Journallist on the road - Rangoon View, last week of October

ရန်ကုန်ရှုခင်း - အောက်တိုဘာ စတုတ္ထပတ်
လမ်းလျှောက်ဂျာနယ်လစ်၊ ရန်ကုန်
အောက်တိုဘာ ၂၉၊ ၂၀၀၉

ယာဉ်စည်းကမ်း ထိန်းသိမ်းရေး၊ ငွေနဲ့ အပေါက်ခံရတဲ့ ရန်ကုန် ယာဉ်ထိန်းရဲများ
ရန်ကုန်မြို့တွင်းမှာ ပြေးဆွဲနေတဲ့ ၄၃ လိုင်းထဲက ကားဒရိုင်ဘာဖြစ်သူက ကြားတောရလမ်းနဲ့ ကမ္ဘာအေး ဘုရားလမ်း မီးပွိုင့်မရောက်ခင်မှာ စပယ်ယာဆီက နှစ်ရာကျပ်တန် တရွက် တောင်းလိုက်ပါတယ်။ အဲဒီနောက် နွမ်းနေတဲ့ နှစ်ရာတန်ကို ၆ ခေါက်၊ ၈ ခေါက်လောက် ခေါက်ချိုးပြီး ညာဘက်လက်မှာ အသင့် ကိုင်ထားလိုက်တယ်။ အချိန်က ညမှောင်ခါစ ၇ နာရီ သာသာပါ။ မီးပွိုင့်မှာ မီးနီစောင့်ရင်း ကားရှေ့ မီးကြီးကို တချက် ဖွင့်ပိတ်လုပ်ပြီး ယာဉ်ထိန်းရဲ ရုံလေးဘေးမှာ ထိုင်နေတဲ့ ယာဉ်ထိန်းရဲကို အချက်ပေးလိုက်ပါတယ်။


ရန်ကုန်မြို့တွင်း ပြေးဆွဲနေသည့် ဘတ်စကားတစီး (ဓာတ်ပုံ-မိုးမခ)

စက္ကန့်အနည်းငယ်အကြာ မီးပွိုင့်လည်း စိမ်းတာနဲ့ ကားကိုဖြည်းဖြည်း လှိမ့်ထွက်ရင်း ရဲရှေ့အရောက်မှာ ၂ရာတန် ခေါက်ကို ရဲဆီ ပစ်ပေါက်လိုက်ပါတယ်။ ရဲက မသိသလို မျက်နှာပေးနဲ့ လက်ကို နောက်ပြန်ဆန့်ရင်း ခေါင်းကို အနည်းငယ် ဆတ်ပြပြီး လိုက်ပါတယ်။ ဘတ်စ်ကား ကျော်သွားပြီးမှ ပလက်ဖောင်းပေါ် ကျနေတဲ့ ၂ရာတန်အခေါက်ကို ကောက်ယူလိုက်တာကို ကားနောက်မှန်ကနေ မြင်လိုက်ရပါတယ်။

