ရှာဖွေရေး ...

PO Box 320-207, San Francisco, CA 94132-0207, USA – editors @ moemaka.net ((510) 854-6501)။
မိုးမခ ရုံးစားပွဲ - Home ရုံးခန်းအသစ်၊ အမှတ် (၁၂၄)၊ ၅၇ လမ်း၊ မဟာဗန္ဓုလ လမ်းမ၊ ပုဇွန်တောင်မြို့နယ်၊ ရန်ကုန်မြို့၊
ဖုန်း – ၀၉ ၂၅၂ ၂၄၉ ၀၉၄ ၊ ၀၉ ၄၂၁ ၇၄၃ ၇၅၃ ၊ ၀၉ ၅၀၄ ၁၀ ၅၈ ၊ ၀၉ ၄၃၀ ၄၆၃ ၉၉ (မန္တလေး)။ ။ စာတိုက်သေတ္တာ (၈၂၅)၊ ရန်ကုန်စာတိုက်ကြီး။

အိချယ်ရီအောင် (Myanmar Now) ● ဒုက္ခသည်စခန်းထဲလိုက်လာတဲ့ အသံတိတ်ရာဇဝတ်မှု

အိချယ်ရီအောင် (Myanmar Now) ● ဒုက္ခသည်စခန်းထဲလိုက်လာတဲ့ အသံတိတ်ရာဇဝတ်မှု
(မိုးမခ) ဒီဇင်ဘာ ၉၊ ၂၀၁၆

အိမ်ထောင်ဘက်ရဲ့ အနိုင်ကျင့်မှု ခံနေရတဲ့ စစ်ရှောင်စခန်းရောက် အမျိုးသမီးအများအပြားအတွက် ပညာပေးသင်တန်းတွေ ပြုလုပ်နေပါတယ်

ကွတ်ခိုင် (Myanmar Now)  - ရှမ်းပြည်နယ်၊ ကွတ်ခိုင်မြို့ပြင် ဒုက္ခသည်စခန်းတစ်ခုမှာ ခိုလှုံနေသူ ၃၄ နှစ်အရွယ် အမျိုးသမီး တစ်ဦး ရင်ဆိုင်ခဲ့ရတဲ့ အန္တရာယ်ကြီးနှစ်ခု  ရှိခဲ့ပါတယ်။ တစ်ခုကတော့ သူတို့ရွာနားဖြစ်ပွားတဲ့ တိုက်ပွဲတွေပါ။ နောက်တစ်ခု ကတော့ အရက်သမား၊ ဆေးသမား ခင်ပွန်းသည် အနိုင်ကျင့်တဲ့ဒဏ်ကို ၁၆ နှစ်ကြာ ခံရခြင်းပါပဲ။ 


အောက်တိုဘာလကုန်ပိုင်းကတွေ့ရတဲ့ ရှမ်းပြည်နယ်၊ ကွတ်ခိုင်မြို့ရှိ စစ်ရှောင်စခန်း မြင်ကွင်းတစ်ခု (ဓာတ်ပုံ - အိချယ်ရီအောင်/Myanmar Now)

အမည်မဖော်လိုတဲ့ ဒီအမျိုးသမီးက သတ္တမမြောက်ကလေးကို ကိုယ်ဝန်လွယ်ပြီးချိန်မှာတော့ ကြိမ်ဖန်များစွာ အော်ဟစ်ဆဲဆို၊ ရိုက်နှက်ခံရတဲ့ဘဝမှာကနေ လွတ်မြောက်ဖို့အတွက် ခင်ပွန်းသည်နဲ့ ကွာရှင်း ပြတ်စဲလိုက်ပါတယ်။

“သူက ကျွန်မ အသားနာအောင် အကြိမ်ကြိမ် နှိပ်စက်ခဲ့သလို စိတ်ဓာတ်ဒဏ်ရာရအောင်လည်း နှိပ်စက်ခဲ့တဲ့ သူတစ်ယောက် ပါ။ ကျွန်မ သူ့ကို လုံးဝ ခွင့်မလွှတ်နိုင်ဘူး” လို့ သူက ပါးပြင်ပေါ်လှိမ့်ဆင်းလာတဲ့ မျက်ရည်စတွေကို သုတ်ရင်း ပြောလိုက်ပါ တယ်။

