အဲဒီတုန်းက.. ဦးနု ကြားဖြတ်အစိုးရ
ရွေးကောက်ခံ ကိုယ်စားလှယ်တဦး
ဇန်န၀ါရီ ၁၇၊ ၂၀၀၉
ရွေးကောက်ခံ ကိုယ်စားလှယ်တဦး
ဇန်န၀ါရီ ၁၇၊ ၂၀၀၉
၁၉၈၈ ခုနှစ် ဒီမိုကရေစီအရေးလူထုအုံကြွမှုကာလက ရန်ကုန်တွင် တွေ့ရသော ဦးနု၊ ဒေါ်အောင်ဆန်းစုကြည်၊ ဗိုလ်ချုပ်ကြီးဟောင်းတင်ဦး
ရက်တွေ တရွေ့ရွေ့နဲ့ကုန်လာပြီး ရှစ်လေးလုံး ဒီမိုကရေစီ အရေးတော်ပုံကြီးကလည်း ရက်ရင့်လာပြီ။ ဒေါက်တာမောင်မောင်ခေါ်ထားတဲ့ အရေးပေါ် ညီလာခံနဲ့ လွှတ်တော်တောင် ရက် နီးလာပြီ။ ကျနော်တို့မြို့မှာ အုပ်ချုပ်ရေးကို ကောင်စီက မကြီးကြပ်နိုင်။ မြို့နယ်တာဝန်ကျ ဗိုလ်မှူးကလည်း တာဝန်လွှဲယူဖို့ ဖိအားတွေ ပေးနေတော့ လုပ်ရကိုင်ရ နည်းနည်း ကြပ်တည်း ခက်ခဲလာပါတယ်။ ကြားဖြတ် အစိုးရရယ်လို့ ဖြစ်လာရင်လည်း ကြားဖြတ်အစိုးရရဲ့ ညွှန်ကြားချက် အောက်မှာ လုပ်ရင် နည်းနည်း ပိုပြီး စည်းကမ်းတကျ ဖြစ်လာမယ်။ ကြားဖြတ် အစိုးရကို မျှော်ပါတယ်။ ရေဒီယိုမှာ တနေ့ပေါ်လာနိုး စောင့်မိပါတယ်။စက်တင်ဘာလ(၉)ရက်နေ့မှာတော့ ပါလီမန်အစိုးရရဲ့ နောက်ဆုံး ၀န်ကြီးချုပ်ဟောင်း ဦးနုက သူရဲ့ အစိုးရအဖွဲ့ကို ကြေညာပါတယ်။ သူ့အစိုးရဟာ ၁၉၆၀ ပြည့်နှစ်မှာ ပြည်သူလူထုက တရားဝင် ရွေးကောက် တင်မြှောက်ထားတဲ့ အစိုးရ ဖြစ်တယ်။ ၁၉၆၂ ခုနှစ်က ဗိုလ်နေ၀င်းက အာဏာသိမ်းပြီး လုယူတာ ခံခဲ့ရတယ်။ အခု ပြည်သူလူထုက ဗိုလ်နေ၀င်းရဲ့ စစ်တပ်အစိုးရကို မထောက်ခံဘဲ လူထုအုံကြွ ဆန္ဒပြ ဖြုတ်ချလိုက်လို့ သူ့အစိုးရသာလျှင် တရားဝင် အစိုးရဖြစ်လာပြီ။ သူ့ရဲ့ တရားဝင် အစိုးရအဖွဲ့ကို ပြန်လည် ကြေညာလိုက်ပြီ။ စစ်တပ်တွေက သူ့ဆီ သတင်းပို့ပြီး အမိန့်နာခံကြ။ နိုင်ငံခြားသံရုံးတွေက သံအမတ်တွေလည်း သူ့ အစိုးရကို ဆက်သွယ်ကြဖို့ ကြေညာပါတယ်။
သူ့ရဲ့လုပ်ရပ်က မူအားဖြင့် မှန်ကန်တယ်လို့ ကျနော် ယူဆပါတယ်။ သူ့ကို ထောက်ခံရမယ့် အခြေအနေပါ။ ဒါပေမဲ့ လုပ်နည်း လုပ်ဟန် ချို့ယွင်းသွားတယ်။ ဒါကြောင့် ဒီ(၉)ရက်နေ့ ညနေ ရေဒီယိုသတင်းမှာပဲ သူ့အစိုးရဟာ ကြားဖြတ်အစိုးရဖြစ်လာနိုင်မဲ့အခြေအနေမရှိတော့တာကို