ရန်ကုန်မြို့တွင်း ပြေးဆွဲနေတဲ့ ဘတ်စ်ကားတွေက ယာဉ်ထိန်းရဲတွေကို အခုလို တစ်ရာ၊ နှစ်ရာ ဘာကြောင့် ပေးနေကြတာလဲ လို့မေးစရာ ရှိပါလိမ့်မယ်။ ဘတ်စ်ကားတွေဟာ ထုတ်ပြန်ထားတဲ့ ယာဉ်စည်းကမ်း၊ လမ်းစည်းကမ်းတွေ မလိုက်နာချင်တော့ နေ့စဉ်လိုလို မီးပွိုင့်မှာစောင့်တဲ့ ယာဉ်ထိန်းရဲတွေကို ဆက်ကြေးပေးပြီး ယာဉ်စည်းကမ်း ချိုးဖောက်နေကြရတဲ့ သဘောပါ။ လိုင်းကား တစီးနဲ့တစီး ခရီးသည် လုကြရင်း ပြိုင်မောင်းကြပြီ ဆိုရင် မီးပွိုင့်မှာ မီးဝါနေစဉ် ဖြတ်ချင်ဖြတ်မယ်။ တခါတရံ နီနေတုန်းလည်း ဖြတ်ချင်ဖြတ်မယ်။ ဘတ်စ်ကားတွေ ပွိုင့်ကိုဝင်ရင် ညာဘက်ဆုံး ယာဉ်ကြောကသာ ၀င်ခွင့် ရှိပါတယ်။ ဒါပေမယ့် ကားတန်းရှည်နေလို့ တန်းမစီချင်ရင် ဘယ်ဘက်ဆုံးကနေ ကျော်တက်ပြီး ညာဘက်ကို အတင်းဝင်မယ်၊ နောက်က ကားတွေကို မညှာဘဲ ကြားဖြတ်ဝင်မယ်၊ မီးပွိုင့်မှာ စောင့်နေစဉ် ခရီးသည်တွေကို ကြိုဆင်းစေမယ်၊ လိုက်မယ့် ခရီးသည်ကို တင်မယ် စတဲ့ စတဲ့ အချက်တွေကို အဖမ်းအဆီးမရှိ လုပ်နိုင်ဖို့ ရဲတွေကို ငွေနဲ့ပေါက်ရတာပဲ ဖြစ်ပါတယ်။

ရန်ကုန်တိုင်းကို တာဝန်ယူထားတဲ့ စစ်တိုင်းမှူး နဲ့ ကစထမှူးလို့ခေါ်တဲ့ ဒုဗိုလ်ချုပ်ကြီး မြင့်ဆွေတို့ဟာ ရန်ကုန်မြို့က ဘတ်စ်ကား မောင်းသူနဲ့ ယာဉ်နောက်လိုက်တွေ ယဉ်ကျေးပျူငှာရှိရေး၊ ယာဉ်စည်းကမ်း မဖောက်ဖျက်ရေးတို့ သွန်သင်ဖို့ တာဝန်ယူထားသူတွေပါ၊ ပြီးခဲ့တဲ့ စနေနေ့ကတောင်မှ ရန်ကုန်တိုင်း ယာဉ်စည်းကမ်း ထိန်းသိမ်းရေး ကြီးကြပ်မှုကော်မတီ (မ ထ သ) နှစ် ၂၀ပြည့် ပွဲကို အမျိုးသား ပြဇာတ်ရုံမှာ ဖွင့်လှစ်ခဲ့ပါသေးတယ်။ ဒုတိယ ဗိုလ်ချုပ်ကြီး မြင့်ဆွေနဲ့ ရန်ကုန် စစ်တိုင်းမှူးတို့ တက်ရောက်ကြပါတယ်။

ရန်ကုန်တိုင်း မထသရဲ့ စည်းဝေးပွဲတိုင်းမှလည်း ရန်ကုန်တိုင်းမှူး တက်ရောက်လေ့ရှိပြီး ကားမောင်းသူ၊ ယာဉ်နောက်လိုက်တွေ စည်းကမ်းရှိရေး၊ ခရီးသည်များကို ယဉ်ကျေးစွာ ဆက်ဆံရေးတို့ကို အမြဲညွှန်ကြားလေ့ ရှိပါတယ်။ စည်းကမ်းချိုးဖေါက်တဲ့သူတွေကို ပြင်းပြင်းထန်ထန် အရေးယူမယ် ဆိုတာမျိုးလည်း အစဉ်အမြဲ ပြောပါတယ်။ သို့ပေမယ့် ယာဉ်မောင်းနဲ့ ယာဉ်နောက်လိုက်တွေဟာ ဘယ်နေရာမှာ ဘယ်ခလုပ် နှိပ်ရမယ် ဆိုတာကို သိပြီးသားပါ။

ဘယ်လမ်းဆုံမှာ ဘယ်ရဲကို ဘယ်လောက်တန် ငွေစက္ကနဲ့ခေါက်ပြီး ပေါက်ရမလဲ။ ပစ်ချခဲ့ရမလဲ ဆိုတာကို ကောင်းကောင်း သိနေတဲ့ အတွက် ရန်ကုန်မြို့ ယာဉ်စည်းကမ်း ထိန်းသိမ်းရေး ဆိုတာ စာရွက်ပေါ်မှာပဲ ရှိနေတော့မှာပါ။

