ရှာဖွေရေး ...

editors @ moemaka.net ((510) 854-6501)။
မိုးမခ ရုံးစားပွဲ - Home ရုံးခန်းအသစ်၊ အမှတ် (၁၂၄)၊ ၅၇ လမ်း၊ မဟာဗန္ဓုလ လမ်းမ၊ ပုဇွန်တောင်မြို့နယ်၊ ရန်ကုန်မြို့၊
ဖုန်း – ၀၉ ၂၅၂ ၂၄၉ ၀၉၄ ၊ ၀၉ ၄၂၁ ၇၄၃ ၇၅၃ ၊ ၀၉ ၅၀၄ ၁၀ ၅၈ ၊ ၀၉ ၄၃၀ ၄၆၃ ၉၉ (မန္တလေး)။ ။ စာတိုက်သေတ္တာ (၈၂၅)၊ ရန်ကုန်စာတိုက်ကြီး။

ထက်ခေါင်လင်း (Myanmar Now) ● ဒီရေတောတွေက ကျွန်တော်တို့ကို ထမင်းကျွေးနေတာ


ထက်ခေါင်လင်း (Myanmar Now) ● ဒီရေတောတွေက ကျွန်တော်တို့ကို ထမင်းကျွေးနေတာ
(မိုးမခ) မတ် ၂၅၊ ၂၀၁၇

ရခိုင်ဒေသဒီရေတောထဲ စီးပွားဖြစ်ထင်းခုတ်၊ မီးသွေးဖုတ်သူတွေကို အရေးယူဖို့လိုနေသေးကြောင်း ဒီရေတော ကာကွယ် သူတဦးက ပြောလိုက်ပါတယ်။

နိုင်ငံရေးသမားများလည်း ဒီရေတောကို အာရုံစိုက်ကြဖို့လိုကြောင်း သဘာဝပတ်ဝန်းကျင်ထိန်းသိမ်းတဲ့ ရခိုင်ဒေသ တံငါ သည်တဦးက ပြောလိုက်ပါတယ်။   ဂွမြို့နယ်၊ မကျည်းငူကျေးရွာအုပ်စု၊ ကံငူကျေးရွာက  ၆၂ နှစ်အရွယ် ဦးကျော်ဝင်းဟာ ကျေးရွာအဆင့် ဒေသတွင်း ဒီရေတောကာကွယ်ထိန်းသိမ်းရေးအဖွဲ့ ဥက္ကဋ္ဌအဖြစ် တာဝန်ယူထားပါတယ်။ သူတို့အဖွဲ့က ရခိုင်ကမ်းရိုးတန်း သဘာဝပတ်ဝန်းကျင်ထိန်းသိမ်းရေးအသင်းနဲ့ လက်တွဲဆောင်ရွက်နေတာပါ။ မကြာသေးခင်က Myanmar Now နဲ့တွေ့ဆုံရာမှာ သူက ဒီရေတောတွေရဲ့ အရေးပါပုံများအကြောင်း ပြောပြထားပါတယ်။


ကံငူကျေးရွာမှာ တွေ့ရတဲ့ ဒီရေတောကာကွယ်ထိန်းသိမ်းရေးအဖွဲ့ ခေါင်းဆောင် ဦးကျော်ဝင်း။ ကံငူကျေးရွာဟာ   ကမ်းရိုး တန်း တံငါရွာလေးဖြစ်ပြီး  အခုဆိုရင် ဧက ၅ဝဝ ကို ကျေးရွာအစုအဖွဲ့ ပိုင်ဒီရေတော တည်ထောင်ထားပါတယ် (ဓာတ်ပုံ - ထက်ခေါင်လင်း/Myanmar Now)
မေး။ ။ ပြန်လည်ထူထောင်ရေး မလုပ်ခင် ရွာပတ်ဝန်းကျင် ဒီရေတောတွေရဲ့ အခြေအနေက ဘယ်လိုရှိလဲ။
ဖြေ။ ။ ဟိုးအရင်တုန်းက ဒီရေတောတွေကို ထိန်းသိမ်းတာမျိုး မလုပ်ခဲ့ပါဘူး။ သူခုတ်၊ ကိုယ်ခုတ်ပဲ။ ဒါပေမယ့် အဲ့ဒီအချိန်အ ထိ ဒီရေတောတွေက ကောင်းတယ်ဗျ။ အခုထက် ၂ ဆကောင်းတယ်။ စီးပွားဖြစ် မီးသွေးတွေ လာဖုတ်တော့မှ အကုန်မျိုး သုဉ်းကုန်တာ။ ဧရာဝတီတိုင်း၊ လပွတ္တာဘက်ကနေ အများအားဖြင့် လာဖုတ်ကြတာ။ ၂ဝဝ၉ ခုနှစ်လောက်စပြီးသူတို့ဝင်လာ တာပေါ့။ အခုလက်ရှိထိတောင် လာဖုတ်နေကြတာပဲ။ သူတို့နားလည်မှုတွေနဲ့ ခုတ်ပြီးဖုတ်နေကြတာ။  ဟိုးအရင်က တုတ်ပင် (ဒီရေတောအပင်တမျိုး) ဆို အကြီးကြီး။ အခု လက်မောင်းလုံးလောက်အပင်မျိုးတောင်မတွေ့တော့ဘူး။ အခုချိန်ထိ သစ်မှောင်ခိုလုပ်ငန်း လုပ်နေကြတုန်း။ လှေ လေးငါးစီးနဲ့ လာလာခိုးခုတ်နေကြတာ။

