ဇင်လင်း - ဒီမိုကရေစီဆိုတာ ပြည်သူတွေရဲ့ အုပ်ချုပ်ရေး စနစ်ပါပဲ
(မိုးမခ) ဧပြီ ၂၆၊ ၂၀၁၆
မြန်မာနိုင်ငံ ပြည်သူလူထုသည် နှစ်ပေါင်း ငါးဆယ်ကျော်ကြာ စစ်အာဏာရှင် စနစ်ဆိုးအောက်၌ မဲမှောင်မွန်းကျပ်စွာ နေ ထိုင်ခဲ့ကြရသည်။ စစ်အာဏာရှင်စနစ်၏ လူမဆန်သည့် အမိန့်အာဏာများအောက်တွင် လူသားဂုဏ်သိက္ခာကို ဖိနှိပ် ချိုး နှိမ်ခံခဲ့ကြရသည်။ မြန်မာပြည်သူလူထုသည် စစ်အာဏာရှင်စနစ်ဆိုးအား ကြိမ်ဖန်များစွာ တွန်းလှန်ဖယ်ရှားရန် အားထုတ်ခဲ့ ကြဖူးသည်။ သို့သော်လည်း လူစိတ်ကင်းမဲ့သည့် စစ်ခေါင်းဆောင်များ၏ သေနတ်အားကိုး ဖိနှပ်ချေမှုန်းမှုများ ကြောင့် နိုင်ငံသူနိုင်ငံသား အများအပြား အသက်ဆုံးရှုံးခဲ့ကြရသည်။ နှစ်ရှည် ထောင်သွင်းအကျဉ်းချခံခဲ့ကြရသည်။ ထောင်တွင်း နှိပ်စက်ညှဉ်းပမ်းမှုများကြောင့်လည်း နိုင်ငံရေး အကျဉ်းသားအများအပြား အကျဉ်းထောင်များအတွင်းမှာပင် ကွယ်လွန်ကျဆုံး ခဲ့ကြရသည်။ အကယ်စင်စစ် ထိုထိုသော ကျဆုံးခဲ့ကြရသည့် နိုင်ငံရေးအကျဉ်းသားအပေါင်းသည် မည်သည့် ရာဇ၀တ်မှုမျိုး ကိုမျှ ကျူးလွန်ခဲ့ကြသူများမဟုတ်။ နိုင်ငံချစ်စိတ်ဖြင့် မိမိတို့နိုင်ငံကို ကမ္ဘာ့အလယ်တွင် တင့်တင့်တယ်တယ် ဂုဏ်သိက္ခာရှိရှိ တိုးတက်ဖွံ့ဖြိုးအောင် ကြံဆောင်လိုသူများသာဖြစ်သည်။
ထိုထိုသော နိုင်ငံရေး အကျဉ်းသားအများအပြား၏ နိုင်ငံဖွံ့ဖြိုးတိုးတက်စေလိုသော စေတနာအရင်းခံဖြင့် ၁၉၆၂ ခုနှစ်မှ ယနေ့ယခုတိုင် အသက်များ ဘ၀များ ပေးဆပ်စွန့်လွှတ်ခဲ့ကြခြင်း၏ ရလဒ်အဖြစ် ယခုအခါ အမှောင်မှ စတင်လွတ်မြောက် ရန် လမ်းစပေါ်လာပြီဖြစ်သည်။ “ငါ၏ ဦးခေါင်းကား သွေးဖြင့် ချင်းချင်းနီ၏။ သို့သော် ငါကား ဦးမညွှတ်။”…ဆိုသည့် အတိုင်း ထိုထိုသော စစ်အာဏာရှင်စနစ် အုတ်နံရံကို ဦးခေါင်းဖြင့် အဆက်မပြတ် တိုက်ခဲ့ကြသော နိုင်ငံရေး တက်ကြွလှုပ်ရှားသူ ရဟန်းရှင်လူ ကျောင်းသားပြည်သူ ထောင်ပေါင်းများစွာ၏ အာဇာနည်စိတ်ထားကြောင့် ယခုအခါ စစ်အာဏာရှင်စနစ် စတင် ပြိုပျက်သည်ကို တွေ့မြင်ကြရခြင်းဖြစ်သည်။ ပြည်သူလူထု မှန်းမျှော်သည့် နိုင်ငံရေးအရုဏ်ဦး မင်္ဂလာစာမျက်နှာအသစ်ကို စတင်ဖွင့်လှစ်နိုင်ခဲ့ခြင်းလည်းဖြစ်သည်။
