အောင်စည်ရွမ်းသံ ကြားပြီထင့် ပြည်တော်ဝင်မယ်လေ
ရန်ဝင်း (တောင်တံခါး)
ဧပြီ ၃၀၊ ၂၀၁၀
“အခါတော်ရောက်ချိန် နီးလို့လာပြီလေ
ဒေါ်ဒေါ် မမ နှမ တို့ရေ အသည်းစွဲ ချစ်မိတ်ဆွေ ခေတ္တ ခွဲလို့နေ
မြို့မနဲ့ အတူတကွ လိုက်ပါနိုင်စေ
အောင်စည်ရွမ်းသံ ကြားပြီထင့် ပြည်တော်ဝင်မယ်လေ”
ပြည်တော်ဝင်၊ အေဝမ်း ဆရာညှာ
ပြည်တော်ဝင် သီချင်းကို အေဝမ်း ဆရာညှာရေးသည့်အချိန်မှာ ဒုတိယကမ္ဘာစစ်ကြီးပြီးခါစ ဖြစ်လေသည်။ ၁၉၄၅ ခုနှစ်၊ မတ်လအတွင်းက ဗိုလ်မှူးကြီးဗထူး၏ တပ်များက မန္တလေးမြို့ မြို့သိမ်းတိုက်ပွဲ ဆင်နွှဲပြီးသည့်နောက် စစ်ဘေးစစ်ဒဏ်သင့် မန္တလေးမြို့ကြီး အတွင်းသို့ မန္တလေးမြို့သူမြို့သားများ တဖွဲဖွဲဖြင့် ပြန်လည်ဝင်ရောက်လာချိန် ဖြစ်လေသည်။ အပျက်အစီးများကြားက မန္တလေးမြို့ကြီးကို ပြန်လည်တည်ဆောက်ကြရန် အားမာန်ပေးသော ပြည်တော်ဝင်သီချင်းကို အေဝမ်း ဆရာညှာ က မင်းကွန်း အရပ်ဒေသမှာ ရေးခဲ့လေသည်။
ဒုတိယကမ္ဘာစစ်မီး မြန်မာပြည်အတွင်းသို့ ကူးစက်ဝင်ရောက်လာသောအခါ မန္တလေးမြို့သူမြို့သားများသည် စစ်ဘေးဒဏ်မှ လွတ်ရာလွတ်ကြောင်းအားဖြင့် မန္တလေးမြို့၏ အနောက်ဘက်မှ ဧရာဝတီမြစ်ကိုဖြတ်ကူးပြီး စစ်ကိုင်းတောင်ရိုး၊ မင်းဝံတောင်ရိုးနှင့် မင်းကွန်း အရပ်ဒေသရှိ သူတော်စင်များ သီတင်းသုံးရာ ဘုန်းကြီးကျောင်းများ၊ သီလရှင်ကျောင်းများတွင် ရတနာသုံးပါး၏ အရိပ်အာဝါသအောက်သို့ ပြေးခိုကြရလေသည်။ ဒေသအခေါ်အားဖြင့် ထိုကျောင်းများကို ‘ချောင်’ ဟု ခေါ်သည်။
ဧရာဝတီမြစ် တဖက်ကမ်းမှ စစ်ကိုင်းတောင်ရှုခင်း။ (ဓာတ်ပုံ၊ ရန်ဝင်း-တောင်တံခါး)
“တောင်တွေစိမ့်စမ်း၊ ချောင်တွေသိန်းသန်း၊ ခေမာသောင်ကမ်း တက်လှမ်း အောင်မြင်မြေ”
စစ်ကိုင်းတောင်၊ မြို့မငြိမ်း
“ဘုန်းဘုရားရဲ့အရိပ်ကို ခိုပါရစေ၊
ကြည်ဖြူရှာသလေ သနားမကင်းရှာဘူးထင့်၊
‘အေးလကွယ်နေကြလဟဲ့’ စိတ်တိုင်းကျ သင့်တော်သလိုနေ”
ထိုသုံးပါး၊ မြို့မငြိမ်း
မြို့မငြိမ်း
မြို့မငြိမ်း အပါအဝင် မြို့မအဖွဲ့သားများနှင့် မိသားစုများသည်လည်း စစ်ကိုင်းတောင်ရိုးရှိ နိဗ္ဗိန္ဒချောင်နှင့် အနီးအပါးရှိ ချောင်များတွင် ခိုနားနေကြရသည်။ သားသမီးပမာ ခင်တွယ်သော ဘင်ဂျို၊ တယော၊ မယ်ဒလင်၊ တာပလာဗုံ အစရှိသော တူရိယာပစ္စည်းများကိုလည်း ရသမျှယူဆောင်ခဲ့ကြသဖြင့် မြို့မအဖွဲ့သားများသည် အတီးအမှုတ် အလေ့အကျင့် မပြတ်လပ်ကြပေ။
‘ချစ်ခင်ကြတဲ့ အားလုံးမိတ်ဆွေ၊ နေ့တိုင်းပဲ သတိရတယ်လေ
