မင်းကိုနိုင် ● ဝါးဋီကာ

မင်းကိုနိုင် ● ဝါးဋီကာ
(မိုးမခ) နိုဝင်ဘာ ၈၊ ၂ဝ၁၇

“ဘဝဆိုတဲ့ ပင်လယ်ကိုမကူးခင် အခြေခံပညာဆိုတဲ့ ချောင်းရိုးလေးကိုအရင်ကူးဖို့ ဆရာဟာ မင်းတို့အတွက် ဝါးတံတားလေး ပါ”

တခါက ကျောင်းဆရာလေးတစ်ယောက် စာမေးပွဲကြီးဖြေဖို့ နှုတ်ဆက်ချိန် သင်ပုန်းကြီးပေါ်ရေးပေးခဲ့သည့် အမှတ်တရဖြစ် ပါသည်။ ထိုဆရာက သူ့မူပိုင်စကားလား၊ တစ်စုံတစ်ယောက်၏ စာကို ပြန်ကိုးကားသည်လား သေချာမပြောပြခဲ့၍ မူရင်းကို မဖော်ပြနိုင်တော့ပါ။ ထိုခိုင်းနှိုင်းချက်ကိုမေ့မရသည့်အတွက် ဘဝတွင် တိုက်ဆိုင် လာတိုင်းဝါးတံတားနှင့် တူသူတွေအကြောင်း တွေးမိမြဲ။ ထိုအတွေးကပင် လူတွေဟာ ဘယ်လိုဝါးတွေနှင့်တူပါလိမ့်ဟု ကျွန်တော် အကဲဖြတ်နေမိပါသည်။
.................🎋 ..🎋 .🎋.....................

အနင်းခံဘဝနှင့် အသုံးတော်ခံသွားကြရာမှာ ဝါးတံတားမျှမဟုတ်။ ဝါးဖောင်၊ ဝါးငြမ်းတို့သည်လည်း ကိစ္စတခု လိုရာရောက် အောင် ပို့ဆောင်ပေးရာမှာ အရေးပါခဲ့ကြသလောက် ကိစ္စပြီးမြောက်သော် လူတွေက သဘာဝကျကျ ဘေးဖယ်ထားကြမြဲ သို့မဟုတ် အလားတူ နောက်ထပ် ကိစ္စတွေအတွက် နင်းကြ သုံးကြ ရမြဲ။ ထို အနင်းခံ အဖြည့်ခံများကလည်း နာလှချေရဲ့ဟု မညည်းညူကြပါ။ အချို့အနင်းခံ၊ အဖြည့်ခံ ဝါးတံတား၊ ဖောင်၊ ငြမ်းများက ဤသို့ပင် နှလုံးပိုက်လိုက်ကြသေးသည်။

“ကျုပ်တို့က ဖြေသာပါတယ်၊ တစ်ပွဲပြီးတစ်ပွဲ အသုံးတော်ခံရပေမယ့် ကိစ္စများစွာ ပြီးမြောက်တာကိုး၊ မျှစ်ဘဝမှာ ချိုးစား ခံလိုက်ရတဲ့ ညီနောင်များရဲ့အဖြစ်ထက်စာရင် ကြိမ်ဖန်များစွာ ကောင်းကျိုးရှာနိုင်ခဲ့တာကိုး”

ထိုအခါ ကျွန်တော်တို့ ဝန်းကျင်တွင် မျှစ်ဘဝမှာပင် ချိုးဖဲ့အစားခံလိုက်ရသည့် အနာဂါတ်တန်ဖိုး များစွာကို သတိပြုလာမိပါ သည်။
🎋 ..🎋 .🎋