၁၃၇၈ ခုနှစ် တန်ခူးလဆန်း ၁၁ ရက် အင်္ဂါနေ့(18 April 2016, Monday) ကို နှစ်ပေါင်း ၅၀ ကျော်အတွင်း မြန်မာနိုင်ငံ၏ံ မင်္ဂလာကျက်သရေအပေါင်းနှင့် ပြည့်စုံမှု အရှိဆုံးနေ့ဟု သတ်မှတ်လျှင် ရနိုင်ပါသည်။ အဘယ်ကြောင့်ဆိုသော် ထို မင်္ဂလာ နေ့ရက်၌ မင်္ဂလာအပေါင်းနှင့် ပြည့်စုံသော ဒေါ်အောင်ဆန်းစုကြည်၏ နှစ်သစ်ကူး မိန့်ခွန်းကို နိုင်ငံပိုင် ရုပ်သံမီဒီယာများနှင့်တကွ အခြားသော သတင်းမီဒီယာအသီးသီးတွင် ကန့်သတ်နှောက်ယှက်မှု တစ်စုံတစ်ရာမရှိဘဲ ကြားနာနိုင်ခဲ့ကြ၍ ဖြစ်သည်။ ထို နိမိတ်ပုံအရ မြန်မာနိုင်ငံသည် ၎င်းမျှော်မှန်းထားခဲ့သော နိုင်ငံရေးခေတ်သစ်တစ်ခုဆီသို့အောင်မြင်စွာ စတင်လှမ်းချီနေပြီဟု ဆိုနိုင်သဖြင့် ဖြစ်သည်။ နှစ်ပေါင်း ၅၀ ကျော် ခါးသည်း မဲမှောင် မွန်းကျပ်လှသော အခြေအနေဆိုးများအောက်တွင် လူ့သား ဂုဏ် သိက္ခာ ဖိနှိပ်ချိုးနှိမ်ခံခဲ့ကြရသည့် မြန်မာပြည်သူလူထုသည် နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ထိုနှစ်သစ်ကူး မိန့်ခွန်းကို ကြားကြရသောအခါ ပြောပြခြင်းငှာ မစွမ်းသာအောင် ၀မ်းသာပီတိဖြစ်ကြရသည်။ သူတို့တူးတူးခါးခါး မုန်းတီသော စစ်အာဏာရှင်စနစ်ဆိုးကြီး အောက်မှ မကြာခင် လုံးဝလွတ်မြောက်တော့မည်ဟု မျှော်မှန်းမိကြ၍ လည်းဖြစ်သည်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ယခုနှစ်အတွက် နှစ်သစ်ကူး မိန့်ခွန်းပြောကြားရာတွင် အမျိုးသား ဒီမိုကရေစီ အဖွဲ့ချုပ် အစိုးရသစ် အနေဖြင့် နှစ်သစ်ကူးချိန်ကာလ၌ စတင်တာဝန်ယူခဲ့ရသောကြောင့် အတိတ်နိမိတ် ကောင်း ဖြစ်သည်ဟု ယူဆကြောင်း၊ အမျိုးသားဒီမိုကရေစီအဖွဲ့ချုပ် အစိုးရဆိုသည့် အသုံးအနှုန်းကြောင့် ပါတီက အုပ်ချုပ်ပိုင်ခွင့် အာဏာကို ရယူထားသည့် သဘောအဓိပ္ပာယ် မဟုတ်ကြောင်း၊ အမျိုးသားဒီမိုကရေစီအဖွဲ့ချုပ်က လူထုကို တင်ပြထားခဲ့သည့် ပါတီ၏ မူဝါဒများအပေါ် အခြေခံကာ အုပ်ချုပ်မည့် စနစ်မျိုး ဖြစ်၍၊ တာဝန်ယူမှု တာဝန်ခံမှုရှိသည့် သဘောအဓိပ္ပာယ်ဖြစ်ကြောင်း