ရှာဖွေရေး ...

PO Box 320-207, San Francisco, CA 94132-0207, USA – editors @ moemaka.net ((510) 854-6501)။
မိုးမခ ရုံးစားပွဲ - Home ရုံးခန်းအသစ်၊ အမှတ် (၁၂၄)၊ ၅၇ လမ်း၊ မဟာဗန္ဓုလ လမ်းမ၊ ပုဇွန်တောင်မြို့နယ်၊ ရန်ကုန်မြို့၊
ဖုန်း – ၀၉ ၂၅၂ ၂၄၉ ၀၉၄ ၊ ၀၉ ၄၂၁ ၇၄၃ ၇၅၃ ၊ ၀၉ ၅၀၄ ၁၀ ၅၈ ၊ ၀၉ ၄၃၀ ၄၆၃ ၉၉ (မန္တလေး)။ ။ စာတိုက်သေတ္တာ (၈၂၅)၊ ရန်ကုန်စာတိုက်ကြီး။

လှကျော်ဇော - ကျွန်မသား ညီရှင်း သို့မဟုတ် ကလေးစစ်သားပြဿနာ


လှကျော်ဇော - ကျွန်မသား ညီရှင်း သို့မဟုတ် ကလေးစစ်သားပြဿနာ
ဝတောင်တန်းက လွမ်းပန်းချီ။ ဆောင်းပါးအမှတ်(၃)

(မိုးမခ) အောက်တိုဘာ ၂၆၊ ၂၀၁၆
(၁)

ဒီနှစ်(၂၀၁၆)ထဲ တရုတ်ပြည်တဝန်းမှာကျင်းပတဲ့--အနှစ်(၈၀)ပြည့် ခရီးရှည်ချီတက်ပွဲ (Long March) အခမ်းအနားတွေမှာ အသက်(၉၀) ပတ် လည်တပ်နီတော်သား (Red Army)ဟောင်းတွေ တက်ရောက်လာကြပါတယ်။ (၁၀၄) နှစ်ရွယ် ရဲဘော်ဟောင်းကြီးတဦးတောင်ပါသေး။ ခရီးရှည်ချီတက်ပွဲဆိုတာက-တရုတ်ကွန်မြူနစ်တွေဦးစီးတဲ့ တပ်နီတော်က အဲဒီကာလ တရုတ်ပြည်ကိုအုပ်ချုပ်နေတဲ့ ချန်ကေရှိတ်-ကူမင်တန် တပ်များရဲ့ ပြင်းထန်လှတဲ့ ဝိုင်းဝန်းပိတ်ဆို့ တိုက်ခိုက်ချေမှုန်းမှုများကို မခံနိုင်တော့တဲ့အဆုံး ဒီတိုက်ခိုက်မှုများကို ရှောင်ရှားရေးအတွက် သူတို့ တတွေ တည်ဆောက်ထားတဲ့ တရုတ်ပြည်တောင်ပိုင်းမှာရှိတဲ့ အခြေခံဒေသတွေ (ကျင်ကန်းစန်း အပါအဝင်) ကိုစွန့်ပစ်ပြီး ဟိုးအရှေ့မြောက် ဘက်ဒေသ (ယင်အန်း)ကို တတပ်လုံး သေနင်္ဂဗျူဟာ ရွှေ့ပြောင်းချီတက်မှုပါ။ ၁၉၃၄-အောက်တိုဘာလကစလို့ ၁၉၃၅-အောက်တိုဘာလ ကုန်အထိ-တနှစ်ကျော်ကြာတဲ့ ခရီးရှည်ကြီးပါ။ မိုင်ပေါင်း(၅၀၀၀)ကျော်ရှည်လျားပြီး အလွန်ခက်-အလွန်ခေါင်တဲ့အရပ်တွေကို ခက်ခက်ခဲခဲ ဖြတ် ရရုံမက လိုက်လံတိုက်ခိုက်တာ-အမျိုးမျိုးကိုလည်း တွန်းလှန်တိုက်ခိုက်ရတာလည်းဖြစ်တာကြောင့် စထွက်တုန်းက လူပေါင်း(၁၃၀၀၀၀) တသိန်း သုံးသောင်းကျော်ဟာ-ယင်အန်းရောက်တော့ တသောင်းသာသာလေးပဲ ကျန်ပါတော့တယ်။

