ရှာဖွေရေး ...

PO Box 320-207, San Francisco, CA 94132-0207, USA – editors @ moemaka.net ((510) 854-6501)။
မိုးမခ ရုံးစားပွဲ - Home ရုံးခန်းအသစ်၊ အမှတ် (၁၂၄)၊ ၅၇ လမ်း၊ မဟာဗန္ဓုလ လမ်းမ၊ ပုဇွန်တောင်မြို့နယ်၊ ရန်ကုန်မြို့၊
ဖုန်း – ၀၉ ၂၅၂ ၂၄၉ ၀၉၄ ၊ ၀၉ ၄၂၁ ၇၄၃ ၇၅၃ ၊ ၀၉ ၅၀၄ ၁၀ ၅၈ ၊ ၀၉ ၄၃၀ ၄၆၃ ၉၉ (မန္တလေး)။ ။ စာတိုက်သေတ္တာ (၈၂၅)၊ ရန်ကုန်စာတိုက်ကြီး။

ဖြိုးသီဟချို ● မူမမှန်တဲ့ရာသီဥတုကြောင့် မိုးစပါးစိုက်ရေး လက်တွန့်နေတဲ့ လယ်သမားများ

ဆိုးရွားလာတဲ့ ရာသီဥတုနဲ့ လိုက်လျောညီထွေ ဖြစ်ဖို့အတွက်ဆိုရင်တောင်သူလယ်သမားတွေက  စိုက်ပျိုးနည်းစနစ်တွေပြောင်းလဲ
ရမှာ ဖြစ်ပါတယ်။ (ဓာတ်ပုံ - အောင်ပေါ်ထွန်း)
 ဖြိုးသီဟချို ● မူမမှန်တဲ့ရာသီဥတုကြောင့် မိုးစပါးစိုက်ရေး လက်တွန့်နေတဲ့ လယ်သမားများ
(မိုးမခ) ဇွန် ၁၊ ၂၀၁၆

ယခုဆောင်းပါးအား Myanmar Now မှ ရယူပါသည်။

ရာသီဥတုကြောင့် နှစ်စဉ် အရှုံးပေါ်နေရတဲ့ မြစ်ဝကျွန်းပေါ်ဒေသ လယ်သမားအများစုဟာ အနိမ့်ပိုင်းဒေသကလယ်တွေမှာ  မိုးစပါးမစိုက်ဖို့ ဆုံးဖြတ်ထားကြပါတယ်။

ဇလွန်၊ မအူပင် (Myanmar Now) - တစ်နှစ်ထက်တစ်နှစ် ပိုမိုဆိုးရွားလာတဲ့ ရာသီဥတုဒဏ်ကို ခံစားနေရတဲ့ လယ်သမား တွေထဲမှာ ဧရာဝတီတိုင်းဒေသကြီး၊  ဇလွန်မြို့နယ် ကော့ကက်ကြီးကျေးရွာက ကိုအောင်ကြွယ်တို့မိသားစုလည်း ပါဝင်ပါ တယ်။ မနှစ်တုန်းက သူတို့လယ်  ၁၄ ဧကမှာ ထက်ဝက်လောက်က ရေနစ်မြုပ်သွားတဲ့အတွက် စပါးတွေပျက်စီးပြီး အရှုံးပေါ် ခဲ့ရတာပါ။

ဒီနှစ်နွေစပါးပေါ်ချိန်မှာလည်း ရာသီဥတုဖောက်ပြန်၊ ဆောင်းကာလ ရှည်ကြာနေတာနဲ့ကြုံရပြီး နွေစပါးအထွက်နှုန်း သိသိ သာသာ လျော့ကျသွားတယ်လို့ သူက ဆိုပါတယ်။

“အရင်က တစ်ဧကကို တင်း ၁ဝဝ ထွက်တယ်ဆို အခု ၇၅ တင်းပဲ ရတော့တယ်။ ရေကြောက်လို့ ဒီနှစ် မိုးလယ်မှာ  အနိမ့်ပိုင်း လယ်တွေ မစိုက်တော့ဘူး” လို့ ကိုအောင်ကြွယ်က ပြောပါတယ်။ 

ဒေသတွင်း မအူပင်မြို့နယ်၊ ပလောင်ကျေးရွာက ဦးကျော်မင်းလည်း  အလားတူ ဆုံးဖြတ်ထားပါတယ်။

