Mar Mar Aye - 400

“ပြောပြစရာတွေလည်း တပုံကြီးရှိသေးတယ်” အမှတ် (၄၀၀)

ဧရာဝတီ စီးဟေ့ စီးဟေ့
မာမာအေး
အောက်တိုဘာ ၃၀၊ ၂၀၁၁

သောတရှင်များ ကျန်းမာတော်မူကြပါစရှင်
မာအေးချစ်တဲ့သောတရှင်တွေ ဂီတ၀ါသနာရှင်တွေအားလုံး မာအေးရဲ့အသံလေး ကြားရတဲ့အခါမှာ ကိုယ်ရောစိတ်ပါ ချမ်းသာကြပါစေလို့ ဆုမွန်ကောင်းတောင်းလိုက်ပါတယ်။

သောတရှင်တို့ရေ – မာအေးတော့ ဂီတအစည်းအရုံးက အတွင်းရေးမှူးသစ်ကလေး အကြောင်းပြုပြီး အစည်းအရုံး မပေါ်မီက အကြောင်းတွေနဲ့ပါ သမိုင်းဆက် သိနိုင်အောင် ပြောပြပေးခွင့်ရလို့ ဒီနေရာလေး ပေးထားတဲ့ ဘီဘီစီကိုလဲ ကျေးဇူးတင်ပါတယ်။

နားမညည်းပါဘူးလို့ တကူးတက ခွင့်လွှတ်ကြတဲ့ သောတရှင်ဆွေသဟာများကိုလဲ ကျေးဇူးအထူးတင်ပါတယ်။ ဒီကနေ့အထိ မာအေးတို့ရဲ့ လုပ်ဆောင်ခဲ့မှုတွေကို ယုံကြည်စွာ နားလည်ပေးတဲ့ ဂီတလောကက ညီအကို မောင်နှမ အဖွဲ့ဝင်များကိုလဲ ကျေးဇူး မမေ့ပါဘူးလို့ ပြောချင်ပါတယ်။

ပြောစရာတွေကတော့ တပုံကြီး ရှိသေးတာပါဘဲ။ နားပြောင်းနားလွှဲလေးဖြစ်အောင် နားထောင်စေ့ချင်လို့ အပြင်ရောက်နေတဲ့ အနုပညာမောင်နှမတွေ တစုကြီး စုပြီး ပျော်ကြတဲ့ နေ့ကလေး တနေ့က အကြောင်းတွေ ပြောပြမယ်လို့ စိတ်ကူးထားပါတယ်။ မာအေး တည်ထောင်ထားတဲ့ “မာအေးဖောင်ဒေးရှင်း” ဆိုတာ ရှိတယ်လို့တော့ ကြားဖူးမယ် ထင်ပါရဲ့။ အဲဒါကို ၂၀၀၈ ခုနှစ်က ဆန်ဖရန်စစ္စကိုမြို့မှာ “သီချင်းဆိုရအောင်” ဆိုတဲ့ ခေါင်းစဉ် ပေးပြီး ဖျော်ဖြေပွဲလေးနဲ့ တင်ဆက် ဖွင့်ခဲ့တာပေါ့ရှင်။

“ဘလော့စပေါ့”တခုလဲ ဆင်ပေး တင်ပေးထားတာ ရှိပါတယ်။ ကွန်ပြူတာ စခမ်းမှာ စမ်းတ၀ါးဝါး အဆင့်ဘဲ ရှိသေးတော့ - သူများ တင်ပေးမှ ဖြစ်တဲ့ အခြေအနေမှာဘဲ ရှိပါတယ်။ မာအေးညံ့ပါတယ် ဆိုတာ သိတယ်မဟုတ်လား သောတရှင်။

အဲဒီလို စက်ကြိုး ယန္တယားဖက်မှာ မစွမ်းတော့ နှုတ်အစွမ်း၊ လက်အစွမ်းဘဲ အားကိုးရတာကိုး။ စိတ်အမျိုးတူတဲ့သူချင်း တွေ့ရင် စုရွတ်စုဖတ် အနုပညာငတ်တာတွေ ဖြေကြပါတယ်။ တိုင်းပြေငတ်တာတွေ ဖြေကြပါတယ်။ ဖေါင်ဒေးရှင်း လုပ်ငန်းဝင် စာရင်းလေး တင်လို့လဲ ရနိုင်တါပေါ့နော်။