အဲဒီ့ခရီးရှည်လမ်းတလျှောက်မှာပါခဲ့ပြီး ယနေ့အထိအသက်ရှင်ကျန်ရစ်သူ တပ်နီတော်သားဟောင်းကြီးများက အခါကြီးရက်ကြီးတွေ (နိုင်ငံတော် နေ့၊ တပ်မတော်နေ့ စသဖြင့်)မှာ သူတို့အတွေ့အကြုံတွေကို ကျောင်းတွေမှာ လိုက်လံဟောပြောကြပါတယ်။ ရုပ်မြင်သံကြားသတင်းဌာနများက ပြုလုပ်တဲ့ တိုက်ရိုက်လွှင့်ပေးတဲ့ပွဲများမှာလည်း သူတို့တက်ရောက် ဟောပြောကြပါတယ်။

အခုခေတ် လူငယ်တွေကို သူတို့တတွေ အခုလို ငြိမ်းငြိမ်းချမ်းချမ်းနေနိုင်ဖို့ ဘယ်သူတွေဘယ်လို စွန့်လွှတ်အနစ်နာခံသွားကြတယ်။ ဒါ့ကြောင့် ဒါတွေကို တန်ဖိုးထားဖို့၊ ဒီအာဇာနည်တွေကိုလည်း မမေ့ဖို့၊ နိုင်ငံရေးအရ ပညာပေးကြပါတယ်။ ဒီနှစ်ကျင်းပတဲ့ပွဲတွေမှာလည်း သူတို့ချည်းပါပဲ။ အဲဒီတပ်နီတော်သားကြီးများဟာ ခရီးရှည်ချီတက်ပွဲတုန်းက ကလေးစစ်သားများပါ။ သူတို့ဘဝတွေကိုပြန်ပြောပြရာမှာ တချို့က မိဘမဲ့တွေ၊ တချို့က မိဘကဆင်းရဲလွန်းလို့ မကျွေးနိုင်လို့ ရပ်တကာလှည့်တောင်းစားနေကြရသူတွေ- သူတို့လှည့်ပတ်သွားလာနေကြရင်း တပ်နီတော်နဲ့ တွေ့ပြီး ထမင်းကျန်ဟင်းကျန်တောင်းစားကြရင်း တပ်နဲ့ပါလာကြသူတွေ။ သူတို့ရဲ့အသက် အတိအကျလည်း မသိကြဘူး။ တပ်ထဲရောက်တော့ မှန်းပေးထားတဲ့ အသက်တွေ။ တချို့က ၁၀ နှစ်-၁၁ နှစ်သားတွေပဲတဲ့။

အခုတော့ သူတို့တတွေက နောင်မျိုးဆက်တွေကို တော်လှန်ရေးအမွေ နိုင်ငံရေးအမွေတွေ လက်ဆင့်ကမ်းပေးနေရတဲ့-နိုင်ငံရေးမှူးတွေဖြစ် နေ ကြပါပြီ။ ဒါ့အပြင် တရုတ်ပြည်မှာ ကလေးများနေ့ (ဇွန်လ-၁-ရက်နေ့)ဆိုရင် ကလေးပညာပေးကားတွေ ပြတတ်ပါတယ်။ မပါမပြီး ကားလေး တကားကတော့ -- “တပ်သားငယ်လေး--ကျန်းကဲ” ဆိုတဲ့ကားပါ။ ဂျပန်ခုခံရေးစစ်ပွဲအတွင်း ဂျပန်က အဘွားဖြစ်သူကိုသတ်ပစ်လိုက်လို့ အစ ကတည်းက မိဘမဲ့ကလေး-ကျန်းကဲဟာ သူတို့ရွာနားပတ်လည်မှာ လှည့်လည်လှုပ်ရှားနေတဲ့ ပြောက်ကျားတပ်ကို ရအောင်ရှာပြီး-ဆက်သား အဖြစ် တာဝန်ယူ လုပ်ကိုင်ရတာတွေ-ဂျပန်စခန်းတွေအကြားသွားပြီး ထောက်လှမ်းရတာတွေ- စတဲ့အကြောင်းအရာတွေပါ။