မေး။ ။ ထင်း၊ မီးသွေးအတွက် အပင်ခုတ်တာ ဒေသခံတွေရော မပါဘူးလား။
ဖြေ။ ။ မဟုတ်ဘူးဗျ။ ကိုယ့်ဒေသကလူတွေက နားလည်လာပြီ။ မလုပ်ကြတော့ဘူး။ ဧရာဝတီတိုင်း ဘက်ကနေ လာကြတာ။  သူတို့ခုတ်နေတာကို သိလို့သွားတားတဲ့အခါမှာတော့ သူတို့ မလုပ်တော့ပါဘူးဆိုပြီး ပြန်ပြောတယ်။ ဒါပေမယ့် ကွယ်ရင်တော့ လုပ်နေကြတာပဲ။ ကျွန်တော်တို့ကလည်း မလုပ်ဖို့တားနေတာကို ဆက်လုပ်ရင်တော့ ရိုက်ဖို့ပဲရှိတယ်။ တခါတလေ ခိုးခုတ်နေတာကို ကျွန်တော်တို့မိလို့ လှေရော၊ လူရော လက်ရဖမ်းပြီး သစ်တောဌာနကို အပ်လိုက်တယ်၊ ကျွန်တော်တို့ ပြန်လာတာနဲ့ ခုတ်တဲ့သူတွေကို ခုတ်တဲ့ ရဲတင်းတွေကအစ အကုန်ပြန်ပေးပြီး လွှတ်ပေးလိုက်တယ်။ ကျွန်တော်တို့က ကိုယ် အရိပ်တကြည့်ကြည့်နဲ့ ပြန်ထူထောင်ထားတဲ့အပင်ကို သူတို့လာခုတ်တော့ ကျွဲမြီးတိုတာပေါ့။ အဲ့ဒီလိုသာ ကျွန်တော်တို့က ဖမ်း၊ သက်ဆိုင်ရာကပြန်လွှတ်ဆိုရင် ကျွန်တော်တို့ထူထောင်ထားတဲ့အပင် အဲ့ဒီလူတွေခုတ်တာ ဘယ်ခံတော့မလဲ။ ကျွန်တော်တို့ တရွာထဲ ဒီတတောလောက်ကို နှစ်ရက်ခုတ်တာတင် ကုန်တယ်။ ကျွန်တော်တို့ရွာသားတွေ အခု ထင်းဆိုက် တာဆို အုန်းလက်ခြောက်၊ အုန်းသီးခွံတွေ၊ ဒီရေတောပင်မဟုတ်တဲ့ ကိုယ့်မြေလေးတွေမှာ စိုက်ထားတဲ့အပင်လေးတွေ၊ ဗာဒံပင်လေးတွေ။ နောက်ဆုံး လုပ်စရာက ဥပဒေမဲ့တားဖို့ပဲရှိတော့တယ်၊ ကျွန်တော်တို့ ထောင်ကျခံလိုက်ကြဖို့ပဲရှိတယ်။ တယောက်လောက်ကို ဥပမာအနေနဲ့ ထိထိရောက်ရောက် အရေးယူပေးစေချင်တယ်။ ဒီရေတောခုတ်လို့ ထောင်ကျတယ် ဆိုတဲ့အသံ ထွက်လာမှ ထပ်မလုပ်ရဲကြတော့မှာ။ 


