ရှာဖွေရေး ...

PO Box 320-207, San Francisco, CA 94132-0207, USA – editors @ moemaka.net ((510) 854-6501)။
မိုးမခ ရုံးစားပွဲ - Home ရုံးခန်းအသစ်၊ အမှတ် (၁၂၄)၊ ၅၇ လမ်း၊ မဟာဗန္ဓုလ လမ်းမ၊ ပုဇွန်တောင်မြို့နယ်၊ ရန်ကုန်မြို့၊
ဖုန်း – ၀၉ ၂၅၂ ၂၄၉ ၀၉၄ ၊ ၀၉ ၄၂၁ ၇၄၃ ၇၅၃ ၊ ၀၉ ၅၀၄ ၁၀ ၅၈ ၊ ၀၉ ၄၃၀ ၄၆၃ ၉၉ (မန္တလေး)။ ။ စာတိုက်သေတ္တာ (၈၂၅)၊ ရန်ကုန်စာတိုက်ကြီး။

တူမောင်ညို ● ခွေးရူးရိုက်တဲ့ ဓလေ့ကောင်း အစဉ်ထွန်းကားစေဖို့


တူမောင်ညို ● ခွေးရူးရိုက်တဲ့ ဓလေ့ကောင်း အစဉ်ထွန်းကားစေဖို့
(မိုးမခ) စက်တင်ဘာ ၂၇၊ ၂၀၁၆

ရပ်ထဲရွာထဲမှာ  “ခွေးရူး” ဟေ့ ဆိုလျှင် တအိမ်တယောက်  ကိုယ်စီ တုတ်၊ ဓား ဆွဲထွက်လာကြကာ ဝိုင်းဝန်း ရိုက်နှက်ပြီး ကိစ္စတုံးလိုက်ကြပုံကို မြင်ဖူးကြပါလိမ့်မယ်။ “ခွေးရူး” ကို သက်ညှာနေလို့မဖြစ်၊ ဘာအကြောင်းကြောင့်မှ ထောက်ထား နေ စရာအကြောင်း မရှိ။

ဤကဲ့သို့သော အပြုအမူမျိုးကို မီးလောင်လျှင်လည်း တွေ့ရတတ်ပါတယ်။ “မီး”  ဟေ့ဆိုလျှင် တအိမ်တယောက် ရေပုံးကိုယ်စီ ဆွဲထွက်လာကြပြီး လောင်နေတဲ့မီးကို ဝိုင်းဝန်းငြှိမ်းသတ်ကြပါတယ်။ ဤသည်မှာ ဗမာ့လူ့အဖွဲ့အစည်း၏ ဓလေ့ကောင်းတွေ ထဲက တခုပဲဖြစ်ပါတယ်။ တနည်းအားဖြင့် တာဝန်သိမှုပဲ ဖြစ်ပါတယ်။ ခွေးရူးက ငါ့အိမ်ကလူကိုက်တာမဟုတ်၊ မီးက ငါ့အိမ် လောင်တာမဟုတ်ဆိုတဲ့ ကျဉ်းကျဉ်းမြောင်းမြောင်း တကိုယ်ကောင်းစိတ် မမွေးကြ။

အခုလည်း မြန်မာ့လူ့အခွင့်အရေးကော်မရှင်အဖွဲ့ဝင် လူကြီးမင်း၏ လူမဆန်သော အပြောအဆိုအပြုအမှုကို ဝိုင်းဝန်းဆန့် ကျင် ကန့်ကွက်ကြရာ၌ ခွေးရူး အပေါ်၊ လောင်နေသော မီးအပေါ် ပြုမူခဲ့ကြသော မြန်မာ့ဓလေ့ကောင်းကို မြင်တွေ့ရပါတယ်။ အဟောတဝ ကောင်းလေစွ။

“ခွေးရူးဟေ့ -- ခွေးရူးဟေ့ - မီးဗျို့ -- မီး” လို့  နှိုးဆော် အသိပေးရုံမျှဖြင့် တာဝန်မကျေနိုင်၊ ခွေးရူး ဇီဝိန်ချွေပွဲ ၊ မီးငြှိမ်းသတ်ပွဲ တွေ မှာ  ကိုယ်ထိလက်ရောက် ကိုယ်စီပါဝင်ကြမှသာ တင်းပြည့် ကျပ်ပြည့် တာဝန်ကျေပွန်သူဖြစ်ပါလိမ့်မယ်။