ဝါးတစ်ပင်ဘဝ မျှစ်က စသည်ကို လူတိုင်းသိသည်။ မျှစ်လိုချိုးစားမခံခဲ့ရလျှင် သူတို့ ဘာတွေဆက်ဖြစ်နိုင်ပါလိမ့်။ စာအုပ် တစ်အုပ် ကျွန်တော်တို့ ဖတ်နေသည် ဆိုပါတော့။ နှလုံးသား တည်ငြိမ် သိမ်မွေ့မှုအတွက် ရသပဲဖြစ်စေ၊ သိမှုအတွက် သုတ ဖြစ်စေ၊ ကိုယ်စီဘဝ လမ်းရွေးချယ်ပဲ့ကိုင်ဖို့ ဒဿနအတွေးအခေါ်ပဲဖြစ်စေ စာအုပ်ကိုယ်စီ စာမျက်နှာကိုယ်စီမှာ စီတန်း ဖော်ပြကြပါလိမ့်မည်။ ထိုစာမျက်နှာ စာရွက်စက္ကူများမှာ ဝါးပျော့ဖတ်မှ ဖြစ်လာသည်ကို သတိမူမိပါလိမ့်မည်။

ကျွန်တော်တို့ တစ်သက်တာ ဖတ်ခဲ့ရေးခဲ့ကြသော စာများအတွက် ရှေ့ကအမှားကို နောက်လူတွေမလိုက်မိဖို့က အစစာမျက် နှာများက သင်ပေးခဲ့ကြပါသည်။ စက္ကူဖြစ်ရန် “ပျော့ဖတ်ဝါး” များလို ဖြစ်တည်ပေးကြသည့် လူသားဘဝတွေကို ကျွန်တော် ဆင်ခြင်မိပြန်ပါသည်။
ဝါးကဖြစ်လာသည့် စက္ကူချင်းပင် တန်ဖိုးက မတူ။ တံဆိပ်ခေါင်းလို ကြာလေ အဖိုးတန်လေ ဘဝများဖြစ်သူဖြစ်၊လက်ထပ်စာချုပ်၊ နားလည်မှု စာချွန်လွှာတို့လို ခန့်ခန့် ကြီးနေနိုင် သူက နေနိုင်။

ထီလက်မှတ်လို ဘဝကကော၊ လူတွေကို အချိန်အတိုင်းအတာတစ်ခုအထိ စိတ်ကူးယဉ် ပျော်ရွှင်ခွင့် ပေးထားနိုင်သည်။ ပြီးတော့မှ မဟုတ်ကာမှလွဲရော ဆိုကာ ရယ်မောလိုက်လို့ရသေး။

အောင်စာရင်းစာရွက်လိုကတော့ ရင်ခုန်စရာအကောင်းဆုံး၊ အဆုံးအဖြတ်များနှင့် တရားသူကြီးဖတ်ပြသည့် စီရင်ချက်များ။ ဝါးပင် ဘဝချင်းတူပါလျက် အသုံးတော်ခံဖြစ်စဉ်နေရာ ကာလအလျောက် တန်ဖိုးများ အဓိပ္ပါယ်များ ခြားနားကုန်တာကို တစ်ခါက ပင်ဝါးရုံများ၏ မျှစ်စို့ မျှစ်ပေါက် ညီနောင်အချင်းချင်း စကားပြောခန်းကို ကျွန်တော် နားဆင်နေမိပါသည်။
...........🎋 ..🎋 .🎋..................

ငါတို့က အမြတ်ဆုံးထဲမှာ ပါတယ်ကွ။ လူတိုင်း သည်းခြေကြိုက် ငွေစက္ကူဖြစ်ခွင့်ရတယ်ဟု မော်ကြွားသည့် ဝါးကလည်း မော်ကြွားပါလိမ့်မည်။ ငွေစက္ကူချင်းတူတာတောင် ဇင်ဘာဘွေ ဒေါ်လာနှင့်ဗြိတိသျှ စတာလင်ပေါင် ငွေစက္ကူကလည်း တန်ဖိုးချင်း ကွာလှကြောင်း ငြင်းခုံခြေဖျားထောက်နိုင်ကြပါသေးသည်။

“အဖေတို့ ဖက်ဆစ်ကိုတော်လှန်ကြတုန်းက ဘာသေနတ်မှရတာမဟုတ်ဘူးကွ၊ စောင့်ဖို့လည်း အချိန်မရတော့ ဝါးချွန်နဲ့ပဲ တော်လှန်ခဲ့ရတာ”