ရှင်းပြထားသည်။ အမျိုးသားဒီမိုကရေစီ အဖွဲ့ချုပ်၏ အခြေခံမူများမှာ အမျိုးသား ရင်ကြား စေ့ရေး၊ ပြည်တွင်းငြိမ်းချမ်းရေး၊ တရားဥပဒေ စိုးမိုးရေး၊ ဖွဲ့စည်းပုံ အခြေခံဥပဒေ ပြုပြင် ပြောင်းလဲရေး၊ ဒီမိုကရေစီစနစ် ရှင်သန်အမြစ်တွယ်အောင် လုပ်ဆောင်ရေးများ ဖြစ်ကြောင်း ရွေးကောက်ပွဲ မတိုင်မီကပင် တင်ပြထားပြီး ဖြစ်သည်။ ဒေါ် အောင်ဆန်းစုကြည်၏ မိန့်ခွန်းတွင် အဖွဲ့ချုပ်က သတ်မှတ်ထားသော အခြေခံမူများနှင့်အညီ တာဝန်ယူမည်ဖြစ်ကြောင်း ပြောကြားထာသည်။
ဒေါ်အောင်ဆန်းစုကြည် အထူးပြုပြောကြားခဲ့သည့် အချက်မှာ National Reconciliation ဖြစ်သည်။ “အရေးအကြီးဆုံးကတော့ အမျိုးသားရင်ကြားစေ့ရေးပါပဲ။ နိုင်ငံတစ်နိုင်ငံဟာ တိုးတက်ဖို့ ချမ်းသာဖို့ဆိုလို့ရှိရင် ညီညွတ်မှုဟာ အင်မတန်မှ အရေးကြီးပါတယ်။ကျမတို့ဒါကြောင့်မို့ လို့ ဒီအစိုးရဟာ အမျိုးသားရင်ကြားစေ့ရေးကို ဦးတည်တဲ့အစိုးရလို့ ပြောတဲ့အခါမှာ ကျမတို့ပါတီကို ထောက်ခံမဲ ပေးခဲ့တဲ့ ပြည်သူလူထုအတွက်တင်မဟုတ်ဘူး၊ ကျမတို့ကို မဲမပေး မထောက်ခံခဲ့တဲ့ ပြည်သူတွေ အတွက်လည်း ဒီအစိုးရဟာ တာဝန်ယူမှာပါလို့ ကျမက ရှင်းရှင်းလင်းလင်း ပြောချင်ပါတယ်။” - ဟု ဒေါ်အောင်ဆန်းစုကြည်က ပြောခဲ့သည်။
ထို့ပြင် စစ်မှန်သော ဖက်ဒရယ် ဒီမိုကရေစီ ပြည်ထောင်စုတစ်ခု ထူထောင်ရေးအတွက် ဖွဲ့စည်းပုံ အခြေခံဥပဒေ ပြင်ဆင်ရေး လုပ်ဆောင်ရာတွင် ပြည်သူလူထုကို မထိခိုက်စေမည့် နည်းလမ်းကိုသုံးမည်ဟုလည်း ဒေါ်အောင်ဆန်းစုကြည် က နှစ်သစ်ကူးမိန့်ခွန်းတွင် တည်ကြည်ပွင့်လင်းစွာ ထည့်သွင်း ပြောကြားခဲ့သည်။ ဒေါ်အောင်ဆန်းစုကြည်က “ဖွဲ့စည်းပုံ အခြေခံဥပဒေ ပြင်ဆင်ဖို့ လုပ်တဲ့နေရာမှာ ကျမတို့ဟာ ပြည်သူလူထုကို မထိခိုက်တဲ့နည်းတွေပဲ ကျမတို့ သုံးမှာပါ။ ကျမတို့ နိုင်ငံရဲ့ အေးချမ်းမှုကို ထိခိုက်တဲ့နည်းတွေနဲ့ ကျမတို့ လုပ်ဆောင်သွားမှာ မဟုတ်ပါဘူး။ ဒါဟာ အမျိုးသားဒီမိုကရေစီ အဖွဲ့ချုပ် အမြဲပဲ ကိုင်စွဲခဲ့တဲ့မူပါ။ ပြည်သူ မနာစေရ ပါဘူး။ လုပ်စရာရှိရင် ကျွန်မတို့ ရှေ့ကနေ ခံစရာရှိရင်ခံပါမယ်။ အနောက်ကနေ ကာစရာ ရှိရင်ကာပါမယ်။ ပြည်သူလူထုကို မထိခိုက်တဲ့ နည်းတွေသာ သုံးစွဲပြီးတော့ ကျမတို့ရဲ့ နိုင်ငံကို မှန်ကန်တဲ့ လမ်းပေါ်ကိုပို့ဖို့ ဆိုတာဟာ ကျမတို့အခု အစိုးရ သစ်ရဲ့ အင်မတန်မှခိုင်မာတဲ့ အခြေခံမူ တခုဖြစ်ပါတယ်လို့ ပြောပါရစေ။” ဟု ရှင်းပြခဲ့သည်။