အိမ်ဖော်အလုပ်သမလေးနှစ်ယောက်ဖြစ်တဲ့ “မသဇင်နဲ့ မစန်းကေခိုင်” တို့အပေါ် အိမ်ရှင်ဖြစ်တဲ့ “အင်းဝအပ်ချုပ်ဆိုင်ပိုင်ရှင် များ” က လူမဆန်စွာ ညှဉ်းပန်းနှိပ်စက်ခဲ့ကြတယ်။ ဒါကို “မြန်မာ့လူ့ခွင့်အရေးကော်မရှင်” က ထိထိရောက်ရောက်အရေးယူ ဆောင်ရွက်ဖို့ ပျက်ကွက်ခဲ့တယ်။ ပျက်ကွက်ရုံတင်မက လူမဆန်စွာ ညှဉ်းပန်းနှိပ်စက်ခဲ့သူတွေနဲ့ နှစ်ကိုယ့်တစိတ်ပမာ ပူး ပေါင်း ပြုမူခဲ့ပါတယ်။

ဒီလို ရိုင်းပြမိုက်မဲတဲ့ အပြုအမူအတွက် တာဝန်သိမီဒီယာတွေက ဖော်ထုတ်မေးမြန်းတဲ့အခါမှာလည်း မချေမငံဆက်ဆံပြုမူ ခဲ့ပြန်ပါတယ်။ တုန့်ပြန်ပုံက လှောင်အိမ်ထဲကအကောင်ကို တုတ်နဲ့ထိုးလိုက်လို့ တုန့်ပြန်ပုံမျိုးနဲ့ ဆင်တူနေပါတယ်။

ဒီလို တာဝန်ပျက်ကွက်ပြီး၊ အပြုအမူအပြောဆို မချေမငံတဲ့၊ ရိုင်းပြတဲ့ကော်မရှင်အဖွဲ့ဝင်လူကြီးတချို့ကို ထိရောက်စွာ အရေး ယူပေးရန်အဆိုကို ပြည်သူ့လွှတ်တော်က အဆုံးအဖြတ်ပေးခဲ့ပါတယ်။ ဒီအဆိုကို အဆုံးအဖြတ်ပေးရမှာ မဲပေးရာမှာ ပြည်သူ့ လွှတ်တော်ကိုယ်စားလှယ်တွေထဲမှာ ဒီလိုအပြုအမူအပေါ်  အားပေးထောက်ခံတဲ့ လွှတ်တော်ကိုယ်စားလှယ်တွေပါရှိနေတာကို ပြည်သူအများက အထင်အရှားသိမြင်လိုက်ရပါတယ်။

လွှတ်တော်အတွင်း ဒီအဆိုအတွက် ပေးခဲ့ကြတဲ့ မဲရလဒ်ကိုကြည့်ပါ။

- ထောက်ခံမဲ ၃၇၄ မဲ
- ကန့်ကွက်မဲ ၁  မဲ
- ကြားနေမဲ ၈  မဲ  ဖြစ်ပါတယ်။

ကန့်ကွက်မဲပေးတဲ့ လွှတ်တော်ကိုယ်စားလှယ် ၁ ဦးနဲ့၊ ကြားနေမဲပေးခဲ့တဲ့  ၈ ဦးဟာ ဒီလိုလူ့အခွင့်အရေးချိုး ဖောက်တဲ့ ကိစ္စ အပေါ်၊ တာဝန်ပျက်ကွက်ပြီး၊ ရင့်သီးရိုင်းပြမှုအပေါ် ထိရောက်စွာအရေးယူပေးရေးအဆိုကို ကန့်ကွက်ခဲ့ကြတာဟာ လူ့ အခွင့်အရေး ချိုးဖောက်သူတွေဘက်က၊ တာဝန်ပျက်မှုဘက်က၊ ရိုင်းပြမှုဘက်က ရပ်တည်ခဲ့ကြတာ၊ ဒီလိုအပြုအမူတွေကိုအားပေးထောက်ခံခဲ့ကြတာပဲဖြစ်ပါတယ်။

