နန်းတင်ထွေး ● အပြောင်းအလဲကို စောင့်မျှော်နေတဲ့ နာဂဒေသ


နန်းတင်ထွေး ● အပြောင်းအလဲကို စောင့်မျှော်နေတဲ့ နာဂဒေသ
(မိုးမခ) ဇန်နဝါရီ ၃၁၊ ၂၀၁၇

နာဂတောင်တန်းတွေကြားထဲမှာ လဟယ်မြို့လေးဟာ တိတ်တိတ်ဆိတ်ဆိတ် ရှိလှပါတယ်။

ဆင်းရဲမွဲတေမှုနဲ့ ပဋိပက္ခတွေကြောင့် ချွတ်ခြုံကျနေတဲ့ နိုင်ငံမှာ အမှန်တကယ် ပြောင်းလဲမယ်လို့ ကြွေးကြော်ခဲ့တဲ့ အတိုက်အခံပါတီ အစိုးရဖွဲ့နိုင်ခဲ့တာကြောင့် ပြည်တွင်းပြည်ပက စောင့်ကြည့်နေကြပါတယ်၊ ဒါပေမဲ့ အစိုးရသစ် တက်လာပြီး တစ်နှစ်ပြည့်ခါနီးအချိန်မှာတော့ နိုင်ငံရဲ့အဆင်းရဲဆုံးနဲ့ ဖွံ့ဖြိုးမှု အနိမ့်ကျဆုံး ဒေသ  နာဂတောင်တန်း  အခြေအနေက အရင်အတိုင်းပါပဲ။


  နာဂကိုယ်ပိုင် အုပ်ချုပ်ခွင့်ရ ဒေသ ဦးစီးအဖွဲ့ ရုံးစိုက်ရာ လဟယ်မြို့ကို ၂၀၁၆ စက်တင်ဘာလက တွေ့ရပုံ  (ဓာတ်ပုံ - နန်းတင်ထွေး)

“အခုထိတော့ ဘယ်လို အပြောင်းအလဲမှ မတွေ့သေးဘူး” လို့ နာဂ ကိုယ်ပိုင်အုပ်ချုပ်ခွင့်ရဒေသ အုပ်ချုပ်ရေးရုံး၊ ညွှန်ကြားရေးမှူး ဦးသိန်းဇော်က ဆိုပါတယ်။

အိန္ဒိယနယ်စပ်က နာဂကိုယ်ပိုင်အုပ်ချုပ်ခွင့်ရဒေသဟာ လဟယ်၊ လေရှီး၊ နန်းယွန်း မြို့နယ် သုံးခုကို ပေါင်းထားတာဖြစ်ပြီး လူဦးရေ ၁၂ဝ,ဝဝဝ ကျော် ရှိပါတယ်။ ၂ဝ၁၄ စက်တင်ဘာက စလို့ လဟယ်ဟာ လျှပ်စစ်မီး ၂၄ နာရီ ရရှိခဲ့ပါတယ်။

● ဆက်သွယ်ရေး
မပြောင်းလဲသေးတဲ့ လဟယ်ကို ရောက်ဖို့ ဆိုရင် လမ်း တစ်လမ်းပဲ ရှိပါတယ်။ အဲဒီလမ်းက ခန္တီးမြို့နဲ့ ဆက်သွယ်ထားတာပါ။ ဒီလမ်းဟာ မိုးရာသီ ဖြစ်တဲ့ ဇွန်ကနေ စက်တင်ဘာအတွင်းမှာ သွားလာလို့မရပါဘူး။ ကျန်တဲ့အချိန်တွေမှာတော့ ဒေသတွင်း သွားလာဖို့အတွက် မော်တော်ဆိုင်ကယ်တွေကိုသာ အားကိုးနေရတာပါ။ လမ်းအခြေအနေဟာ မြန်မာနိုင်ငံရဲ့ အခြားဒေသတွေနဲ့ စိတ်ကူးနဲ့တောင် နှိုင်းယှဉ်လို့မရအောင် ဆိုးဝါးပါတယ်။ မြေပြို၊ တောင်ကြားလမ်းတလျှောက် လမ်းချော်မှုတွေနဲ့ ကြုံရင် နာရီနဲ့ချီကြာအောင် ပိတ်နေတတ်တဲ့လမ်းပါ။ နွေရာသီမှာ လေးဘီးယက် အမြင့်ကားတွေ၊ ပစ်ကပ်ကားတွေ သွားလို့ ရနိုင်ပေမဲ့ မော်တော်ဆိုင်ကယ်ကို သုံးခြင်းဟာ နာဂ ကိုယ်ပိုင်အုပ်ချုပ်ခွင့်ရဒေသအတွက် လက်တွေ့ပိုကျပါတယ်။  