ဒါတွေကတော့-တရုတ်တော်လှန်ရေးတပ်ဖွဲ့များအတွင်း မလွှဲမရှောင်သာရောက်ရှိလာကြရတဲ့ ကလေးစစ်သားများရှိခဲ့တယ်ဆိုတာကို နိဒါန်းချီ တာပါ။

(၂)

ထို့အတူပဲ ကျွန်မတို့ရဲ့ဗမာပြည်တလွှားရှိခဲ့တဲ့ ရှိဆဲလည်းဖြစ်တဲ့ တော်လှန်ရေးတပ်ဖွဲ့များအတွင်းမှာလည်း ကလေးအရွယ် (မိဘလူကြီးသူမများ အုပ်ထိမ်းမှုအောက်မှာ အပူအပင်မဲ့စွာ စာသင်ကြားနေရမယ့်အရွယ်လေးများ) အများအပြား ရှိခဲ့ပါတယ်။ ဒါတွေဟာ ကျွန်မတို့ရဲ့စိတ်ဆန္ဒတွေနဲ့ ကင်းစွာဖြစ်ပေါ်လာခဲ့တဲ့ လက်တွေ့ဖြစ်ရပ်တွေပါ။ လူမျိုးပေါင်းစုံပြည်သူတွေအပေါ် ရန်သူလိုသဘောထားပြီး မပြီးနိုင်မစီးနိုင် စစ်ဆင်တိုက်ခိုက် ပြီး ပြည်တွင်းစစ်ကြီးအတွင်း စီးပွားရေးအရလည်း မတန်မဆချမ်းသာလာ၊ အင်အားအရလည်း ဘယ်သူမှမယှဉ်နိုင်အောင် ကြီးထွားလာနေပြီး ဩဇာအာဏာ ကြီးမားလာလို့ ပြည်တွင်းစစ်ကို ‘ပိုးမွေးသလို မွေးနေတဲ့’ ဗမာ့တပ်မတော်တွင်းက ကလေးစစ်သားများအကြောင်းကတော့ မကြာခဏ သတင်းတွေမှာ ပါလာပြီးဖြစ်ပါတယ်။

ဒီကလေးစစ်သားပြဿနာဟာ ပြည်တွင်းစစ်ကြီးရှိနေသရွေ့ ဆက်လက်ရှိနေမှာပါ။ ဒီပြဿနာကို အရင်းအမြစ်ကနေ တကယ်ပဲဖြေရှင်း ချင်ရင် တော့ ဒီပြည်တွင်းစစ်ကြီးကိုရပ်စဲပြီး လူမျိုးပေါင်းစုံ၊ အဖွဲ့အစည်းပေါင်းစုံ၊ လူတန်းစားအလွှာပေါင်းစုံ၊ တန်းတူအခွင့်အရေးရရှိနိုင်တဲ့ ဘက်စုံက ပြည့်စုံတဲ့ ပြည်တွင်းငြိမ်းချမ်းရေးတရပ် ရအောင်ဝိုင်းဝန်းကြိုးစားကြရမှာပါ။

(၃)

