စစ်အစိုးရ ၀ါဒဖြန့်များက မူးယစ်သုံး အနုပညာရှင်များကို အမည်တပ်ပြီး ဝေဖန်
မိုးမခ အထောက်တော် ၀၀၃
ဇူလိုင် ၁၊ ၂၀၀၈
ယခင်အပတ်၊ ရန်ကုန် ဗဟန်း အထက (၂) စာသင်ကျောင်း မူးယစ်ဆေးဝါးဆန့်ကျင်ရေး ဟောပြောပွဲတွင် လက်ရှိအရေးယူခံနေရသော မူးယစ်ဆေးသုံး အနုပညာရှင်များကို အမည်များနှင့်တကွ ထုတ်ဖော်ပြောဆို ဝေဖန်သွားသည်ဟု သိရသည်။ စစ်အစိုးရ အစီအမံဖြင့် ပြုလုပ်သည့် အစိုးရကျောင်းများ၏ ဟောပြောပွဲများတွင် ထိုသို့ ထုတ်ဖော်ပြောဆိုလိုက်သဖြင့် ပြင်ပဂျာနယ်လောကတွင် အတည်မပြုနိုင်သေးဘဲ စောင်းပါးရိပ်ခြေပြောဆိုနေမှုများ မှန်ကန်ကြောင်း အတည်ပြုသကဲ့သို့ဖြစ်ကြောင်း သတင်းပို့သူက မှတ်ချက်ပေးသည်။
ထက်ထက်မိုးဦး၊ စိုင်းစိုင်းခမ်းလှိုင်၊ အာရ်ဇာနည် စသည့် အဆိုတော်အမည်များလည်းပါသည်ဟု ပြောဆိုကြသည်။
အတည်မပြုနိုင်သော ကောလဟာလများအဆိုအရ မှုခင်းအစမှာ နိုင်ငံတကာမူးယစ်ပုလိပ်အဖွဲ့က မြန်မာနိုင်ငံသားတဦးကို ပြည်ပတွင် ဖမ်းဆီးမိရာက အခုလို အဖမ်းအဆီးများ အရေးယူမှုများ ပြုလုပ်လာခြင်းဖြစ်ကြောင်း၊ မြန်မာစစ်အစိုးရအနေနှင့် လူအခွင့်အရေးကိစ္စ၊ မတရားလုပ်အားပေးကိစ္စများတွင် နာမည်ပျက်လျက်ရှိရာ၊ နာဂစ် အရေးအခင်းတွင်လည်း လူမှုရေးကယ်ဆယ်ရေး ပျက်ကွက်ခဲ့ပြီးနောက်ပိုင်း ယခုလို မူးယစ်ဆေးဝါးနယ်ပယ်အထိ နာမည်ပျက်လာသည်ကိုမူ တတ်နိုင်သလောက် တုန့်ပြန်အရေးယူနေပုံရသည်ဟု သတင်းပို့သူက ထင်မြင်ချက်ပေးသည်။
“ နောက်ဆိုရင် နိုင်ငံတကာအကြမ်းဖက်အဖွဲ့တွေက မြန်မာပြည်မှာ အခြေစိုက်ပြီး လေ့ကျင့်ကွင်းဆင်းနေတယ်ဆိုပြီး သတင်းတွေ ဖြစ်လာရင် ဘယ့်နှယ့် လုပ်မလဲ။ အခုတောင် အဲင်အယ်ဒီပါတီရဲ့ ဒေါ်အောင်ဆန်းစုကြည်မွေးနေ့ပွဲကိုတောင် ၀င်ပြီး အကြမ်းဖက်ရမ်းကားနေသေးတာကိုတောင် စစ်အစိုးရက အရေးမယူနိုင်ဘူးလေ။ အလောင်းမြေမြုတ်တဲ့လူတွေတို့၊ မုန်တိုင်းကယ်ဆယ်ရေး အလှူရှင်တွေကိုတော့ ဖမ်းလိုက်ဆီးလိုက်နဲ့ မဟုတ်ဘူးလား …” ဟု သူက မှတ်ချက်ပေးသွားသည်။
Comments