ဟော တိုက်တိုက်ဆိုင်ဆိုင်၊ အဖေတို့စကားဝိုင်းမှာ ကျွန်တော်စဉ်းစားနေသည့် ဝါးတွေက ပါနေပြန်ပါပေါ့လား။

နိုင်ငံတစ်ခု နယ်မြေတစ်ခု၏ သမိုင်းတွင် လွတ်မြောက်ရေးတော်လှန်ရေးတွေမှာလည်း ရရာလက်နက်အဖြစ် အနှီဝါးတွေ ပါနေပြန်ပါပေါ့လား။
🎋 ..🎋 .🎋

တင်းဝါး၊ ကြသောင်းဝါး၊ မျှင်ဝါး၊ ဝါးပိုး၊ ဝါးနက်၊ ဝါးယား....ကျွန်တော် မသိသေးတာတွေ ကျန်ဦးမည်။ ဝါးမျိုးစုံ၏လူ့လောကထဲ အသုံးတော်ခံ ပုံစံတွေကိုကြည့်ရင်း လူတွေဟာဝါးနဲ့တူရင် ဘယ်လိုဝါးမျိုးဖြစ်မလဲဟု ရေရွတ်မိပါသည်။ နေပူပူမှာ အိမ်တော် ရာထီး၊ ပုသိမ်ထီး တို့ဖြင့် အေးမြတင့်တယ်ခဲ့ဖူးကြပါလိမ့်မည်။ လူ့သမိုင်းတွင် ထီးအစမှာ ဝါးကပင်ဖြစ်ပါလိမ့်မည်။ စတီးကိုင်း၊ သံကိုင်း၊ ပလတ်စတစ်ကိုင်း စသည်တို့က နောက်မှ ပေါ်လာတာဖြစ်သည်။ ဝါးဖြင့် လုပ်ထားသည့် ထီးကိုင်း၊ ထီးခရိုင်တိုဖြင့် တန်ဆာဆင်အပ်သော ထီးမျိုးစုံအောက် လူသားတွေ နေဒဏ်မိုးဒဏ် အကာအကွယ်ရခဲ့ဖူးပြီ၊ ရွာစည်းရိုး ကင်းစခန်းတွေမှာ ရှေ့ဆုံးက ရင်ဆိုင်ရန်အသင့်ရှိသည့် ဝါးချွန်များ၊ကင်းတဲများ၊ အဲသလိုလူတွေ။ နွေဦးမှာ ထနောင်းရိပ်၊မန်ကျည်းရိပ်အောက် အေးအေးလူလူ ထိုင်နိုင်သည့်ပက်လက် ကုလားထိုင်လေးတွေ။

ကြယ်စုံညတွေမှာ စံပယ်ငုံအလှနှင့်အတူပုံပြောပြခဲ့သည့် အဘွားအိမ်ရှေ့က ကွပ်ပျစ်ကလေး။ ဝါးတွေနှင့်ပင်ဖြစ်ခဲ့သည်မို့ ထိုဝါးပင်နှင့်တူသည့် လူတွေကလည်း သူတို့ဘဝအဓိပ္ပါယ် သူတို့ ဖွင့်ဆို ဂုဏ်ကလေးခံကာ ကျေနပ်ကြပါလိမ့်မည်။

လူတွေ အခြေခံအကျဆုံးက စားဝတ်နေရေးဆိုသည့်အလျောက်၊ ဂူထဲမှထွက်ခါ ထွန်ယက် စိုက်ပျိုးတတ်အမဲလိုက်ရာမှ မွေး မြူတတ်လာသည်။ ယဉ်ကျေးမှုထွန်းကားစခေတ်တွင် နေရေးအတွက် သစ်ရွက်သစ်ခက်များ ထိုးကာနေလာရာမှ ဝါးကို ခွဲတတ်ခြမ်းတတ်နှီးဖျာတတ်လာရာကအစ ချစ်စရာ အိမ်ကလေးများ၊ မိသားစုဘဝကိုယ်စီကို တန်ဖိုးရှိစေသည့် တဲကလေး များမှလည်း ဝါးဖြင့်ပင်ဆောက်ခဲ့ရသည် မဟုတ်ပါလား။