ဒီနေရာမှာ ကျွန်မကြုံတွေ့ခဲ့ရတဲ့ ကလေးစစ်သားလေးများအကြောင်း ပြောပြပါဦးမယ်။

ကျွန်မတို့ ဗမာပြည်ကွန်မြူနစ်ပါတီခေါင်းဆောင်တဲ့ ပြည်သူ့တပ်မတော်က ၁၉၆၈ ခုနှစ် ဇန်နဝါရီမှာ ဗမာပြည်အရှေ့မြောက်ဒေသ ‘နယ်စိမ်း’ ကို တိုးဝင်ပြီး အဲဒီဒေသကပြည်သူတွေ ဝ၊ ရှမ်း၊ လားဟူ၊ အခါ (အများစုက-ဝ-လူမျိုး) စတာတွေကို လွတ်မြောက်စေခဲ့ပါတယ်။ ဒေသခံ-အုပ်ချုပ် သူများဖြစ်တဲ့စော်ဘွားများ နယ်စားပယ်စားများလက်အောက်မှာ ကျေးကျွန်များသဖွယ် အလွန်ပင်ပန်းဆင်းရဲကြီးစွာနေထိုင်ခဲ့ရတဲ့ လူအများ အပြားလွတ်မြောက်လာခဲ့ကြပြီး ကျွန်မတို့တပ်ထဲ အလုံးအရင်းနဲ့ဝင်ရောက်လာကြပါတယ်။ အဲဒီအုပ်တွေထဲမှာကလေးအုပ် တအုပ်လည်း ပါ လာပါတယ်။

အဲဒီဒေသတွေမှာ စော်ဘွားတွေက ပဒေသရာဇ်တပိုင်း၊ ကျေးကျွန်တပိုင်းစနစ်နဲ့ အုပ်ချုပ်နေတာပါ။ သူတို့က သူတို့ဒေသရဲ့ခေတ်နောက်ကျတဲ့ ကျေးကျွန်စနစ်နဲ့ ပဒေသရာဇ်စနစ်ရဲ့အစဉ်အလာဟောင်း၊ ဓလေ့ထုံးစံဟောင်းဖြစ်တဲ့ ‘ခေါင်းဖြတ်ယဇ်ပူဇော်’တဲ့အစဉ်အလာကို ထိန်းသိမ်း ထားခဲ့ တာပါ။ ဒီလို ယဇ်ပူဇော်ဖို့ကလေးငယ်လေးတွေကို ဝယ်ထားတတ်ပါတယ်။ တချို့ကတော့ ကြွေးနဲ့သိမ်းခံထားရတာဖြစ်ပြီး တချိုကတော့ အုပ်စု တိုက်ပွဲတွေမှာ ရှုံးတဲ့အုပ်စုမှကလေးများကို ဖမ်းခေါ်လာတာပါ။ အဲဒီကလေးတွေအရွယ်ရောက်ရင် (၁၅-၁၆နှစ်) သူတို့ရဲ့ထုတ်လုပ်ရေး တောင်ယာ စိုက်ခင်းများကောင်းဖို့ (ဆန်ရေစပါးတိုးများဖို့ဆိုပြီး) ခေါင်းဖြတ်ပြီး ယဇ်ပူဇော်တာခံရပါတယ်။ သူတို့လေးတွေရဲ့ပါးမှာ ပါးရဲထိုးထား ပြီး အမှတ်အသားပြုထားပါတယ်။ ရွာတိုင်းမှာအဲသလိုကလေးမျိုး ဆယ်ဂဏန်းထိ ရှိတတ်ပါတယ်။

ကျွန်မတို့တပ်တွေက အဲဒီဒေသရှိ စစ်အစိုးရ ဖောက်ပြန်ရေးတပ်တွေ၊ ကူမင်တန်တပ်ကြွင်းတပ်ကျန်တွေ၊ ကာကွယ်ရေးတပ်ဖွဲ့တွေစတဲ့ ဖောက်ပြန်ရေးတပ်တွေကို တိုက်ခိုက်ချေမှုန်းပြီး အဲဒီ ဒေသကိုလွတ်မြောက်စေလိုက်တဲ့အခါ စော်ဘွားဆိုးများ ထွက်ပြေးသွားပြီး အဲဒီကလေးအုပ်ကြီး ကျန်ခဲ့ပါတယ်။ စားရမဲ့မဲ့ သောက်ရမဲ့မဲ့နဲ့ (တချို့ ဆိုအဝတ်တောင်မပါဘူး။) ကလေးတွေကို ပါတီခေါင်းဆောင်တဲ့ပြည်သူတပ်မတော်က တပ်သားကလေးအဖြစ် မွေးမြူစောင့်ရှောက် မိဘမဲ့ ကျောင်းထောင်ကာ ပြုစုပျိုးထောင်ပေးခဲ့ဖူးပါတယ်။

