နိုင်ငံရေးပါတီ ၁၁ ပါတီက စီးပွားရေး အခွင့်အရေးများ တောင်းချိန်တွင်
မြေအောက်လှုပ်ရှားသည့် အဖွဲ့ ၁၁ ဖွဲ့က နိုင်ငံရေး အကျဉ်းသားအားလုံး လွှတ်ပေးရေးနှင့် ပြည်တွင်းငြိမ်းချမ်းရေးကို တောင်းဆို
မိုးမခ အထောက်တော်၊ ရန်ကုန်
ဧပြီ ၃၀၊ ရန်ကုန်
ပြည်တွင်းရှိ ရွေးကောက်ပွဲဝင် နိုင်ငံရေးပါတီ ၁၁ ပါတီစုပေါင်းပြီး ဥရောပ သမဂ္ဂအား အကောက်ခွန် လျော့ပေါ့ခွင့်ပြုရန် မေတ္တာရပ်ခံချိန်တွင် လျှို့ဝှက်လှုပ်ရှားလျက်ရှိသည့် နိုင်ငံရေး အဖွဲ့ ၁၁ ဖွဲ့ကလည်း နိုင်ငံရေး အကျဉ်းသား အားလုံးလွှတ်ပေးရေးနှင့် ပြည်တွင်းငြိမ်းခြမ်းရေး တို့ကို အရပ်ဝတ် အစိုးရအားတောင်းဆိုလိုက်သည်။
ဥရောပသမဂ္ဂ အနေဖြင့် မြန်မာနိုင်ငံအား စီးပွားရေးအရ ပိတ်ဆို့အရေးယူထားခြင်းကို သက်တမ်း တစ်နှစ် ထပ်မံတိုးပြီး ရက်သတ္တပတ် အနည်းငယ်အကြာတွင် နိုင်ငံရေးပါတီ ၁၁ ပါတီက ကုန်သွယ်မှုပြုရာတွင် အထွေထွေ သက်သာခွင့်ရ နိုင်ငံအဖြစ် မြန်မာနိုင်ငံအား ပြန်လည်ထားရှိပါရန် ၂၈ ရက်နေ့နေ့စွဲဖြင့် မေတ္တာရပ်ခံခဲ့ခြင်း ဖြစ်သည်။
ထိုသို့ အထွေထွေသက်သာခွင့်ကို ပြန်လည်ထားရှိပေးခြင်းဖြင့် အသေးစား အလတ်စား လုပ်ငန်းများ အကျိုးရှိနိုင်ပြီး သာမန်ပြည်သူများအတွက်လည်း အကျိုးကျေးဇူးရှိနိုင်မည်ဟု အဆိုပါ ဒီမိုကရေစီမိတ်ဆွေများ အဖွဲ့ဝင် နိုင်ငံရေးပါတီများက ဆိုသည်။ သို့ရာတွင် အရပ်ဝတ် လဲလှယ်ထားသည့် စစ်ဗိုလ်ချုပ်အများစုပါဝင်သည့် အစိုးရသစ်အနေဖြင့် လူ့အခွင့်အရေးဆိုင်ရာ အခြေအနေတိုးတက်အောင် ဆောင်ရွက်မှုများ ပြုလုပ်မည် မပြုလုပ်မည်ကို အဆိုပါ ၁၁ ပါတီအနေဖြင့် အာမခံနိုင်ခြင်း မရှိပေ။ အထက်ပါ ဒီမိုကရေစီမိတ်ဆွေများ အဖွဲ့ဝင် ၁၁ ပါတီတွင် ဒီမိုကရက်တစ်ပါတီ (မြန်မာ)၊ ဒီမိုကရေစီနှင့် ငြိမ်းချမ်းရေး၊ ပြည်ထောင်စု ဒီမိုကရေစီ၊ ရှမ်းတိုင်းရင်းသားများ ဒီမိုကရက်တစ်၊ ရခိုင်တိုင်းရင်းသားများ ဖွံ့ဖြိုးတိုတက်ရေး၊ ဝံသာနု NLD ၊ ချင်းအမျိုးသား၊ ဖလုံ-စဝေါ် ဒီမိုကရက်တစ်နှင့် အမျိုးသား မဟာမိတ်များ အဖွဲ့ချုပ်ပါတီတို့ဝင်သည်။
မြန်မာနိုင်ငံလုံးဆိုင်ရာ သံဃာ့တပ်ပေါင်းစုအဖွဲ့၊ ၈၈ မျိုးဆက်ကျောင်းသားများ အဖွဲ့၊ ဗမာနိုင်ငံလုံးဆိုင်ရာ ကျောင်းသားသမဂ္ဂ၊ ရက္ခအလင်းတန်း၊ Saffron Generation ၊ ၂၀၀၇ မျိုးဆက် ကျောင်းသားများ သမဂ္ဂ အစရှိသည့် မြေအောက်လှုပ်ရှားသည့် အဖွဲ့ ၁၁ဖွဲ့က ဦးသိန်းစိန် ခေါင်းဆောင်သည့် ကြံ့ဖွံ့အစိုးရအဖွဲ့ကို သုံးသပ်ချက်နှင့် အတူ နိုင်ငံရေး အကျဥ်းသားများအားလုံး ချွင်းချက်မရှိလွှတ်ပေးရန် တောင်းဆိုချက်ကို ဧပြီလ ၂၉ ရက်နေ့နေ့စွဲဖြင့် ထုတ်ပြန်ကြေညာခဲ့သည်။
မြေအောက်လှုပ်ရှားမှု အဖွဲ့ ၁၁ဖွဲ့မှ ထုတ်ပြန်သည့် ကြေညာချက်တွင် ယခုအသစ်ဖွဲ့စည်းသည့် အစိုးရသစ် အဖွဲ့ဝန်ကြီးအဖွဲ့ဝင် ၃၅ နေရာအနက် ၂၆ နေရာကို စစ်ဗိုလ်ချုပ်ဟောင်းများက ရယူထားပြီး ကျန်နေရာများအား ကြံ့ဖွံ့ပါတီဝင်များက ရယူထားခြင်း၊ ပြည်နယ်နှင့်တိုင်း အစိုးရအဖွဲ ၀န်ကြိးချုပ် ၁၄ နေရာအနက် ဗိုလ်ချုပ်ဟောင်း နှင့်လက်ရှိ ဗိုလ်ချုပ်များက ၁၀ နေရာ ယူထားပြီး ၄ နေရာကို ကြံ့ဖွံ့ပါတီဝင်များက ရယူထားခြင်း၊ အမျိုးသား ကာကွယ်ရေးနှင့် လုံခြုံရေးကောင်စီဝင် ၁၀ ဦးတွင်လည်း ၉ ဦးမှာ လက်ရှိဗိုလ်ချုပ်နှင့် ဗိုလ်ချုပ်ဟောင်းများ ဖြစ်ကာ ကျန်တစ်ဦးမှာ ကြံ့ဖွံ့ပါတီဝင် ဖြစ်နေသည့် အချက်တို့ကိုထောက်ပြထားသည်။
Comments