ကွတ်ခိုင်မြို့ပြင်က KBC စခန်းထဲ သူ့ကိုတွေ့ရချိန်မှာ ဒီအမျိုးသမီးက ၃ လ အရွယ် ကလေးအပါအဝင် ကလေး ၇ ယောက်ကို ပြုစုပျိုးထောင်၊ ပြန်ရောင်းနိုင်တဲ့ ဝက်တစ်ကောင်ကို လွတ်ကျောင်းမွေးမြူရင်းနဲ့ မိသားစုကို ဦးဆောင်နေတာ တွေ့ရပါတယ်။
စစ်ဒဏ်သင့်ရွာပေါင်း ၉ ရွာကနေ ထွက်ပြေးတိမ်းရှောင်လာသူ ၃ဝဝ နီးပါး စုဝေးခိုလှုံတဲ့ အဲဒီရွာအပြင် မကြာသေးခင်က ကွတ်ခိုင်မြို့ပြင် စစ်ရှောင် ဒုက္ခသည်စခန်းတချို့ကိုရောက်ရှိစဉ် တွေ့ခဲ့ရတဲ့ အမျိုးသမီးအများအပြားဟာ သူ့လိုပဲ အိမ်ထောင် ဘက်တွေရဲ့ အနိုင်ကျင့်တာကို ခံနေရသူတွေပါ။

စခန်းတွေထဲ မိသားစုတွင်းအကြမ်းဖက်မှု အထူးသဖြင့် ကျား မ အခြေပြု အကြမ်းဖက်မှု လျော့နည်းလာစေဖို့အတွက် လတ် တလော  အထောက်အကူပေးနေတာကတော့ အသိပညာပေး သင်တန်းများပါပဲ။

● ပညာပေးခြင်း
ကုလသမဂ္ဂလူဦးရေ ရန်ပုံငွေအဖွဲ့ UNFPA ကတော့ အမျိုးသမီးများကို အကြမ်းဖက်မှု အထူးသဖြင့် အိမ်တွင်း အကြမ်းဖက်မှု တွေက မြန်မာနိုင်ငံမှာ တော်တော်လေး ဖြစ်ပေါ်နေတယ်လို့ ပြီးခဲ့တဲ့ရက်ပိုင်းအတွင်း ထွက်ရှိလာတဲ့ ထုတ်ပြန်ချက်တစ်စောင်မှာ ဖော်ပြထားပါတယ်။

ဒီအဖွဲ့ရဲ့ ကျား၊ မ အခြေပြု အကြမ်းဖက်မှုရေးရာကျွမ်းကျင်သူအရာရှိ Alexandra Robinson က ကျား၊မအခြေပြု အကြမ်း ဖက်ခံရခြင်းတွေမှာ ကာကွယ်မှုလုပ်ငန်းတွေက အရေးကြီးတယ်လို့ ပြောပါတယ်။

"ကျား၊ မ အခြေပြု အကြမ်းဖက်မှု ဆိုတာ အမျိုးသမီးတွေကို နှိပ်စက်မှု အထူးသဖြင့် အိမ်တွင်းအကြမ်းဖက်မှု အကြီးစားဖြစ်လို့ အသံတိတ်ရာဇ၀တ်မှုလို့ ပြောနိုင်ပါတယ်။ ဒုက္ခသည်စခန်းတွေမှာတောင် ဒီပြဿနာတွေ ဖြစ်နေပါတယ်" လို့ သူက ဆိုပါတယ်။



သင်တန်းတွေပြုလုပ်ခြင်း၊ ပိုစတာနဲ့ လက်ကမ်းစာစောင်တွေ ဖြန့်ဝေခြင်း အစရှိတဲ့ သတိပေးလုပ်ငန်းစဉ်ဟာ ပြည်သူတွေ အတွက် နည်းမျိုးစုံနဲ့ အများကြီး အထောက်အကူပြုတယ်လို့ သူက ရှင်းပြပါတယ်။

