တူမောင်ညို
(၂၀၁၂ ခုနှစ်၊ စက်တင်ဘာ ၆ ရက်)
“မုန်းစကိုတိုစေ၊ ချစ်စကိုရှည်စေ၊ နာစရာရှိလျှင် လွမ်းစရာနှင့်ဖြေဆိုသည့် စကား” ကလည်း စကားအဖြစ်သာပြောကြတာပါ။
ခုံရုံးနဲ့ လွှတ်တော်ကြားက “ပြည်ထောင်စုအဆင့်” အငြင်းပွားမှုပြဿနာက ပို၍ပို၍ ပြင်းထန်လောင်ကျွမ်းလာနေပြီဖြစ်ပါတယ်။ ပါးကိုက်ရင် နားကိုက်မယ်ဆိုပြီး တုန့်ပြန်နေကြပါတယ်။ ဘယ်ဖက်ကမှ အလျှော့ပေးကြမယ့်ပုံစံမတွေ့မြင်ရသေးပါဘူး။
လွှတ်တော် မီးလောင်နေပြီလား။
ကျနော်ဒီလိုရေးတာ အကြောင်းအချက်မဲ့မဟုတ်ပါဘူး။
၂ - ၉ - ၂၀၁၂ ရက်နေ့၊ မြန်မာ့အလင်းသတင်းစာ၊ စာမျက်နှာ ၆ မှာဖေါ်ပြထားတဲ့ (ဒေါက်တာမာလာအောင် - ဒုတိယ ပါမောက္ခချုပ်- ရန်ကုန်အရှေ့ပိုင်းတက္ကသိုလ်) ရဲ့ဆောင်းပါး “union level ဒွိဟ သို့မဟုတ် ပြည်ထောင်စုအဓိပ္ပာယ်ဖွင့်ဆိုခြင်း၏ နောက် ဆက်တွဲ ဆန်းစစ်ချက် ” ဆောင်းပါး နဲ့ပတ်သက်ပြီး ပြည်သူ့လွှတ်တော်ထဲမှာမေးခွန်းမေးပါတယ်။
ဒီမေးခွန်းကို ဥပဒေရေးရာနှင့်အထူးကိစ္စရပ်များလေ့လာဆန်းစစ်သုံးသပ်ရေးကော်မရှင်အဖွဲ့ဝင် ဦးဘရှိန် က ပြန်လည်ဖြေကြား ရာမှာ “နိုင်ငံပိုင် သတင်းစာ နှစ်စောင်တွင် ဤဆောင်းပါး ပါရှိလာသည့်အတွက် ဆောင်းပါး၏ နောက်ကွယ်၌ ပရောဂတစ်စုံတစ်ရာရှိ နေ သလားဟု မေးခွန်းထုတ်စရာရှိနေပါကြောင်း၊ ယခုအချိန်အခါတွင် မီးလောင်ရာလေပင့်ခြင်းမပြုလုပ်သင့်ပါကြောင်း” ဖြေကြားခဲ့ပါတယ်။
သူ့အဖြေက လွှတ်တော်မီးလောင်နေတာကို ဝန်ခံထားပါတယ်။ “ဆောင်းပါး”က လေပင့်ပေးနေတယ်လို့ဆိုလိုတာထင်ရှားပါ တယ်။
လေပင့်သောဆောင်းပါး
ဦးဘရှိန်အဖြေထဲမှာ နိုင်ငံပိုင်သတင်းစာနှစ်စောင်ဤ“ဆောင်းပါး” ပါရှိလာတယ်လို့ပြောထားပါတယ်။ အဲဒါလည်း အဖြစ်မှန်နဲ့ ကွဲလွဲနေပါတယ်။ ဒီ “ဆောင်းပါး”ကို နိုင်ငံပိုင်သတင်းစာတွေဖြစ်တဲ့ မြန်မာ့အလင်း၊ ကြေးမုံ၊ New Light Of Myanmar တို့မှာ စက်တင် ဘာလ ၂ ရက်နေ့မှာ တပြိုင်နက်ဖေါ်ပြခဲ့တာဖြစ်ပါတယ်။