မနှစ်က နိုဝင်ဘာ (၂၅)ရက်နေ့မှာ “မာရသွန်နှင်းဆီ” ခေါင်းစဉ် ချီတဲ့ ကဗျာရွတ်ပွဲ ဆင်နွှဲခဲ့ကြပါတယ်။ မာအေးရဲ့ စာဘ၀ အစဟာ 'ကဗျာ' အလှသာ ဖြစ်လို့ ကဗျာဆရာ လာရင် ကဗျာဖြစ်တာပေါ့။ ရွှေဝါရောင်နဲ့ ပြေးခဲ့တဲ့ ကဗျာမောင်ကလေး အောင်ဝေးလဲ မကြာမကြာ လာတတ်တော့ အတော်ဘဲ ဖြစ်နေတယ်ရှင့်။

ပြီးခဲ့တဲ့ သြဂုတ်လ (၂ရ) ရက်နေ့မှာ ကဗျာရှင် မောင်နှမတွေ တစုကြီး စုမိကြမှာမို့ ကဗျာရွတ်ပွဲတပွဲ လုပ်ရအောင် မောင်ကလေး အေါင်ဝေးကို ပြောပြလိုက်ပါတယ်။ သူက တခြားမြို့မှာ မိသားစုနဲ့နေတာပါ။ ဒါပေမယ့် ကဗျာသံ ကြားတာနဲ့ အပြေးအလွှား လာချင်တာ ဒီက မာအေး ၀မ်းမနာသားတွေကလဲ သူတို့ အကိုကြီးကို ပြေးခေါ်ကြတာ ဟုတ်နေတာဘဲ။

မာအေးက ဘာရယ်မဟုတ်ပါဘူး၊ တကူးတကရယ်လဲ မတွေးမိပါဘူး၊ အင်္ဂလန် ရောက်နေတဲ့ ပန်းချီဆရာလေးထိန်လင်းက မာအေးတို့နိုင်ငံ ဗြိတိသျှသံရုံးမှာ တာဝန်ခံဖြစ်ခဲ့ဖူးတဲ့ သူ့ဇနီးနဲ့ သမီးလေးနဲ့အတူ မာအေးဆီကို လာလည်ချင်တယ်လို့ ဖုန်းဆက်လာတာနဲ့ လာပါ လည်ပါ ပြောလိုက်တာကိုး။

မာအေးတို့ ဖို့ဝိန်းက အမေရိကန် တောမြို့ကလေးပါ။ ပြစရာ ဘာမှ သိပ်ကြီး ရှိတာမှ မဟုတ်တော့။ သူကလဲ ကဗျာတွေ လုပ်၊ သရုပ်ပြတွေလုပ်နဲ့ ပေါ်ပြူလာ ဖြစ်နေတော့ - ကဗျာရွတ်ရင် အဆင်ပြေတယ်။ အပျင်းပြေမယ်။ စုပြီးတွေ့နိုင်တဲ့သူတွေ့ကြပါစေရယ်လို့ တွေးဆမိတာနဲ့ မောင်ထိန်လင်း အတွက် စီစဉ်ခဲ့တာပါ။

ဒီမြို့မှာကလဲ ဘော်ဒါကလာတဲ့ ထိန်လင်းတို့သူငယ်ချင်းတွေက အများသားဘဲ။ ဇေတ၀န် ၀ိဟာရမှာ သူတို့လဲ စုကြဦးမယ် တဲ့။ ကေါင်းတာဘဲလေ၊ ပျော်ကြပါစေပေါ့။