ဒီလို အသိပေးခြင်းအားဖြင့် အကြမ်းဖက်မှုကြုံတွေ့ရတဲ့ အမျိုးသမီးတွေနဲ့ မိန်းကလေးတွေအတွက် ကာကွယ်စောင့်ရှောက်မှု အစီအစဉ်တွေ ဘယ်လိုရနိုင်မလဲ၊ ဆေးကုသမှု၊ စိတ်ပိုင်းဆိုင်ရာနဲ့ ဥပဒေပိုင်းဆိုင်ရာ အကူအညီတွေ ဘယ်လိုရနိုင်မယ်ဆိုတာ သိလာနိုင်မှာပါလို့ သူက ဆက်ပြောပါတယ်။ 

KBC စခန်းမှာနေထိုင်သူ ဒေါ်ဇေနန်းကတော့ သင်တန်းမတက်ခင်မှာ အမျိုးသားက အမျိုးသမီးကို ရိုက်နှက်နှိပ်စက်တာ မြင် ဖူးတယ်၊ ဒါဟာ အမျိုးသားတွေရဲ့ လုပ်ပိုင်ခွင့်လို့ ယူဆမိခဲ့ကြောင်း ပြောပြပါတယ်။

"ကျွန်မကိုယ်တိုင်ကလည်း အမျိုးသားနဲ့အမျိုးသမီးက တန်းမတူဘူး၊ အမျိုးသားကိုဦးစားပေးရမယ်ဆိုပြီး ထင်ထားတာ။ အခုနောက်ပိုင်း သင်တန်းတွေတက်ပြီးတော့မှ အကြမ်းဖက်မှုဘာလဲဆိုတာကို ကိုယ်ကိုယ်တိုင်သိခဲ့ရတာပါ” လို့ သူက ဆိုပါ တယ်။

RC Camp လို့ ခေါ်ကြတဲ့ စစ်ရှောင်စခန်းတစ်ခုမှာနေထိုင်သူ ဒေါ်ဇောင်ယမ်းက ခန္ဓာကိုယ်ပိုင်း နာကျင်အောင် ပြုလုပ်တာဟာ အကြမ်းဖက်မှုဖြစ်တယ်၊ စိတ်ကိုနာကျင်အောင်လုပ်ရင်လည်း အကြမ်းဖက်မှုမြောက်တယ်ဆိုတဲ့ အသိပညာတွေပို့ချတဲ့  သင်တန်း တက်ရောက်ရတာကြောင့် ကျေနပ်မိတယ်လို့ ဆိုပါတယ်။

“တစိမ်းယောက်ျားတစ်ယောက် အဓမ္မကျင့်တာမပြောနဲ့၊ ကိုယ်နဲ့လက်ထပ်ထားတဲ့ အမျိုးသားကိုယ်တိုင်ဖြစ်စေကာမူ ဇနီး သည်အလိုမတူဘဲ လိင်ဆက်ဆံတယ်ဆိုတာ အကြမ်းဖက်မှုမြောက်တယ်၊ မုဒိမ်းမှုမြောက်တယ်ဆိုတာကို သိခွင့်ရခဲ့ပါ တယ်” လို့  လူဦးရေ တစ်ရာကျော်ရှိတဲ့ RC စခန်းမှာ ခိုလှုံနေသူ ဒေါ်ဇောင်ယမ်းက ပြောပြပါတယ်။

စစ်ရှောင် ၉၅၂ ဦး ခိုလှုံနေတဲ့ ZUP AUNG စခန်းမှာရောက်နေသူ ဒေါ်ကော့လွမ်ကတော့  အကြမ်းဖက်ခံရတဲ့ အမျိုးသမီး တွေဟာ စခန်းတာဝန်ခံတွေဆီမှာ တိုင်ကြားတာ၊ ဆွေးနွေးတာ မရှိသေးဘူး၊ ကျား  မ ရေးရာ အခြေပြု အကြမ်းဖက်မှုဆိုင်ရာ  အသိပညာပေးမှုများ စခန်းတွေထဲ ရောက်လာပေမယ့် ဒုက္ခသည်တွေထဲမှာ အမျိုးသမီး အမျိုးသား  တန်းတူအခွင့်အရေးရှိရမယ် ဆိုတဲ့ အချက်ကို လက်မခံသူတွေ ရှိနေသေးတယ်၊ လို့ ဆိုပါတယ်။