သဘောပေါက်မိပါတယ်။ ရေဒီယို သတင်း အဆိုအရ ဦးနုက (၉)ရက် (၉)လ (၉) နာရီမှာ သူ့အစိုးရအဖွဲ့ကို ပြန်လည် ဖွဲ့စည်းသင့်တယ်ထင်လို့ ဖွဲ့လိုက်တယ်။ တလအတွင်း လွတ်လပ်ပြီး တရားမျှတတဲ့ ပါတီစုံရွေးကောက်ပွဲကို ကျင်းပပေးမယ်။ အဖွဲ့ဝင်တွေ အဖြစ် သူနဲ့ တပ်မှူးဟောင်းကြီးများ မဖြစ်မီက ဖွဲ့စည်းထားခဲ့တဲ့ ဒီမိုကရေစီနဲ့ ငြိမ်းချမ်းရေးအဖွဲ့ (ဒီငြိမ်း) အဖွဲ့ဝင်တွေကို ထည့်သွင်းထားတယ်။ အဖွဲ့ဝင်(၂၅)ဦး ပါဝင်တဲ့ ဦးနုရဲ့ အစိုးရအဖွဲ့မှာ ယခင်ပါလီမန်ခေတ်က အစိုးရအဖွဲ့ဝင်ဟောင်းအဖြစ် သမ္မတဟောင်း မန်းဝင်းမောင်၊ လွှတ်တော်ဥက္ကဌဟောင်း ဗိုလ်မှူးအောင်၊ အတွင်းဝန်ဟောင်း ဦးသန်းစိန်နဲ့ ဗိုလ်ခင်မောင် စတဲ့ ထင်ရှားတဲ့သူတွေ ပါပါတယ်။ နောက်ပြီး လက်ရှိ အရေးတော်ပုံမှာ ထင်ရှားလာတဲ့ ဆရာဝန်တွေ တက္ကသိုလ် ပါမောက္ခတွေပါ ကျယ်ကျယ်ပြန့်ပြန့် ဖွဲ့စည်းလိုက်ပေမဲ့ အဲဒီအစိုးရ အဖွဲ့ဝင်စာရင်းမှာ ပါတဲ့သူတွေကို သူက ကြိုတင် မညှိနှိုင်းခဲ့ပါဘူး။ မကြာသေးခင်က ဖွဲ့လိုက်တဲ့ ဒီငြိမ်းအဖွဲ့ဝင် တပ်မှူးဟောင်းကြီးတွေကိုတောင် ကြိုတင် ညှိနှိုင်းခြင်း မလုပ်ခဲ့ပါဘူး။
ဒီတော့ ဒီငြိမ်းက တပ်မှူးဟောင်းကြီးတွေက အဖွဲ့ထဲမှာ ဆွေးနွေးတိုင်ပင်ခြင်း မရှိလို့ သူတို့ လက်မခံနိုင်ဘူးလို့ ကြေညာလိုက် ပါတယ်။ တနည်းအားဖြင့် ကန့်ကွက်ခံလိုက်ရတယ်။ သူ့အစိုးရ အဖွဲ့ဝင်အဖြစ် ကြေညာခံထားရတဲ့ တခြားပုဂ္ဂိုလ်များကလည်း သူတို့ကို ကြိုတင်ညှိနှိုင်း တိုင်ပင်ခြင်း မရှိလို့ ၀န်ကြီးရာထူးများကို လက်မခံနိုင်ဘူးလို့ ကြေညာကြပါတယ်။ ဒါကြောင့် ဒီ(၉)ရက်နေ့မှာဘဲ ဖွဲ့ပြီး နာရီပိုင်း အတွင်းမှာ နှုတ်ထွက်သူ အများဆုံး ဖြစ်ပြီး ခိုင်မာမှု ချိနဲ့သွားတဲ့ အစိုးရအဖွဲ့ဖြစ်သွားပါတယ်။
ဘီဘီစီက ဦးနုကို တယ်လီဖုံးနဲ့ ဆက်သွယ်မေးမြန်း တော့လည်း ဦးနုက ကျနော့်စိတ်ထဲမှာ ဒီအချိန်မှာ ဒီလူတွေနဲ့ အစိုးရဖွဲ့ဖို့ စိတ်ကူးရလို့ ဖွဲ့စည်းလိုက်တာ၊ ကျုပ်က ဘယ်သူ့မှ တိုင်ပင် စရာမလိုဘူး၊ ဘာကြောင့်တိုင်ပင်ရမှာလဲ ဆိုတဲ့ စကားကို ကြားရတဲ့ တပြည်လုံး ပြည်သူလူထုက ၀မ်းနည်းကြရပါတယ်။