ထိန်လင်းတို့ မရောက်ခင် မာအေးက အိမ်ငယ်လေး တအိမ်ကို ပြောင်းထားတာမို့ အောင်ဝေးက အိမ်နောက်ဖက်ခြံထဲ ဆင်နွှဲမယ့်ကြံပါတယ်။ တကယ်နေကြည့်တော့ မာအေး သဗာယနဲ့ မမျှနိုင်တာ သိပြီး၊ အိမ်ကြီးဆီ ပြန်ပြောင်းလာရတယ်၊ တော်ပါသေးရဲ့ ညီမတော် ဆွေဇင်ထိုက်လဲ မမျှော်လင့်ဘဲ ရောက်လာ၊ ကိုအောင်ဝေးတို့ မိသားစု၊ ကိုထိန်လင်းတို့ မိသါးစု LA က ကိုကျော်ဝဏ္ဏ၊ DC က အောင်အောင်တို့လဲ ရောက်လာ အခန်းတွေ ဗလာမရှိ၊ ကံကေါင်းပါဘိပေါ့ရှင်။

မောင်ထိန်လင်း အပေါင်းအသင်းတွေလဲ အိမ်မှာ လာစုတာဘဲဟာ၊ ဓါတ်ပုံတွေ အမှတ်တရ ရိုက်ကြတော့တောင် ပြောမိသေးတယ်၊ “ပြည်တော်ပြန် သတင်းထုတ်ခေါ်နေချိန်မှာ ဒီလို တစုကြီး ဓါတ်ပုံထဲမှာ တွေ့ကြရင် - ဘာတွေ တိုင်ပင်ဘို့ လူစုသလဲလို့ အထင်ကြီးနိုင်တယ်” ဆိုတဲ့ အကြောင်းပါ၊ မာအေးလဲ ဟိုလုပ် ဒီလုပ် အထုပ်အပိုးတွေ ပြောင်းနဲ့ဟာ ဘာခေါင်းစဉ်နဲ့ ကဗျာရွတ်ကြမှာလဲ ဆိုတာ ရွတ်မယ့်နေ့ မတိုင်ခင်လေး အောင်ဝေးရောက်မှ သိရပါတယ်။ ရေးဖို့ အချိန်မရှိတာသိတဲ့ အောင်ဝေး ကူးလာပေးတဲ့ မောင်စိန်ဝင်း (ပုတီးကုန်း) ရဲ့ ကဗျာ အဖွင့်မှာ ပြောရင်း ဖတ်လိုက်ရတာပါဘဲ၊ ဆွေဇင်ထိုက်က တောကဗျာရွတ်ပွဲကို မြို့မှာလိုဘဲ တခန်းတနား MC လုပ်ပေးသွားပါတယ်။ “POETRY PERFORMANCE FOR BURMA” ခေါင်းစီးနဲ့ ကဗျာရွတ်ကြတာ ဆောင်းယွန်းလ၊ မင်းတာရာ၊ မျိုးမြင့်ချို၊ ပန်းချီထိန်လင်း၊ စာရေးဆရာမလေး ခက်မာ၊ ကျောင်းသားတပ်မတော်က သံခဲ (ဆေး-မန်း)၊ နေစောမေ၊ သစ်ကေါင်းအိမ် နဲ့ အောင်ဝေး၊ ကျော်ဝဏ္ဏ၊ ၀င်းငယ်၊ ဝေလင်း၊ ချမ်းမှိုင်းအောင်တို့အဖွဲ့လိုက် ရွတ်တဲ့ ဧရာဝတီ ကဗျာရှည်ကြီး ရွတ်တဲ့အသံ နာခံကြရတယ်။ ခက်မာရဲ့ သားကလေး 'လင်းသစ်နွေဦး' သစ်ကေါင်းအိမ်ရဲ့ သားကလေး “မင်းထင်ကျော်”၊ အောင်ဝေးရဲ့ သားလေး“လမင်းဝေး” တို့လဲ ၀င်ရွတ်ကြလေတော့ ကဗျာ့မျိုးစေ့သစ်ကလေးတွေလို့ ချစ်မိပါတယ်။ မောင်ထိန်လင်း သမီးလေးကလဲ ဗမာကလေးကဗျာတွေ ရွတ်လိုက်တာ ဗမာလေးတွေထက်တောင် ပီသသေးတယ်ရှင်။ အံ့ရောဘဲ။ ကဗျာတွေ အဝေးက ပို့တဲ့ 'ညိုခက်ကျော်' နဲ့ 'ဇော်ဇော်အောင်' တို့ ကဗျာတွေကို ကိုယ်စားရွတ်ပေးတာလဲ မှတ်တမ်းတခုပါဘဲ။ ကျိုက်လတ်ဦးမြစိန်ကလဲ တယောလေးနဲ့ ချွဲပေးတော့ လွမ်းစရာလေးတွေလဲ ဖြစ်သပေါ့လေ။

