Quotes for Feb 2009

ဖေဖော်ဝါရီ စာကိုး၊ စကားကိုး
ဖေဖော်ဝါရီ ၂၇၊ ၂ဝဝ၉

"အလုပ်ဖြုတ်ခံရတဲ့ အထဲမှာ ဒါရိုက်တာကစလို့ အဆင့်ပေါင်းစုံသော ဝန်ထမ်းတွေ ပါပါတယ်။ လေယာဉ်လက်မှတ်ကလွဲလို့ သူတို့မှာ ဘာအကျိုးခံစားမှုမှ မရှိပါဘူး။ ရင်နာစရာပါ။ - - မြန်မာ ဝန်ထမ်းတွေကို မြန်မာပြည်ကို ပြန်လွှတ်မယ်ဆိုရင် လေယာဉ်လက်မှတ် ဈေးနူန်းတွေက အခြားနိုင်ငံတွေနဲ့ယှဉ်ရင် ၂ဆကျော်ကျော်လောက် ပိုများလို့ပါ။ - - - ဒါ့ကြောင့် အတ္တလန်တစ် ဟိုတယ်က ဖြုတ်ပစ်ခဲ့တဲ့အထဲမှာ မြန်မာဝန်ထမ်း တစ်ယောက်စ နှစ်ယောက်စပဲ ပါပါတယ်။ မြန်မာပြည်ရဲ့ ဆင်းရဲလွန်းလှတဲ့ ပို့ဆောင် ဆက်သွယ်ရေးစနစ်ကို ဒီအချိန်မှာ ကျေးဇူးတင်သင့်ပါတယ်"
နှင်းနဲ့မာယာ၊ ဘလော်ဂါ
mysterysnow.blogspot.com ဖေဖော်ဝါရီ ၁

"နေမထွက်ခင်ကတည်းက တမျှော်မျှော် စောင့်နေရသော်လည်း နေမြင့်သည့်တိုင် ပေါ်မလာတတ်။ လူတွေလည်း လမ်းဘေးတွင် မိုးတိုးမတ်တပ်, ယပ်တခပ်ခပ်, ချွေတလုံးလုံးနှင့် နေပူထဲ စောင့်ကြရသည်။ မရပ်နိုင်လျှင်လည်း ကိုယ့်ဖိနပ်ကို ဖင်ခု၍ ထိုင်ရသည်။ - - - အချို့နှစ်များဆိုလျှင် အလံတော်က အမိုးဖွင့် ကားပေါ်တွင် ခပ်သွက်သွက်လေးပါ သွားသည်။ တိုင်းရင်းသားဝတ်စုံ ကိုယ်စီဝတ်ထားသော အလံကိုင်အဖွဲ့က ခပ်နှေးနှေး ပြေး၍ သယ်လာဆောင်လာသော နှစ်များဆိုလျှင်တော့ တော်ပါသေးသည်။ “မလိုက်မနေရ” ဆိုတာကြီးကြောင့်လားမသိ။ ကျွန်တော်ငယ်ငယ်က ဤသို့ အလံတော်ကြိုရခြင်းကို မကြိုက်ခဲ့, မပျော်ခဲ့။ အာဇာနည်ခေါင်းဆောင်များ, တိုင်းရင်းသားခေါင်းဆောင်များ အသက်ချွေးသွေးရင်း၍ ချုပ်ဆိုခဲ့သော ပင်လုံစာချုပ်ကို ဒီလောက်လေးမှ အပင်ပန်းခံ ဂုဏ်မပြုနိုင်ဘူးလားဟု အပြစ်တင်လျှင်လည်း ခံရုံသာရှိပါသည်။ ငယ်စဉ်ကလေးဘ၀က အမြင်ကို ပွင့်ပွင့်လင်းလင်း ပြန်ပြောခြင်းသာ ဖြစ်သည်"
သီတာဧရာ၊ ဘလော်ဂါ
sonata-cantata.blogspot.com/ ဖေဖော်ဝါရီ ၁၁

"နိုင်ငံတစ်နိုင်ငံရဲ့ ကိစ္စအတော်များများဟာ..သက်ဆိုင်ရာအုပ်ချုပ်သူအစိုးရတွေ ရဲ့ တာဝန်ဖြစ်တဲ့ အကြောင်း ..ယေဘုယျ အားဖြင့် ကျမ လက်ခံပါတယ်..။ ဒါပေမဲ့ တပြိုင်နက်ထဲမှာပဲ..နိုင်ငံသား တစ်ဦးစီမှာ လဲ..ကိုယ်စီ တာဝန် ရှိပါတယ်"
မမသီရိ၊ ဘလော်ဂါ
http://mamathiri.blogspot.com/ ဖေဖော်ဝါရီ ၂၀