တကယ်တော့ ဒီလိုကိစ္စမျိုးတွေမှာ ပြည်သူက မဲဆန္ဒပေးရွေးချယ်ထားတဲ့ ပြည်သူ့ကိုယ်စားလှယ်တွေဟာ ဘယ်လိုမှ ကြား နေစရာအကြောင်း လုံးဝမရှိပါဘူး။ ပြည်သူလူထုဘက်က၊ လူ့အခွင့်အရေးဘက်က  ပြတ်ပြတ်သားသား ရပ်တည်ကြရမှာ ပါ။အခုတော့ ဒီကိုယ်စားလှယ် ၉ ဦးဟာ ပြည်သူ့ဘက်က မရပ်တည်ကြောင်း အထင်အရှားဖော်ပြခဲ့ပါပြီ၊ ဒီလိုကိုယ်စားလှယ် မျိုးကို မဲပေးရွေးချယ်ဖို့ မထိုက်တန်ဘူးဆိုတာ ပြည်သူတွေသိကြရတာ အမြတ်ပါပဲ။

ဒီနေရာမှာ နောက်ထပ် သတိပြုစရာကောင်းတဲ့ အချက်တခုကို ထောက်ပြချင်ပါတယ်။

လွှတ်တော်ထဲမှာ  “ဒီမိုကရေစီ ဖက်ဒရယ်ပြည်ထောင်စု” ဆိုတဲ့ စကားရပ်ကိစ္စ၊ ဧည့်စာရင်းကိစ္စ၊ အရေးပေါ်စီမံမှုအက်ဥပဒေ ရုပ်သိမ်းတဲ့ကိစ္စတွေမှာ ကန့်ကွက်မဲတွေ တွင်တွင်ပေးခဲ့ကြတဲ့ ကာချုပ်ရဲ့ စစ်ဗိုလ်ကိုယ်စားလှယ်ဆိုသူတွေဟာ လူ့အခွင့်အ ရေးကော်မရှင် အဖွဲ့ဝင်လူကြီးကို ထိရောက်စွာအရေးယူရေးအဆိုဘက်က ရပ်တည်ခဲ့ကြ၊  မဲပေးခဲ့ကြပါတယ်။  သူတို့ဘာ ကြောင့်  ဒီလို ရပ်တည်ခဲ့ကြသလဲ/မဲပေးခဲ့ကြသလဲ။ ဘာလို့ ဒီလိုဝင်ပြီး  အမှတ်ယူနေကြရတာလဲ။  လောလောလတ်လတ် အကြောင်း ၂ ချက်ရှိပါတယ်။

ပထမတချက်က မြန်မာ့လူ့အခွင့်အရေးကော်မရှင်ရဲ့ပြုမူလုပ်ဆောင်ချက်က သူတို့ ထုတ်ပြန်ထားတဲ့ တည်ဆဲဥပဒေဆိုတာကို ချိုးဖောက်နေလို့ပါပဲ။

ဒုတိယအချက်က  “မိုင်းယော်လူသတ်မှု” မှာ ပါဝင် ကျူးလွန်ခဲ့ကြတဲ့ စစ်ဗိုလ်တွေကို စစ်တပ်က ပူပူနွေးနွေး အရေးယူထားတဲ့ ကိစ္စပါပဲ။