ယာဉ်ထိန်းရဲ မဟုတ်ဘဲ အခြားသော ၀န်ကြီး၊ ဌာနဆိုင်ရာအရာရှိတွေ သက်ဆိုင်ရာ အာဏာပိုင်တွေကိုလည်း စောစောကလို မီးနီ၊ မီးဝါ ဖြတ်လိုရင် ၊ မီးပွိုင့်မှာ သူများလုပ်လို့ မရတာ ကိုယ်လုပ်ချင်ရင် ငွေနဲ့ပေါက်ပြီး ဖြတ်လို့ ရပါတယ်။ ဒါပေမယ့် ဘတ်စ်ကား ယာဉ်မောင်း၊ ယာဉ်နောက်လိုက်တွေ လိုတော့ ၂ရာတန်နဲ့ သွားမပေါက်နဲ့ပေါ့၊ အဲဒီနေရာကျရင် သိန်း၊ သန်းနဲ့ချီတဲ့ ငွေတို့ ရွှေတို့၊ ကားတို့နဲ့ ပေါက်ကြမှ ဖြတ်ခွင့်ရမှာပါ။ ယာဉ်စည်းကမ်း ထိန်းသိမ်းရေး ညွှန်ကြားနေတဲ့ ဗိုလ်ချုပ်တွေကို သိန်း၊သန်း နဲ့ ချီပြီး မပေါက်ဘဲ နှစ်ရာတန်နဲ့ သွားပေါက်လို့ကတော့ အဖမ်းခံရရုံ ရှိမှာပါ။

အ၀ီစိရေလား၊ ကြံ့ဖွံ့ရဲ့ စည်းရုံးရေးလား

ကုန်လွန်ခဲ့တဲ့ သီတင်းပတ်က လျှပ်စစ်ဓာတ်အား မလုံလောက်လို့ ရန်ကုန်မြို့ရဲ့ မြို့နယ် အတော်များများမှာ သောက်သုံးရေ လေးငါးရက်ကြာ ပြတ်တောက်ခဲ့ရပါတယ်။ ဒီ အဖြစ်အပျက် ဖြစ်ပျက်ပြီးသည် အထိ သက်ဆိုင်ရာ တာဝန်ရှိသူတွေက ဘာဖြစ်တယ်လို့လဲ အသိပေး ကြေညာခဲ့ခြင်းမရှိပါဘူး။ ခါတိုင်း မီဒီယာကို အပတ်စဉ် ဖိတ်ခေါ်ပြီး ရန်ကုန်မြို့ စည်ပင်သာယာရေး ကော်မတီရဲ့ လုပ်ဆောင်ချက်တွေကို ပြောနေတဲ့ မြို့တော်ဝန်လည်း ယခုကိစ္စမှာ မီဒီယာကို ဘာမှ ထုတ်ဖေါ်ပြောဆိုခြင်း မရှိတော့ပါဘူး။ မြို့နေထိုင်သူတွေဟာ ဘာသတင်း အချက်အလက်မှ မရဘဲ တနေ့လာနိုး၊ တနေ့လာနိုး စောင့်ရင်း ငါးရက်မျှ ကြာခဲ့ရပါတယ်။ ဂက်စ်ပိုက် ပေါက်လို့ ဓာတ်အားမရ၊ ဓာတ်အားမရလို့ ရေတွန်းစက် အလုပ်မလုပ်နိုင် ဆိုတဲ့ အဖြစ်ကို မြို့နေသူတွေကို အသိ မပေးခဲ့ပါဘူး။ သက်ဆိုင်ရာ ဌာနတွေဟာ လူထုကို ဂရုမစိုက်ဘဲ ပြောခွင့်ရှိမရှိ မသိဘဲ ပြောမိလို့ အထက်လူကြီးက အလုပ်ဖြုတ်မှာကို ပိုမို စိုးရိမ် ကြောင့်ကြ တာကြောင့် လူထုခမျာ ဘာဖြစ်မှန်း မသဘပဲ ဒုက္ခရက်ရှည် ခံစားကြရတာပါ။