“ညီမတို့က ဝန်ထမ်းဆိုတော့ စိစစ်ရေးအပိုင်းတွေ လုပ်ရတော့ မီဒီယာအပိုင်းတွေကို ကျယ်ကျယ်ပြန့်ပြန့် သိသွားတာပေါ့နော်။ မီဒီယာဆိုတာ ဘယ်လိုလဲ၊ ဂျာနယ်တွေ မဂ္ဂဇင်းတွေ ဘယ်လိုလုပ်နေသလဲ ဆိုတဲ့ ပညာရပ်တွေ ရပါတယ်။
စာပေစိစစ်ရေး ဆိုလည်း စာပေလောကသားတွေ ဖွံ့ဖြိုးတိုးတက်ဖို့ ရည်ရွယ်ချက် လေးရပ် နဲ့ လုပ်နေတာ ဆိုတော့ ဒီသင်တန်းတွေ (၁/၂ဝဝ၉ စာနယ်ဇင်းပညာသင်တန်းတွေ) ဖွင့်လှစ်လိုက်လို့ ပိုပြီးတော့ တိုးတက်လာတယ်။ ညီမတို့လည်း ဗဟုသုတ အများကြီး ရပါတယ်”
ယုယုနွယ်၊ စာပေစိစစ်နှင့် မှတ်ပုံတင်ဌာန
ပေါ်ပြူလာဂျာနယ်၊ ဖေဖော်ဝါရီ ၁၇

“လေးဖြူ၏ သီချင်းများကို စွဲလမ်းရာမှာ လေးဖြူ၏ ဆိုပေါက်အပြင် စကားလုံးများ၏ အင်အားကလည်း အဓိက ပါဝင်နေသည်။ သူ့သီချင်းတွေက ခံစားမှုထဲမှာ နစ်မျောမနေ။ ခံစားမှုထဲက ထိုးဖောက် ပေါက်ကွဲနေ၏”
မောင်ကိုကို(အမရပူရ)၊ စာရေးဆရာ
၇ ရက်သတင်းဂျာနယ်၊ ဖေဖော်ဝါရီ ၁၂

“အိမ်ထောင်သည်တွေက မိမိ လှပဖို့ကို သေချာ ဂရုစိုက်ပြီး ပြင်ဆင်လာကြတယ်။ အရင်ကထက်ကို ပြင်လာတာ။ အရင်ကတော့ ကလေးတယောက် မွေးပြီးရင် ပစ်စလက်ခတ် နေကြတာ များတယ်။ အခုကျတော့ မျက်နှာ အရေးအကြောင်း မဖြစ်အောင် ပြင်ကြတယ်။ ဆံပင်တွေ ပြင်တယ်။ အဆီချတယ်။ မျက်နှာ၊ ဆံပင် ပေါင်းတင်တယ်၊ လက်သည်းခြေသည်းလည်း ပြင်ကြတယ်။ အိမ်ထောင်သည်တွေ အလှပြင်ဆိုင်ကို လာရင် ကျပ် သောင်းဂဏန်းကနေ ကျပ်သိန်းချီအထိ ငွေသုံးပြီး အလှအပ ထိန်းကြတယ်”
ဒေါ်သန်းသန်းအေး၊ ဝါဝါသန်းအလှပြင်ဆိုင်
မော်ဒန်သတင်းဂျာနယ်၊ ဖေဖော်ဝါရီ ၂ဝ

“မင်းသမီး ဇာတ်ဆောင်ဆု မဟုတ်ရင်တောင် ဇာတ်ပို့ဆု တစ်ခုခုရရင် တော်သေးတာပေါ့။ အခုတော့ မင်းသမီးဆု လုံးဝ မပါဘူး ဆိုတော့ ရင်ထဲမှာ ဟာတာတာကြီးနဲ့ ဘယ်လိုကြီးမှန်းကို မသိဘူး။ ကိုယ့်ဇာတ်ကားလည်း မပါပါဘူး။ ဒါပေမဲ့ သူများတွေ ရရင်လည်း ပျော်တာပေါ့။ ဘယ်မင်းသမီး ရရပါ။ တစ်ဦးဦးကို ရစေချင်တယ်။ စင်ပေါ်မှာ မင်းသမီး မပါတော့ တစ်မျိုးကြီး ခံစားရတယ်။ ပန်းဖြူ အကယ်ဒမီပွဲကို တက်ခဲ့တာ (၁ဝ)ကြိမ်မက ရှိနေပြီ။ ဒီလို မင်းသမီး ဆုမရာက ပထမဆုံးအကြိမ် ကြုံတွေ့ရတာပါပဲ”
ပန်းဖြူ၊ သရုပ်ဆောင်
ရန်ကုန်တိုင်းမ်ဂျာနယ်၊ ဖေဖော်ဝါရီ ၁၉