ဒီရေတောအတွင်း ဓနိကိုင်းတွေ ခုတ်ယူနေတဲ့  ကျိန္တလီ ဒေသခံတဦး။  ဓနိကို အမိုး အကာအဖြစ် အသုံးပြုတဲ့နေအိမ်တွေ ကျေးလက်ဒေသမှာ အများအပြား ရှိနေတာကြောင့် ဓနိပင်တွေက ကျေးလက်ဒေသအတွက် တန်ဘိုးရှိလှပါတယ် (ဓာတ်ပုံများ - ထက်ခေါင်လင်း/Myanmar Now)

မေး။ ။ ဒီရေတောထိန်းသိမ်းရင် ဘာအကျိုးအမြတ်ရမယ်ဆိုတာ ခုတ်တဲ့သူတွေကို မပြောပြဘူးလား။
ဖြေ။ ။ ပြောတယ်၊ အတန်တန်ပြောတယ်၊ ချောင်းဖျားမှာ မီးသွေးဖုတ်နေတဲ့သူတွေကို မီးသွေးမဖုတ်နဲ့၊ ကျွန်တော်တို့ ဒီရေတောထိန်းသိမ်းဖို့နဲ့ပတ်သက်ပြီး ရတဲ့ရန်ပုံငွေတွေနဲ့ ငွေကြေးထုတ်ပေးမယ်၊ ကွမ်းခြံတွေ ဘာတွေလုပ်၊ ငါးလုပ်ငန်းလုပ်ဖို့ ပိုက်၊ လှေမရှိရင် ဝယ်ပေးမယ်၊ အဲ့ဒါတွေနဲ့လုပ်စား၊  ထင်း၊ မီးသွေးဘက်ကို စိတ်မကူးပဲ လုပ်ငန်းပြောင်းလုပ်ဖို့။  ထင်းခုတ်စား တာ တနေကုန်ခုတ်မှ ငါးထောင်လောက်ရတာ။ အခုဒီရေတောကို ထိန်းဖို့ ထောက်ပံ့ပေးတဲ့ ရန်ပုံငွေနဲ့ လုပ်ကိုင်လာတာဆို အရင်တုန်းက ဒီလို ငါးဖမ်းလှေ (ကမ်းနီးငါးဖမ်းလှေ) ဆိုတာ မြင်တောင်မမြင်ဖူးခဲ့ဘူး။ ဒီလိုလှေပိုင်ခဲ့မယ်လို့ မျှော်လင့်ချက် တောင် မထားနိုင်ခဲ့ဘူး။ အခုရှိနေတဲ့ရွာကအိမ်တွေဆို CLEAR စီမံကိန်း (နိုင်ငံတကာ အစီအစဉ်တခုဖြစ်တဲ့ အသက်မွေး ဝမ်းကျောင်းမှုနှင့် စားနပ်ရိက္ခာ ဖူလုံရေး ရန်ပုံငွေအဖွဲ့ရဲ့ ၂ဝ၁၂ - ၂ဝ၁၄ စီမံကိန်း) ကျပြီး နောက်ပိုင်းမှ ဆောက်လာနိုင်ခဲ့တာ။ အရင်တုန်းက တဲသာသာအိမ်ကလေးတွေ။ 
 