“တော်သလင်း၊ သီတင်းကျွတ်လောက်ဆိုရင်တော့ ရေပြန်ကျသွားလောက်ပြီ။ အဲဒီအချိန်မှာမှ ရာသီကုန် (သီးနှံ) ဖြစ်တဲ့ ပြောင်းတို့၊ သခွားတို့ ပြန်စိုက်မယ်” လို့ မနှစ်က ရေကြီးမှုကြောင့် မိုးစပါး ၇ ဧက ဆုံးရှုံးခဲ့ရတဲ့  ဦးကျော်မင်းက ပြောပါတယ်။
နိုင်ငံရဲ့ စပါးကျီလို့ တင်စားကြတဲ့ ဧရာဝတီမြစ်ဝကျွန်းပေါ်ဒေသရဲ့ အနိမ့်ပိုင်းလယ်မြေတွေထဲ မိုးတွင်းကာလမှာ စိုက်ပျိုးတဲ့ သက်ကြီးစပါးမျိုးဟာ တစ်ဧက အထွက်နှုန်း နည်းပါးရုံသာမက ပူပြင်းခြင်း၊ မိုးခေါင်ခြင်း၊ ရေကြီးခြင်း အစရှိတဲ့ ရာသီဥတု ဒဏ်ကြောင့် ဆုံးရှုံးမှုများတဲ့အတွက် ဒီနှစ်တော့ လယ်သမားအများအပြားက စိုက်ပျိုးဖို့ လက်ရှောင်နေကြပါပြီ။

● ဒီနှစ်အတွက် စပါးအထွက်နှုန်း
ဧရာဝတီတိုင်းဒေသကြီးအခြေစိုက် လွတ်လပ်သော လယ်သမားများအဖွဲ့ချုပ် ဥက္ကဋ္ဌ ဦးသိန်းအောင်က  မိုးစပါးမစိုက်တော့ ဘူးဆိုတဲ့ မြေနိမ့်ဒေသ လယ်ဧကပေါင်း နှစ်သိန်းဝန်းကျင်ရှိပေမဲ့ အထွက်နှုန်းနည်းတဲ့ စပါးမျိုးစေ့တွေကိုသာ စိုက်ပျိုးနိုင်တာ ကြောင့် ဒေသတွင်း စပါးအထွက်နှုန်းကိုတော့ သိသိသာသာ ထိခိုက်မှာ မဟုတ်ဘူးလို့ ပြောပါတယ်။

မြန်မာနိုင်ငံဟာ ဒီဘက်ဆယ်စုနှစ်တွေအတွင်း မိုးခေါင်ရေရှားခြင်း၊ အချိန်အခါမဟုတ် မိုးကြီးခြင်း စတဲ့ ရာသီဥတုဒဏ်တွေကို နှစ်စဉ်ခံစားနေရပါပြီ။ ပြီးခဲ့တဲ့နှစ် ဇူလိုင်၊ သြဂုတ်လတို့မှာ တိုက်ခိုက်ခဲ့တဲ့ ကိုမန်ဆိုင်ကလုန်းမုန်တိုင်းကြောင့် ပုံမှန်ထက်ပိုတဲ့ မိုးကြီးရေလျှံမှုတွေ နိုင်ငံအနှံ့ဖြစ်ခဲ့ရာမှာ ဧရာဝတီတိုင်းဒေသကြီး တစ်ခုတည်းအတွင်းမှာတင် မိုးစပါးဧကပေါင်း၂၆ဝ,ဝဝဝ ကျော် ထိခိုက်ပြီး ဧကပေါင်း ၅၂,ဝဝဝ ထက် မနည်း ပျက်စီးဆုံးရှုံးသွားပါတယ်။

ဆိုးရွားလာတဲ့ ရာသီဥတုနဲ့ သင့်လျော်အောင် စိုက်ပျိုးနည်းစနစ်တွေပြောင်းလဲဖို့နဲ့ စိုက်ပျိုးသီးနှံတွေ ရွေးချယ်နိုင်ဖို့ဟာ လယ်သမားတွေအတွက် သေရေးရှင်ရေးဖြစ်နေပါပြီ။

မိုးလေဝသပညာရှင်ဦးထွန်းလွင်ကလည်း မြန်မာနဲ့အရှေ့တောင်အာရှနိုင်ငံတွေဟာ မုတ်သုံဝင်ချိန် နောက်ကျ၊ မုတ်သုံထွက် ချိန်စောလာတတ်တာကြောင့် စိုက်ပျိုးနည်းစနစ်တွေ မဖြစ်မနေ အပြောင်းအလဲလုပ်ရတော့မယ်လို့ သတိပေးပါတယ်။

