အဲလိုထူး ● ကျွန်တော်တို့စာကြည့်တိုက်ကလေး အရင်ကနဲ့မတူတော့ဘူး

အဲလိုထူး ● ကျွန်တော်တို့စာကြည့်တိုက်ကလေး အရင်ကနဲ့မတူတော့ဘူး
(မိုးမခ) ဖေဖော်ဝါရီ ၁၁၊ ၂၀၁၇

ကျွန်တော်တို့ စာကြည့်တိုက်ကလေး… အရင်ကနဲ့မတူတော့ဘူး။ အရှင်းဆုံးပြောရရင် စာအုတ်တွေအများကြီးပိုင်ဆိုင်သွား ပြီ။ အပတ်စဉ်ထုတ်ဂျာနယ်တွေဆို တောင်ပုံရာပုံ၊ စာလာဖတ်တဲ့သူတွေကလည်း မနက်တကျောနဲ့ ညနေတကျောမှာ ကု လားထိုင်အပြည့်နီးပါးအပြင် မိုးတိုးမတ်တပ်တွေပါထပ်ကုန်တယ်။ တနေ့ တနေ့ စာအုပ်အငှားစာရင်းကိုကြည့်လိုက်ရင် လူဦးရေ ခြောက်ဆယ်ကျော် ခုနှစ်ဆယ်နီးပါး။ ဒါဆို ကျွန်တော်တို့ မြို့သူမြို့သားတွေ စာဖတ်ကြပြီပေါ့။

ကျွန်တော်တို့ စာကြည့်တိုက်ကလေး… အရင်ကနဲ့မတူတော့ဘူး။ ကျွန်တော်တို့မြို့ စာပေဟောပြောပွဲမှာ ကျွန်တော်ထည့် ဟောဘူးတယ်။ ကျွန်တော်တို့ ငယ်ငယ်တုန်းက စာဖတ်ရပုံကလေး။ ကျွန်တော်တို့ဈေးထောင့်မှာ ပစ္စည်းအစုံရောင်းတဲ့ အခုခေတ်အခေါ် စတိုးဆိုင်လိုဟာမျိုး တဆိုင်ရှိတယ်။ မိန်ကလေးခေါင်းမှာညှပ်တဲ့ကလစ်ကစပြီး နှစ်ကျပ်တန်ထီလက် မှတ် အဆုံးထိ ရောင်းတယ်။ ပိုင်ရှင်က တရုတ်လူမျိုး၊ သမီးတွေလည်း အများကြီးရှိတယ်။ အဲဒီဆိုင်မှာ အပတ်စဉ်ထုတ် ရွှေသွေး စာစောင်ချိတ်ထားတယ်။ အဲဒီခေတ်က ရွှေသွေးတစောင်ကို တကျပ်လားမသိပါဘူး။ ကိုယ်တိုင်ဝယ်မဖတ်နိုင်တော့ ဈေးကို တိတိကျကျမသိ။ သူဋ္ဌေးသားသူငယ်ချင်းတယောက်က အမြဲတမ်းဝယ်ဖတ်တယ်။ ကလေးဘဝဆိုတော့လည်း သူငယ်ချင်း ဝယ်တဲ့နောက် လိုက်ငမ်းတာပေါ့။ အရွယ်အားဖြင့် ဘာရှိဦးမှာလဲ။ နှစ်တန်းသုံးတန်းပေါ့။ ကြာတော့ ဆိုင်ရှင်တရုတ်ကြီးက မေးပါလေရော။ "မင်း…ဘယ်နှတန်းလဲ" တဲ့။ "ကျွန်တော် နှစ်တန်းပါ၊ သုံးတန်းပါပေါ့"။ "ဒါဆို..စာဖတ်တတ်နေပြီပဲ။ ရွှေသွေး တွေကို မဝယ်ပဲ မကိုင်နဲ့.."တဲ့။ အကြောင်းရင်းကတော့ မင်းစာဖတ်တတ်နေပြီ။ ရွှေသွေးစာစောင်ကို ပိုက်ဆံမပေးပဲ အလ ကားမဖတ်နဲ့လို့ ပြောတာပါပဲ။ ဟုတ်ပါပြီ။ အခုတော့ ကျွန်တော်တို့ စာကြည့်တိုက်ကလေး အရင်ကနဲ့မတူတော့ပါဘူး။