မေး။ ။ အရင်တုန်းက ဘာလုပ်ငန်းလုပ်ခဲ့လဲ။
ဖြေ။ ။ အရင်တုန်းက ကျွန်တော်က တံငါလုပ်ငန်းပဲလုပ်တာ။ ကျွန်တော်တို့မှာ ဥယျာဉ်မရှိဘူး။ လယ်မရှိဘူး။ ပင်လယ်မှာ ရာသီဥတုကောင်းရင် ငါးဖမ်းလိုက်တယ်။ ရာသီဥတုမသာရင် ချောင်းထဲ ငါးလိုက်ဖမ်းတယ်။ ထင်းခုတ်ရောင်းတယ်။ အရင်တုန်းက လက်လှော်လှေခပ်သေးသေးလေးတောင်မှ မပိုင်ဘူး။ ငှားလုပ်ရတာ။ တရွာလုံးမှာမှ ၅ စီးလောက်ပဲရှိတာ။ လှေမရှိသူက တနေ့ ၅ဝဝ ပေးငှား။ ငါးရှာတာမှာမှ တနေကုန်ရှာ ၃ဝဝ ပဲရလို့ လှေငှားခ ၃ဝဝ ပဲ ပေးတော့ စကားတွေက များကြနဲ့။ အဲ့ဒီလိုဘဝတွေ အမျိုးမျိုးကြုံခဲ့ရတာ။  စီမံကိန်းကျပြီး နောက်ပိုင်း စက်လှေ ဝယ်နိုင်လာခဲ့တယ်။ ပင်လယ်ကို တခေါက်ထွက်သွားရင် ကျပ်သိန်း ၁၅၊ ၂ဝ ဆိုတာ ရလာတယ်။ အမျိုးသမီးတွေတောင် ပင်လယ်ငါးဖမ်းလှေပြန်ရောက်လို့ ငါးခွဲကြေးရတာ တခါတလေ တရက်တည်းနဲ့ သုံးသောင်းလောက်အထိ ရကြတယ်။

၂၀၁၂ ခုနှစ်က အပြောင်ရှင်းခံလိုက်ရတဲ့ ကျွန်းခုံတွေကို ရခိုင်ကမ်းရိုးတန်း သဘာဝပတ် ၀န်းကျင် ကာကွယ်ထိန်းသိမ်းရေးအသင်းက ပြန်လည် ထူထောင်ရေးလုပ်ငန်းတွေ လုပ်ကိုင်နေပါတယ်။ ပတ်ဝန်းကျင် ထိန်းသိမ်းရေး၊ သစ်ပင်စိုက်ပျိုးရေး လုပ်ငန်းတွေကြောင့် ဒီရေပင်တွေ ပြန်လည် ထူထပ်စ ပြုလာပါပြီ။

မေး။ ။ ဌာနဆိုင်ရာတွေက  ဒီရေတောထိန်းသိမ်းဖို့ ပြောပြ၊ စည်းရုံးတာမျိုး ရှိလား။
ဖြေ။ ။ ဘာတခုမှမရှိဘူး။ အဓိကကတော့ သစ်တောဌာနပဲ။  ကျွန်တော်တို့ကို ကြက်၊ ကြက်ချင်း အိုးမဲသုတ်ပြီး ခြင်းထောင် တခုထဲထည့် ခွပ်ခိုင်းတဲ့သဘောမျိုးဖြစ်နေတယ်၊ ဖိအားလေးတော့ နည်းနည်းပေးပါလို့ (ဝန်ကြီးတယောက်ကို) တင်ပြခဲ့ဖူး တယ်။ ဘာ့ကြောင့်လဲဆို ခုတ်နေတဲ့သူတွေကို ကျွန်တော်တို့က သွားပြောတယ်။ မခုတ်နဲ့ပေါ့။ အဲ့ဒီတော့ တယောက်နဲ့ တ ယောက် ဓားနဲ့ခုတ်၊ တုတ်နဲ့ရိုက်ရမယ့် အခြေအနေမျိုးဖြစ်နေတယ်။ သူတို့ဆီကို အထောက်အထားတွေနဲ့ တင်ပြတယ်။   အရေးယူမပေးဘူး။ အဲ့ဒီတော့ ခုတ်ကွာ၊ ဟိုရောက်လည်း ငါတို့ကို ပြန်လွှတ်ပေးတာပဲဆိုတာ ဖြစ်လာတယ်။

မေး။ ။ လွှတ်တော်ကိုယ်စားလှယ်တွေကိုရော တင်ပြတောင်းဆိုတာမျိုးမလုပ်ဖူးလား။  
ဖြေ။ ။ လုပ်ပါတယ်။ သူတို့ကတော့ လွှတ်တော်မှာတင်ပြပေးမယ်ပေါ့။  ပြီးခဲ့တဲ့အစိုးရသက်တမ်းတုန်းက လွှတ်တော်ကိုယ် စားလှယ်တွေကတော့ ရွာတွေဘက်လာပြီး ဒီရေတော ကာကွယ်ဖို့ပြောတယ်။ အခု လွှတ်တော်ကိုယ်စားလှယ် အသစ်တွေ တော့ ကျွန်တော်တို့ဘက်ကို တယောက်မှ မရောက်လာကြသေးဘူး။ တွေ့တော့ ကျွန်တော်တို့က ပြောပြလည်း သူတို့ဘက် က သိပ်အရေးမလုပ်ဘူး။ သူတို့မှာလည်း ပါတီအစွဲလေးတွေနဲ့ပေါ့ဗျာ။

