Rangoon Blackout worst ever in 2010

ရန်ကုန်မြို့တွင် တစ်နှစ်တာ အတွင်း အဆိုးဝါးဆုံး လျှပ်စစ်ဓါတ်အား ပြတ်တောက်
မိုးမခ အထောက်တော်၊ ရန်ကုန်
မတ် ၃၁၊ ၂၀၁၀
ရန်ကုန်မြို့တွင် ယခုရက်ပိုင်းအတွင်း ဖြစ်ပွားလျက်ရှိသည့် လျှပ်စစ်ဓါတ်အား ပြတ်တောက်မှုသည် လွန်ခဲ့သည့် တစ်နှစ်တာ အတွင်း အဆိုးရွားဆုံးဖြစ်သည်ဟု ရန်ကုန်မြို့ခံများက ပြောဆိုကြသည်။
ယခုရက်ပိုင်း အတွင်း ရန်ကုန်မြို့တွင် လျှပ်စစ်ဓါတ်အား ပေးဝေရာတွင် မိနစ်ပိုင်းမျှသာ ပေးဝေပြီး နာရီနှင့်ချီ ဖြတ်တောက်လျက် ရှိကာ၊ လျှပ်စစ်ဓါတ်အားဖြင့် သုံးရေ စုပ်ခြင်း၊ အိမ်သုံး အင်ဗာတာ ဖြင့်ဘက်ထရီအား ပြန်လည် ဖြည့်သွင်းခြင်း၊ မိုဘိုင်းဖုန်းကဲ့သို့သော တကိုယ်ရေသုံး
လျှပ်စစ်ပစ္စည်းများ အားဖြည့်ခြင်းတို့ကို ပြုလုပ်၍ မရလောက်သည့် အခြေအနေသို့ ရောက်ရှိနေပြီး လျှပ်စစ်ဓါတ်အား မရရှိခြင်းကြောင့် သာမန်နှစ်ထက် ပူပြင်းသည့် ရာသီဥတုဒဏ်ကိုလည်း ပိုမိုခံစားနေရသည်ဟု မြို့ခံများက ပြောဆိုကြသည်။
လျှပ်စစ်ဓါတ်အား ပြတ်တောက်မှု၏ အကျိုးဆက် အဖြစ် အိမ်သုံးမီးစက်များ၊ လုပ်ငန်းသုံးမီးစက်များ၊ ကွန်ဒိုနှင့် ရှော့ပင်းစင်တာ၊ ဟိုတယ်များမှ မီးစက်ကြီးများ၏ ဆူညံသံ၊ လေထုညစ်ညမ်းမှု နှင့်အတူ အပူရှိန် ပိုမြင့်တက်ခြင်းများ ဖြစ်ပွားလျက်ရှိသည်ဟု ရန်ကုန်မြို့နေထိုင်သူများက ပြောဆိုကြသည်။
ပုဇွန်တောင် မြို့နယ်တွင် နေထိုင်သူ တဦးက လွန်ခဲ့တဲ့ ၂၄ နာရီကတည်းက လျှပ်စစ်မီးက ၂နာရီ ၃နာရီ တောက်လျှောက် မရသေးဘူး။ မီးလာတာနဲ့ ချက်ခြင်း ရေလည်းစုပ်တင်လို့ မရဘူး။ အားလုံး ၀ိုင်းပြီး စုပ်နေကြတော့ မတက်တော့ဘူး။ အခုသုံးရေလည်း ကုန်ခါနီး ဖြစ်နေပြီ။ နွေရာသီ ပူတဲ့အချိန်ကျမှ ရေက မရှိဖြစ်နေတာ။ ညဘက် သန်းခေါင် မီး၁နာရီ ၂နာရီကြာလောက် လာချိန်မှာ
ရေစုပ်ဖြစ်ရင်စုပ်ဖြစ် နို့မဟုတ်ရင်တော့ မရတော့ဘူး။ ဒါကြောင့် အိပ်ရေးပျက်ခံပြီး လျှပ်စစ်မီးကို စောင့်နေရတယ်။” ဟုပြောဆိုသည်။