ဤ စကားရပ်ကို ထောက်ရှုခြင်းအားဖြင့် ဒေါ်အောင်ဆန်းစုကြည်နှင့် သမ္မတ ဦးထင်ကျော်တို့ဦးဆောင်မည့် အစိုးရသစ် သည် ယခင့် ယခင် စစ်တစ်ပိုင်း အစိုးရအဆက်ဆက်နှင့် မိုးနှင့်မြေပမာ ခြားနားသည်ကို တွေ့နိုင်သည်။ ယခင်အစိုးရ အဖွဲ့ဝင်များသည် ပဒေသရာဇ်ဆန်ဆန် နေထိုင်လုပ်ကိုင်ခဲ့ကြပြီး၊ တိုင်းပြည်၏ အဆီအနှစ် အကျိုးအမြတ်မှန်သမျှ သူတို့အာဏာပိုင် အလွှာကသာ လက်ဝါးကြီးအုပ် ရယူခံစားခဲ့ကြသည်။ တိုင်းပြည်အပေါ် မတင်သင့်ဘဲ တင်ရှိခဲ့သည့် ကြွေးမြီများနှင့် ဆိုးကျိုးမှန်သမျှကိုမူ ပြည်သူလူထုခေါင်းပေါ် တာဝန်မဲ့စွာ ပစ်တင်ခဲ့ကြသည်။ ထို့ကြောင့်လည်း ယခင် အစိုးရများ လက်ထက်က ၀န်ကြီး ၀န်ကလေးများ၊ အရာရှိကြီး အရာရှိငယ်များ၊ ၎င်းတို့နှင့် လက်သင့်ရာ လူများသည် ထားစရာ မရှိအောင် ကြီးပွားချမ်းသာခဲ့ကြသည်။ ပြည်သူပြည်သား အလုပ်သမား လယ်သမား ဆင်းရဲသားများမှာမူ ရေခြားမြေခြား နိုင်ငံများတွင် မျက်နှာအောက်ချ အညံ့ခံလျှက် ဆင်းရဲပင်ပမ်းကြီးစွာ လုပ်အားရောင်းစားခဲ့ကြရသည်။ နိုင်ငံသူ နိုင်ငံသားများ အလုပ်လက်မဲ့ ဖြစ်ကြရခြင်း၊ နေစရာမရှိ စားစရာမရှိ ဖြစ်ကြရခြင်းများသည် ထိုထိုသော အစိုးရမင်းများ၏ တာဝန်မဲ့မှုကြောင့် ဖြစ်ပါသည်။ အစိုးရမင်းများ ဘီလျံနာကြီးများသဖွယ် ဇိမ်ခံယစ်မူး နေချိန်တွင် ပြည်သူလူထုက ကြွေးတင်ကျွန်ဖြစ်သည့် ကိန်းဆိုက်ခဲ့ကြရသည်။ အရှက်မဲ့လှသော အစိုးရတာဝန်ယူခဲ့သူ လူကြီးမင်းများ ဟု ဆိုရန်မှတပါး အခြား ပြောစရာစကားပင် မရှိပါ။