ဧရာဝတီတိုင်းဒေသကြီးဘက်ကနေ   လှေနဲ့ ရောက်လာကြပြီး ကျိန္တလီမှာ စီးပွားဖြစ် မီးသွေးဖုတ်၊ ထင်းခုတ်ကြသူတွေ ရှိပါတယ်။ သူတို့ ခုတ်လှဲသွားခဲ့တဲ့ ဒီရေပင်ငုတ်တိုတွေကို နေရာ အများအပြားမှာ တွေ့ရပါတယ်။

မေး။ ။ ရွေးကောက်ပွဲတုန်းက ဘယ်ပါတီက အမတ်လောင်းကို မဲပေးခဲ့လဲ။
ဖြေ။ ။ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီကိုပဲ မဲပေးခဲ့တာ။ တရွာလုံးလည်း ပြည်ခိုင်ဖြိုးကိုပဲ ပေးခဲ့တာ။ ဘာဖြစ်လို့ လဲဆိုတော့ ပြည်ခိုင်ဖြိုးလက်ထက်မှာ ကျွန်တော်တို့ကို ဒီရေတောနဲ့ပက်သက်ပြီး သူတို့ခွင့်ပြုချက်နဲ့ပဲ ချပေးခဲ့တာ။ အဲ့ဒီအ တွက်ကြောင့်လည်း ကျွန်တော်တို့ရွာဟာ ပြောင်းလဲတိုးတက်လာတာ။

မေး။ ။ အစိုးရအဖွဲ့အစည်းတွေ၊ လွှတ်တော်အမတ်တွေကို ဘာပြောချင်တာ ရှိသလဲ။
ဖြေ။ ။ ဒီရေတောနဲ့ပက်သက်ရင်တော့ ကျွန်တော်တို့ထိန်းသိမ်းထားတာတွေကို နှောင့်ယှက်မှုမရှိရင် အကျေနပ်ဆုံးပဲ။ ဘာလို့လဲဆိုတော့ ထိန်းသိမ်းရင် အပင်တွေကြီးလာမယ်၊ နိုင်ငံခြားသားတွေနဲ့ ဒီရေတော ထိန်းသိမ်းမှုကို တွဲလုပ်ရင်း သိ လာတာက ဒီရေတောထိန်းသိမ်းထားလို့ နောင်မှာ နိုင်ငံတကာက ငွေကြေး (စိုက်ပျိုးသစ်တော ကာဗွန်ထိန်းသိမ်းနိုင် မှုကြောင့် ပေးအပ်တဲ့ နိုင်ငံတကာလျော်ကြေးငွေ) တွေ ရလာမယ် ဆိုတဲ့ သတင်းစကားတွေကြောင့် မျှော်လင့်ချက်ရှိလာတယ်။ နောက် ကျွန်တော်တို့ ရည်ရွယ်ချက်ကိုက ဒီရေတောကို ထိန်းသိမ်းမယ်၊ ပိုကောင်းသထက် ကောင်းမွန်အောင် လုပ်မယ်၊ ထောက်ပံ့ထားတဲ့ ငွေကြေးကို ကျွန်တော်တို့က အလွဲသုံးစားမလုပ်ဘဲနဲ့ ထိန်းသိမ်းရေးကို အားစိုက်လုပ်နေတာကို သူတို့မြင် မယ်၊ နောက်မျိုးဆက်တွေကိုလည်း ဒါကို ဆက်ထိန်းသိမ်းရမယ့်အမွေပေးမယ် ဆိုတာပဲ။ အရင်က ရွာမှာ ၄ တန်းအောင် ဆိုတာ ခပ်ရှားရှား။ အခုဆို ၉ တန်း၊ ၁ဝ တန်းတွေ ရှိလာတော့ ကျွန်တော်တို့အားဖြစ်ရတယ်။  အရင်က ကျောင်းမထား နိုင်ကြဘူး၊ ကျောင်းသွားဖို့ အင်္ကျီဖိုး၊  မုန့်ဖိုးမရှိဘူး။ ဟိုဘက်ကမ်းမှာ သွားတက်ဖို့ မိဘဆင်းရဲတော့ မထားနိုင်ဘူး။ သားရေ ကျောင်းသွား တက်ပါလားဆိုရင် အဖေတယောက်တည်း လှေလှော်ပြီး ငါးဖမ်းလို့ရမလား၊ သားပါလိုက်ကူညီမှရမှာပေါ့နဲ့ နောက်ဆုံး တံငါလေးပဲ ဖြစ်ကရော။ ကျွန်တော် စိတ်ပျက်တာက အခု ဟိုမှာ ခုတ်နေတယ်၊ ဒီမှာခုတ်နေတယ်ကြားလို့ လိုက်ရလည်း ကျွန်တော်တို့လူလေး လေးငါးခြောက်ယောက်ပဲ။ ခုတ်တာကိုအရေးမယူ ပေးတော့ လိုက်ဖို့ကို စိတ်ပျက်လာ ကြတယ်။ လိုက်တားရင် မတော် ဓားနဲ့ခုတ်တော့ ဘယ်လိုလုပ်မလဲ၊ လောက်လေး (လေးခွ) နဲ့ပစ်ရင် ဘယ်လိုလုပ်မလဲ။ ကျွန်တော်ကတော့ အသက်သေပစေ၊ ကိုယ်ရွာဖွံ့ဖြိုးရေးအတွက် လိုက်ထိန်းသိမ်းမှာပဲ။