တကယ်တော့ ကျွန်မတို့ရဲ့ပြည်သူ့ဒီမိုကရေစီတော်လှန်ရေးဆိုတာ ပါတီခေါင်းဆောင်တဲ့ လယ်သမားစစ်ပွဲပါ။ လယ်သမားတွေက စစ်ဝတ် ဝတ်ပြီး ဖောက်ပြန်တဲ့အုပ်စိုးသူလူတန်းစားကို တိုက်ပွဲဝင်နေတာပါ။ ပါတီခေါင်းဆောင်တဲ့ ပြည်သူ့တပ်မတော်ဟာ အဖိနှိပ်ခံလူမျိုးပေါင်းစုံနဲ့ ပါဝင် ဖွဲ့စည်း ထားတာပါ။ ဒါကြောင့် အဖိနှိပ်ခံလူမျိုးပေါင်းစုံရဲ့ ‘အိမ်ထောင်စုကြီး’ ဖြစ်သလို ‘ပညာသင်ကြားပေးတဲ့ ကျောင်းတော်ကြီး’ တခု ဖြစ်ပါတယ်။ အသက်အရွယ်မျိုးစုံ ကလေးလူကြီး စသဖြင့် ပျိုပျိုအိုအို ပါဝင်နေတာမဆန်းပါဘူး။ ဒီလိုတပ်မတော်သားတွေကို လူသားတွေပီပီ၊ လူ့အခွင့်အရေး ခံစားခွင့်ရှိအောင်၊ တန်းတူဆက်ဆံခွင့် ရှိရှိမဆိုတာကသာ အဓိကပါ။ ဒါတွေနဲ့ပတ်သက်လို့ဗမာပြည်ကွန်မြူနစ်ပါတီ လက်နက်ကိုင်တော် လှန် ရေး နှစ် ၃၀ ပြည့်အထိမ်းအမှတ်နဲ့ အရှေ့မြောက်နယ်စပ်ဒေသ ဖွင့်လှစ်ခြင်း ၁၀ နှစ်ပြည့် အထိမ်းအမှတ်အဖြစ် (၁၉၇၈ ခုနှစ်က) ရိုက်ကူးခဲ့တဲ့ “ငြှိမ်းမရတဲ့ မီးတောက်မီးလျှံ” မှတ်တမ်းတင် ရုပ်ရှင်ကားမှာ ထည့်သွင်းရိုက်ကူးခဲ့ဖူးပါတယ်။

ဒါ့အပြင် တော်လှန်ရေးဆိုတာ ဘယ်တော်လှန်ရေးမှ တနေ့တရက် စသဖြင့် အချိန်တိုနဲ့ ပြီးမြောက်အောင်မြင်ခဲ့တာရယ်လို့ မရှိခဲ့ဖူးပါဘူး။ ရေရှည် ဆင်နွှဲရစမြဲပါ။ ဒီလိုနဲ့ တော်လှန်ရေးသမားတွေဟာ တော်လှန်ရေးလမ်းခရီးမှာ အရွယ်ရောက်ကြတော့ တော်လှန်ရေးအိမ်ထောင်တွေ ထူထောင် ကြရတာပါ။

မိမိတို့တော်လှန်ရေးဇနီးမောင်နှံက ပွားစည်းလာတဲ့ သားသမီးရတနာတွေကို တော်လှန်ရေးထဲမှာ ပြုစုပျိုးထောင် လူလားမြောက် အောင် စောင့်ရှောက်ခဲ့ကြရတာပါ။ ဒီလိုနဲ့ အရွယ်လေးတွေ ရလာတော့ တော်လှန်ရေးထဲက စာသင်ကျောင်းမှာ စာသင်ပေး၊ တော်လှန်ရေး လက် တွေ့အတွင်းမှာ တော်လှန်ရေးလုပ်ငန်းတချို့မှာ ပါဝင်လုပ်ကိုင်ခိုင်းရင်း ဥပမာ- မိမိဘေးမှာ ကိုယ်ရံ၊ မြင်းထိန်း စသဖြင့် လုပ်ကိုင်ခိုင်းရင်း တော်လှန်ရေး တပ်သားလေးတွေ ဖြစ်လာတာပါ။ ဒါကြောင့် တော်လှန်ရေးတပ်ဖွဲ့အတွင်းမှာ တော်လှန်ရေးတပ်သားကလေးတွေ ရှိနေတာ ရှောင်လွှဲ မရနိုင်တဲ့ ဖြစ်စဉ်ဖြစ်ရပ်တခုပါ။