“အချစ်ဆိုတာ မတွေ့ချင်သေးတဲ့ လူတစ်ယောက်က အိမ်ထောင်ဘက်ကို မစဉ်းစားသေးဘူးပေါ့နော်။ ဘယ်လိုပဲဖြစ်ဖြစ် ကိုယ်ဘက်က လက်ခံချင်လာပြီ စဉ်းစားချင်လာပြီ ဖြစ်တော့မှပဲ စဉ်းစားပြီး Planချပြီး ရွေးချယ်မှာပါ”
သင်ဇာဝင့်ကျော်၊ မော်ဒယ်ဂဲလ်၊ သရုပ်ဆောင်
၂၄ နာရီ ၇ ရက် သတင်းဂျာနယ်၊ ဖေဖော်ဝါရီ ၂၂

"ထောင်က ၁၅ နှစ်ပေါ့နော်။ ဒါပေမယ့် ရှေ့နေတွေ ဝင်ခွင့်မပေးတဲ့ အတွက် စိတ်မကောင်းဘူး။ အခု လောလောဆယ် ကျန်းမာရေးတော့ ကောင်းနေပါတယ်။ ဒေါက်တာတင်မင်းထွဋ်နဲ့ အတူတူနေရပါတယ်။ သူ့အတွက်စိတ်မပူနဲ့တဲ့၊ ထောင်ပြောင်းမပြောင်းဆိုတာတော့ မသိသေးဘူး တဲ့။ သမီးတို့ဖေဖေ အခုလို ဖြစ်သွားတာ မိသားစုအတွက် ဆုံးရှုံးပေမယ့် အများအတွက် လုပ်တဲ့အတွက်ကြောင့် ဂုဏ်ယူစွာနဲ့ပဲ ဖြစ်လာတဲ့ ပြဿနာတွေကို ရဲရဲဝံ့ဝံ့ ရင်ဆိုင်ပြီးတော့ ဖြေရှင်းသွားမယ်လို့ပဲ ပြောချင်ပါတယ်"
မကြည်ကြည်ဦး၊ နိုင်ငံရေးအကျဉ်းသား ဦးညီပု၏သမီး
ဒီဗွီဘီသတင်းဌာန၊ ဖေဖော်ဝါရီ ၁၄

“ရိုဟင်ဂျာ ပြဿနာက ဒီ အရှေ့တောင်အာရှမှာ တော်တော် ပျံ့နှံ့နေပြီ၊ ဒါပေမဲ့ ဘာပဲဖြစ်ဖြစ် အခုပြောနေတာက ရိုဟင်ဂျာလူမျိုး၊ နောက် မျိုးနွယ်စုဆိုတာ မရှိဘူး။ ကျနော်တို့ကတော့ အဲဒီ မျိုးနွယ်စုက ပြဿနာက အဓိက မဟုတ်သလို ထင်ပါတယ်။ လူသား ပြဿနာပဲ။ လူ ဒီနိုင်ငံထဲမှာ ရှိနေတယ်၊ generation အဆက်ဆက်ဆိုရင် သူတို့ရဲ့ ခံစားခွင့်၊ ရပိုင်ခွင့်တွေက အဓိပ္ပာယ်တမျိုး ရှိရမယ်လေ။ လူမျိုး ဟုတ်တယ်၊ မဟုတ်တယ်ဆိုတဲ့ ပြဿနာက အဓိကမကျဘူးလို့ ကျနော်တို့ ထင်တယ်လေ။ အဲဒီတော့ လူ့အခွင့်အရေး ရှုထောင့်ကပဲ သူတို့ လူသားတယောက်ရဲ့ ဂုဏ်သိက္ခာ၊ လူသားတယောက် ရသင့်တဲ့ အခွင့်အရေးကို တနည်းနည်းနဲ့ ပေးအပ်ဖို့တော့ လိုတာပေါ့”
ဦးဉာဏ်ဝင်း၊ နိုင်ငံရေးသမား
RFA အသံလွှင့်ဌာန၊ ဖေဖော်ဝါရီ ၉