လုပ်အားပေး ဗဟုသုတ မြန်မာပြည်တွင် နည်းကြောင်း ILO အရာရှိပြော
မိုးမခအထောက်တော် အမှတ် ၀၀၄
အောက်တိုဘာ ၁၆၊ ၂ဝဝ၉
အောက်တိုဘာ ၁၆၊ ၂ဝဝ၉
![](https://blogger.googleusercontent.com/img/b/R29vZ2xl/AVvXsEgIihsunNBnyL9DIDcRK_UF1eF4Uxe2_BMAnR2GMNVxRvUjNY9QvR7QYXJq2Gpj7-lmk69aU3sd813Xpf3sP3JrjU6mH98belqocKIXmN8eHZGhy7rfQLHL9NjCL-t0zu9TI3k8yBIXFc0B/s400/freeburmarangers+org.jpg)
“သိတဲ့ ရာခိုင်နှုန်းကို ပြောရရင်တော့ အလွန်ကို နည်းပါသေးတယ်။ လူအများစုက ဒီဥပဒေ နဲ့ ဒီဥပဒေမှာ ပါတဲ့ ၎င်းတို့ရဲ့ အခွင့်အရေးတွေကို သိတောင် မသိကြပါဘူး” ဟု ILO ဆက်သွယ် ညှိနှိုင်းရေး အရာရှိ စတိဖ်မာရှယ်က ယနေ့ထုတ် Bi Weekly Eleven ဂျာနယ်နှင့် ဆက်သွယ်မေးမြန်းခန်းတွင် ပြောလိုက်သည်။
မြန်မာနိုင်ငံတွင် လုပ်အားပေးခိုင်းစေမှုကို ပြည်နယ်နှင့်တိုင်း ၁၄ ခုတွင် တွေ့နိုင်သည်။
လုပ်အားပေး ခိုင်းစေသည့် အာဏာပိုင်တို့အား တရားပြန်စွဲသည့် သတင်းများ တခါတရံ ထွက်ပေါ်လာလေ့ရှိသည်။ နာမည်အကြီးဆုံးအမှုမှာ လွန်ခဲ့သည့် ၄ နှစ်က ရန်ကုန်တိုင်း၊ ကော့မှူးမြို့နယ်မှ မစုစုနွေးက လုပ်အားပေး ခိုင်းစေသည့် အာဏာပိုင်များကို တရားစွဲဆိုခဲ့သည့်အမှု ဖြစ်သည်။
ထိုအမှုသည် လုပ်အားပေးခိုင်းစေသဖြင့် ဒေသခံ အာဏာပိုင်က ပထမဦးဆုံးအကြိမ် တရားစွဲခံရသည့် အမှု ဖြစ်ပြီး တရားလို မစုစုနွေးက အနိုင်ရခဲ့သည်။ သို့သော်လည်း နောက်ပိုင်းတွင် မစုစုနွေးသည် အာဏာပိုင်တို့၏ အငြိုးထား နှိပ်ကွပ်မှုဒဏ်ကို ခံခဲ့ရသည်။
မြန်မာပြည်တွင် လုပ်အားပေး စေခိုင်ခြင်း အမျိုးအစား များစွာ ရှိသည့်အနက် အသက်အန္တရာယ်နှင့် အနီးဆုံးမှာ ရှေ့တန်းစစ်မြေပြင်ဒေသများတွင် ပေါ်တာ ခေါ် အထမ်းသမားများအဖြစ် ခိုင်းစေခံရမှု ဖြစ်သည်။
လုပ်အားပေး ခိုင်းစေမှု ဖြစ်ရသည့် အကြောင်းရင်း များစွာ ရှိသည်ဟု ILO ဆက်သွယ် ညှိနှိုင်းရေး အရာရှိ စတိဖ်မာရှယ်က ပြောသည်။
“ယနေ့အထိ အဓမ္မ ခိုင်းစေမှုတွေ ရှိနေသေးတယ် ဆိုတာကတော့ ခိုင်းစေသူတွေက သူတို့ဟာ အခြားသူတွေထက် ကြီးမြတ်တယ်လို့ သူတို့ကိုယ်သူတို့ ယူဆနေကြလို့ပါပဲ။ ဒါဟာ သူတို့ရဲ့ နိုင်ငံသားတွေကို မလေးစားတာပါပဲ” ဟု စတိဖ်မာရှယ်က Bi Weekly Eleven ဂျာနယ်ကို ပြောလိုက်သည်။
Comments