ကျွန်တော်တို့စာကြည့်တိုက်ကလေး…အရင်ကနဲ့မတူတော့ပါဘူး။ ကျွန်တော်တို့ စာကြည့်တိုက်ကလေးရဲ့နာမည်က "ကြီး ပွားရေး စာကြည့်တိုက်" ဖြစ်ပါတယ်။ စာကြည့်တိုက်နာမည်က ရှေးရှေးတုန်းကနာမည်အတိုင်း ယူထားတာမို့ သိပ်တော့ မလန်းပါဘူး။ ဟိုးရှေးရှေးခေတ်က မြန်မာနိုင်ငံမှာ"ကြီးပွားရေးစာဘတ်အသင်း" ဆိုတာ နိုင်ငံလုံးဆိုင်ရာရှိခဲ့ဘူးတယ်လို့ ကြားမိတယ်။ အဲဒီအဆက်အနွယ်ပေါ့။ ဘာဖြစ်လို့လဲဆိုတော့ ကျွန်တော်တို့စာကြည့်တိုက်ကလေးစတင်တည်ထောင်တဲ့ ခု နှစ်က ၁၉၃၁ ခုနှစ်လို့ ဖော်ပြထားပါတယ်။ ကျွန်တော်မမွေးခင် နှစ်ပေါင်းလေးဆယ်လောက်ကဆိုတော့ ကျွန်တော့်အဖေ တောင် မမွေးလောက်သေးဘူးထင်ပါတယ်။ အဲဒီတုန်းကစာကြည့်တိုက်ကလေး ကျွန်တော်တို့မြို့ရဲ့ ဘယ်နေရာမှာရှိတယ် ဆိုတာ ကျွန်တော်မသိပါဘူး။ ကျွန်တော်သိတတ်တဲ့အရွယ်မှာ စာကြည့်တိုက်နေရာက ဈေးသွားရာလမ်းဘေးဈေးနားကို ရောက်နေပါပြီ။ ဒါပေမယ့် နေရာမှာရေညှိတွေတက်နေတဲ့ အုတ်ဖောင်ဒေးရှင်းအဟောင်းကြီးပဲရှိပါတယ်။ စာကြည့်တိုက် က မီးလောင်တဲ့အထဲပါသွားလို့ ပြောတာပဲ။

ကျွန်တော်တို့ စာကြည့်တိုက်ကလေး အရင်ကနဲ့မတူတော့ပါဘူး။ မီးလောင်ဒဏ်ရာရထားတဲ့စာကြည့်တိုက်မြေနေရာ အုတ် ဖောင်ဒေးရှင်းအဟောင်းကြီးကို ဘယ်သူမှလည်း စိတ်မဝင်စားကြပါဘူး။ စာကြည့်တိုက်ဆိုတာ အပိုသက်သက်အခွင့်အရေးတစ်ခုဖန်တီးထားတာလို့ အများစုက ယူဆထားပုံရပါတယ်။ အဲဒီမှာ စာကြည့်တိုက်ကို ပြန်လည်အသက်သွင်းဖို့ စာပေဝါ သနာရှင်သုံးလေးဦးက လှုပ်ရှားမှုတခုလုပ်ကြတယ်။ အဲဒီခေတ်အခါက ဗီဒီယိုပြပြီး ရန်ပုံငွေရှာခြင်းပါပဲ။ စာကြည့်တိုက်နေရာ အုတ်ဖောင်ဒေးရှင်းပေါ်မှာ အင်ဖက်မိုး ထရံကာ ဗီဒီယိုရုံဆောက်ပြီး ဗီဒီယိုရုပ်ရှင်ကားတွေကို နေ့လည် တကား၊ ည တကား အခကြေးငွေယူပြီး ပြတယ်။ အဲဒီခေတ်က နိုင်ငံခြားကားတွေပဲရှိပါတယ်။ တရုတ်ကားတွေ၊ အင်္ဂလိပ်ကားတွေပေါ့။ တကား ကို တကျပ် နှစ်ကျပ် စသည်ဖြင့်၊ မီးစက်ဖိုး ပြစက်ဖိုး နုတ်ပြီး ကျန်တဲ့ငွေက စာကြည့်တိုက်ဖြစ်မြောက်ရေးရန်ပုံငွေပေါ့။ ဒါ လည်း အတိုက်အခိုက်ပေါင်းများစွာကြောင့် ကြာကြာမခံလိုက်ပါဘူး။ ခွင့်ပြုလက်မှတ် (လိုင်စင်) မရှိပဲ ဗီဒီယိုပြခွင့် မရှိဆိုတာ နဲ့ တခန်းရပ်နားသွားရပါတယ်။ အုတ်ဖောင်ဒေးရှင်းအဟောင်းကြီးပေါ်မှာ အင်ဖက်မိုး ထရံကာတဲကြီးကတော့ ဒီအတိုင်း ပေါက်ပြဲဆွေးမြေ့လို့..။