ရန်ကုန်မြို့လယ် တနေရာတွင် လူအားဖြင့် စက်ရေတွင်း တူးနေပုံ (ဓာတ်ပုံ-မိုးမခ)

အဲဒီလို ရေပြတ်ခဲ့ရပြီး ရက်ပိုင်း အကြာမှာ မြို့လယ် ရပ်ကွက်တွေရဲ့ ရ၀တ သို့မဟုတ် ဓမ္မာရုံရှေ့မှာ အ၀ီစိ (စက်ရေတွင်း) တွင်း တူး နေတာကို တွေ့မြင်ရပါတော့တယ်။ ကျောက်တံတား မြို့နယ်ထဲက တွင်းတူးနေတဲ့ အဖွဲ့တဖွဲ့ကို မေးမြန်းကြည့်တဲ့ အခါမှာ မြို့တော် စည်ပင်က စီမံချက်နဲ့ လုပ်တာ၊ ရပ်ကွက်တွေ ရေမလာရင် ရေပေးဝေဖို့၊ အခု ၅ ဖွဲ့လောက် တပြိုင်တည်း တူးနေတာ လို့ဆိုပါတယ်။ စက်ရေတွင်းကို လက်နဲ့ တူးတာပါ။ သုံးချောင်းထောက်စင် ပေါ်မှာ ပိုက်ထိန်းမယ့်သူ နှစ်ယောက်လောက်က တက်နေပြီး အောက်မှာ သံပိုက်ကို လူငယ်နှစ်ယောက်က ရေပိုက် ဖြုတ် တပ် လုပ်တဲ့ ဂွရှင်နဲ့ ညှပ်ပြီး နွားများ ဆီဆုံ လှည့်သလို တပတ်ပြီး တပတ် လှည့်ကာ စက်ရေတွင်းတူးကြတာပါ။ တချို့နေရာတွေမှာတွေ့ရသလို စက်အားနဲ့ တဂျိုင်းဂျိုင်း ဆောင့်ကာ တူးတဲ့ စက်ရေတွင်း မဟုတ်ဘဲ လူအားနဲ့ တူးတာမို့လို့ ပေ ၁၅၀ ၀န်းကျင်မှာပဲ ရပ်တန့်လိုက်ကြပါတယ်။

စက်ရေတွင်း အခစား တူးသူ တဦးကတော့ “လတ်တလော မြို့လယ် မြို့နယ် ၃ခု ဖြစ်တဲ့ ပုဇွန်တောင်၊ ဗိုလ်တထောင်၊ ကျောက်တံတား တို့မှာ တွင်းပေါင်း ၂၅တွင်း တူးဖို့ လျာထားတယ်၊ တွင်းတွေရဲ့ အနက်က ပေ ၁၅၀ နဲ့ ၂၅၀ အကြားပဲ” လုိ့ ပြောပြပါတယ်။

