ဟင်္သာတ EPC က ၀န်ထမ်းတွေရဲ့ မီးဖြတ်တဲ့ရာသီချိန်ရောက်ပြီ
ဟင်္သာတမီဒီယာ၊ ဖေဖော်ဝါရီ ၂၁။
ဧရာဝတီတိုင်းဒေသကြီး ဟင်္သာတမြို့တွင် အလှည့်ကျမီးပေးစနစ်ကို စတင်ကျင့်သုံးနေသည်မှာ သီတင်း နှစ်ပတ်ခန့် ရှိနေပြီဖြစ်သည်။ မြို့ပေါ်တွင် အုပ်စုများခွဲထားပြီး အုပ်စုတစ်စုစီကို ၃ နာရီခြားတစ်ခါ မီးဖြတ်တယ်လို့ သိရပါသည်။ ယခုလို ကျောင်းသားများ စာမေးပွဲဖြေချိန်နီးကပ်လာတဲ့ အချိန်မှာ ညပိုင်းမီးမလာတဲ့အခါ ကျောင်းသားများ စာကျက်ရန် အလွန်ပင် အခက်အခဲ ဖြစ်နေတယ်လို့ ကျောင်းသားမိဘများက ပြောပါသည်။
အလှည့်ကျမီးပေးစနစ်ကို ကျင့်သုံးနေသည်ဆိုသော်လည်း အမြဲတမ်းလိုလို မီးမပျက်သည့် အုပ်စုတစ်စု ရှိကြောင်း၊ ထိုအုပ်စုမှာ VIP လိုင်း ဆိုသည့် အုပ်စုဖြစ်ကြောင်း မြို့ခံများက ပြောသည်။
“ VIP လိုင်းဆိုတာကတော့ အရေးကြီးတဲ့ နေရာတွေပေါ့၊ ဥပမာ- ဆေးရုံတို့၊ ထောင်တို့၊ ရဲစခန်းတို့၊ ဆိုတာတွေ မီးမပျက်တာ လက်ခံတယ်ဗျာ၊ ပြောချင်တာက အစိုးရရုံးတွေ၊ ရုံးတွေမှာ မီးကိုထွန်းချင်သလိုထွန်းထားကြတာ၊ ညပိုင်းတွေဆိုလည်း ထိန်ထိန်ငြီးနေတာပဲ၊ အဲလို အလဟသတ်ထွန်းထားမယ့်အစား၊ ညပိုင်းမှာ လူနေရပ်ကွက်တွေကို ပိုပြီး မီးပေးစေချင်တာ၊ ကျောင်းသားတွေ ဖယောင်းတိုင်မီးနဲ့ စာကျက်ရတာ တော်တော်ဒုက္ခရောက်နေတယ်၊ ပိုပြီးဆိုးတာက တချို့ လျှပ်စစ်မီးအသုံးပြုရတဲ့ ကိုယ်ပိုင်စီးပွားရေးလုပ်ငန်းတွေ၊ တချို့အိမ်တွေကျတော့ EPC က လိုင်းမင်းတွေနဲ့ပေါင်းပြီး VIP လိုင်းကို ချိတ်ထားကြတာ၊ အဲတာတွေက ဟိုးအရင်ထဲက လုပ်စားလာကြတာ ကြာနေပြီ၊ တိုင်လိုက်လို့ စစ်ဆေးရေးလာမယ်ဆိုရင် လိုင်းမင်းတွေက ကြိုပြီးတော့ သူတို့ပိုက်ဆံယူပြီးချိတ်ပေးထားတဲ့ လိုင်းတွေကို VIP လိုင်းကနေ ရိုးရိုးလိုင်းကို ပြန်ပြောင်းပေးတာ၊ အဲဒီတော့ လာစစ်တဲ့အဖွဲ့လည်း ဒီတိုင်းပြန်သွားရတဲ့ အကြိမ်တွေ နည်းမှ မနည်းတာပဲ၊ ခုလည်း EPC က လိုင်းမင်းတွေက အရင် ချိတ်ခဲ့တဲ့လူတွေကိုပဲ VIP လိုင်းပြန်ချိတ်မလားလို့ လိုက်ညှိနေကြပြီ၊ ခုလို စာမေးပွဲချိန်တွေကိုတော့ မီးပေးဖို့ကောင်းပါတယ်ဗျာ ”
ဟု ကျောင်းသားမိဘတစ်ဦးက ပြောသည်။
ယခုလို မီးခဏခဏ ပျက်တဲ့အချိန်မျိုးဟာ EPC က လိုင်းမင်းတွေရဲ့ ရာသီချိန် ဖြစ်နေကြောင်း သိရပါသည်။
Comments