“သမားရိုးကျနည်းနဲ့တော့ သွားလို့မရတော့ဘူး။ အခြေအနေကို ညှိပြီးတော့၊ ပြောင်းလဲပြီးတော့ စိုက်ပျိုးရမှာပါပဲ” လို့ သူက ပြောပါတယ်။
နိုင်ငံအောက်ပိုင်းမှာ အချိန်အခါမဟုတ် မိုးကြီးနိုင်တာကြောင့်  လုပ်ငန်းအမြန်ပြီးဖို့အတွက် မိရိုးဖလာ ထုံးစံတွေအတိုင်း လုပ်ကိုင်ခြင်းထက် ရိတ်သိမ်း၊ အခြောက်ခံ၊  အစေ့ခြွေတာတို့ကို စက်ကိရိယာတွေ အားကိုးမှ သင့်တော်မယ်လို့ သူက ဆက်ပြောပါတယ်။

“စက်ကိရိယာ အကူအညီနဲ့လုပ်ဖို့လိုတယ်။  အဲဒါတွေရဖို့အတွက် သက်ဆိုင်ရာ လယ်သမားအနေနဲ့တော့ တတ်နိုင်ချင်မှ တတ်နိုင်မှာပေါ့။ အစိုးရအနေနဲ့ ကူညီဖို့လိုတာပေါ့” လို့ ဦးထွန်းလွင်က ဆိုပါတယ်။

တိုင်းအစိုးရအဖွဲ့ သယံဇာတနှင့်သဘာဝပတ်ဝန်းကျင်ရေးရာဝန်ကြီး ဦးဘဟိန်းက ဒေသအတွင်း စိုက်ပျိုးရေးကဏ္ဍ တိုးတက် ဖို့အတွက် မြန်မာနိုင်ငံဆန်စပါးအသင်းချုပ်နဲ့ ပူးပေါင်းပြီး ကန်ထရိုက်လယ်ယာစနစ် အကောင်အထည်ဖော်ဖို့အတွက် ကြိုး စားနေတယ်လို့ ဆိုပါတယ်။ သိမ်းဆည်းခံရတဲ့ လယ်ယာမြေတွေ ပြန်လည်ရရှိရေး၊ မျိုးကောင်းမျိုးသန့်တွေသုံးပြီး စိုက်ပျိုး နိုင်ရေးတို့ကို အလေးထား  ဆောင်ရွက်သွားမယ်လို့ ပြောပါတယ်။

“ရာသီဥတုဆိုတာကတော့ သဘာဝဘေးအန္တရာယ်ဖြစ်တဲ့အတွက် ကာကွယ်ဖို့ တော်တော်ခက်ခဲပါတယ်။ လူလုပ်တဲ့အန္တ ရာယ်တွေကိုတော့ အဓိက ဦးစားပေးပြီး ဖြေရှင်းသွားမှာပါ”လို့ သူက ပြောပါတယ်။    

● စိုက်ပျိုးရေးကဏ္ဍ အကြံပြုမှုများ
ဒေသတွင်း ဆန်တင်ပို့မှု အများဆုံးနိုင်ငံတစ်ခုဖြစ်ခဲ့ဖူးတဲ့၊ လူဦးရေ ၇ဝ ရာခိုင်နှုန်းဝန်းကျင်က တောင်သူလယ်သမားတွေ ဖြစ်နေတဲ့ မြန်မာနိုင်ငံဟာ စိုက်ပျိုးရေးကဏ္ဍနဲ့ တောင်သူလယ်သမားတွေရဲ့ ဘဝမြင့်မားရေးကို ဦးစား မပေးခဲ့ပါဘူး။

ပြည်ထောင်စုလွှတ်တော်ရဲ့ တောင်သူလယ်သမားနှင့် အလုပ်သမားရေးရာ ကော်မတီဥက္ကဋ္ဌ၊ မအူပင်မြို့နယ် ပြည်သူ့လွှတ် တော်ကိုယ်စားလှယ်  ဦးစိန်ဝင်းက မြန်မာနိုင်ငံဟာ စိုက်ပျိုးရေးနိုင်ငံဖြစ်ပေမဲ့လည်း အစိုးရ အဆက်ဆက်က စိုက်ပျိုးရေးဖွံ့ဖြိုး တိုးတက်ရေးအတွက် ငွေကြေးသုံးစွဲမှု အလွန်နည်းပါးတယ်လို့ ပြောပါတယ်။