ကျွန်မတို့နည်းတူ ဗမာပြည် အဖိနှိပ်ခံတိုင်းရင်းသားတွေကလည်း အမျိုးသားတန်းတူရေး၊ ဒီမိုကရေစီရေးနဲ့ အဖိနှိပ်ခံဘ၀က လွတ်မြောက်ရေး အတွက် ကိုယ်တိုင်နိုင်ငံရေးပါတီ၊ ကိုယ်တိုင်တပ်မတော်တွေနဲ့ တိုက်ပွဲဝင်နေကြတာပါ။ ဒါကြောင့် သူ့အမျိုးသားတပ်မတော်ထဲ သူ့လူမျိုးတွေ အသက်အရွယ် ကြီးကြီးငယ်ငယ် ပျိုပျိုအိုအိုကလေးကစ ပေါင်းစုံပါဝင်နေတာ မထူးဆန်းပါဘူး။

တော်လှန်ရေးဆိုတာ စနစ်ဟောင်းဓလေ့ထုံးစံဟောင်းတွေကိုတိုက်ဖျက်ပစ်ပြီး လူမှုစနစ်သစ်တရပ် ထူထောင်ရေးအတွက် တိုက်ပွဲဝင်နေတာ ဖြစ် တယ်။ လူသားလူ့အဖွဲ့အစည်းအတွင်းမှာ ဆင်းရဲဒုက္ခ အနိဋ္ဌာရုံတွေကို မမြင်ချင်မတွေ့ချင်ကြလို့ တိုက်ပွဲဝင်နေကြသူတွေ ဖြစ်တယ်။ သဘာဝရဲ့ အလှတရားတွေကို မြတ်နိုးတန်ဖိုးထားသူတွေ ဖြစ်တယ်။ နှလုံးသားနူးညံ့သူတွေဖြစ်တယ်။
 တော်လှန်ရေးသမားပီပီ တော်လှန်ရေး လုပ်ငန်း တွေကို လူထုအကြား လှည့်လည်လုပ်ကိုင်နေရင်းက ဒုက္ခအဝဝရင်ဆိုင်နေရတဲ့ မိဘမဲ့ ကလေးသူငယ်တွေတွေ့ရရင် မကြည့်ရက် မရှုရက်ဖြစ်ပြီး ကောက်ယူမွေးစားမိကြတာပါပဲ။

(၄)

ဒီလိုနဲ့ကျွန်မမှာလည်း သားလေးတယောက်ရခဲ့ပါတယ်။ (ကျွန်မလိုပဲ ကျန်တဲ့ရဲဘော်တွေလည်း ကောက်ယူ မွေးစားမိခဲ့ကြတာပါပဲ။) သူ့နံမည် က -ညီရှင်း-တဲ့။ တကယ်တော့ ရတုန်းက (၃)ယောက်ပါ။ ဒါလေးက လက်ကျန်ပေါ့။ ရှေ့တန်းကပြန်လာတဲ့ တပ်ဖွဲ့တဖွဲ့က သူတို့ကောက်ရလာ တဲ့ ကလေးတွေထဲက အငယ်ဆုံးလေး(၃)ယောက်ကို ကျွန်မတို့ဆေးကျောင်း ဝင်အပ်သွားပါတယ်။ ကျန်(၂)ယောက်က ဆေးကျောင်းမှာ မပျော် ဘူး။ သူတို့ရွာသားချင်းတွေရှိတဲ့ တပ်ကိုပဲ ပြန်ချင်တယ်ဆိုပြီး တငိုငိုတရီရီဖြစ်လာလို့ ပြန်ပို့ပေးလိုက်ရလို့ သူတယောက်တည်း ကျန်ခဲ့တာပါ။