ဝါးအိမ်ကလေး နဲ့ အတူနေစဉ်က မိသားစုချင်းသစ္စာရှိရှိ၊ ရုန်းကန်ခဲ့၊ ရင်ဆိုင်ခဲ့ ဘာမဆို အတူမျှယူခဲ့သော သာဓက တွေကလည်း ဝါးကပေးသည့် ဘဝအဓိပ္ပါယ်တချို့မဟုတ်ပါလား။ ကိုယ်ဟာ မင်းတို့ မိသားစုကို ပျဉ်ထောင်အိမ်၊အုတ်ခံအိမ် တွေနဲ့ မထားနိုင်ခဲ့ပေမယ့် ကိုယ့်ရဲ့ဖြူစင်တဲ့ဝင်ငွေနဲ့ဆောက်ခဲ့တဲ့ ဝါးအိမ်လေးဟာ ရဲတိုက်ကြီးလိုလုံခြုံမှုမျိုး ပေးနိုင်ခဲ့ပါတယ် ဟူသည့်စကားမျိုး ရင်ထဲမှာဖြစ်ဖြစ် အနည်းဆုံးပြောကြတာ နားထောင်တတ်လျှင်ကြားဖူးပါလိမ့်မည်။ ကိုယ်တိုင်ကိုယ်က ဈေးမကြီးလှသော်လည်း စွမ်းသမျှ ရိုးသားလှပခဲ့သည့် ဝါးအိမ်လေးလို လူသားများ၊ ဝါးခမောက်လေးလို လူသားများ၊ ဝါးဖျာ လို ဝါးခေါင်းအုံးလိုလူများ။ ဝါးကျည်တောက်လို ချွေးနှဲစာတွေစုပြီး တရွေ့ရွေ့လှမ်းခဲ့ရသော ဘဝများ လူများ။
🎋 ..🎋 .🎋

ကြေး၊ ကြိုး၊ သားရေ၊ လေ၊ လက်ခုပ်တဲ့။ ကျွန်တော်တို့ ရိုးရာတူရိယာငါးမျိုးမှာပင် ဝါးနှင့်လုပ်သည့် တူရိယာငါးမျိုး မှာပင်ဝါးနှင့် လုပ်သည့် တူရိယာက နှစ်မျိုးပါလိုက်သေး။ ငါးအချိုးနှစ်ဆိုတာ တစ်ရာမှာ လေးဆယ်ရာနှုန်း။

နန်းတော်ထဲက ငွေနှဲကြီးက မဟာဂီတဖန်တီးပြသလို၊ နွားကျောင်းသား၏ ဝါးပလွေကလည်း နေညိုညိုမှာ လေချိုသွေးလျှင် ရင်ထဲတနင့်ကြီး လွမ်းသွားအောင် စွမ်းပါသေးသည်။ နန်းတော်ရှေ့ဆရာတင်၏ တောဓလေ့ တောရနံ့သင်းသော တေးများ ကို ခံစားလိုက်ပါ။ ပလွေဖြင့် သံစဉ်ရှာခဲ့သည့်တေးတွေဟု သိမှတ်ဖူးပါသည်။

ဘဝမှာ အဿပြာများ ကုဋေမကြွယ်ပေမယ့် ဝါးပုလွေငယ်လို သံချိုသာခဲ့ပါရဲ့ဟု နှစ်သိမ့်ကြည်နူးရသည့် ဘဝ တွေလည်းရှိကြ ပါသည်။ ဟော ….. လက်ခုပ်၊ ဝါးလက်ခုပ်တဲ့၊ ဘယ်ဂီတ ဖန်တီး ဖန်တီး၊ အခြေခံက စည်းနဲ့ဝါး၊ စည်းက ကြေးတူရိယာ၊ ဝါးဆိုမှတော့ ဝါးပဲပေါ့။ ကိုင်း၊ ဝါးကဘယ်လောက် အခြေခံကျလိုက်သလဲ။ ပျော်စရာ အောင်ပွဲတွေက ဒိုးပတ်ဝိုင်းမှာ ဝါးလက် ခုပ်မြိုင်မြိုင်နဲ့ ပျော်နိုင်ဖို့။ ဝါးလက်ခုပ်လို လူသားတွေကလည်း ရှိသေးသကိုး။