စစ်တပ်ပိုင် “မြဝတီသတင်းစာ” မှာတော့ ဒီ“ဆောင်းပါး” ကို စက်တင်ဘာလ ၄ ရက်နေ့မှာဖေါ်ပြထားပါတယ်။
အခုလိုသတင်းစာ ၄ စောင်စလုံးမှာ ဒီ “ဆောင်းပါး” ပါရှိနေတော့ ဦးဘရှိန် အဖြေထဲမှာမေးခွန်းထုတ်ထားသလို “ဆောင်းပါး၏ နောက်ကွယ်၌ ပရောဂ တစ်စုံတစ်ရာရှိနေတာ” သေချာတယ်လို့ယူဆနိုင်ပါတယ်။ နိုင်ငံပိုင်သတင်းစာ ၃ စောင်ရဲ့ ပရောဂလား၊ စစ်တပ် ပိုင်သတင်းစာရဲ့ပရောဂလား။ ဘယ်သူ့ ပရောဂလဲ။
ဒေါက်တာမာလာအောင် ရဲ့ “ဆောင်းပါး” အနှစ်ချုပ်က ဒီလိုပါ။
- ခုံရုံးဆုံးဖြတ်ချက်ကို မထီမဲ့မြင်ပြုနေခြင်း (Contempt of Court ) သို့ဦးတည်နေပါသည်။
- အမှန်တကယ်မှာ ခုံရုံးအဖွဲ့ဝင်ပုဂ္ဂိုလ်ကြီးတို့သည် ဥပဒေနှင့်အညီ (လွှတ်တော်၏ အခြေအနေမှန်) မှန်ကန်စွာဆုံးဖြတ် ထောက်ပြခဲ့ခြင်း ဖြစ်ပါသည်။
- ခုံရုံး၏ဆုံးဖြတ်ချက်ကို အလေးထား၍လွှတ်တော်ဆိုင်ရာဥပဒေများ၏ မှားယွင်းနေသော ဥပဒေအပိုင်းကို ပြင်ဆင်သတ်မှတ် ရမည်သာ ဖြစ်ပါသည်။
- အဆိုပါပုဂ္ဂိုလ်ကြီးတို့ (ခုံရုံးအဖွဲ့ဝင်များ) သည် လေးစားအပ်သည့် အစားထိုးမရနိုင်သော ပညာရှင်ကြီးများဖြစ်ပါကြောင်း
ဦးဘရှိန်ဟာ ဒေါက်တာမာလာအောင်ရဲ့ “ဆောင်းပါး”ကို အချက်အလက်တိတိကျကျနဲ့ တုန့်ပြန်နိုင်ခြင်းမရှိပါ။
“တစ်ဖက် သတ်အမြင်၊ မှန်ကန်မှုမရှိသော အမြင်” တွေနဲ့တင်ပြထားတာလို့သာ စွပ်စွဲအပြစ်တင်သွားပါတယ်။ “နိုင်ငံတော်ပိုင် သတင်းစာများတွင်ပါရှိလာ သင့်သည့်ဥပဒေဆောင်းပါး အဆင့်အတန်းမဟုတ်ပါကြောင်း”လို့လည်း အကဲဖြတ်ခဲ့ပါတယ်။
ဒါဆိုရင် နိုင်ငံတော်ပိုင်သတင်းစာတွေကအဆင့်အတန်းမရှိတဲ့ဆောင်းပါးကိုထည့်သွင်းမိတာလား။ ဒါမှမဟုတ် အဆင့်အတန်း ရှိတယ်လုိ့ယူဆပြီး ထည့်သွင်းဖေါ်ပြတာလား။ သတင်းစာတွေမှာ ဒီလို ထည့်သွင်း ဖေါ်ပြတာက ပရောဂတစ်စုံတစ်ရာလား။ နိုင်ငံတော် ပိုင်တက္ကသိုလ်တစ်ခုမှာ ဒုတိယပါမောက္ခချုပ်အဖြစ်လက်ရှိ တာဝန်ထမ်းဆောင်နေသူတစ်ဦးရဲ့ ဆောင်းပါးကို အခုလိုအကဲဖြတ်လိုက်တာ ဟာ (လူပုဂ္ဂိုလ်၊ ပညာ၊ တက္ကသိုလ်) ပုတ်ခတ်စော်ကားရာမရောက်ဘူးလား။ အသရေဖျက်မှုမြောက်ပါသလား။