လူပုံလေးကတုတ်တုတ်ခိုင်ခိုင် အသားလေးက ညိုညိုစိုစို၊ မျက်လုံးကြီးကပြူးပြူး၊ မျက်တောင်ကော့ကြီးနဲ့ ပါးစုန့်ကြီးတွေထွက်နေတဲ့ မျက်နှာ ဝိုင်းဝိုင်းကြီးနဲ့သူလေးကို ကျွန်မမှာ မြင်မြင်ချင်း ဘယ့်နှယ်ဖြစ်မှန်းမသိပါဘူး။ မေတ္တာတွေရော၊ အသနားအကြင်နာတွေရော စုပုံပေးလိုက်မိပါ တော့တယ်။

‘သား သား’ ဆိုတာ ပါးစပ်က မချမိတော့ပါဘူး။ နံမည်တောင် မခေါ်မိပါဘူး။ သားမောင်ကောက်ရ လက်ဆွဲပြီး ကျောင်းလာအပ်တဲ့ ကျွန်မကို ခပ်ပြုံးပြုံးမျက်နှာပေးနဲ့ (သဲရန်ကော လို့)ကြည့်နေတဲ့ ဆရာရန်လင်း(ပန်းဆန်းကျောင်း-ကျောင်းအုပ်-ကွယ်လွန်) ကို အခုတောင် ပြန် မြင်ယောင် နေသေးတယ်။

ညီရှင်းလေး ကျောင်းပြီးတော့ ဆေးရုံကသူနာပြုသင်တန်းတက်ခိုင်းပြီး ဆေးရုံမှာပဲ အလုပ်လုပ်ခိုင်းထားပြီး နယ်လှည့်ဆေးအဖွဲ့တွေနဲ့လည်း ပါပါ သွားတတ်ပါတယ်။ သူနာပြု ၁ နှစ်တန်သည် ၂ နှစ်တန်သည်လုပ်ပြီးမှ ဖော်ပြချက်ကောင်းမှ အဆင့်မြင့် ဆရာဝန်သင်တန်းတက်နိုင်တာပါ။ ဒါ့ ကြောင့် ကျွန်မက သူ့ကို သိပ်မျက်ခြည်ပြတ်မခံဘဲ နောက်တကြိမ်ဖွင့်မယ့် ဆရာဝန်သင်တန်းကိုတက်ခိုင်းမယ်လို့ လျာထား ထားပါတယ်။

ဒီမှာတင် မောင်မင်းကြီးသားလေးက ဗွေဖောက်လာပါတယ်။ ဆေးရုံရိက္ခာရုံက ကလေးမလေးတဦးနဲ့ လက်ထပ်ခွင့်ပြုဖို့ စာတင်လာတာပါ။ ကလေးမလေးက ရုပ်ရည်လေးက သားနားပေမယ့် အစွန်းအထင်းရှိနေသူကလေးလို့ ဆိုကြပါတယ်။ ကျွန်မတို့အခြေခံဒေသထဲကို တဖက်နိုင်ငံ က ကုန်သည်လိုလို ပွဲစားလိုလိုလူနဲ့လိုက်ပြေးသွားပြီး လအချို့ကြာမှပြန်ရောက်လာသူလေးပါ။ ကျွန်မမှာ ကိုယ့်သားလူပျိုလေးကို ဒီကလေး မလေးနဲ့သဘောမတူနိုင်ဖြစ်လာတော့ ကျွန်မတို့ဆေးရုံက စည်းရုံးရေးအရ သူတို့ ၂ ယောက်နဲ့ တိုက်ရိုက်သက်ဆိုင်တဲ့ရဲဘော်က ကဲ-ဆရာမ သားကို ကိုယ်တိုင်ပဲဆွေးနွေးတော့ ကျွန်တော်တို့တော့ လက်မြှောက်ပြီဆိုပြီးပြောလာလို့ တနေ့ နေ့လည် ကျွန်မကို လာတွေ့ဖို့ ချိန်းလိုက်ပါ တယ်။

