Burmese Junta's accessory's USDA becomes political party for 2010 Election

ကြံ့ဖွံ့ပါတီအား ထူထောင်ခွင့်ပြုလိုက်ကြောင်း မြန်မာအသံက ကြေညာ

မိုးမခ အထောက်တော်၊ ရန်ကုန်

မေ ၅၊ ၂၀၁၀

ဧပြီလ ၂၉ ရက်နေ့က ရွေးကောက်ပွဲ ကော်မရှင်တွင် ပါတီ တည်ထောင်ခွင့်ပြုရန် လျှောက်ထားခဲ့သည့် ကြံ့ခိုင်ရေးနှင့် ဖွံ့ဖြိုးရေးပါတီအား တည်ထောင်ခွင့်ပြုလိုက်ကြောင်း ယနေ့ည ၈နာရီ ရုပ်သံ သတင်းတွင် ကြေညာသွားခဲ့သည်။

ပါတီ တည်ထောင်ခွင့် မလျှောက်မီ ၅ ရက်အလိုတွင် ဗိုလ်ချုပ်များအဖြစ်မှ အနားယူပြီး အရပ်ဝတ်သို့ လဲခဲ့ကြသည့် စစ်အစိုးရ၏ ၀န်ကြီး ဒုဝန်ကြီး စုစုပေါင်း ၂၇ ဦးနှင့်နအဖ အစိုးရက ခန့်အပ်ခဲ့သော ရွေးကောက်ပွဲ ကော်မရှင်ထံ ပါတီ တည်ထောင်ခွင့်ပြုရန် ၂၉ ရက်နေ့တွင် လျှောက်ထားခဲ့ကြပြီး ယခုကဲ့သို့ မေလ ၄ ရက်နေ့တွင် တည်ထောင်ခွင့် ပြုလိုက်ခြင်း ဖြစ်သည်။

ဧပြီလ ၃၀ ရက်နေ့ သတင်းစာတွင်ပါရှိသည့် ကော်မရှင်၏ ကြေညာချက်အရ ပါတီ တည်ထောင်ခွင့် ပြုရန် လျှောက်ထားသည့် ပါတီပေါင်း ၂၅ ပါတီ ရှိပြီး ၁၂ ပါတီအား တည်ထောင်ခွင့် ပြုပြီးဖြစ်ကာ၊ ယခင် ပါတီဟောင်းများ အနက် ပြန်လည် မှတ်ပုံတင်ရန် လျှောက်ထားသည့် ပါတီ ၄ပါတီအနက် ၃ပါတီကို မှတ်ပုံတင်ခွင့် ပြုပြီး ဖြစ်သည်ဟု ပါရှိသည်။

ယနေ့ည ထုတ်ပြန်သော ကြေညာချက်အရ လျှောက်ထားသည့် လက်ကျန် ပါတီ ၁၃ ပါတီအနက် ၈ ပါတီဝန်းကျင်ကို တည်ထောင်ခွင့် ပြုလိုက်သဖြင့် စုစုပေါင်း ပါတီ ၂၀ ကျော်သွားပြီဖြစ်သည်။

ပါတီအသစ်များအနေဖြင့် တည်ထောင်ခွင့် ပြုရန် နောက်ဆုံးနေ့ သတ်မှတ်ထားခြင်း မရှိသေးသော်လည်း ယခင် ပါတီဟောင်းများ အနေဖြင့် ရွေးကောက်ပွဲ ဥပဒေ ကြေညာသည့်နေ့မှ ရက်ပေါင်း ၆၀ အတွင်း ပြန်လည် လျှောက်ထားရန် သတ်မှတ်ထားသဖြင့် လာမည့် ကြာသပတေးနေ့တွင် ကုန်ဆုံးမည် ဖြစ်သည်။

၁၉၉၀ ရွေးကောက်ပွဲတွင် လူထု ထောက်ခံမှု အများဆုံးရရှိခဲ့သည့် အမျိုးသား ဒီမိုကရေစီ အဖွဲ့ချုပ် အနေဖြင့် ရွေးကောက်ပွဲ မ၀င်ရန် ၊ ပြန်လည် မှတ်ပုံမတင်ရန် အများဆန္ဒဖြင့် ဆုံးဖြတ်ခဲ့ပြီး ဖြစ်သဖြင့် လာမည့် ၇ရက်နေ့တွင် နိုင်ငံရေး ပါတီအဖြစ်မှ ပယ်ဖျက်ခြင်းခံရဖွယ် ရှိနေသည်။

လက်ရှိ အုပ်ချုပ်ရေး အာဏာကို ရယူထားသည့် စစ်ဗိုလ်ချုပ် အများစု ပါဝင်ပြီး ကြံ့ဖွံ့အဖွဲ့ကို ထိုအမည်အတိုင်း မပြောင်းလဲဘဲ ဖွဲ့စည်းသည့် အချက်အပေါ်တွင် လူအများက တရားမျှတမှု မရှိဟု ရှုမြင်ကြသကဲ့သို့ နိုင်ငံက ထောက်ပံ့ထားသည့် ကြံ့ဖွံ့ပိုင် ဘဏ္ဍာငွေများ၊ အဆောက်အဦ၊ စီးပွားရေး လုပ်ငန်းများကို သုံးစွဲပြီး အခြားသော နိုင်ငံရေးပါတီများနှင့် ယှဉ်ပြိုင်မည် ဆိုသည့် အချက်အပေါ် ယှဉ်ပြိုင်ဘက် နိုင်ငံရေး ပါတီများ အနေနှင့်လည်း တရားမျှတမှု မရှိဟု ယူဆပြီး ထုတ်ဖေါ် ပြောဆိုလာကြသည်ကို သတင်း ဖေါ်ပြချက်များ အရ ကြားသိရသည်။

(ဓာတ်ပုံ - စစ်အစိုးရ ထူထောင်ထားသော ကြံ့ဖွံ့ (အသင်း) ၏ အလံ၊ တံဆိပ်ပုံတူများ)