ကျုပ်တို့မြို့မ အသင်းသားများတတွေ၊ တောင်ရိုးတန်း စစ်ကိုင်းဘက်မှာနေ
ကျန်းမာကြရဲ့လားလို့ မြို့မမောင် တတွေ ရွှေမန်းသူမေ မေးလိုက်သံတွေ
ကျန်းမာကြပါရဲ့လို့ မြို့မမောင် တတွေ ရွှေမန်းသူမေ ပြောလိုက်ပါလေ
စစ်ကိုင်းမှာပဲ စိတ်ကစွဲ နတ်ပြည်၊ တခါတလေတော့ မျှော်မှန်း တမ်းတ တတွေတွေ
ပြန်ချင်ဇောတွေ ရောက်ချင်ဇောနဲ့ စိတ်စောလို့သာနေ’
ပြည်တော်ဝင်၊ အေဝမ်း ဆရာညှာ
ဒုတိယကမ္ဘာစစ်ကြီးပြီးခါစ ၁၉၄၅ ခုနှစ် မတ်လ ၂၃ ရက်၊ သောကြာနေ့တွင် မန္တလေးမြို့သို့ပြန်ကြရန် ဆုံးဖြတ်ကြပြီးလျှင် မြို့မအဖွဲ့သားများသည် သုံးနှစ် သုံးမိုးခန့် နီးလျက်နှင့်ဝေးနေကြရသော မန္တလေးမြို့ကြီးသို့ ပြန်လည် ဝင်ရောက်ကြလေသည်။ အင်းဝတံတားကြီးမှာ စစ်အတွင်းက ပျက်စီးသွားခဲ့သဖြင့် ဧရာဝတီမြစ်ကို ကူးတို့ဖြင့်ကူးကာ တဖက်ကမ်းရှိ စံရွေးဆိပ်ကမ်းမှ စံရွေးဘူတာသို့ စုရပ်အဖြစ် ရောက်လာကြသည်။ ထိုမှတဆင့် စစ်သုံးလက်ကျန် ကားကြီးတစီးတွင် ရရာဆေးဖြင့် ‘မြို့မ ဗုဒ္ဓဝေယျာဝစ္စ တူရိယာအသင်းကြီး’ ဟု ရေးခြယ်ကာ စစ်ကိုင်း၊ မန္တလေး လမ်းမကြီးတလျောက် အမရပူရမြို့ကိုဖြတ်၍ မန္တလေးမြို့သို့ပြန်ကြသည်။ အေဝမ်း ဆရာညှာ၏ ပြည်တော်ဝင်သီချင်းကို သီဆိုတီးမှုတ် လာကြသော မြို့မအဖွဲ့ကြီးကို တလမ်းလုံးရှိ စစ်ဘေးဒဏ် ပြေးရှောင်ရာမှ အိမ်ပြန်နေကြသည့် ခရီးသွားအပေါင်းက သောင်းသောင်းဖြဖြ အားပေးကြိုဆိုကြလေသည်။
မန္တလေးမြို့သူမြို့သားများသည် မန္တလေးမြို့ကြီးကို အပျက်အစီးများအကြား ပြာပုံဘဝမှ ရှင်သန်ထမြောက်စေ၍ မြို့သစ်၊ ဘဝသစ်အဖြစ် ထူထောင်နေကြရာတွင် အေဝမ်း ဆရာညှာ၏ ပြည်တော်ဝင် သီချင်းကို မြို့မအဖွဲ့ကြီးက လှည့်လည် သီဆို တီးမှုတ်၍ အားမာန် တက်စေခဲ့ကြလေသည်။
“မန္တလေးဆို ရွှေမြို့ တို့ရတနာပုံနေပြည်
တင့်တယ်သာယာစည်ကား ဟိုတုန်းအခါကလေ
အဲဒါတွေ မတွေးနဲ့တော့၊ ရှေ့ဆက်ခါ စီမံ ကြံစို့လေ။
မေ့မေ့ပျောက်ပျောက် အောက်မေ့လို့နေ တိုက်တာအိမ်ခြေ စည်းစိမ်ရှင်တွေ
လူကြံရင်မခံနိုင်ဘူး အထူးပင်မှတ်ကြပေ၊
အရင်လို ပျော်ပျော် ရွှင်ရွှင်နေ မြို့မအသင်းကပြောမလေ
ဖြစ်ဟဲ့ဆို ဖြစ်ရမယ်တဲ့ တက်ခေတ်လူငယ်များ အားအင် တောင့်တင်းစေ”
ပြည်တော်ဝင်၊ အေဝမ်း ဆရာညှာ
၁၉၆၉ ခုနှစ် မေလအတွင်းက စစ်ကိုင်းမြို့တမြို့လုံး မီးဘေး အကြီးအကျယ်သင့်သောအခါ မြို့မအဖွဲ့ကြီးက စစ်ကိုင်းမြို့သို့သွားရောက်၍ အေဝမ်း ဆရာညှာ၏ ပြည်တော်ဝင် သီချင်းကိုပင် လှည့်လည်သီဆိုတီးမှုတ်ခါ စစ်ကိုင်း မြို့သူမြို့သားများကို အားပေးခဲ့ကြပြန်သည်။