ဒီကိစ္စတွေကိုဖုံးကွယ်ဖို့ ကော်မရှင်ကိစ္စမှာ သူတို့စစ်ဗိုလ်ဟောင်းဖြစ်တဲ့ (ဗိုလ်) ဦးဇော်ဝင်းရဲ့ မိုက်မဲမှုတွေအပေါ် မင်္ဂလာ ယူပြီး ဆုံးမပြတာဖြစ်ပါတယ်။ သူတို့လိုချင်တဲ့ကိစ္စတွေမှာ သူတို့ဂုဏ်တင်ချင်တဲ့ကိစ္စတွေမှာဆိုရင်တော့ စစ်တပ်ဆိုတာ အမိန့်နဲ့ စည်းကမ်းခါးဝတ်ပုဆိုးပမာ မြဲမြံတဲ့အဖွဲ့အစည်းဖြစ်တယ်လို့ ပဏာယူတတ်သော်လည်း၊ မရှူနိုင် မကယ်နိုင်၊ ဖုံးမရ ဖိမရဖြစ်တဲ့ (မိုင်းယော်သတ်ဖြတ်မှုလို) ကိစ္စတွေမှာဆိုရင်တော့ အောက်ခြေတပ်မှူးတပ်သားတွေကို လက်ညှိုးထိုး အပြစ်ပုံ ချပြီး ပြောတဲ့စကားက “စစ်တပ်ဆိုတာ မတစ်ထောင်သားတွေနဲ့ ဖွဲ့ထားတာ” လို့ ဆိုတတ်ကြပါတယ်။

အခု အုတ်အော်သောင်းတင်းဖြစ်သွားတဲ့ကိစ္စမှာ စစ်တပ်အနေနဲ့ ကန့်ကွက်မဲပေးလို့မရဘူး၊ ကြားနေလို့မဖြစ်ဘူး။ တပ်မ တော်က လူ့အခွင့်အရေးဘက်က ရပ်တည်တယ် ဆိုတာကို ပြသဖို့ အကွက်ကောင်းတစ်ခုအဖြစ် အသုံးချခဲ့တာသာဖြစ်ပါတယ်။

တကယ်တော့ စစ်တပ်အဖို့ ဒီလိုကိစ္စတွေလုပ်ရတာ အံတိုနေပါပြီ။ ရိုးနေပါပြီ။ နိုင်ငံရေးအကျဉ်းတွေဖမ်းထားပြီး - ပြန်လွှတ် ပေးတဲ့အခါ မင်္ဂလာယူသလိုမျိုးပါပဲ။ စစ်တပ်က အဓမ္မသိမ်းထားတဲ့ လယ်ယာမြေတွေ ပြန်ပေးတဲ့အခါမှာလဲ၊ “ အသုံးမလို တော့တဲ့  လယ်ယာမြေကို ပြန်လည်စွန့်လွှတ်အပ်နှံတယ်” တဲ့ ပုံစံမျိုးပါပဲ။

အလားတူပါပဲ။ ကလေးစစ်သား အဓမ္မစုဆောင်းခဲ့ကြပြီး၊  ကလေးအခွင့်အရေးချိုးဖောက်မှု တိုင်းကျော် ပြည်ကျော်ဖြစ်လာ တော့ မှ “မိဘရပ်ထံ ပြန်လည်အပ်နှံတယ်” ဆိုတဲ့ ဂိုက်ဖမ်းပြီး သူတို့ကျူးလွန်ခဲ့ကြတဲ့ ရာဇဝင်ရာဇဝတ်မှုအမည်းစက်ကြီးတွေကို ပြန်လည်ဖုံးကွယ်ဖားထေးဖို့ နည်းမျိုးစုံနဲ့ ပက်ပက်စက်စက် ကြံစည်နေကြတာမျိုးသာ ဖြစ်ပါတယ်။

ဒါကြောင့် “လူ့အခွင့်အရေးဘက်ကနေ တပ်မတော်က ရပ်တည်တာပဲ၊ မဲပေးတာပဲ” လို့ အညှာလွယ်လွယ်နဲ့ အတွက်အချက် မလွဲကြစေဖို့နဲ့ မျက်စေ့မှိတ်ပြီး အကောင်း မမြင်မိကြစေဖို့သာ ဖြစ်ပါတယ်။

တကယ်တော့ စစ်တပ်ဆိုတာ အထက်ကပေးအမိန့်အတိုင်း လှုပ်ရှားတာပါ။ သတ်ဆို သတ်၊ မီးရှို့ဆို မီးရှို့၊ လုဆို လုကြ၊ အ ဓမ္မကျင့်ဆို ကျင့်ကြတာပါ။ ရေဘူးပေါက်တာမလိုဘူး ရေပါဖို့ အဓိကဆိုတဲ့မူနဲ့ လုပ်ကြတာဖြစ်ပါတယ်။