ဒေါ်အောင်ဆန်းစုကြည်၏ စိတ်ရင်း စေတနာကမူ အလွန်ဖြူစင် ကောင်းမွန်သည်ဟု ဆိုရမည်။ သူ့ မိန့်ခွန်းတွင် - “ကျမတို့နိုင်ငံကို ကမ္ဘာ့အလယ်မှာ တင့်တယ်စေချင်တယ်ဆိုတာ ကျမက ရုပ်ပိုင်းဆိုင်ရာအရ ချမ်းသာမှုကိုတင် ပြောတာမဟုတ်ပါဘူး။ ကျမတို့ရဲ့နိုင်ငံသူနိုင်ငံသားများရဲ့ အရည်အချင်းကို ကမ္ဘာကနေပြီးတော့ လေးစားရအောင်လို့၊ ကမ္ဘာကနေပြီးတော တန်ဖိုးထားအောင်လို့၊ လုပ်ချင်တဲ့ စိတ်ဓါတ်အရ ပြောတာဖြစ်ပါတယ်။ ကျမတို့နိုင်ငံ ကမ္ဘာ့အလယ်မှာ တင့်တယ် တယ်ဆိုရင် ကျမတို့နိုင်ငံသူ နိုင်ငံသားတွေ ဘယ်နိုင်ငံသွားသွား မြန်မာနိုင်ငံကလာတဲ့ နိုင်ငံသူ နိုင်ငံသားတွေဟေ့ ဆိုပြီးတော့ ခေါင်းမော့ပြီးတော့ ဂုဏ်ယူနိုင်တဲ့အဆင့်ကို ဖြစ်စေချင်ပါတယ်။” ဟု ပြောကြား ထားသည့် သဘောထားကို ကြည့်လျှင် ယခင့် ယခင် လူကြီးမင်းများ၏ စေတနာခေါင်းပါးမှုကို တွေ့နိုင်သည်။ ယခင်က နိုင်ငံကူးလက်မှတ် စာအုပ်အနီ ကိုင်ဆောင်ပြီး နိုင်ငံ့အပြင်ထွက်ဖူးသူ မြန်မာနိုင်ငံသားတိုင်း တပါးနိုင်ငံများတွင် မည်မျှ အောက်ကျခဲ့ရသည်ကို သိကြပြီး ဖြစ်ပါလိမ့်မည်။ ထိုသို့ဂုဏ်ငယ်ခဲ့ရသည်မှာ တာဝန်ယူမှု တာဝန်ခံမှု မရှိခဲ့သော အစိုးရခေါင်းဆောင်ဆိုသူများကြောင့် မြန်မာနိုင်ငံသားတို့ဂုဏ်ငယ်ခဲ့ရခြင်း ဖြစ်သည်။ ယင်းအချက်ကို ခံစားသိရှိ နားလည် သော ဒေါ်အောင်ဆန်းစုကြည်က ပြည်သူလူထု ပါဝင်ပတ်သက်မှု အင်အားဖြင့် နိုင်ငံ့ဂုဏ်ကို ပြန်လည် မြှင့်တင်ပေးရန် သန္နိဋ္ဌာန်ချထားပုံရသည်။
၎င်းအပြင် ဒေါ်အောင်ဆန်းစုကြည်က တရားဥပဒေစိုးမိုးမှု မရှိပါက နိုင်ငံသူနိုင်ငံသားများ လုံခြုံအေးချမ်းစွာ နေနိုင်မည် မဟုတ်ကြောင်း ထောက်ပြထားသည်။ တရားဥပဒေသည် ပြည်သူကို ဖိနှပ် ချုပ်ချယ်ရန် မဟုတ်ကြောင်း၊ တရားဥပဒေ စိုးမိုးမှုဆိုသည်မှာ ပြည်သူများအား စိတ်ပိုင်းဆိုင်ရာ ရုပ်ပိုင်းဆိုင်ရာ အကာအကွယ်ပေးရန် ဖြစ်ကြောင်းလည်း ဖွင့်ဆိုပြ သည်။ ထို့ကြောင့် တရားရေးမဏ္ဍိုင် ထိရောက် တည့်မတ်ရန် အလွန်အရေးကြီးကြောင်း ဒေါ်အောင်ဆန်းစုကြည်က ဆိုသည်။ တရားဥပဒေ စိုးမိုးရေးသည် ပြည်တွင်း ငြိမ်းချမ်းရေးအတွက်လည်း အလွန် အရေးကြီးကြောင်း၊ တရားဥပဒေ စိုးမိုးရေး မရှိဘဲ ငြိမ်းချမ်းရေးကို ဆောက်တည်၍ မရနိုင်ကြောင်း၊ ငြိမ်းချမ်းရေးနှင့် ပတ်သက်ပြီး လက်ရှိ အစိုးရ အနေနဲ့ အရင်အစိုးရ၏ လုပ်ရပ်အားလုံးကို