ဒုတိယကမ္ဘာစစ်ကြီးအပြီး သင်္ကြန်ပွဲမှစ၍ သင်္ကြန်ပွဲတိုင်းတွင် အေဝမ်း ဆရာညှာ၏ ပြည်တော်ဝင် သီချင်းကို မြို့မအဖွဲ့ကြီးက ငွေငန်း သင်္ကြန်ယာဉ်ပေါ်တွင် မှတ်မှတ်ရရ သီဆိုတီးမှုတ်လာခဲ့ကြသည်မှာ ယနေ့ထက်တိုင်အောင်ပင်။
မောင်အေးမြင့် (မြန်မာမှုဒီဇိုင်းသုတေသီ)
ဆယ်စုနှစ်တနှစ်ကျော် ကာလကြာရှည်စွာ သင်္ကြန်ပွဲတိုင်း မြို့မအဖွဲ့ကြီးနှင့် ပူးပေါင်းပါဝင်ဖျော်ဖြေခဲ့သည့် စာရေးဆရာ၊ အဆိုတော်၊ ရုပ်ရှင်သရုပ်ဆောင် ဝင်းဦးသည် ရှေးခေတ်က မြို့မအဖွဲ့ကြီး ပြည်တော်ဝင်ခဲ့သည့် လမ်းကြောင်းအတိုင်း စစ်ကိုင်းမြို့မှ မန္တလေးမြို့သို့ ခရီးတလျောက် မြို့မအဖွဲ့ကြီးနှင့်လိုက်ပါလျက် အေဝမ်း ဆရာညှာ၏ ပြည်တော်ဝင် သီချင်းကို ဂုဏ်ပြုသီဆိုခဲ့သည်မှာ နှစ်စဉ် နှစ်တိုင်း ဖြစ်ခဲ့လေသည်။
၂ဝ၁ဝ မန္တလေးသင်္ကြန် မှ မြို့မအဖွဲ့ကြီး (ဓာတ်ပုံ၊ ဒေါက်တာ လှခိုင် – မန္တလေး)
မြို့ကြီးများသည် ပြာပုံဘဝမှ ပြန်လည် စည်ပင်ဖွံ့ဖြိုးလာခဲ့လေသည်။ အပျက်အစီးများအကြားက ရုန်းကန်၍ ရှင်သန် ထမြောက် လာနိုင်ခဲ့ပေပြီ။ မည်သို့ပင် ဟောင်းနွမ်းပျက်စီးနေသည်ဖြစ်စေ၊ ပျက်အစဉ် ပြင်ခဏ ဆိုသကဲ့သို့ အပျက် သည် အကောင်း၊ အဟောင်း သည် အသစ် ဖြစ်နိုင်ပေ၏။ အေဝမ်း ဆရာညှာ၏ ပြည်တော်ဝင် သီချင်းသည် အပျက် အဟောင်း ကို အကောင်း အသစ် ဖြစ်စေရန် ပြန်လည်တည်ဆောက်ရာတွင် အားမာန်ကိုဆောင်ခဲ့ပေသည်။
“အခါတော်ရောက်ချိန် နီးလို့လာပြီလေ
ဒေါ်ဒေါ် မမ နှမ တို့ရေ အသည်းစွဲ ချစ်မိတ်ဆွေ ခေတ္တ ခွဲလို့နေ
မြို့မနဲ့ အတူတကွ လိုက်ပါနိုင်စေ
အောင်စည်ရွမ်းသံ ကြားပြီထင့် ပြည်တော်ဝင်မယ်လေ”
အေဝမ်း ဆရာညှာ
ပြည်တော်ဝင် ဆိုသည်မှာ ကိုယ့်တိုင်းပြည်၊ ကိုယ့်အရပ်သို့ အိမ်ပြန်ချိန်ပင် ဖြစ်လေတော့သည်။ ။
အထူးကျေးဇူးတင်စွာဖြင့် ကိုးကားခြင်း
(၁) ပြည်သူချစ်သော အနုပညာသည်များ၊ လူထုဒေါ်အမာ၊ မေလ၊ ၁၉၆၄
(၂) တိမ်ယံအိပ်မက် မိုးထက်နရီ၊ ဆူးငှက်၊ စက်တင်ဘာ၊ ၂ဝဝ၇
(၃) အတာတေး နှင့် မန္တလေးသင်္ကြန်၊ အောင်အောင် (ယဉ်မွန်)၊ မတ်လ၊ ၂ဝဝ၁
(၄) မြို့မငြိမ်း နှင့် သူ့အနုပညာ၊ သန်းအောင်ခိုင်၊ ဒီဇင်ဘာ၊ ၁၉၉၇
(၅) မန္တလေးမြို့ အနှစ် တစ်ရာ့ငါးဆယ်ပြည့် အထိမ်းအမှတ် ဆောင်းပါးပေါင်းချုပ်
သီချင်းများ နားထောင်ရန် - ပြည်တော်ဝင်သီချင်း - ရာဇာဝင်းတင့်သီဆို
ပြည်တော်ဝင်သီချင်း - ၀င်းဦး သီဆို
Comments