အောက်တိုဘာလကုန်ပိုင်းက ရှမ်းပြည်နယ်၊ ကွတ်ခိုင်မြို့ပြင် စစ်ရှောင်စခန်းတစ်ခုရဲ့ အများသုံးရေဘုံပိုင်မှာ တွေ့ရတဲ့ အမျိုးသမီးတစ်ဦး (ဓာတ်ပုံ - အိချယ်ရီအောင်/Myanmar Now)

“ကျား ၊ မ ရေးရာ အခြေပြုအကြမ်းဖက်မှုနဲ့ပတ်သက်ပြီး  အသိပေးလုပ်ရတဲ့အပေါ်မှာ အခုချိန်မှာတော့သိပ်ပြီး အားရမှုမရှိ သေးပါဘူး”လို့  ဒေါ်ကော့လွမ်က ပြောပါတယ်။

စခန်းမှာ ခိုလှုံကြတဲ့ မိသားစုတွေအတွင်း အမျိုးသား အများအပြားဟာ ဝင်ငွေရှာဖွေဖို့ အခက်အခဲရှိခြင်း၊ စိတ်ဖိစီးခြင်း တို့ကြောင့် ကိုယ့်အိမ်ထောင်ဘက်ကို ရိုက်နှက်ကြပါတယ်။ တချို့ကလည်း သောက်စားမူးယစ်ပြီး နှိပ်စက်တာလည်း ရှိပါ တယ်။

ခင်ပွန်းသည်က ဇနီးဖြစ်သူကို ရိုက်နှက်နှိပ်စက်ခြင်းဟာ နာကျင်စေမှု၊ အပြင်းအထန်နာကျင်စေမှု စတဲ့ပုဒ်မများနဲ့ ငြိစွန်းပေ မယ့် မြို့ပြဒေသတွေမှာလည်း ဒီလိုတိုင်ကြား တရားစွဲဆိုတဲ့အမျိုးသမီး ရှားပါးတယ်လို့ အထက်တန်းရှေ့နေ ဦးမင်းသက်ဇင် က ပြောပါတယ်။

ဥပဒေပိုင်းဆိုင်ရာ ဗဟုသုတရှိတဲ့ အမျိုးသမီးတွေကလည်း တိုင်ကြားတဲ့အတွက် ခင်ပွန်းသည် အထိန်းသိမ်းခံရပြီးနောက်ပိုင်း ဖြစ်ပေါ်လာမယ့် နောက်ဆက်တွဲ လူမှုရေး၊ စီးပွားရေး ပြဿနာတွေကို ကြိုတင်စိုးရိမ်တာကြောင့် ဥပဒေကြောင်းအရ ဖြေ ရှင်းဖို့ တွန့်ဆုတ်နေကြတာ ဖြစ်နိုင်တယ်လို့ သူက သုံးသပ်ပါတယ်။

● အမျိုးသားများရဲ့ ပါဝင်မှု
အမျိုးသမီးများအပေါ်နည်းမျိုးစုံနှင့် ခွဲခြားဆက်ဆံမှု ပပျောက်ရေး သဘောတူစာချုပ်ကို မြန်မာနိုင်ငံက ပါဝင် လက်မှတ်ထိုး ခဲ့တာ အနှစ် ၂ဝ ပြည့်ပါတော့မယ်။ အမျိုးသမီးများအပေါ် အကြမ်းဖက်မှုနဲ့ ပတ်သက်ပြီး အသိပညာပေး လှုပ်ရှားမှုတွေကတော့ ဒီမိုကရေစီဖော်ဆောင်တဲ့ ပြီးခဲ့တဲ့နှစ်တွေအတွင်းမှာမှ ကျယ်ကျယ်ပြန့်ပြန့် ပေါ်ထွက်လာတာပါ။