လူ့အခွင့်အရေးကို စစ်တပ်က ဘယ်နေရာမှာမဆို အကြီးအကျယ်ချိုးဖောက်ခဲ့တာပါ။
ရှမ်းပြည်နယ်မှာ၊ ကချင်ပြည်နယ်မှာ၊ ကရင်ပြည်နယ်မှာ၊ တနင်္သာရီကမ်းလွန်၊ ပင်လယ်ပြင်က ကျွန်းပေါ်မှာ တောင်ပေါ်မြေ ပြန့်ဘယ်မှာဖြစ်ဖြစ် လက်ညှိုးထိုးမလွဲပါဘူး။ စစ်ဗိုလ်တွေဟာ စစ်တပ်ထဲမှာရှိတော့လည်း လူ့အခွင့်အရေး ချိုးဖောက်ခဲ့ကြ သလို၊ စစ်တပ်ကနေ (အကစ) ဝန်ထမ်းတွေအဖြစ် အင်းစိန်ထောင်၊ သာယာဝတီထောင်၊ သရက်ထောင်တွေကို ရောက် လာကြတော့လည်း နိုင်ငံရေးအကျဉ်းသားတွေအပေါ် လူမဆန်စွာဆက်ဆံပြုမူခဲ့ကြတာပါပဲ။

လူ့အခွင့်အရေးကော်မရှင်အဖွဲ့ဝင်လူကြီး (ဗိုလ်) ဦးဇော်ဝင်းကို နမူနာအဖြစ်ထားကြည့်ပါ။

စစ်တပ်ထဲမှာရှိတုန်းကလည်း စစ်တပ်ထဲမှာမို့ လူ့အသက်၊ လူ့ဘဝ၊ လူ့ဂုဏ်သိက္ခာ၊ လူ့အခွင့်အရေးဆိုတာတွေကို တန်ဖိုး ထားကြတာမဟုတ်ပါဘူး။ တန်ဖိုးထားရကောင်းမှန်း မသိပါဘူး။ (အကစ) ညွန်ချုပ်ဖြစ်လာတော့လည်း သရဲသဘက်လို သေးသိမ်ယုတ်ညံ့မှုတွေနဲ့ နိုင်ငံရေးအကျဉ်းသားတွေအပေါ် ပြုမူဆက်ဆံခဲ့တယ်။ နိုင်ငံရေးအကျဉ်းသားအပေါ်တင်မကဘူး။ ဇနီးသားသမီး မိဘဆွေမျိုးတွေအပေါ်မှာပါ တဆင့်တိုး ယုတ်မာခဲ့ကြတယ်။

(အကစ) ဝန်ထမ်းကနေ ဘဝပြောင်းပြီး  အရှင်မွေးလို့ချက်ချင်း လူ့အခွင့်အရေးကော်မရှင်မှာ အဖွဲ့ဝင်ဖြစ်လာပြီး  လူမျက်နှာဖုံး စွပ်ရပြန်တော့လည်း ဘီလူးသွားကို ဖြဲပြပြန်ပါတယ်။

ဒါဟာ (ဗိုလ်) ဦးဇော်ဝင်း တဦးတယောက်ထဲရဲ့ ထူးခြားချက်မဟုတ်ပါဘူး။ စစ်ဗျူရိုကရေစီယန္တယားကြီးထဲက လူတွေရဲ့အမူအကျင့်နဲ့စာရိတ္တပဲဖြစ်ပါတယ်။ သူတို့ဗီဇနဲ့အမူအကျင့်ဟာ စစ်တပ်ထဲမှာပဲဖြစ်ဖြစ်၊ အစိုးရဝန်ကြီးဖြစ်လာတဲ့အခါမှာပဲဖြစ်ဖြစ်၊ အစိုးရဝန်ထမ်းညွန်ချုပ်၊ ထောင်ပိုင်ထောင်မှူး ဖြစ်လာတဲ့အခါပဲဖြစ်ဖြစ်၊ လူ့အခွင့်အရေးကော်မရှင်လူကြီးဖြစ်လာတဲ့အခါမှာပဲဖြစ်ဖြစ် ပြောင်းလဲမသွားပါဘူး။ ဘယ်လိုပဲကျည်တောက်ပြောင်းစွပ်စွပ် ကောက်မြဲကောက်ပါတယ်။  သူတို့ဟာ ဘယ်နေ ရာမှာ ဖြစ်ဖြစ် ပြည်သူ လူထုကို နှိပ်စက်ကလူပြုပါ့မယ်၊ နိုင့်ထက်စီးနင်းပြုမူပါမယ်လို့ သစ္စာပြုထားကြပုံပါပဲ။