ကျွန်မအိမ်ထဲ မရဲတရဲဝင်လာပြီး ကျွန်မရှေ့ထိုင်ခုံမှာထိုင်၊ မဝံ့မရဲနဲ့ ကျွန်မကိုလှမ်းကြည့်လိုက်တဲ့ သူ့မျက်လုံးလေးတွေကိုမြင်လိုက်ရတဲ့အခါ-ကျွန်မတို့ငယ်ငယ်က အဘွားပြောပြဆုံးမထားတဲ့စကားတွေ ခေါင်းထဲပေါ်လာပါတယ်။ “သမီးတို့ မိစုံဖစုံနေရတာ အလွန်ကံကောင်းတာ။ ရှေး ကုသိုလ် အကျိုးပေးကောင်းလို့ပေါ့။ မိမစုံဖမစုံကြီးရတဲ့ကလေးတွေကို ကြည့်လိုက်စမ်း။ မျက်နှာလေးတွေက ညှိုးနေတာ။ သမီးတို့လို လက်လက်ထ မနေနိုင်ဘူး။ ကိုယ်လောက် ကံမကောင်းရှာတဲ့ သူလေးတွေအပေါ် ညှာရတယ်မြေးရဲ့” …တဲ့။

ဟုတ်ပ။ ကျွန်မသားက မျက်နှာလေးညှိုးရုံမက မျက်လုံးလေးတွေကရီဝေပြီး ဆွေးရိပ်တွေတောင် သန်းနေသလိုပါလား။ မပျက်ပျက်အောင် ဖျက် မယ်ဆိုပြီး ဒေါင်းတင်ထားတဲ့ကျွန်မ နာရီဝက်လောက် စကားအခြေအတင်ပြောပြီးတဲ့ နောက် နောက်ဆုံး အရှုံးပေးလိုက်ရပါတယ်။

ကဲ.. သူက ကျွန်မကို ရှင်းပြတဲ့စကားတွေကိုလည်း ကြည့်ပါဦး။ “ဒေါ်ဒေါ်(သူက ကျွန်မကို ဒေါ်ဒေါ်လို့ခေါ်တယ်) တို့က သူ့ကို ဆတ်ကော့ လတ် ကော့ ပျံတံတံ ကောင်မလေးလို့မြင်တယ်ဆိုတာ ကျွန်တော်သိပါတယ်။ (ကျွန်မ သားသမီးချင်း မစာမနာ စိတ်လိုက်မာန်ပါ သုံးလိုက်မိတဲ့ စကားလုံး အတိအကျပါပဲ။ သူက ဘယ်ကပြန်ကြားထားမှန်း မသိ။) တကယ်တော့ သူက သိပ်ရိုးတာ။ စိတ်လည်း သိပ်ကောင်းတာ။ ဒါ့ကြောင့် သူ အညာ ခံ လိုက်ရတာ။ အဲဒါကို ကျွန်တော်ကသနားမိတာပါ” တဲ့။ ပြီး ဆက်ပြောလိုက်ပုံက… “ဒါပေမဲ့ ဒေါ်ဒေါ်သဘောမတူရင် ကျွန်တော်မယူပါဘူး ”…. တဲ့လေ။ ဘယ်မိဘများ ဒီလို အပျော့ဆွဲ ဆွဲတတ်တဲ့ သားသမီးအပေါ်တင်းခံနိုင်ပါ့မလဲ။

ဪ ခုနေကာ သားတွေ သမီးတွေနဲ့ စည်ပင်ချမ်းသာနေရော့မယ်။ ဝတောင်တန်းပေါ်မှာ ကျွန်မ ချန်ထားရစ်ခဲ့ရတဲ့ သားတယောက်အကြောင်းပါ။ ဗမာပြည်တဝန်းရှိ ကလေးသူငယ်များ အားလုံးစိတ်ချမ်းသာ ကိုယ်ချမ်းသာနဲ့ ပညာသင်ကြားနိုင်ကြ ပါစေ။ ကလေးစစ်သားဘဝမျိုးက ကင်းဝေးကြပါစေ။

၎-၁၀-၂၀၁၆။

မှတ်ချက်။ ။ အရေးတော်ပုံဂျာနယ်။အတွဲ၂- အမှတ် ၇--မှ။