သတင်းစာတွေမှာ “ဆောင်းပါး” ဘာကြောင့် ထည့်သွင်းရသလဲကိစ္စနဲ့ ပတ်သက်ပြီး ရှင်းလင်းချက်အပြည့်အစုံကို လာမည့် တနင်္လာနေ့ (၁၀စက်တင်ဘာ) မှာ ဖြေကြားပေးမယ့်အကြောင်း ပြန်ကြားဒုတိယဝန်ကြီး ဦးရဲထွဋ်က လွှတ်တော်မှာ ပြောပါတယ်။
လွှတ်တော်ကို မမှု အံတု နေတဲ့ခုံရုံး
စစ်ဆေးရေးအဖွဲ့က ၂ ကြိမ်ခေါ်ယူပြီး ရုံးချိန်အပြည့် စောင့်ဆိုင်းခဲ့ပေမယ့် ခုံအဖွဲ့ဝင်တွေ လာရောက်စစ်ဆေးခံခဲ့ခြင်းမရှိပါဘူး။ ထို့အတူ တတိယအကြိမ်ခေါ်ယူစစ်ဆေးမှုကိုလည်း ခုံရုံးဥက္ကဋ္ဌ နဲ့ ခုံအဖွဲ့ဝင်တွေလာရောက်အစစ်ဆေးခံမည်မဟုတ်ဟုယူဆပါတယ်။
“ပြည်သူ့လွှတ်တော်စုံစမ်းစစ်ဆေးရေးအဖွဲ့” က စွပ်စွဲပြစ်တင်ခြင်းခံရတဲ့ ခုံရုံးဥက္ကဋ္ဌ နဲ့ အဖွဲ့ဝင်တွေကို စက်တင်ဘာလ ၃ ရက်နေ့တွင်တစ်ကြိမ်၊ စက်တင်ဘာလ ၄ ရက်နေ့တွင် တစ်ကြိမ်၊ စုစုပေါင်း ၂ ကြိမ် “နေရာနှင့် အချိန်အတိအကျ အကြောင်းကြား ဖိတ် ခေါ်ခဲ့ပြီး အချိန်ပြည့်ရုံးခန်းဖွင့်လှစ်ပြီး စောင့်ဆိုင်းခဲ့ပေမယ့် စွပ်စွဲခံရသူတစ်ဦးတစ်ယောက်မျှ ကိုယ်တိုင်သော်လည်းကောင်း၊ ကိုယ်စား လှယ်ဖြင့်သော်လည်း လာရောက်စစ်ဆေးခံခဲ့ခြင်းမရှိပါဘူး” လို့ စစ်ဆေးရေးအဖွဲ့၊ အဖွဲ့ဝင် ဦးဝင်းမြင့် ကပြောကြားခဲ့ပါတယ်။
စက်တင်ဘာလ ၅ ရက်နေ့ မှာလည်း ခုံအဖွဲ့ဝင်တွေ လာရောက်အစစ်ဆေးမခံခဲ့ဘူးဆိုရင်
“စုံစမ်းစစ်ဆေးမှုပြီး ဆုံးသည့် အနေဖြင့်သတ်မှတ်ရရန်သာရှိပါကြောင်း” နှင့် ခုံရုံးဥက္ကဋ္ဌနှင့်ခုံအဖွဲ့ဝင်များ၏ “ပြုမူမှုသည် ပြည်သူ့လွှတ်တော်ကိုလည်းကောင်း၊ ပြည်သူ့ လွှတ်တော်ကိုယ်စားလှယ်များ အားလုံးကိုလည်းကောင်း၊ ဖွဲ့စည်းပုံအခြေခံဥပဒေနှင့်အညီဆောင်ရွက်နေသော စုံစမ်းစစ်ဆေးရေး အဖွဲ့ ကို လည်းကောင်း မခန့်လေးစားပြုမူခြင်းဖြစ်သည်”
လို့ စုံစမ်းစစ်ဆေးရေးအဖွဲ့က သုံးသပ်ထားပါတယ်။