စက်တင်ဘာလကုန်ပိုင်းက လဟယ်မြို့ အပြင်ဘက်မှာ တွေ့ရတဲ့ ဆိုင်ကယ်သမား  (ဓာတ်ပုံ - နန်းတင်ထွေး)

လဟယ်ကနေ ခန္တီးကို သွားတဲ့ ခရီးလမ်းဟာ အဲဒီလို ခက်ခက်ခဲခဲ သွားလာရတာကြောင့် တစ်ရက်နီးပါး ကြာတတ်ပါတယ်။ စီးပွားရေးမြို့တော် ရန်ကုန်ကနေ သွားမယ်ဆိုရင်တော့ ၂ ရက် ကြာပါမယ်။ ရန်ကုန်ကနေ မန္တလေး၊ မန္တလေးကနေ ခန္တီးထိ လေယာဉ် ၂ ဆင့်စီးရမှာ ဖြစ်ပြီး၊ ခန္တီးကနေ ချင်းတွင်းမြစ်ကို တစ်ရက်ကြာ ဖြတ်ကျော်ရမှာပါ။ ချင်းတွင်းမြစ်တွင်းခရီး ပြီးရင်တော့ လမ်းခရီးလည်း အဆင်ပြေမယ်ရင် ဆိုင်ကယ် ၃ နာရီလောက် စီးရုံနဲ့ လဟယ်ကို ရောက်နိုင်ပါပြီ။

၂၄ နာရီ လျှပ်စစ်မီးလာတဲ့ လဟယ်မှာ အစိုးရသစ်လက်ထက် အပြောင်းအလဲတစ်ခုအနေနဲ့ ဆိုရင်တော့ ပြီးခဲ့တဲ့ ရက်ပိုင်းအတွင်း စတင် အသုံးပြုနိုင်တဲ့ 3G ဖုန်းလိုင်း ပေါ်ပေါက်လာခြင်းပါပဲ။  ဒီအခြေအနေ ဖြစ်ပေါ်မလာခင်ကတော့ အင်တာနက် ချိတ်ဆက်မရနိုင်တဲ့ 2G ဖုန်းတွေကိုပဲ သုံးခဲ့ရတာပါ။

ကုလသမဂ္ဂ ဖွံ့ဖြိုးရေးအစီအစဉ်ရဲ့ ၂ဝ၁၅ ဖေဖော်ဝါရီလ အစီရင်ခံစာမှာတော့  စစ်ကိုင်းတိုင်းဒေသကြီးအစိုးရ လက်အောက် နာဂဒေသဟာ လဟယ်ရဲ့ ဖွံ့ဖြိုးမှုနည်းပါးတဲ့အချက်ကို ဖော်ပြထားပါတယ်။ ဒီအစီရင်ခံစာရေးဖို့ အချက်အလက်တွေကို လဟယ်၊ ကလေးဝ၊ ကန့်ဘလူနဲ့ မုံရွာမြို့ ဒေသခံတွေဆီကနေ ၂ဝ၁၄ မှာ ကောက်ယူခဲ့တာပါ။ ၃ နှစ်အတွင်း သူတို့ရဲ့ ဝင်ငွေ အကြောင်း မေးမြန်းရာမှာ လဟယ်ဒေသခံတွေရဲ့ ၁၈ ရာခိုင်နှုန်းကပဲ သူတို့ဝင်ငွေ တိုးလာတယ်လို့ ဖြေဆိုပါတယ်။  ကျန်တဲ့ ၃ မြို့မှာတော့ ဝင်ငွေတိုးလာတယ်လို့ ပြောတဲ့သူက  ၄ဝ ရာနှုန်း ဝန်းကျင်ရှိနေပါတယ်။