ပစ်ပယ်မှာ မဟုတ်ဘဲ အကောင်း လုပ်ဆောင်ချက်များကို အသိအမှတ် ပြုကြောင်း၊ ပြည်တွင်းငြိမ်းချမ်းရေးနှင့် အပစ်အခတ်ရပ်စဲရေး အောင်မြင်ပြီးမြောက်စေရန် ပါဝင်သင့်သည့် အဖွဲ့အစည်းအားလုံး ပါဝင်နိုင်အောင် ကြိုးစားမည်ဖြစ်ကြောင်း ဒေါ်အောင်ဆန်းစုကြည်က အလေးအနက်ပြောကြားခဲ့သည်။
ဒေါ်အောင်ဆန်းစုကြည်က “တရားဥပဒေ စိုးမိုးရေးအတွက် အင်မတန် အရေးကြီးတဲ့ မူတစ်ခုကတော့ မည်သူမဆို အပြစ်ရှိ တယ် ဆိုတာကို ခိုင်လုံတဲ့ သက်သေ သာဓက မရှိလို့ ရှိရင် အပြစ်မဲ့လို့ သတ်မှတ်ရပါလိမ့်မယ်။ ဒါဟာ တရားဥပဒေရဲ့ အခြေခံ လိုအပ်တဲ့ မူတစ်ခု ရှိပါတယ်။ အပြစ်ရှိတဲ့ လူများပင်လျှင် တရားဥပဒေအရ စီရင်တဲ့ အခါမှာ တရားဥပဒေ ထိရောက်မှုကို အကြင်နာ၊ ကရုဏာနဲ့ ပျော့ပျောင်းအောင် လုပ်ရမယ်ဆိုတဲ့ အဆိုလည်း ရှိပါတယ်။ ဒီလို အကြင်နာ ဂရုနာနဲ့ တရားဥပဒေရဲ့ ထိရောက်မှုကို ပျော့ပျောင်းအောင်လုပ်တဲ့ခြေလှမ်းတစ်ခု အနေနဲ့လည်း ကျမတို့သမ္မတကြီးကနေပြီးတောံ ဒီနှစ်သစ်ကူးအခါသမယမှာ လွတ်ငြိမ်းချမ်းသာခွင့်ကိစ္စတွေကို လက်မှတ်ထိုးပြီးတော့ သဘောတူခဲ့တာဖြစ်ပါတယ်။” စသဖြင့် ရှင်းပြခဲ့ပြီး နှစ်သစ်ကူး ကာလ၌ နိုင်ငံရေး အကျဉ်းသားများ လွတ်ငြိမ်းခွင့်ရရှိ အောင် ဆောင်ရွက်ပေးခဲ့သည်။
ဒေါ်အောင်ဆန်းစုကြည်သည် ပြည်သူလူထုကို တန်ဖိုးထားသည့် သဘောထားလည်းရှိကြောင်း ယခု မိန့်ခွန်းတွင် ပေါ်လွင်နေသည်။ “ကျွန်မတို့အခု နိုင်ငံတော်ဖွဲ့စည်းပုံ အခြေခံဥပဒေနဲ့ ပတ်သက်လို့ စဉ်းစားတဲ့အခါမှာ အရေးကြီးဆုံး အချက်တစ်ခုကဘာလဲဆိုတော့ ဖွဲ့စည်းပုံ အခြေခံဥပဒေရဲ့ အခြေခံမူ နံပါတ် (၄) မှာပါတဲ့အချက်ပါ။ အဲဒါ ကတော့ နိုင်ငံတော်ရဲ့အချုပ်အခြာအာဏာဟာ နိုင်ငံသားများဆီက ဆင်းသက်တယ်။ နိုင်ငံတစ်ဝန်းလုံးမှာတည်ရှိတယ်။ ဒါဟာ ဒီမိုကရေစီရဲ့အခြေခံမူပါပဲ။ ဒါကိုကျွန်မတို့လုံးဝလက်ခံတယ်။ ဒါကိုလည်း လုံးဝ ကျင့်သုံးသွားပါမယ်။ နိုင်ငံသူ နိုင်ငံသား တွေဟာ အဓိကပါပဲ။ နိုင်ငံသူနိုင်ငံသားများဟာ ပထမ၊ နိုင်ငံသူနိုင်ငံသားများဟာ ဒုတိယ၊ နိုင်ငံသူနိုင်ငံသားများဟာ အဆုံးအထိပဲ။ နိုင်ငံသူနိုင်ငံသားများအတွက် နိုင်ငံကဖြစ်ရမယ်။ နိုင်ငံဆိုတာဟာ နိုင်ငံသူ နိုင်ငံသားများ မရှိလို့ရှိရင် အဓိပ္ပာယ်မရှိပါဘူး။ နိုင်ငံသူနိုင်ငံသားများအတွက် အစိုးရဟာဖြစ်ရပါလိမ့်မယ်။ ဒီမူကို ကျွန်မတို့ဘယ်တော့မှ လက်လွှတ်မှာ မဟုတ်ပါဘူးဆိုတာ ကျွန်မတို့ရဲ့ပြည်သူလူထုကို ကတိပေးချင်ပါတယ်။” ဟု ဒေါ်အောင်ဆန်းစုကြည်က ကတိပြုထားသည်။
“ကျွန်မတို့ပြည်သူပြည်သားတွေကို မယုံကြည်လို့ရှိရင် ဒီမိုကရေစီကိုလည်း ယုံကြည်စရာ အကြောင်းမရှိ ပါဘူး။ ဘာဖြစ်လို့လဲဆိုတော့ ဒီမိုကရေစီဆိုတာ ပြည်သူတွေရဲ့ အုပ်ချုပ်ရေး စနစ်ပါပဲ။ ပြည်သူတွေကို တန်ဖိုးမထားရင်၊ ပြည်သူတွေကို မယုံကြည်လို့ရှိရင် ဒီမိုကရေစီကို ထူထောင်ဖို့ဆိုတာဟာ အိပ်မက်မက်စရာတောင်မှမဟုတ်ပါဘူး။” စသဖြင့် နှစ်သစ်ကူးမိန့်ခွန်းတွင် ဒေါ်အောင်ဆန်းစုကြည်က ရိုးရှင်းပွင့်လင်းစွာ ပြောကြားခဲ့သည်။
ဒေါ်အောင်ဆန်းစုကြည်၏ နှစ်သစ်ကူးမိန့်ခွန်းကို သုံးသပ်ကြည့်လျှင် ဖခင် ဗိုလ်ချုပ်အောင်ဆန်း၏ စံနမူကို အမြဲ လိုက်နာ ကျင့်သုံးကြောင်းတွေ့ရသည်။ ဖခင်ကဲ့သို့ သဘောထားကြီးမား ကျယ်ပြန့်ပုံကိုလည်း မြင်ရသည်။
မိန့်ခွန်းနိဂုံးမှာ ဒေါ်အောင်ဆန်းစုကြည်က “ကျွန်မတို့ဟာ နိုင်ငံကိုအကျိုးပြုနိုင်မယ့် ပုဂ္ဂိုလ်တွေ မည်သူ့ကိုမဆို လက်တွဲပြီး တော့ ကျွန်မတို့နဲ့ ပါဝင်ပြီးတော့ လုပ်စေချင်ပါတယ်။ ၁၉၄၇ ခုနှစ် ရွေးကောက်ပွဲများပေါ့နော်။ မြန်မာနိုင်ငံ လွတ်လပ်ရေး အတွက် ဦးတည်တဲ့ ရွေးကောက်ပွဲများ ကျင်းပပြီးတဲ့အခါတော့ ဖေဖေပြောခဲ့တဲ့ အင်မတန်မှ တိုတောင်းပြီးတော့ ရှင်းလင်း တဲ့ စကားလေးတစ်ခုရှိပါတယ်။ ဒီနိုင်ငံကို မေတ္တာ၊ သစ္စာနဲ့ အုပ်ချုပ်ပါ့မယ်။ အဲဒီတော့ နိုင်ငံကို မေတ္တာ၊ သစ္စာနဲ့ အုပ်ချုပ် ပါ့မယ်ဆိုတဲ့ အဓိပ္ပာယ်က နိုင်ငံသူ နိုင်ငံသားတွေ အပေါ် မေတ္တာထားပါမယ်။ နိုင်ငံအပေါ်မှာ သစ္စာစောင့်ပါမယ်။ ဒီဟာက အင်မတန်မှ တိုတိုတောင်းတောင်းနဲ့ ဘယ်အစိုးရမဆို၊ ပြည်သူလူထုကို လေးစားတဲ့ ဘယ်အစိုးရမဆို ပေးသင့်၊ တည်သင့် တဲ့ ကတိ ဖြစ်ပါတယ်။ ကျွန်မတို့လည်း