ကျွန်တော်တို့စာကြည့်တိုက်ကလေး… အရင်ကနဲ့မတူတော့ပါဘူး။ လူတွေရဲ့အသိစ်ိတ် ပွင့်လင်းမြင်သာဖြစ်လာဖို့၊ အသိ ဉာဏ်တွေ ရှင်သန်ထက်မြက်လာဖို့၊ အတွေးအမြင်တွေ တောက်ပထွန်းလင်းလာဖို့ စာအုပ်စာပေက အထောက်အပံ့တွေ အများကြီးပေးတယ်လို့ ဆရာ့ဆရာကြီးပေါင်းများစွာက ပြောဆို ချပြခဲ့တာတွေ အများကြီးရှိပါတယ်။ မြို့သူမြို့သား အများ စုကတော့ ရုပ်လုံးမပေါ်တဲ့စာကြည့်တိုက်အပေါ်မှာ ဘာအာရုံမှ အထွေအထူးရှိကြဟန်မတူပါဘူး။ တနေ့စာ တနေ့ အလျဉ်မီ စားရပြီး ဘဝကို တင့်ကောင်းတင့်တယ် ဖြတ်သန်းခွင့်ရရင်ပဲ ပြီးပြည့်စုံပြီလို့ ဆုတောင်းနေကြသလိုလို။ ဒီဘက်ခေတ်ရောက်မှပဲ နိုင်ငံခြားမှာ အခြေချနေထိုင်တဲ့ဒေသခံတစ်ဦးက လူမနေတော့တဲ့သူ့အိမ်ကြီးကို စာကြည့်တိုက်ဆောက်ဖို့လှူပါတယ် ဆို တော့မှ…။

ကျွန်တော်တို့ စာကြည့်တိုက်ကလေး အရင်ကနဲ့မတူတော့ပါဘူး။ အခြေခံအဆောက်အဦးရသွားပြီဆိုရင်ပဲ စာအုပ်စာ တမ်း အလှူရှင်ပေါင်းများစွာ တဖွဲဖွဲပေါ်ပေါက်လာပါတော့တယ်။ သုတ၊ ရသစာပေတွေ၊ မှတ်တမ်းမှတ်ရာ စာပေတွေ၊ ပညာရပ်ဆိုင် ရာစာပေတွေ၊ သတင်းနဲ့ဖျော်ဖြေရေးဆိုင်ရာစာပေတွေ၊ ကလေးစာပေတွေ၊ ဘီဒိုတွေ..ဘီဒိုတွေတန်းစီလို့၊ စာအုပ်စင်တွေ ကလည်း အများကြီး၊ အဲဒီစာအုပ်စင်တွေပေါ်မှာ စာအုပ်က ကျိုးတို့ကျဲတဲမဟုတ်။ တင်းပြည့်ကျပ်ပြည့်၊ မနက်ပိုင်း ဈေးလာ ချိန်နဲ့ ကျောင်းမတကခင်ဆို စာကြည့်တိုက်ထဲမှာ လူတွေရှုပ်ထွေးနေတယ်။ စာကြည့်တိုက်ဝန်ထမ်းအမျိုးသမီးကလေးမှာလက်မလည်ရဘူး။ ထိုင်ဖတ်ကြတဲ့လူတွေ အပြည့်မကငှားသွားကြတဲ့လူတွေလည်း မနည်းဘူး။ မြို့ကလေးနဲ့နီးစပ်ရာကျေးရွာတွေကလည်း ဆိုင်ကယ်နဲ့ စက်ဘီးနဲ့ တလစာ လာသယ်ကြတယ်။ ညနေစောင်းပြန်ရင်လည်း လူကအုံပြီး ကျလာပြန် ရော။ ကိုစန်းဦးတို့ စိတ်ကူးချိုချိုစာအုပ်တိုက်က စာကြည့်တိုက်တွေကိုကူညီခြင်းအစီအစဉ်မှာ ကျွန်တော်ကိုယ်တိုင် အကူ အညီရဖို့ ကြိုးစားပေးခဲ့တယ်။ စာကြည့်တိုက်ရဲ့ဦးဆောင်သူက စာကြည့်တိုက်ရဲ့အနေအထားအခြေအနေကို စာတမ်းတ စောင်လို တိတိကျကျစာရင်းပြုစုပြီး ကိုစန်းဦးတို့ဘုတ်အဖွဲ့လက်ထဲထည့်လိုက်တော့"ခင်ဗျားတို့စာကြည့်တိုက်က ကျွန်တော် တို့တောင် ပြန်ကူညီရဦးမယ်။ ကျွန်တော်တို့မှာတောင်မရှိတဲ့စာအုပ်မျိုးတွေ ခင်ဗျားတို့စာကြည့်တိုက်မှာရှိနေတာပဲ.." ဆိုပြီး စာအုပ်နှစ်သိန်းဖိုး ကူညီလိုက်ပါတယ်။ ဒါဆိုတော့…ကျွန်တော်တို့စာကြည့်တိုက်ကလေး အရင်ကနဲ့ မတူတော့ဘူးပေါ့..။

အဲလိုထူး