ဆောင်းယွန်းလ ● ညနေအကြောင်း



 ဆောင်းယွန်းလ ● ညနေအကြောင်း
(မိုးမခ) သြဂတ်စ် ၄၊ ၂၀၁၆

တစုံတယောက်က
ညနေကို
လယ်ကွင်းထဲက ရိတ်သိမ်းယူခဲ့တယ်
တစုံတယောက်က
ညနေကို
ပင်လယ်ထဲက ဆယ်ယူခဲ့တယ်
တစုံတယောက်က
ညနေကို
ယမကာဆိုင်ထဲက ပါဆယ်ဆွဲယူခဲ့တယ်
တစုံတယောက်က
ညနေကို
စစ်ပွဲထဲက ဒရွတ်တိုက် ဆွဲထုတ်ယူခဲ့တယ်
တစုံတယောက်က
ညနေကို
သူ့ချစ်သူနှုတ်ခမ်းဖျားပေါ်က နမ်းရှိုက်ပြီးယူခဲ့တယ်..

သူတို့အားလုံး
သူတို့ အခင်းအကျင်းနဲ့ သူတို့
ညနေ တခင်းစီကို ယူပြီး
ညရှိရာဘက်ဆီကို ထွက်ခွာသွားခဲ့ကြတယ်….

ငါ့မှာသာ…
ခင်းလို့မရတဲ့ ညနေကို
ဝင်လုလု နေလုံးကြီးအောက် အထပ်ထပ်ခေါက်ထားခဲ့ရင်း
ညပျောက်ကို….ဆက်ရှာနေမိ….။

ဆောင်းယွန်းလ (သြဂုတ် ၂ရက်၊ ၂၀၁၆)