နေအိမ်ခန်းအတွင်းက ဘာသာရေးဆုတောင်းပွဲများ တားမြစ်ခဲ့
မိုးမခ အထောက်တော် ၀၀၇
ဇန်န၀ါရီ ၂၀၊ ၂၀၀၉
၂၀၀၇ စက်တင်ဘာ ရွှေဝါရောင် တော်လှန်ရေး နောက်ပိုင်းတွင် စစ်အစိုးရက ဗုဒ္ဓဘာသာဝင် ဘုန်းတော်ကြီးများ၊ ဘုန်းတော်ကြီးကျောင်းများ၊ တရားပွဲများကို ဖိနှိပ်မှုများ ပြုလုပ်ခဲ့သည်။ သံဃာတော်များကိုလည်း သံဃာသပိတ်မှောက်ကံဆောင်မှုကို နှိမ်နှင်းရန် ဖမ်းဆီး ထောင်ချပြီး အချို့ကို ရဲဘက်စခန်းများအထိ ပို့ဆောင်ခဲ့သည်။ ယခုအခါ ဗုဒ္ဓဘာသာဝင်များသာမက အခြား ဘာသာရေး လွတ်လပ်ခွင့်များကိုပါ ကန့်သတ် ချုပ်ချယ်မှု ဆက်လက် တိုးပွားလာကြောင်း သတင်းများက ဆိုသည်။
ရန်ကုန် စည်ပင်သာယာနယ်နမိတ်အတွင်းရှိ လူနေအိမ်များ၊ တိုက်ခန်း အဆောက်အဦများအတွင်း မိမိကိုယ်ပိုင်အစီစဉ်ဖြင့် စုပေါင်းပြုလုပ်နေကြသော ဘာသာရေး ၀တ်ပြုဆုတောင်းမှုများကို အမြန်ရပ်တန့်ရန် ၊ ရန်ကုန်တိုင်း သာသနာရေးမှူး ဦးစိုးနိုင်အမိန့် ဖြင့် ဇန်န၀ါရီ ၅ ရက်နေ့ က စာတစောင် ထုတ်ပြန်လိုက်သည် ။
အချက် ၃ ချက်ပါသည့် သာသနာရေးမှူး ဦးစိုးနိုင်၏အမိန့်ကို ကိုးကားကာ မြို့နယ် မယက ဥက္ကဋ္ဌများက သက်ဆိုင်ရာ ခရစ်ယာန် ဘာသာရေးဆုတောင်းသူများ ၊ အစ္စလန် ဘာသာရေး ဆုတောင်းသူများကို ခေါ်ယူသတိပေးခဲ့ပြီး ၀န်ခံကတိ လက်မှတ်ထိုးစေခဲ့သည် ။ လိုက်နာမှုမရှိလျှင် အရေးယူမည်ဟု ထုတ်ပြန်ချက်တွင် ဖေါ်ပြထားသည် ။
လူဦးရေ ၄ သန်း ကျော်အထိ တိုးပွါးလာသည့် ယနေ့ ရန်ကုန်မြို့ပေါ်တွင် ခရစ်ယာန်များနှင့် အစ္စလန်တို့လည်း ပိုမို တိုးပွားလာခဲ့သည် ။ အထူးသဖြင့် လူအများ အလွယ်တကူ စုနိုင်သည့် ပန်းပဲတန်း၊ ကျောက်တံတား၊ ပုဇွန်တောင်မြို့နယ်များရှိ တိုက်ခန်းများတွင် ၀တ်ပြုဆုတောင်းမှု ပို များလာသည်။ ပန်းဆိုးတန်းလမ်းအတွင်းမှာပင် ၀တ်ပြုဆုတောင်းရန် စုဝေးသည့် ခရစ်ယာန် အသင်းတော် ၃၀ ခန့်ရှိသည် ။ ပန်းပဲတန်း ကျောက်တံတား ပုဇွန်တောင် ၃ မြို့နယ် ပေါင်းလိုက်လျှင် ၀တ်ပြုဆုတောင်းသည့် နေရာပေါင်း ၈၀ ခန့် ရှိသည်။ ၄င်းကဲ့သို့ နေအိမ်တိုက်ခန်းများတွင် ၀တ်ပြုဆုတောင်းမှုပြုသူ ခရစ်ယာန်အများစုမှာ ချင်းတိုင်းရင်းသားများ ဖြစ်ကြသည်ဟု ဆိုသည်။ အစ္စလန် ဆုတောင်းပွဲလုပ်သည့် နေရာနှင့် အရေအတွက်ကိုမူ မိုးမခမှ ဆက်လက် စုံစမ်းဆဲဖြစ်သည်။
ဓာတ်ပုံမှာ အစိုးရက ထုတ်ပြန်သည့် စာမိတ္တူ ဖြစ်သည်။
Comments