ဒီအတိုင်းပဲ ဆက်ပြီးတော့ လုပ်သွားချင်ပါတယ်။ ပြည်သူပြည်သားတွေ အပေါ်မှာ မေတ္တာ ထားပါ့မယ်၊ နိုင်ငံအပေါ်မှာ သစ္စာစောင့်ပါ့မယ်။ အဲဒီဟာ နှစ်ခုပဲ လုပ်နိုင်ပြီဆိုလို့ရှိရင် ကျွန်မတို့နိုင်ငံဟာ အောင်မြင်ဖို့ သေချာပါတယ်။ ဒီတော့ ကျွန်မအနေနဲ့ နိဂုံးချုပ်စကားလေးပြောရမယ်ဆိုလို့ရှိရင် ကျွန်မတို့ အခုဒီအချိန်အခါ ကနေ စပြီးတော့ ကျွန်မတို့ရဲ့နိုင်ငံရဲ့ အနာဂတ် တစ်လျှောက် အောင်မြင်ဖို့အတွက် ကျွန်မတို့ပြည်သူပြည် သားအား လုံးဟာ မေတ္တာခြုံလို့ လုံနိုင်ပါစေ၊ သစ္စာဆောင်လို့ အောင်နိုင်ပါစေလို့ ကျွန်မအနေနဲ့ ဆုတောင်းမေတ္တာပို့လိုက်ပါတယ်။” ဟု နိဂုံးချုပ်ထားသည်။
မြန်မာ့သမိုင်းတွင် ရာစုနှစ်ထက်ဝက်ကျော် ပျောက်ဆုံးနေသည့် မေတ္တာတရားနှင့် သစ္စာတရားကို ပြန်လည်ဖေါ်ထုတ်လာ ခြင်းသည် အလွန်မင်္ဂလာရှိပါသည်။ နိုင်ငံရေးစနစ် ပြုပြင် ပြောင်းလဲရေးအတွက် အစိုးရသစ်၏ ရှေ့ ခရီးသည် ခက်ခဲပါလိမ့် မည်။ အမျိုးသားဒီမိုကရေစီအဖွဲ့ချုပ်သည် လူထုပါတီဖြစ်သဖြင့် လူထုက ဆက်လက် ၀န်းရံထောက်ခံကြဖို့ လိုပါသည်။ ခေတ်/စနစ် တစ်စုံလုံး ပြောင်းလဲပစ်နိုင်သည်အထိ၊ မတွန့်မဆုတ် ဆက်လက်ဝန်းရံကြဖို့လိုသည်။ အာဏာရှင် အဆက် ဆက် တာဝန်မဲ့စွာ ရှုပ်ခဲ့ ဖွခဲ့သည့် ပြဿနာပေါင်းအသင်္ချေ အနန္တကို ရှင်းရန် ကိစ္စသည် အလွန်ကြီးမားသည့် စိန်ခေါ်မှုကြီး ဖြစ်သည်။ လက်ရှိ အစိုးရသစ်အတွက် ယခင်က အရှုပ်ထုပ်ကို ဦးစွာ ရှင်းပြီးမှသာ တိုင်းပြည်ရှေ့တဆင့်တက်အောင် လုပ်နိုင်ပါလိမ့်မည်။ ဤအခြေအနေမျိုးတွင် ရရှိလာသည့် ဒီမိုကရေစီအခွင့်အရေးကို မှန်ကန်စွာ အသုံးချ၍ အမြော်အမြင် ရှိရှိ အစိုးရကို ၀န်းရံထောက်ခံကြရမည် ဖြစ်သည်။ ဖျက်လိုဖျက်ဆီး မလုပ်မိကြဖို့ သတိပြုကြရမည်လည်း ဖြစ်သည်။ အာဏာရှင်စနစ် တစ်ကျော့ပြန် ခေါင်းထောင်လာစေမည့် အပျက်သဘော ပြုမူ ပြောဆိုမှုများကို လူထုက လူထုနည်းဖြင့် ညီညီညာညာ ၀ိုင်းဝန်းကာကွယ်ကြရန် လိုအပ်နေဆဲဖြစ်သည်ဟု ထင်မြင်မိပါသည်။ ။
၂၀၁၆ ဧပြီလ ၂၅ ရက်၊ တနင်္လာနေ့ ဒီလှိုင်းစာစောင်မှာ ဖေါ်ပြခဲ့တဲ့ ဆောင်းပါး။