လျှပ်စစ်မီး မရသဖြင့် ရေတွန်းစက်များ ရေမတွန်းပို့နိုင်ခဲ့လျင် ရန်ကုန်မြို့လယ်ရပ်ကွက်များ အတွင်း ကြံ့ဖွံ့မှ တူးဖေါ်ထားသည့် စက်ရေတွင်းများဖြင့် ရေပေးဝေရန် ရန်ကုန်မြို့တော်ဝန်နှင့် ရန်ကုန်တိုင်း ကြံ့ဖွံ့တာဝန်ခံတဦး ဖြစ်သူ ဗိုလ်ချုပ်အောင်သိန်းလင်းက စီစဉ်ထားသည်ဟု စည်ပင် သာယာမှ ပြုလုပ်သည့် သတင်းမီဒီယာနှင့် တွေ့ဆုံပွဲများတွင်ပြောဆိုခဲ့သည်။
သို့ရာတွင် ကြံ့ဖွံ့အလံတင်ထူထားသည့် စက်ရေတွင်းမှ သုံးရေကို နေထိုင်သည့် အိမ်အသီးသီးသို့ သယ်ယူရာတွင် ပုံးများဖြင့် ကိုယ်တိုင်သယ်ယူရမည် ဖြစ်သဖြင့် ရေတွင်းနှင့် အလှမ်းကွာသူများနှင့် အထပ်မြင့်တွင် နေထိုင်သူများ အနေဖြင့် အခက်အခဲ ကြီးမားလိမ့်မည် ဖြစ်သည်ဟု ရန်ကုန်မြို့ခံတဦးက ပြောသည်။ ထို့ပြင် စက်ရေတွင်းမှ ထွက်ရှိသည့် ရေ သည်
သံဓါတ်ပါရှိနိုင်ခြင်း၊ ရေသွက်မဟုတ်ခြင်း တို့ကြောင့် ရန်ကုန်မြို့ခံများက သုံးစွဲလိုခြင်းမရှိကြဟု လည်းသိရှိရသည်။
ရန်ကုန်မြို့ရှိ ကိုယ်ပိုင်စီးပွားရေး လုပ်ငန်းများဖြစ်သည့် စားသောက်ဆိုင်များ၊ အင်တာနက်ဆိုင်များ အစရှိသည့် လုပ်ငန်းများတွင်လည်း မီးစက်ကို တရက်လျင် ၁၀နာရီကျော် မောင်းနှင်ရသဖြင့် ကုန်ကျစရိတ်ပိုမို မြင့်တက်လာပြီး စားသုံးသူ အရေအတွက် နည်းသည်နှင့် မီးစက်ရပ်ခါ ဆိုင်ကို စောစီးစွာ ပိတ်ကြရသည့် အဖြစ်များလည်း ဖြစ်ပွားလျက် ရှိနေပြီး ယခုရက်ပိုင်း ဓါတ်ဆီဈေး ယခင် တဂါလံ ကျပ် ၃၀၀၀ ၀န်းကျင်မှ ၃၄၀၀ ကျပ် သို့ မြင့်တက်ခဲ့သည်ဟုလည်း သိရသည်။
မည်သည့် အကြောင်းကြောင့် ရန်ကုန်မြို့တွင် ယခုလို လျှပ်စစ်မီး ဆိုးဝါးစွာ ပြတ်တောက် နေရသည်ကို တာဝန်ရှိသူများ အနေဖြင့် ပြည်တွင်းမီဒီယာများသို့ရှင်းလင်း ပြောဆိုခြင်း မရှိသော်လည်း အစိုးရပိုင်သတင်းစာများတွင်မူ ရဲရွာရေအား လျှပ်စစ်တာဘိုင် တလုံး စတင်လည်ပတ်ပြီ ဆိုသည့် သတင်းကို ပြီးခဲ့သည့် ဖေဖေါ်ဝါရီလက ဖေါ်ပြခဲ့သည်။ သို့သော်လည်း ရန်ကုန်မြို့၏ သုံးစွဲမှုကို ပြည့်မှီအောင် ပေးနိုင်ခြင်း မရှိသည့်ပြင် ယခင်လများထက် ၊ ယခင်နှစ်များထက် ပိုမိုဆိုးရွားစွာ ပြတ်တောက်လျက်ရှိသည်ကိုသာ ကြုံတွေ့နေရသည်။