ပြည်သူ့လွှတ်တော်ကနေ “ပြည်သူ့လွှတ်တော်စုံစမ်းစစ်ဆေးရေးအဖွဲ့” ကို ၂၉ - ၈ - ၂၀၁၂ ရက်နေ့က လွှတ်တော်ညွန်ကြား ချက် အမှတ် (၁/၂၀၁၂) နဲ့ တာဝန်နဲ့လုပ်ပိုင်ခွင့်တွေသတ်မှတ်ပေးပြီးဖွဲ့စည်းပေးခဲ့ပါတယ်။
အဆိုပါ “စုံစမ်းစစ်ဆေးရေးအဖွဲ့” ဖွဲ့စည်းမှုနဲ့ပတ်သက်ပြီး ဖွဲ့စည်းပုံအခြေခံဥပဒေဆိုင်ရာ ခုံရုံး က ၂ ကြိမ်တိုင်တိုင် ကန့်ကွက် ခဲ့ပါတယ်။
- ပထမအကြိမ် ၁ -၉ -၂၀၁၂ ရက်နေ့စွဲဖြင့် “စုံစမ်းစစ်ဆေးရေးအဖွဲ့ဥက္ကဋ္ဌ နှင့်အဖွဲ့ဝင်များကို ကန့်ကွက်ခြင်း”
- ဒုတိယအကြိမ် ၃ - ၉ -၂၀၁၂ ရက်စွဲဖြင့် “စုံစမ်းစစ်ဆေးရေးအဖွဲ့ဥက္ကဋ္ဌ ဦးသိန်းဆွေနှင့် အဖွဲ့ဝင်များကိုကန့်ကွက်ခြင်း”
ခုံရုံးက ကန့်ကွက်စာကို ပြည်သူ့လွှတ်တော်ဥက္ကဋ္ဌ ထံလိပ်မူထားပြီး။ မိတ္တူကို နိုင်ငံတော်သမ္မတ၊ ပြည်ထောင်စု လွှတ်တော် နာယက၊ အမျိုးသားလွှတ်တော် ဥက္ကဋ္ဌ၊ တပ်မတော်ကာကွယ်ရေးဦးစီးချုပ်၊ ပြည်ထောင်စုရွေးကောက်ပွဲကော်မရှင် ဥက္ကဋ္ဌ၊ ပြည်သူ့ လွှတ်တော်စုံစမ်းစစ်ဆေးရေးအဖွဲ့ဥက္ကဋ္ဌတို့ ထံပေးပို့ခဲ့ပါတယ်။
တကယ်တော့ ဖွဲ့စည်းပုံအခြေခံဥပဒေ ခုံဥက္ကဋ္ဌအပါအဝင် ၉ ဦး ကို ဖွဲ့စည်းပုံအခြေခံဥပဒေ၊ ပုဒ်မ ၃၂၁ နဲ့အညီ ရွေးချယ်ခဲ့ကြ တာပါ။ သမ္မတဦးသိန်းစိန် က ဦးသိန်းစိုး၊ ဒေါက်တာတင်အောင်အေး၊ ဒေါ်ခင်လှမြင့် တို့ (၃) ဦးကို အဆိုပြု ရွေးချယ်ခဲ့ပါတယ်။ ထို့အတူ ပြည်သူ့ လွှတ်တော်ဥက္ကဋ္ဌ သူရဦးရွှေမန်းကလည်း ဦးထွန်းကြည်၊ ဦးစိုးသိန်း၊ ဦးခင်ထွန်း၊ တို့ (၃) ဦးကို အဆိုပြု ရွေးချယ်ခဲ့တာ ဖြစ်ပြီး၊ အမျိုးသားလွှတ်တော်ဥက္ကဋ္ဌ ဦးခင်အောင်မြင့် က ဦးဆန်းမြင့်၊ ဦးမြင့်ကြိုင်၊ ဒေါ်မိမိရီတို့ကို အဆိုပြုရွေးချယ်ခဲ့ကြတာပဲဖြစ်ပါ တယ်။
ဒါကြောင့် လွှတ်တော်မီးလောင်နေတဲ့ “ပြည်ထောင်စုအဆင့်အငြင်းပွားမှု” ပြဿနာအတွက် လတ်တလောမှတ်ချက်အဖြစ် သူတို့ပြောစကားတွေထဲက မူရင်းအတိုင်းကောက်နှုတ်ပြီး အနားသတ်ပေးလိုက်ပါတယ်။
