ဆောင်းယွန်းလ ● မျက်နှာကိစ္စ

ဆောင်းယွန်းလ ● မျက်နှာကိစ္စ
(မိုးမခ) အောက်တိုဘာ ၂၃၊ ၂၀၁၇

မျက်နှာက ကိစ္စသိပ်များတယ်

မျက်နှာများတယ်လို့ ပြောရမလား
မျက်နှာလိုမျက်နှာရလုပ်တယ်လို့ ဆိုရမလား
မျက်နှာပူဖို့တော့ကောင်းပါတယ်
မျက်နှာမြင် ချစ်ခင်ပါစေဆိုပေမယ့်
မျက်နှာပိုးက မသေဘူး
မျက်နှာရှစ်ခေါက်ချိုးထားပြီး
မျက်နှာထိမျက်နှာထားနဲ့ ပြောနေသလိုလို
မျက်နှာကြီးရာ ဟင်းဖတ်ပါတော့လည်း
မျက်နှာက မကောင်းပြန်ဘူး
ရှေ့မျက်နှာ နောက်ထားပြီး
မျက်နှာပြောင်တိုက် မျက်နှာလိုက်နေပြန်ပါပြီ
မျက်နှာလွှဲလိုက်တာနဲ့ လွဲတော့တာပဲ
မျက်နှာလွှဲခဲပစ် စကားတွေချည့်ပြောနေတော့
မျက်နှာချင်းဆိုင်မိတာနဲ့ ပြဿနာဖြစ်တာပေါ့

မျက်နှာဟာ နေရာတကာပါတယ်

လူမှုရေးနဲ့ စီးပွားရေးမှာလည်း မျက်နှာ
ပညာရေးနဲ့ ကျန်းမာရေးမှာလည်း မျက်နှာ
တရားစီရင်ရေးနဲ့ ဘာသာရေးမှာလည်း မျက်နှာ
လုပ်ငန်းခွင်နဲ့ အိမ်တွင်းရေးမှာလည်း မျက်နှာ
နိူင်ငံရေးနဲ့ အနုပညာမှာလည်း မျက်နှာ
သာရေးနာရေးနဲ့ ဘာရေးညာရေးမှာလည်း မျက်နှာ
မျက်နှာမရှိရင်
ကိုယ်ရေးတဲ့ စာတမျက်နှာတောင် ပြီးအောင်မဖတ်ချင်ကြဘူး

ကိုယ့်မျက်နှာ လူမမြင်စေချင်လို့
မျက်နှာဖုံးစွပ်ပြီး ဈေးထဲဝင်ရင်
ဓါးပြလို့အထင်ခံရမှာ အသေအချာပဲ
သက်သေခံအထောက်အထားတခုရဖို့
မျက်နှာဖုံးချွတ်ပြီးမှ ဓါတ်ပုံရိုက်ခွင့်ရှိတာလည်း အသေအချာပဲ

ဒီတော့ မျက်နှာမရှိလို့ မဖြစ်ပြန်ဘူး

မျက်နှာဖုံးစွပ်ထားတဲ့ ဒီကဗျာကို
မျက်နှာနာနာနဲ့ မျက်နှာဖုံးချွတ်ပြီး ရေးပါတယ်
မျက်နှာမာမာနဲ့ ဖတ်ခြင်း မဖတ်ခြင်းဟာ
မျက်နှာပိုင်ရှင်တဦးစီနဲ့သာ သက်ဆိုင်ပါကြောင်း။

ဆောင်းယွန်းလ
(အောက်တိုဘာ ၂၁ရက်၊ ၂၀၁၇)

Comments