“မီးမလာတာက အရေးမကြီးဘူး၊ အခုလို ၅မိနစ်  ၁၀မိနစ် ပေးလိုက် ပြန်ဖြတ်လိုက် လုပ်နေတာက သုံးစွဲတဲ့ သူတွေအတွက် စိတ်အနှောင့်အယှက် အရမ်းဖြစ်တယ်။ မီးလာပြီဆိုလို့ မီးစက်ကို ရပ်လိုက်ပြီး ထိုင်တောင်မထိုင်ရ သေးဘူး။ မီးကပြန်ပျက်သွားပြန်ရော လူကို အရူးဖြစ်နေရော”ဟု ကျောက်တံတားမြို့နယ် ရှိအင်တာနက်ဆိုင် တစ်ဆိုင်မှ ပြောဆိုသည်။
နအဖ စစ်အစိုးရက ရွေးကောက်ပွဲများ ကျင်းပပေးမည်ဟု ပြောဆိုထားသည့် ၂၀၁၀ ခုနှစ်တွင် ရန်ကုန်လူထု အနေဖြင့် ရွေးကောက်ပွဲ ၊ အန်အယ်လ်ဒီ နှင့်အခြားသော အတိုက်အခံပါတီများ နှင့်ပတ်သက်သည့် နိုင်ငံရေး ကိစ္စရပ်များကို စိတ်မ၀င်စားနိုင်စေရန် ရန်ကုန်လူထုကို ယခုကဲ့သို့ ဒုက္ခရောက် စေရန်ဖန်တီးထားခြင်းလား ဟူသည့် တွေးဆမှုများလည်း ရှိသည်ကို ကြားသိရသည်။
နိုင်ငံပိုင် လုပ်ငန်းများအား ပုဂ္ဂလိကပိုင် ပြုလုပ်ရေးအစီအစဉ်များအား မြန်မြန်ဆန်ဆန် လုပ်ဆောင် လျက်ရှိသည့် ယခုလိုအချိန်တွင် လျှပ်စစ်ဓါတ်အား ထုတ်လုပ်ပေးဝေခြင်းကိုလည်း ပုဂ္ဂလိကအား လုပ်ကိုင်စေမည့် ကောလဟလများ ထွက်ပေါ်လျက် ရှိသော်လည်း ပြိုင်ဆိုင်မှု မရှိသည့် စစ်အစိုးရနှင့် နီးစပ်သူ လုပ်ငန်းရှင်ကြီးများ လက်ထဲသို့ ထိုးအပ်ခဲ့လျင် မီတာကြေး တိုးမြှင့်ကောက်ခံ သည်မှလွဲပြီး ၀န်ဆောင်မှု တိုးတက်လာခြင်း မရှိမည့် အဖြစ်ကိုလည်း လူထုက စိုးရိမ်လျက် ရှိသည်။
ဥပမာအားဖြင့် လွန်ခဲ့သည့် ၂၀၀၉ ခုနှစ်ဆန်းမှ စတင်ကာ တခါသုံး ဂျီအက်စ်အမ် ဆင်းကဒ်များကို ထူးကုမ္ပဏီခွဲ စင်ထရယ် မားကက်တင်းက ရောင်းချပေးလျက် ရှိသော်လည်း ပြိုင်ဆိုင်မှု မရှိသည့်အတွက်ကြောင့် ၁လသက်တမ်းခံ ဖုန်းကဒ်မှာ ပြောဆိုခဈေးကြီးသည့် အပြင်
သတ်မှတ်ဈေးထက် ၃၊ ၄ထောင်မှ ၇ထောင် ကျပ်ဝန်းကျင်ထိ အပိုကြေးပေးဝယ် ရသည့် အဖြစ်ကို ကြုံတွေ့နေရသည်။

Comments