Fair in NLD

NLD ရုံးချုပ်မှ ဈေးရောင်းပွဲတော် လူစည်ကား
ခင်နှင်းလွင်၊ ရန်ကုန်
ဇန်န၀ါရီ ၄၊ ၂၀၁၁

NLD ရုံးချုပ်တွင် ဇန်န၀ါရီလ ၂ ရက်နေ့မှ စတင်ပြီး ယနေ့ အဆုံးသတ်မည့် လွတ်လပ်ရေးနေ့ အကြို ရန်ပုံငွေ ဈေးရောင်းပွဲတော်သို့ ပရိသတ် အများအပြား လာရောက်သည်ကို တွေ့ရသည်။ ၂ ရက်နေ့ နံနက်က ဈေးပွဲတော်ကို ဒေါ်အောင်ဆန်းစုကြည်ကိုယ်တိုင် ဖွင့်လှစ်ပေးခဲ့သည်။

`လွတ်လပ်ရေးနေ့ အကြို ဈေးရောင်းပွဲတော်ဟာ အဖမ်းဆီးခံထားရတဲ့ လူတွေ ထောက်ပံ့ဖို့ အတွက် ရည်ရွယ်တာပါ´ ဟု NLD ဗဟိုအမျိုးသမီးအဖွဲ့မှ ဒေါက်တာဒေါ်မေ၀င်းမြင့်က ပြောပြသည်။

ဈေးပွဲတော်တွင် ရန်ကုန်မြို့၊ ကရင်ပြည်နယ်၊ မွန်ပြည်နယ်နှင့် ရှမ်းပြည်နယ်တို့မှ NLD အဖွဲ့ဝင်များ လာရောက် ရောင်းချကြောင်း သိရသည်။

ဆိုင်စုစုပေါင်း ၂၇ဆိုင်ရှိပြီး ထိပ်ဆုံးတွင် အမျိုးသမီးအဖွဲ့က ရောင်းချသည့် ဒေါ်အောင်ဆန်းစုကြည် အမှတ်တရ ပစ္စည်းဆိုင်၊ အမှတ်တရ လက်ပတ်နာရီ ဘောပင်၊ အလှတင် ဖန်တုံး၊ ခြင်း နှင့် လက်ထိုးပစ္စည်း မျိုးစုံကို တွေ့ရသည်။

ဗိုလ်ချုပ်အောင်ဆန်း၏ နတ်မောက်မြို့ရှိ နေအိမ်မှ မြေသားများကို နမူနာ အထုပ်ကလေးများနှင့် အောင်မြေ အမှတ်တရ ရောင်းချပေးနေသည်။

ထို့အပြင် တာမွေမြို့နယ်မှ ရောင်းချသော အမှတ်တရပစ္စည်းဆိုင်တွင် ဘားအံထောင်တွင် အကျဉ်းကျခံနေရသော ဘလော့ကာ ကနေဘုန်းလတ်၏ မိဘများက ဒေါ်စုပုံပါ လက်လုပ် (hand made) ပစ္စည်းများကို ရောင်းချ ပေးနေတာကို တွေ့ရသည်။ ထောင်ဒဏ် ၃၅ နှစ် ကျနေသည့် ကိုစန်းဇော်ထွေး ဖန်တီးသည့် ပန်းချီကားကိုလည်း တွေ့ရသည်။

ဒေါ်စု၏ ပန်းချီ ၇မျိုး၊ ဒေါ်စု လွတ်လပ်ပြီးနောက် သွားလာလှုပ်ရှားသော ဗွီဒီယိုမှတ်တမ်း အခွေများကိုလည်း ရောင်းချပေးထားတာကိုလည်း တွေ့မြင်နိုင်ပါသည်။

`ထင်တောင် မထင်ထားဘူး ဒီလောက် ရောင်းရမယ်လို့။ အကျိုးအမြတ်ကို နဂိုကတည်းက စီစဉ်ထားတဲ့ အတိုင်း လှူမှာပါ´ ဟု ကရင်ပြည်နယ်မှ ကရင် အ၀တ်အထည်များ လာရောက် ရောင်းချသော ဒေါ်နန်းခင်ထွေးမြင့်က ပြောပြသည်။

မွန်ပြည်နယ် NLD ကလည်း မွန်ရိုးရာ အ၀တ်အထည်များကို ရောင်းချပေးခဲ့ပြီး ဒုတိယနေ့တွင်ပင် ပစ္စည်းများ ရောင်းကုန် ခဲ့သည်ဟု သိရသည်။

ထို့အပြင် စမ်းချောင်းမြို့နယ်မှ ဗိုလ်ချုပ်၏ ရှားပါး ဓါတ်ပုံပစ္စည်းများ၊ တောင်ဒဂုံမြို့နယ်ရှိ သွေးလှူရှင်များ၏ ရန်ပုံငွေ အရောင်းဆိုင်၊ ကဗျာဆရာ ဖျာပုံနီလုံဦး၏ စာအုပ် အရောင်းဆိုင်၊ ကိုမျိုးသန့် (သရက်ထောင်တွင် အကျဉ်းကျခံနေရသူ) ၏ ဇနီး ရောင်းချသည့် စတီးပစ္စည်း အရောင်းဆိုင်များကိုလည်း တွေ့မြင်ရသည်။
`မနေ့က ညနေ မှာ စုစုပေါင်း စာရင်း ချုပ်လိုက်တော့ သိန်း ၅၀ ကျော်ဖိုး ရောင်းရပါတယ်´ ဟု ဒေါ်မေ၀င်းမြင့်က ပြောပြသည်။