၃ နှစ်ကြာရေးဆွဲနေတဲ့ အမျိုးသမီးများအပေါ် အကြမ်းဖက်မှု တားဆီးကာကွယ်ရေးဥပဒေကြမ်းကိုလည်း လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနက  ပြန်လည် ပြင်ဆင်နေပါတယ်။ ပြင်ဆင်ပြီးရင် ဥပဒေကြမ်းက လွှတ်တော်ကို ရောက်သွားမှာပါ။


အောက်တိုဘာလကုန်ပိုင်းက ရှမ်းပြည်နယ်၊ ကွတ်ခိုင်မြို့ပြင် စစ်ရှောင်စခန်းတစ်ခုမှာ တွေ့ရတဲ့ မိခင်နဲ့ ကလေး (ဓာတ်ပုံ - အိချယ်ရီအောင်/Myanmar Now)

UNFPA နဲ့ ပူးပေါင်းပြီး ကျား ၊ မ ရေးရာ အခြေပြု အကြမ်းဖက်မှုဆိုင်ရာ သင်တန်းပေးနေတဲ့ အဖွဲ့တစ်ခုကတော့ မြန်မာနိုင်ငံ မူးယစ်ဆေးဝါးဆန့်ကျင်ရေးအသင်း ဖြစ်ပါတယ်။ ပြီးခဲ့တဲ့နှစ်နဲ့ ဒီနှစ် သင်တန်းနှစ်ခုကို ကချင်၊ ကရင်၊ ရခိုင်၊ ရှမ်းပြည်နယ် တွေက  ရဲဝန်ထမ်းများ တက်ရောက်ခဲ့တယ်လို့ အသင်းရဲ့ ဗဟိုအလုပ်မှုဆောင် ကော်မတီဝင် တစ်ဦးဖြစ်သူ အငြိမ်းစားရဲမှူး ကြီး ဦးသိန်းကြည်က ပြောပါတယ်။

“ကျား ၊ မ ရေးရာအကြမ်းဖက်မှု ဆိုတဲ့အဓိပ္ပါယ်က ပြည်သူလူထုအပြင် ရဲ၊  တရားသူကြီး၊ ရှေ့နေတွေလည်း ကျယ်ကျယ် ပြန့်ပြန် သိရှိဖို့ လိုပါတယ်" လို့ ဦးသိန်းကြည်က ပြောပါတယ်။

အကြမ်းဖက်မှုဖြစ်ပေါ်ရခြင်းက မူးယစ်ဆေးဝါးပြဿနာနဲ့  ဆက်စပ်နေတယ်၊   မူးယစ်ဆေး သုံးစွဲမှုကို ဆန့်ကျင်ဖို့ လူထုကြား မှာ အသိပညာ များများပေးရမယ်၊  မူးယစ်ဆေးသုံးစွဲမှုကနေ  မိသားစု၊ မိတ်ဆွေများအကြား  ပြစ်မှုကျူးလွန်တာတွေ အများ အပြား ဖြစ်ပေါ်နေတယ် လို့ ဦးသိန်းကြည်က ရှင်းပြပါတယ်။

ညီမျှခြင်းမြန်မာအဖွဲ့ ညွှန်ကြားရေးမှူး ဦးအောင်မျိုးမင်း ကလည်း ကျား ၊ မ ရေးရာအခြေပြုအကြမ်းဖက်မှု ဆိုင်ရာ သင်တန်း တွေမှာ  အမျိုးသားရော ၊ အမျိုးသမီးပါ  ပါဝင်သင့်တယ်လို့ ပြောပါတယ်။

“သင်တန်းတွေက အသိပညာပေးတာပါ။ အသိပညာ ဘယ်လောက်တိုးတိုး တကယ်လိုက်မလုပ်ဘူး ဆိုရင်တော့ အလ ကားပါပဲ” လို့ ဦးအောင်မျိုးမင်းက သုံးသပ်ပါတယ်။