မူအားဖြင့် ဦးနုလုပ်ရပ်မှန်တယ်လို့ ကျနော်မြင်ပါတယ်။ ဒါပေမဲ့ ဖြစ်သင့်တာ က ၁၉၆၂ ခုနှစ် အာဏာအသိမ်းခံရစဉ်က အစိုးရအဖွဲ့ဝင်ဟောင်းဖြစ်တဲ့ သမ္မတ မန်းဝင်းမောင်၊ လွှတ်တော်သဘာပတိ ဗိုလ်မှူးအောင်၊ သူကိုယ်တိုင်ဝန်ကြီး အဖွဲ့ဝင် တယောက်ဖြစ်တဲ့ ဗိုလ်ခင်မောင်တို့ ဦးသန်းစိန်တို့လောက်ဆိုရင် လုံလောက်သလောက် ရှိနေပြီ။ ဒီအဖွဲ့ဝင်ဟောင်းတွေနဲ့ပဲ စစ်အာဏာရှင်စနစ်ကို လူထုက လက်မခံလို့ အလိုလို အစိုးရအဖွဲ့ဝင်တွေ ပြန်ဖြစ်လာပြီး ကျန်တဲ့ ၀န်ကြီး အဖွဲ့ ၀င်ဟောင်းများက သမ္မတ၊ လွှတ်တော်ဥက္ကဌ နဲ့ ၀န်ကြီးချုပ်တို့ထံ လာရောက် ဆက်သွယ်သတင်းပို့ပါ။ လက်နက်ကိုင် အဖွဲ့အစည်းများကလည်း သူ့အစိုးရဟောင်းထံ သတင်းပို့ပါ။ နိုင်ငံခြားသံတမန်များကလည်း မူလ တရားဝင်ဦးနု အစိုးရကိုပဲ ဆက်သွယ်ပါ။ သပိတ်အဖွဲ့ ပေါင်းစုံ အတွက်လည်း တလ အတွင်း ရွေးကောက်ပွဲ လုပ်ပေးမှာမိုလို့ ဦးနုအစိုးရကို ထောက်ခံပါ။ အဲဒီလို ပုံစံသာဆိုရင် သမိုင်းမှာ အခြေအနေ တစ်မျိုး ပြောင်းလာမယ်။ ဦးနုကို ၀မ်းပမ်းတသာ ထောက်ခံ ကြမယ်လို့ ကျနော်ထင်ပါတယ်။
သူကလည်း ထောက်ခံမှု ရချင်လို့ အရေးတော်ပုံအတွင်း ထင်ရှားလာတဲ့ ခေါင်းဆောင်အချို့ကို သူ့အစိုးရထဲ ထည့်လိုက်တယ်။ အဲဒီ ခေါင်းဆောင်တွေ ကလည်း အာဏာလိုချင်လို့ လုပ်တဲ့သူလို့ ကျောင်းသားနဲ့ ပြည်သူ အမြင်မှားသွားမှာကို စိုးရိမ်တယ်။ ကြိုတင်ဆွေးနွေးချက်ကလည်း မရှိလို့ လက်မခံနိုင်။ ဒီလိုမျိုးနဲ့ ဖြစ်သင့်၊ ပေါ်ပေါက်လာသင့်တဲ့ ကြားဖြတ်အစိုးရ တခုဟာ ဦးနုရဲ့ ဗေဒင် ယတြာ ယုံကြည်မှု၊ ဘယ်သူ့မှ မတိုင်ပင်ဘဲ ဇွတ်တရွတ် လုပ်မှုကြောင့် ကျောင်းသားပြည်သူ ထောက်ခံမှု မရဘဲ သောင်မတင် ရေမကျ ဟောင်းလောင်းကျန်ခဲ့တဲ့ အစိုးရဖြစ်သွားခဲ့ရတယ်။ ရှစ်လေးလုံး လှုပ်ရှားမှုရဲ့ အထွတ်အထိပ်မှာ ဦးနုရဲ့ ဇွတ်လုပ်မှုအရ သူ့ကို အားလုံးက ကျေးဇူးရှင်အဖြစ် ၀ိုင်းဝန်း ထောက်ခံမှုကို ရသင့်ရက်သားနဲ့ မရဘဲ ဖြစ်ခဲ့ရပါတယ်။ သမိုင်းမှာ ၀မ်းနည်းစရာ တခုပေါ့။ ။
Comments