သူတို့ စိတ်ကြိုက်ရေးဆွဲအတည်ပြုခဲ့တဲ့ ဖွဲ့စည်းပုံအခြေခံဥပဒေ(၂၀၀၈)အပေါ် သူတို့သဘောထားပုံနဲ့ပြုမူနေပုံတွေကို မှောက် ထားတဲ့ ခွက်ကိုလှန်ဘိသကဲ့သို့ ကွက်ကွက်ကွင်းကွင်းမြင်ကြရပါလိမ့်မယ်ခင်ဗျာ။
ပထမမှတ်ချက်
- ဥပဒေပြုရေးကဏ္ဍက တရားစီရင်ရေးလွှမ်းမိုးစွက်ဖက်ခြင်းဖြစ်ကြောင်းထင်ရှားပေါ်လွင်နေပါတယ်၊
- ဒါဟာ Rule of Law ကိုပျက်စီးစေခြင်းအကြောင်းရင်းတစ်ရပ်ဖြစ်ပါတယ်၊
- တရားစီရင်ရေးရဲ့ဆုံးဖြတ်ချက်ကို ဥပဒေပြုအမတ်များက အမှားအမှန် မဲခွဲဆုံးဖြတ်ချက်သည် ကမ္ဘာအစဉ်အလာမရှိခဲ့ပါ၊
- တရားရုံး၏စီရင်ခွင့်ကို ပြင်ပမှ မဲခွဲ၍ဆုံးဖြတ်ခြင်းသည် အခြေခံဥပဒေနှင့်တည်ဆဲဥပဒေများကို မျက်ကွယ်ပြုခြင်းဖြစ်ပါတယ်။
- ဖွဲ့စည်းပုံအခြေခံဥပဒေကို မလိုက်နာဘဲ အတိအလင်းချိုးဖောက်ခြင်းဖြစ်ကြောင်းပြောကြားလိုပါတယ်။
- Constitutional institution ကို ပျက်စီးအောင် ဖျက်ဆီးခြင်းလည်းဖြစ်ပါတယ်။
- ပြည်လုံးကျွတ်ဆန္ဒခံယူပွဲဖြင့် ပြည်သူလူထု (၉၂.၂၄ %) ၏ ထောက်ခံမှုဖြင့် အတည်ပြုထားသည့် ဖွဲ့စည်းပုံအခြေခံဥပဒေကို တန်ဖိုးမဲ့ အောင်ဆောင်ရွက်နေကြခြင်းဖြစ်ပါတယ်။
(၂၇ - ၈ -၂၀၁၂ ရက်နေ့ ပြည်ထောင်စုလွှတ်တော် ၁၁ ရက်မြောက်နေ့၊ နိုင်ငံတော် ဖွဲ့စည်းပုံ အခြေခံ ဥပဒေခုံရုံး ဥက္ကဋ္ဌ ဦးသိန်းစိုး ၏ ရှင်းလင်းတင်ပြချက်)
ဒုတိယမှတ်ချက်
- “ဖွဲ့စည်းပုံအခြေခံဥပဒေ၏အနှစ်သာရဖြစ်သော အပြန်အလှန် ထိန်းကြောင်းမှု ယန္တယားနှင့် ညီမျှစေသည့်ချိန်ခွင်လျှာကို ပျက်စီး စေသည်မှာ ခုံရုံးပင်ဖြစ်နေပါကြောင်း ”
(၅ -၉ ၂၀၁၂ ရက်နေ့၊ ပြည်သူ့လွှတ်တော်အစည်းအဝေး (၃၉) ရက်မြောက်နေ့ ဥပဒေရေးရာ နှင့်အထူးကိစ္စရပ်များလေ့လာဆန်းစစ်သုံးသပ်ရေးကော်မရှင်အဖွဲ့ဝင် ဦးဘရှိန် က ပြန်လည်ဖြေကြားချက်)
ညွန်း
- မြန်မာ့အလင်းသတင်းစာ၊ ၂၀၁၂ ခုနှစ်၊ စက်တင်ဘာ ၂ ရက်
- မြန်မာ့အလင်းသတင်းစာ၊ ၂၀၁၂ ခုနှစ်၊ စက်တင်ဘာ ၆ ရက်
- ဖွဲ့စည်းပုံအခြေခံဥပဒေ (၂၀၀၈)
Comments