ဒါကြောင့် နိဂုံးချုပ်ရမယ်ဆိုရင် စစ်အုပ်စုရှိနေသမျှ၊ ၂၀၀၈ အခြေခံဥပဒေတည်မြဲနေသမျှ လူ့အခွင့်အရေးချိုးဖောက်မှုနဲ့ လူမ ဆန်မှုတွေကို ကြုံနေ၊ ကြားနေ၊ တွေ့နေမြင်နေကြရအုံးမှာပါ။

မိုင်းယော်ရွာသားတွေကို စစ်တပ်က လူမဆန်စွာသတ်ဖြတ်ခဲ့တာပါ။

ဒီလိုသတ်ဖြတ်တာဟာ နောက်ဆုံးမဟုတ်သလို ပထမဆုံး လည်းမဟုတ်သေးပါဘူး။ ၁၉၆၂ ကနေ ရေတွက်ကြည့်ရင်ပဲ စစ်တပ်က သတ်ဖြတ်ခဲ့တာတွေကို တောင်လိုပုံကြည့်ရင် ပုပ္ပါးတောင်ထက်မြင့်ချင်မြင့်မယ်နိမ့်တော့ မနိမ့်နိုင်ပါဘူး။ ကိုပါကြီး၊ ကချင် ကျောင်းဆရာမလေးနှစ်ဦးနဲ့ တောင်သူဒေါ်ခင်ဝင်းတို့ဖြစ်ရပ်တွေဟာ ပူပူနွေးနွေးဖြစ်ရပ်တွေပါ။ ဒီလိုဖြစ်ရပ်တွေအပေါ် မှာ မြန်မာ့လူ့အခွင့် အရေးကော်မရှင်ဟာ ရေငုံနှုတ်ပိတ်ပြီးနေခဲ့တာပါ။ ဒီလိုနေတာ၊ လွှတ်တော်ထဲမှာ ကန့်ကွက်မဲ၊ ကြားနေမဲ ပေးတာတွေဟာ မတရားမှု ကိုအားပေး အားမြှောက်ပြုတာပါ။ အလိုတူအလိုပါ ရပ်တည်တာပါ။

ယခင် ကြံ့ဖွံ့အစိုးရက လူ့အခွင့်အရေးကော်မရှင်ကိုစစ်ဗိုလ်ဟောင်း၊ ဗျူရိုကရက်ဟောင်းတွေနဲ့ ဖွဲ့စည်းခဲ့တာပါ။ ဒီလို လူစား တွေနဲ့ ဖွဲ့စည်းတာဟာ လူ့အခွင့်အရေးကို တမင်ပျက်ရယ်ပြုတာပါပဲ။ စော်ကားတာပါပဲ။

ဒီလိုလူစားတွေနဲ့လူ့အခွင့်အရေးကော်မရှင်ကို မဖွဲ့စည်းထိုက်ပါဘူး။ ဒါကြောင့် လူ့အခွင့်အရေးကော်မရှင် ပြန်လည်ဖွဲ့စည်း မယ်ဆိုရင်ကို သင့်မြတ်ရေးမူနဲ့ မဖွဲ့စည်းသင့်ပါဘူး၊ လူစိတ်ရှိပြီး အများပြည်သူကို လူလိုမြင်ကာ လူကို လူလို လေးစား တန် ဖိုးထားနိုင်သူတွေနဲ့ သာဖွဲ့စည်းသင့်ပါကြောင်း အကြံပြုပါတယ်။