ခင်လွန်း ● ငှက်ကြည့်သမား

 ခင်လွန်း ● ငှက်ကြည့်သမား
(မိုးမခ) ဒီဇင်ဘာ ၂၉၊ ၂၀၁၇
ခြံစည်းရိုးပေါ် ငါမျှော်နေတဲ့
ငှက်ကလေးရောက်ပြီလား
သူ့ကို နေ့တိုင်းစောင့်ကြည့်နေခဲ့ရ
သူ့ခမျာ မနေ့က အစာမှဝပါ့မလား
တနေ့ကရော ဝခဲ့ပါရဲ့လား
သူ ကွေးကွေးထားတဲ့ခြေလေးတဖက်
ခြေသည်းချွန်ချွန်ဝါဝါလေးတွေ
သူ့တောင်ပံကြားထိ မ, တင်ထား
တခါတခါတော့ အဲဒီ့ခြေလေးတဖက်ကို ဒရွတ်ဆွဲလို့
အစာကိုကောက်တဲ့အခါ
တဆတ်ဆတ်တုန် ကြာကြာမရပ်နိုင်ရှာ
သူ့တောင်ပံကို ခြေတဖက်အစား ကားကားကြီးချရင်း
မြေမှာဝပ်လို့ အစာကောက်ရရှာသူ
ဒီလိုအချိန်ချောင်းနေကြ ကြောင်ဖားကြီး
ခုန်အုပ်ခံလိုက်ရပြီလား
သူ့အတွက်ပူနေရတာပဲ
တခြားငှက်လေးတွေလို
အစာဝပါ့မလား
ကြောင်ခံတွင်းထဲရောက်သွားပြီလား
သတ္တဝါတို့ရဲ့ကံကြမ္မာတရားဟာ
မိုးတိမ်တွေလို တလွင့်လွင့်တမျောမျော
ကောင်းကင်ပေါ် ငှက်ကလေးတွေရော
တိမ်ပြာပြာရော
ငါ့အဖော် တုတ်ကောက်လေးရော
အငြိအတွယ်မရှိ
လူးလားပျံသန်းလျက်
ခြံစည်းရိုးပေါ်က နှုတ်သီးဝါဝါ ခြေတပေါင်ကျိုးငှက်ကလေးသာ
ချိတ်ကျန်မနေခဲ့ရင်
ငါဟာ လေထဲဝဲပျံလို့နေတော့မှာ။ ။
........
ခင်လွန်း
ဒီဇင်ဘာ ၂၈၊ ၂၀၁၇
နံနက်- ၉:၀၀

Comments