ကျွန်တော်တွေးနေစဉ်မှာပင် ခင်မောင်ရင်၏ “တောသားကြီး” သီချင်းက ပလွေတို လေချိုဖြင့် ထွက်လာသည်။ ဒီသီချင်းက ပတ္တလားနှင့်မှလိုက်သည်ဟု တညီတညွတ်တည်းဆိုကြ၏။ ပတ္တလားတောင်မှ သံပတ္တလား၊ ကြေးပတ္တလားနှင့်မလိုက်။ တောဖွဲ့တေးမို့ တောသဘာဝကျကျ ဝါးပတ္တလားနှင့်မှ အလိုက်ဆုံးတဲ့။

ကျွန်တော့်မျက်လုံးတွေ အဖေ့အိမ်ခန်းက ဝါးပတ္တလားဆီရောက်သွားသည်။ လားလား၊ ဝါးဘဝထဲမှာ အတော့် ကိုစာဖွဲ့ရမည့် ပြာလဲ့မှာ ဇာချဲ့ရမည့် ဝါးပါလား။ ဝါးပိုးဝါးကို အဆစ်နှစ်ဖက်ပါအောင် အကျအနရွေး၊ အထူဗြက်တွေကို အတိုင်းအဆမလွဲ ချော်အောင် ခုတ်။ ဝဲဘက်ကဗြက်ကျယ်ကျယ် ထုထည်ပါးပါး။ ယာဘက်ရောက်လေလေဗြက်ကျဉ်းကျဉ်း ထုထည်ထူထူ။ အ တော်ကို ပညာပါရသည့်အလုပ်။ အသံလွှဲကျယ်စနစ်မှန်ဖို့၊ ဝါးလုံးတွေကို ခြမ်းကာပေါင်းစပ်၊ အစိုဓါတ် ပျောက်အောင် ကာလရှည် ပေါင်းခံ၊ ကျပ်ခိုးတိုက်လည်းခံ။

ပြီးတော့ ကျပ်ခိုးဝပြီဆိုမှ ဘယ်ညာကြီး ငယ်စဉ်လိုက် ကြိုးနှင့်တွဲနှောင်၊ တံတားလိုခင်း၊ ပြီးတော့ လက်ခတ်နှင့် စိတ်တိုင်း ကျနှက်ပေရော့။ ဝါးနှင့် တူတဲ့ဘဝ ဘယ်ဝါးဘဝ အားကျသလဲဆိုသည့်အတွေး၊ ဝါးပတ္တလားကိုကြည့်ရင်း ကျွန်တော့်မေးခွန်း တွေ ဆွံ့အသွားပါသည်။
..........🎋 ..🎋 .🎋 .............

မျှစ်ဘဝမှာ ချိုးအစားမခံရအောင် နေခဲ့ရ၊ အရွယ်ရောက်မှခုတ်ထစ် ပုံဖော်၊ ဂီတဝိုင်းထဲဝင်ဖို့ ကျပ်တိုက် ကြိုးနှောင်၊ ထိုညီ နောင်များ။ ဝါးခြမ်း ၂၄ ခုက ဂီတတွေမြည်ပြနေကြပါရော့လား။ ကြိုးနှင့် စုချည်၊ လက်ခတ်နှင့် တဒိန်းဒိန်း နှက်တာကိုပဲ အံမ လေး၊ အဘလေး၊ အော် ညည်းကြသလား။ ကြည်မြတဲ့ ဂီတဆိုတာ ပြနေကြသလား။ လူဟာ ဝါးနှင့်တူလျှင် ကျွန်တော်တို့ ကိုယ်စီဘဝတွေ ဘယ်လိုဝါးတွေနှင့် တူပါလိမ့်။

မင်းကိုနိုင်
(ပြည်သူ့အရေးဂျာနယ် အပတ်စဉ်ဆောင်းပါးမှ)

ကိုမင်းကိုနိုင် လူမှုကွန်ရက်စာမျက်နှာပေါ်မှ ပြန်လည်ကူးယူပါသည်။

Comments