စိုက်ပျိုးရေးကဏ္ဍပြုပြင်ပြောင်းလဲရေးအတွက် သိမ်းဆည်းခံလယ်ယာမြေပြန်လည်ရရှိဖို့က အရေးပါတဲ့အချက် ဖြစ်သလို အစိုးရသစ်အနေနဲ့ တောင်သူတွေ အချိန်မီစိုက်ပျိုးနိုင်အောင် ချေးငွေ အချိန်မီ ထုတ်ချေးဖို့လိုတယ်လို့ သူက ဆိုပါတယ်။

“(ဆန်စပါး) သုတေသနပိုင်းမှာ သီးနှံမျိုးစေ့စီမံကိန်းတွေကို အလေးထားပြီး ဆောင်ရွက်မှုအားနည်းတာကို တွေ့ရပါတယ်” လို့ ဦးစိန်ဝင်းက ပြောပါတယ်။

စိုက်ပျိုးရေးကဏ္ဍ ပြုပြင်ပြောင်းလဲဖို့ အစိုးရသစ်ရဲ့ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီးနဲ့ ဆွေးနွေးမယ်လို့ပြောပါတယ်။

“ကိုယ့်ပါတီက ကိုယ့်ဝန်ကြီးပဲဗျာ၊ စိုက်ပျိုးရေးကဏ္ဍဖွံ့ဖြိုးဖို့အတွက်  ကျွန်တော်တို့ ကြိုးစားညှိနှိုင်း အဖြေရှာသွားမှာပါ”  လို့ သူက ဆိုပါတယ်။

ဆန်စပါးစိုက်ပျိုးထုတ်လုပ်သူများအသင်း ဥက္ကဋ္ဌ ဦးစိန်ဝင်းလှိုင်က ဒီနှစ် ပြည်ပပို့ကုန်ထဲ ဆန်မပါဝင်နိုင်ဘူးလို့ ပြောပါတယ်။

" ဒီနှစ်မှာတော့ ရာသီဥတုကြောင့် ဆန်စပါးအထွက်၂ဝ ရာခိုင်နှုန်းလောက် နည်းသွားပါတယ်။ ဒေသတွင်း စားသုံးဖို့ကတော့ ဖူလုံနိုင်ပေမဲ့ နိုင်ငံခြားတင်ပို့ဖို့ကတော့ မဖြစ်နိုင်ပါဘူး" လို့ သူက ပြောပါတယ်။

အလားတူ သုံးသပ်သူတစ်ဦးကတော့ မြန်မာနိုင်ငံဆန်လုပ်ငန်းရှင်းများအသင်းဥက္ကဋ္ဌ ဒေါက်တာစိုးထွန်း ဖြစ်ပါတယ်။ ပူပြင်း ခြောက်သွေ့တဲ့ အယ်လ်နီညိုရာသီဥတုသက်ရောက်ပြီး သိသိသာသာ မိုးနည်းလာနိုင်တာကြောင့်သက်တမ်းတိုတဲ့ စပါးမျိုး တွေ စိုက်ပျိုးသင့်တဲ့အတွက် ရေအရင်းအမြစ်ကို အလေးထားရမယ်လို့ သူက ဆိုပါတယ်။
“မြန်မာနိုင်ငံမှာက ရေရနိုင်တဲ့နည်းတွေရှိပါတယ်။  မြစ်ကြီးတွေမှာရှိနေတဲ့ ရေကို လိုအပ်သလို ထိန်းသိမ်းနိုင်ရင် စိုက်ပျိုးရေး ကဏ္ဍက ပြန်ပြီးမြင့်တက်လာမယ်”လို့  ဒေါက်တာစိုးထွန်းက ပြောပါတယ်။

မအူပင်ခရိုင် စိုက်ပျိုးရေးဦးစီးဌာန ဦးစီးမှူး ဦးသိုက်စိုးက သူတို့ဝန်ကြီးဌာနအနေနဲ့  လယ်သမားတွေကို အယ်လ်နီညို ရာသီ ဥတုနဲ့ပတ်သက်ပြီး နည်းပညာပေးခြင်း၊ မျိုးစပါးတွေဖြန့်ဝေပေးခြင်း အစရှိတာတွေကို ဆောင်ရွက်ပေးနေတယ်လို့ ဆိုပါ တယ်။

“ပျိုးခင်း၊ စိုက်ခင်းတွေ ရေရဖို့ အခက်အခဲဖြစ်နိုင်တယ်။ သီးနှံအထွက်နှုန်း လျော့နည်းသွားနိုင်တယ်။  သက်တမ်းတိုတဲ့စပါးတွေ စိုက်ပျိုးသင့်တယ်” လို့ ဦးသိုက်စိုးက  ပြောလိုက်ပါတယ်။     ။