နာဂရိုးရာ စာပေနဲ့ ယဉ်ကျေးမှု ကော်မတီဝင်တစ်ဦးဖြစ်တဲ့ ဦးအေးဇတ်ကလည်း အလားတူ သုံးသပ်ပါတယ်။

“ဒီဒေသက ဖွံ့ဖြိုးရေးအတွက် အစိုးရသစ်အနေနဲ့ လုပ်စရာတွေ အများကြီး ရှိနေတယ်။ အခုချိန်အထိ သူတို့ ဘာမှ မလုပ်ပေးသေးဘူး” လို့ ခန္တီးမြို့မှာ တွေ့ရတဲ့ ဦးအေးဇတ်က ညင်ညင်သာသာ စီးဆင်းနေတဲ့ ချင်းတွင်းမြစ်အနီးက လက်ဘက်ရည်ဆိုင်မှာ ထိုင်နေရင်း ပြောပါတယ်။ ဒေသခံတချို့ကတော့ ဆိုင်နားမှာ ခြင်းခတ်နေကြပါတယ်။

ခန္တီးဟာ နာဂ ကိုယ်ပိုင်အုပ်ချုပ်ခွင့်ရဒေသထဲ မပါဝင်ပေမဲ့ ဒေသတွင်း အဓိက မြို့ကြီးပါ။ ခန္တီးလူဦးရေ ၄၇ဝ,ဝဝဝ ကျော်မှာလည်း အများစုက နာဂတိုင်းရင်းသားတွေပါပဲ။  ဒေသတွင်းမှာ လေယာဉ်ကွင်းရှိတဲ့ တစ်ခုတည်းသော မြို့ဖြစ်ပြီးတော့ ကမ္ဘာလှည့်ခရီးသည်တွေ စိတ်ဝင်တစား လာရောက်လေ့ရှိတဲ့ နာဂရိုးရာ နှစ်သစ်ကူးပွဲကျင်းပရာ လဟယ်မြို့ကို သွားနိုင်တဲ့ တစ်ခုတည်းသော ဂိတ်ဝမြို့လည်း ဖြစ်ပါတယ်။ 


ထန်ကော်လားမားရွာကနေ တွေ့ရတဲ့ တိမ်ဖုံးတောင်တန်းများ  (ဓာတ်ပုံ - နန်းတင်ထွေး)

ခန္တီးမှာ လျှပ်စစ်မီးကို ညနေ ၆ နာရီမှာ ရနိုင်ပြီး ည ၁ဝ နာရီကျော်ရင်တော့ တစ်မြို့လုံး မှောင်သွားပါပြီ။ ညဘက်လမ်းတွေတော့ မော်တော်ဆိုင်ကယ် မီးရောင်တွေပဲ ရှိတတ်ပါတယ်။

ဒေသခံတွေကတော့ အစိုးရသစ်လက်ထက်မှာ ဆေးရုံဆေးခန်းတွေ ထပ်ပြီးဆောက်ပေးဖို့၊ လမ်းပန်း ဆက်သွယ်ရေး ပိုမို ကောင်းမွန်လာဖို့၊  ပညာရေးကဏ္ဍမြင့်တက်လာဖို့  မျှော်လင့်ပါတယ်။  လက်ရှိ နာဂ ကိုယ်ပိုင် အုပ်ချုပ်ခွင့်ရဒေသတစ်ခုလုံးမှာ မြို့နယ်အဆင့်ဆေးရုံ ဆိုလို့ တစ်ခုပဲရှိပါတယ်။  အဲဒါကတော့ လဟယ်မြို့နယ်မှာပါ။