ရန်ကုန်မြို့ကို ပေးဝေနေတဲ့ ငမိုးရိပ် ၊ ဂျိုးဖြူ၊ လှော်ကား စတဲ့ ရေလှောင်ကန်ကြီးတွေက တနေ့ကို ရေဂါလံ သန်းပေါင်း ၁၃၀၊ ၁၄၀ ကျော် ရပြီလို့ ဂျာနယ်တွေမှာ ဆိုပြီးကာမှ ယခုတော့ အရပ်ထဲမှာ လက်နဲ့တူးတဲ့ စက်ရေတွင်းက ရေကို မီးစက်နဲ့ မောင်းတင်ပြီး သုံးရမယ့် အလားအလာ ရှိပါတယ်။ ရေလှောင်ကန်ကနေ ပေးတဲ့ သဘာဝရေနဲ့ ခပ်တိမ်တိမ် တူးထားတဲ့ မြေအောက်ရေ ဘယ်လိုမှ နှိုင်းယှဉ်လို့မရပါဘူး။ သဘာဝရေက ရေသွက်ဖြစ်ပြီး သောက်သုံးရင်လည်း ဓါတ်သတ္တုမပါလို့ လူရဲ့ ကျန်းမာရေးကို ထိခိုက်မှုမရှိသော်လည်း တိမ်တိမ်တူးပြီး ရေရဲ့ အရည်အသွေးကို စစ်ဆေးထားခြင်း မရှိတဲ့ မြေအောက်ရေဟာ သံဓာတ်ပါခြင်း၊ ထုံးဓာတ်ပါခြင်းတို့ အပြင် ကျန်းမာရေးနဲ့ မသင့်တဲ့ တခြားဓာတ်တွေ ပါဝင်နိုင်ပါသေးတယ်။ လျှော်ဖွတ်ဖို့ ဆိုရင်လည်း မြေအောက်ရေ အများစုဟာ မသင့်တော်ဘဲ သိုလှောင်တဲ့ သံတိုင်ကီ၊ သတ္တု ကိုယ်ထည်တွေကို သက်တမ်း တိုစေပါတယ်။

ဒါ့အပြင် ရန်ကုန်မြို့လယ်မှာ မြေအောက်ရေ ထုတ်ယူမှုကြောင့် အထပ်မြင့် အဆောက်အဦတွေ နိမ့်ဆင်းလာမယ့် အရေးလည်း ရေရှည်မှာ စိုးရိမ်စရာရှိပါတယ်။ မြစ်နဲ့နီးပြီး ပင်လယ်ရေတက် ရေကျကြောင့် မြေအောက်ရေမှာလည်း မြစ်ရေရဲ့ အကျိုးသက်ရောက်မှု ရှိနိုင်သေးတယ်လို့ တချို့သော မြို့ခံများက စိုးရိမ်မှု ရှိနေကြပါတယ်။

နကိုက ရှိပြီးသား ရန်ကုန်မြို့ ရေပေးဝေ စနစ်ရဲ့ ရေတွန်းစက် ဓာတ်အား မပြည့်တာကို မီးစက်ကြီးကြီး ထားရှိပြီး စီစဉ်တာထက် မြို့တွင်းက လမ်းနဘေးတွေမှာ စက်ရေတွင်းတွေ လိုက်တူးပြီး ရေကို အဲဒီနေရာမှာ သွားသယ်ယူရမယ့် သဘော ဖြစ်နေပါပြီ။ ဒီအချက်ဟာ နအဖ အစိုးရရဲ့ စီမံခန့်ခွဲမှု ညံ့ဖျင်းတာကို ဖော်ပြတဲ့ သာဓက တခုလည်း ဖြစ်ပါတယ်။

လာမယ့် နွေရာသီမှာ လျှပ်စစ်မီးတွေ ပြတ်လို့ ရေတွန်းစက်က ရေမတွန်းပေးနိုင်ဘူးဆိုရင် ရပ်ကွက် အလိုက် ကြံ့ဖွံ့ဆိုင်းဘုတ် တင်ပြီး ရေပေးဝေမယ့် လက္ခဏာ တွေ့မြင်ရတယ် လို့ ရန်ကုန်မြို့ခံတွေက ပြောဆိုနေပါပြီ။ ရန်ကုန် တမြို့လုံးကို ပေးလို့ မကုန်နိုင်တဲ့ သဘာဝသုံးရေ ရှိလျက်သားနဲ့ ကြံ့ဖွံ့ စည်းရုံးရေး ဆင်းချင်လို့များ ယခုလို အကွက်မျိုး ဖန်တီးတာလား လို့တောင် တချို့သော မြို့ခံများက သံသယ ရှိနေကြပါတယ်။ လူတွေကို ဒုက္ခရောက်အောင် လုပ်ပြီးမှ ကြံ့ဖွံ့ဆိုင်းဘုတ် တင်ပြီး ကယ်တင်ချင်တာလား လို့ မြို့ခံများက မေးခွန်း ထုတ်နေကြပါတယ်။

Comments