နောက်ဆုံး ပါဖေါမင့် ဆိုတဲ့ ပန်းချီထိန်လင်းရဲ့ လှုပ်ရှားတင်ပြမှုပါ၊ ဘယ်လိုသရုပ်ဖေါ်တာလဲ - ခုမှဘဲ မြင်ဖူးပါတယ်ရှင်။ သူကိုယ်တိုင်က – ကဗျာရွတ်ပွဲမှာ ရှိနေတဲ့သူတွေကို - ကျနော်ပြောတဲ့အတိုင်း လိုက်လုပ်ပေးကြပါလို့ တောင်းဆိုထားပြီးမှ ပါဖေါမင့်ကို စပါတယ်။ ထိုင်နေကြတဲ့သူတွေကြား - ဟိုသွား ဒီသွား ပုလင်းလွတ်ကလေး ကုလားထိုင်ပေါ်တင်ထား၊ တရိုတသေ ပင့်သွား လူတွေရှေ့မှာ တန်းစီနေရာချထားနဲ့ အဲဒါပြီးတော့ မာအေးဆီကို လာခေါ်ပြီး ပရိသဒ်ရှေ့က ကုလားထိုင်တွေ စီထားတဲ့ ဦးဆုံးနေရာမှာ ထိုင်ခိုင်းတယ်၊ မျက်စေ့လဲ မှိတ်ထားရသေးတယ်။ တခြားသူတွေကိုလဲ မာအေးလိုဘဲ ခိုင်းလိမ့်မယ် ထင်တယ်၊ မျက်စေ့မှိတ်ထားရတော့ မမြင်ရဘူးလေ။ နောက်တော့ ခြေခုံပေါ်ကို အ၀တ်နဲ့ ပွတ်တိုက်တာ ခံစားရတယ်။ တခုခု ရေးနေတယ် ဆိုတာလဲ ခံစားရပါတယ်။ အားလုံး မျက်စေ့ဖွင့်ကြည့်နိုင်ပါပြီ လို့ ပြောတဲ့ အချိန် အထိ မိနစ် ၂၀ လောက် ကြာမယ် ထင်ပါတယ်။ မာအေးရဲ့ ခြေစုံကို ငုံ့ကြည့်မိတဲ့အခါ “မိခင်” ဆိုတဲ့ စာ တွေ့ပါတယ်။ ကိုယ့်ဘေးကလူမှာ “ဧရာ”၊ေ နာက်တယောက်က “၀တီ” လူစေ့သွားတော့ “မိခင်ဧရာဝတီ လွတ်လပ်စွာ စီးဆင်းနိုင်ပါစေ” ဆိုတဲ့ စာတန်း ဖြစ်ပေါ်ပါတယ်။ အပြီးသတ်မှာတော့ “ယိုယီးလေးလေးယို -၊ ဧရာဝတီ စီးဟေ့ စီးဟေ့” လို့ စုပေါင်း လက်တွဲဝိုင်းပတ်လှည့်အော် - ပျော်လိုက်ကြပါတယ်။

ဧရာဝတီ အမိ သီတာရေမြေဆုံးတိုင် စီးနိုင်ပါစေသတည်း
ရေပြာရေကြည်၊ မြစ်မင်းဧရာဝတီ၊ ဒုဋ္ဌ၀တီ၊ သလ္လာဝတီ၊ တသွင်သွင် စီးပါတဲ့၊ မြစ်ခရီး ရေနဒီ၊ လှိုင်းသံ လှေသံ တစီစီ မငြီး၊ လောင်းလေကြီးနဲ့ မောင်ကြီးဆီ၊ လောင်းလှေကြီးနဲ့ မောင်ကြီးဆီ ပျို့မောင်ကြီးဆီ
(မောင်ကြီး ရွှေရောင်ရစ်မှ)


ဘီဘီစီ အသံလွှင့်ဌာန http://www.bbc.co.uk/burmese/ ၏ ထုတ်လွှင့်ချက်ကို ကူးယူ ဖော်ပြသည်။