● ကူးစက်ရောဂါ
နာဂကိုယ်ပိုင်အုပ်ချုပ်ခွင့်ရဒေသရဲ့ တစ်ခုတည်းသော အခြေခံပညာ အထက်တန်းကျောင်းက လဟယ်မှာ ရှိပါတယ်။ ပြီးခဲ့တဲ့နှစ် နိုဝင်ဘာ ၂၉  ပြည်သူ့လွှတ်တော် အစည်းအဝေးမှာ နယ်စပ်ရေးရာ ဒု-ဝန်ကြီး ဗိုလ်ချုပ်သန်းထွဋ်ရဲ့ ပြောကြားချက်အရတော့ နာဂဒေသမြို့တိုင်းမှာ  နယ်စပ်ဒေသတိုင်းရင်းသား လူငယ်များဖွံ့ဖြိုးရေး သင်တန်းကျောင်းတွေ ဖွင့်ထားတယ်လို့ ဆိုပါတယ်။

ပြီးခဲ့တဲ့နိုဝင်ဘာပြည်သူ့လွှတ်တော်အစည်းအဝေးတွေမှာတော့ နာဂဒေသအကြောင်း ဆွေးနွေးမှုတွေ သိသိသာသာ ရှိခဲ့ပါတယ်။


ထန်ကော်လားမားရွာက ကလေးငယ်တချို့  (ဓာတ်ပုံ - နန်းတင်ထွေး)

လဟယ်မြို့နယ်ထဲက ကျေးရွာ ၂ ခုရဲ့ လှေကားထစ် ကုန်းမြင့်လယ်ယာမြေ ဖော်ထုတ်ရေးအတွက် ဒေသကို စူးစမ်းလေ့လာခြင်း၊ နည်းပညာကူညီခြင်း စသည့် အစီအစဉ်တွေကို လာမယ့် ဘဏ္ဍာနှစ်မှာ ပြုလုပ်ပေးမယ်၊   နယ်စပ်ဈေးတွေ ဖွင့်နိုင်ဖို့လည်း အိန္ဒိယနဲ့ ညှိနှိုင်းနေတယ်လို့ သက်ဆိုင်ရာ ဝန်ကြီးဌာနတွေက ပြောကြပါတယ်၊ နယ်စပ်ဈေးပေါ်ပေါက်လာရေးအစီအစဉ် နှောင့်နှေးနေရခြင်းကတော့ "စစ်ကိုင်းတိုင်းဒေသကြီးအတွင်းရှိ ပထဝီနိုင်ငံရေး အခြေအနေများ"ကြောင့် ဖြစ်တယ်လို့ ဆိုပါတယ်။

ဖွံ့ဖြိုးရေး အလှမ်းဝေးနေပေမယ့် ယခင်သမ္မတရော ယခုသမ္မတပါ နာဂဒေသ နှစ်သစ်ကူးပွဲတော်တွေကို ကိုယ်တိုင်ကိုယ်ကျ တက်ရောက် အားပေးပြီး သူတို့ရဲ့ ခရီးစဉ်တွေကို အစိုးရအာဘော်သတင်းစာ မျက်နှာဖုံးတွေမှာ ဖော်ပြခဲ့ကြပါတယ်။

နာဂဒေသဟာ သူ့ရဲ့ဝေးလံခေါင်သီမှုကြောင့်ပဲ မြူဆိုင်းနေတဲ့ တောင်တွေ၊ သစ်တောတွေ၊ သစ်ပင်တွေနဲ့ လိပ်ပြာတွေဟာ မူရင်းသဘာဝအလှအတိုင်းပဲ ရှိနေဆဲပါ။ နာဂဒေသဟာ ဇွန်လအတွင်းမှာ အင်မတန် ဆိုးဝါးတဲ့ ဝက်သက်ရောဂါတမျိုး ဖြစ်ပွားခဲ့ပါတယ်။ ကူးစက်မြန်ပြင်းထန်တဲ့ရောဂါကြောင့် နှစ်လအတွင်း လူ့အသက်ပေါင်း ၈ဝ ကျော် ဆုံးရှုံးခဲ့ရပြီး နောက်ဆုံးမှာ ဒေသန္တရအစိုးရ၊ နာဂရိုးရာနှင့်ယဉ်ကျေးမှု ကော်မတီတို့ ဒီရောဂါကို ထိန်းချုပ်ဖို့ လုပ်ဆောင်ခဲ့ကြပါတယ်။ အဲဒီရောဂါဖြစ်ပွားတဲ့ရွာတွေမှာ အခြေခံကျန်းမာရေး ဝန်ဆောင်မှုပေးမယ့် ကျန်းမာရေးမှူးတွေ ဘယ်တုန်းကမှ မရှိခဲ့ပါဘူး။ ကူးစက်ရောဂါဖြစ်ပွားတဲ့ စက်တင်ဘာလ အတွက်ပဲ  သူနာပြု ၅ဝ ကျော် သွားရောက်ဖို့ ကျန်းမာရေးဝန်ကြီးဌာနက တာဝန်ပေးခဲ့ပါတယ်။  