KBC စခန်းကော်မတီ တာဝန်ခံ ဒေါ်ဒီဒီထန်းနန်က စခန်းထဲမှာ ခင်ပွန်းသည်က သူ့ဇနီးသည်ကို ရိုက်နှက်တာကို တွေ့မြင်ကြ သူအများစုက ဒါဟာ အိမ်တွင်းရေးပြဿနာသက်သက်လို့  ယူဆကြတယ်၊ ဝင်ရောက်ဖြေရှင်းပေးလိုမှု မရှိကြဘူးလို့ ပြောပါ တယ်။

ရန်ကုန်အခြေစိုက် ၈၈ မျိုးဆက် (ငြိမ်းချမ်းရေးနှင့်ပွင့်လင်းလူ့အဖွဲ့အစည်း) မှ ဒေါ်သက်သက်အောင်ကတော့ ဒါဟာ မိမိအိမ် ထောင်ရေး၊ မိသားစုအရေးနဲ့ပတ်သက်ပြီး တခြားသူတွေကို  အသိမပေးသင့်ဘူးဆိုတဲ့  အရိုးစွဲနေကြတဲ့ အမူအကျင့် ဖြစ် တယ်လို့ သုံးသပ်ပါတယ်။

“ဒီနိုင်ငံက အမျိုးသားအများစုက ဇနီးသည်တွေကို သူတို့ပိုင်တဲ့ပစ္စည်းလို သဘောထားကြတယ်။ ဒါဟာ လွဲမှားနေတဲ့ အ တွေးအခေါ်ပါပဲ” လို့ ဒေါ်သက်သက်အောင်က ပြောပါတယ်။

အကြမ်းဖက်မှုပြဿနာများ လျော့နည်းလာစေဖို့ အသိပညာပေးရေး လုပ်ငန်းများ ပိုမိုထိရောက်ဖို့ အစိုးရရဲ့ အကူအညီ၊ ပူး ပေါင်း ဆောင်ရွက်မှု ရသင့်တယ်၊  အစိုးရကလည်း အမျိုးသမီးများကို ကာကွယ် စောင့်ရှောက်မှုပေးတဲ့ အခန်းကဏ္ဍမှာ မူဝါဒများ ချမှတ်သင့်တယ်လို့ သူက ဆက်ပြောပါတယ်။

  ကျား၊ မ ရေးရာ တန်းတူညီမျှရေးကွန်ရက်ရဲ့ လူမှုဆက်ဆံရေးညှိနှိုင်းရေးမှူး ဒေါ်အေးသဒ္ဒါလှကတော့ စစ်ရှောင်စခန်းတွေမှာ အနေအထိုင်ဆင်းရဲတဲ့အတွက် အမျိုးသမီးအများစုက ကလေးယူဖို့ ငြင်းတယ်၊ တချို့ အမျိုးသားတွေက ဒီလိုငြင်းဆန်မှုကို သဘောမကျတဲ့အတွက် ဇနီးသည်ကို ရိုက်နှက်ကြတယ်လို့ ဆိုပါတယ်။

နေရထိုင်ရမလွတ်လပ်တဲ့ စခန်းတွေမှာ အပျိုဖော်ဝင်ခါစတွေကို   အိမ်ထောင်ချပေးတာကလည်း မှန်ကန်တဲ့ ဖြေရှင်းချက် မဟုတ်တဲ့အပြင် ဒါဟာ မိသားစုအတွင်း အကြမ်းဖက်မှုတွေ ဖြစ်ပေါ်စေတဲ့ အကြောင်းဖြစ်နေတယ်လို့ ထောက်ပြပါတယ်။

“အနည်းစုသော အမျိုးသားတွေက အကြမ်းဖက်ပြီး အများစုသော အမျိုးသားတွေက လက်ပိုက်ကြည့်နေတာ” လို့ ဒေါ်အေး သဒ္ဒါလှက ပြောလိုက်ပါတယ်။     ။