ကျိန္တလီမှာ တွေ့ရတဲ့ ဒီရေပင်ကြီးက  လူကြီး ၂ ဦး ဖက်စာမက လုံးပတ် ကြီးမားပါတယ်။ အရှေ့တောင်အာရှမှာ  ဒီလိုဒီရေပင်ကြီးမျိုးဟာ ရခိုင်ကမ်းရိုးတန်းမှာသာ ကျန်ရှိတော့တယ်လို့ ရခိုင်ကမ်းရိုးတန်း သဘာဝ ပတ်ဝန်းကျင် ကာကွယ် ထိန်းသိမ်းရေးအသင်းနဲ့ တွဲဖက်အလုပ်လုပ်ကိုင်ဖူးတဲ့  နိုင်ငံတကာ ဒီရေတောပညာရှင်တွေက မှတ်ချက်ပြုကြောင်း သိရပါတယ်။

မေး။ ။ ဒီရေတောကို အခုလိုထိန်းသိမ်းနေလုို့ ဘာအကျိုးကျေးဇူးတွေရမလဲ။
ဖြေ။ ။  ဒီရေတောတွေက ကျွန်တော်တို့ကို ထမင်းကျွေးနေတာ။ ဒါကိုထိန်းတာကြောင့် ငါး၊ ပုဇွန်၊ ဂဏန်း၊ ဂုံးတွေ ပေါများ လာတယ်။ ကျွန်တော့်မှာအခက်အခဲရှိလာရင် တောထဲသွား၊ ဂုံးရှာရောင်းစားတော့ ထမင်းစားဖို့တော့ ရတာပဲ။ အဲ့ဒါကြောင့် ဒီမသမာသူတွေ လာခုတ်နေတာကို စိတ်တအားတိုနေတာ။ ကျွန်တော့်မှာ ပိုက်ဆံမရှိရင် ဒီတောထဲမှာ သွားရှာနေရတာ။ ဂုံးကောက်၊ မရွတ် (စေတီခရု) ကောက်၊ ဂဏန်းထောင်၊ ငါးမျှား၊ နောက်ဆုံး အိမ်အသုံးအဆောင်နဲ့ပဲဖြစ်ဖြစ်၊ ပင်လယ်ထွက် မယ့်လှေအတွက် ကျောက်ဆူးက အစ၊ သိသိသာသာလာပြော၊ ခိုးမခုတ်နဲ့။ သစ်သားကျောက်ဆူးတလက်ကို လေးငါးသောင်း ဖြစ်နေလို့ မဝယ်နိုင်ဘူးဗျ။ ဒီရေတောက ကျွန်တော်တို့ရဲ့ အမိ၊ အဖတွေလို့ကို ကျွန်တော်ခံယူထားတယ်၊ ဒီရေပင်တွေကို လာလာခုတ်နေတာ ကျွန်တော်တို့ရဲ့ အမိ၊ အဖတွေကို တုတ်နဲ့လာရိုက်နေသလိုကို ခံစားမိတယ်။