လဟယ်မြို့နဲ့ ထန်ကော်လားမားရွာကြားမှာ တွေ့ရတဲ့ ကုန်တင်ဆိုင်ကယ်သမားနှစ်ဦး   (ဓာတ်ပုံ - နန်းတင်ထွေး)

တိမ်တွေကို အပေါ်စီးက လှမ်းမြင်နေရတဲ့ ထန်ကော်လားမားရွာကလေးဟာ တောင်တန်းပေါ်မှာ တည်ရှိပြီး ဒီရွာကို တက်တဲ့လမ်းကတော့ အင်မတန် မတ်စောက်တဲ့လမ်း ဖြစ်ပါတယ်။ တိမ်တွေ အဆုပ်လိုက် အဆုပ်လိုက် ဖုံးအုပ်ထားတဲ့ အဲဒီတောင်ပေါ်ရွာကို ရောက်ဖို့ လဟယ်ကနေ မော်တော်ဆိုင်ကယ်ခရီး တစ်ရက် နှင်ရမှာပါ။ လမ်းမှာတော့ တောတောင်တွေ၊ စမ်းချောင်းတွေ ဖြတ်သန်းရပါမယ်။ ဝေးလံခေါင်သီပြီး ငြိမ်သက်အေးချမ်းနေတဲ့ ရွာကိုလည်း ကူးစက်ရောဂါ ရောက်ရှိခဲ့တာကြောင့် ဒေသခံ  ၂၆ ယောက် ဆုံးပါးခဲ့ရပါတယ်။

ရွာရဲ့ အကြီးအကဲတစ်ဦး ဖြစ်တဲ့ ဦးချူတိုက်ဟာ   ဝင်ပေါက်တံခါးတစ်ခုပဲ ရှိတဲ့၊ ပြတင်းပေါက်မပါတဲ့ နာဂရိုးရာ သက်ငယ်မိုး၊ သစ်သားအိမ်ရဲ့ရှေ့မှာ ထိုင်နေပါတယ်။ ကူးစက်ရောဂါကျတဲ့အချိန်အခါအကြောင်း သူက ပြောပြတဲ့အခါ အဲဒီကာလဟာ ဝမ်းနည်းစရာကောင်းတဲ့ အခိုက်အတန့်လို့ သူက ဆိုပါတယ်။ အဲဒီအချိန်မှာ တစ်ရွာလုံး ကယ်ရာမဲ့သလို ခံစားခဲ့ရပုံကို ပြန်ပြောပြပါတယ်။ ဒေသရဲ့စော်ဘွားတစ်ယောက်လိုဖြစ်နေတဲ့  ဦးချူတိုက်မှာ နိုင်ငံရဲ့ လတ်တလော အခြအနေတွေအကြောင်း မှတ်ချက်ပေးစရာ သိပ်မရှိပါဘူး။

“ကျွန်တော် ဒေါ်အောင်ဆန်းစုကြည်ကို သိပါတယ်၊ ယုံလည်း ယုံတယ်။ ဒါပေမဲ့ အခုချိန်အထိ ကျွန်တော်တို့အတွက် ဘာအပြောင်းအလဲမှ မရှိသေးဘူး”  လို့ ဦးချူတိုက်က ပြောလိုက်ပါတယ်။    ။