်၊ ဗိုလ်ဇော်ဌေးတို့ကနေတဆင့် ထုတ်ဖော်ပြောခဲ့ပြီးဖြစ်သလို၊ ကြံ့ဖွံ့ပါတီပူးတွဲဥက္ကဋ္ဌ ဗိုလ်ဌေးဦး က လည်း ထိုနည်းလည်းကောင်းပြောဆိုခဲ့ပါတယ်။ ဒါတွေဟာ တိုက်ဆိုင်မှုသက်သက်မဟုတ်ပါ။ စစ်အုပ်စုရဲ့ အခြေခံရပ်တည်ချက်ကနေ ပေါ်ထွက်လာတဲ့ အရင်းခံသဘောထားတွေပဲဖြစ်ပါတယ်။
သမိုင်းကိုပြန်ကြည့်ရင် အခြေခံဥပဒေတွေကိုသေနတ်နဲ့ဖျက်သိမ်းပစ်ခဲ့တာ၊သေနတ်နဲ့ထောက်ပြီး စိတ်ကြိုက်ရေးဆွဲအတည်ပြု ခဲ့တာလည်း ဒီစစ်အုပ်စုပါပဲ။ အခြေခံဥပဒေမရှိဘဲ အုပ်စိုးခဲ့တာလည်း ဒီစစ်အုပ်စုပါပဲ။ စစ်အုပ်စုက အခြေခံဥပဒေစိတ်ကြိုက်ရေးဆွဲ အတည်ပြုထားပြီးတဲ့အခါမှ “ဥပဒေအထက်မှာ ဘယ်သူမှမရှိဘူး”လို့ ပြောနေတာဟာ တကယ်တော့ ရွံစရာကောင်းတဲ့၊ အရှက်ကင်း မဲ့လွန်းတဲ့ ပြောဆိုမှုသာဖြစ်ပါတယ်။ ဒို့စိတ်ကြိုက်ရေးပြီး အတည်ပြုထားတဲ့ အခြေခံဥပဒေကို မထိနဲ့ မီးပွင့်သွားမယ်လို့ ခြိမ်းချောက်တာ ဖြစ်ပါတယ်။
ဘယ်လောက်ထိဗြောင်ကျသလဲဆိုတော့ “တပ်မတော်အနေဖြင့် တပ်မတော်သာအမိ၊ တပ်မတော်သာအဖ ဖြစ်ပြီး၊ နိုင်ငံတော် အနေဖြင့် ပြည်သူသာအမိ ပြည်သူသာအဖ ဆိုသည့်အရိပ်အာဝါသအောက်တွင်စည်းစည်းလုံးလုံးနေထိုင်သွားရမည်” ဆိုတဲ့ ကာချုပ် ရဲ့သဘောထားနဲ့ ပြောစကားပဲဖြစ်ပါတယ်။ ဒို့အရိပ်နဲ့ ဒို့ပဲ။ အရိပ်ချင်း မတူဘူးလို့ ပြောတာပါ။
အရင်းစစ်လိုက်ရင် “ ပြည်သူသာအမိ ပြည်သူသာအဖ” ဆိုတာကို စစ်တပ်က လက်မခံဘူး လို့ပြောတာဖြစ်ပြီး၊ သူတို့အတွက် “စစ်တပ်နဲ့သေနတ်” သာလျှင် အတုမရှိ၊ တစ်ခုတည်းသော ကိုးကွယ်ရာ၊ဆည်းကပ်ရာ၊ ခိုလှုံရာ၊ အားထားစရာအရိပ်အာဝါသ ဖြစ်တယ် လို့ဗြောင် ထုတ်ပြောလိုက်တာပါ။
ဒါကြောင့် သူတို့ စစ်အုပ်စုအဖို့ “ဥပဒေနဲ့သေနတ်” ဆိုတာ အဓိပ္ပွါယ်နဲ့အနှစ်သာရအရ ဘာမှ ကွဲပြားခြားမှုမရှိဘဲ အခြေအနေ နဲ့အချိန်ကာလအပေါ်မူတည်ပြီး လိုအပ်သလို လဲလှယ်သုံးစွဲနိုင်တဲ့ အဓိပ္ပါယ်တူ၊ အနက်တူ၊ အနှစ်သာရတူတဲ့ ဝေါဟာရစကားလုံးပဲဖြစ်ပါ တယ်။
တနည်းအားဖြင့် “စစ်တပ်နဲ့သေနတ်”ကို ချုပ်ကိုင်ထားသူများက “ ဒီမိုကရေစီအစိုးရနဲ့နိုင်ငံရေးပါတီများ” ကို ပုံစံမျိုးစုံနဲ့ သွန်လို သွန်၊ မှောက်လိုမှောက် လွမ်းမိုးခြယ်လှယ်နေသမျှကာလပတ်လုံး စစ်အာဏာရှင်စနစ်သာ ဖြစ်မြဲဖြစ်နေမှာဖြစ်ပြီး။ “ဒီမိုကရေစီအစိုးရနဲ့ နိုင်ငံရေးပါတီများ”က စစ်တပ်နဲ့သေနတ်ကို ညွန်ကြားနိုင်၊ အမိန့်ပေးနိုင်တဲ့ အခြေအနေရောက်အောင်ပြောင်းလဲပစ်နိုင်မှသာလျှင် အမှန် တကယ်ပြောင်းလဲသွားပြီလို့ ပြောဆို သတ်မှတ်နိုင်ပါလိမ့်မယ်။
“၂၀၀၈ အခြေခံဥပဒေ” ဆိုတာ စစ်တပ်နဲ့သေနတ်ကို ချုပ်ကိုင်ထားတဲ့ စစ်အုပ်စုက “ဒီမိုကရေစီအစိုးရနဲ့ နိုင်ငံရေးပါတီများ”ကို စိတ်ကြိုက်လွှမ်းမိုးချုပ်ကိုင်ထားနိုင်ဖို့အတွက် ဒေါင့်စေကွက်စေ့ ရေးသားထားတဲ့ “ဥပဒေ” သို့မဟုတ် “သေနတ်ရဲ့ ကိုယ်စား/ကိုယ်ပွား” သာလျှင်ဖြစ်ပါတယ်။ဒါကြောင့် ဒီအခြေခံဥပဒေကို ဖျက်သိမ်းပစ်နိုင်မှသာ အပြောင်းအလဲကို တကယ်တန်းဖော်ဆောင်နိုင်မှာဖြစ်ပါတယ်။
ညွန်း
- ကြေးမုံသတင်းစာ(၁၇-၁၁-၂၀၁၅) စာမျက်နှာ ၉