U Wirathu on Times

အကြမ်းဖက်ဗုဒ္ဓဘာသာ၏မျက်နှာခေါင်းစဉ်ဖြင့် တိုင်းမဂ္ဂဇင်းက အဖုံးထုတ်

နိုင်ငံတကာသာဂိ၊ ဇွန် ၂၁၊ ၂၀၁၃

မြန်မာပြည်တွင် ဗုဒ္ဓဘာသာဝင်မြန်မာများအရေးကို အလေးပေး တရားဟောသည့် ဆရာတော် ဦးဝီရသူ၏ မျက်နှာဖုံးဖော်ပြထားပြီး ခေါင်းစဉ်မှာ အကြမ်းဖက်ဗုဒ္ဓဘာသာ၏မျက်နှာဟု ပေးထားသည့် ဇူလိုင်လထုတ် တိုင်းမဂ္ဂဇင်းကြီး၏ အာရှနှင့် အရှေ့အလယ်ပိုင်း၊ ဥရောပထုတ်ပုံနှိပ်ခြင်းတွင် ဖော်ပြထားသည်။

စာရေးသူမှာ Hannah Beech ဖြစ်သည်။ ဆရာတော်၏ တရားများမှာ လူနည်းစု မူဆလင်ဘာသာဝင်တို့ကို ဝေဖန်ခြင်းဖြစ်ပြီး ကြားရသူတို့ကို သွေးဆူစေသည်ဟု သူမက သုံးသပ်ထားသည်။ အရှင်ဝီရသူသည် ဘာသာရေးသူရဲကောင်းဝါဒီ၊ လူနည်းစု မူဆလင်တို့အပေါ် တင်းမာသည့် သဘောထားရှိသူဟု ရေးထားသည်ကို တွေ့ရသည်။ ဦးဝီရသူက လူနည်းစုမူဆလင်ဘာသာဝင်တွေက မြန်မာပြည်ကို သိမ်းဖို့ ကြိုးစားနေတယ်။ သူတို့လူဦးရေပွားနှုန်းက အရမ်းမြန်တယ်။ မြန်မာအမျိုးသမီးတွေကို ခိုးနေတယ်၊ မုဒိန်းကျင့်နေတယ်ဟု သူမကို ပြောကြားသည်ဟု ဆိုသည်။

ထိုကဲ့သို့ အစွန်းရောက်ဗုဒ္ဓဘာသာဝင်တို့သည် အာရှတွင် ပျံနှံ့နေကြောင်း၊ သီရိလင်္ကာ၊ ထိုင်းနိုင်ငံတို့တွင် လူများစု ဗုဒ္ဓဘာသာဝင်များ၊ သံဃာများက လူနည်းစု ခရစ်ယာန်နှင့် မူဆလင်ဘာသာဝင်များကို ကန့်သတ်ကြောင်း၊ နှိမ်နင်းကြောင်း သူမ၏ အမြင်ကို ရေးထားသည်။

ထိုကဲ့သို့ အမှုအခင်းများဖြစ်ပွားခြင်း၊ သတင်းဓာတ်ပုံများ ပြန့်နှံ့ခြင်းဖြင့် မလေးရှားတွင် ဗုဒ္ဓဘာသာဝင်မြန်မာတို့ကို လက်တုံ့ပြန် တိုက်ခိုက်ခြင်း ခံရသည်ဟု မလေးရှားအာဏာပိုင်တို့က ပြောသည်ဟု သူမက ရေးသားထားသည်။

အဆိုပါရေးသားချက်များအပြင် စာရေးသူက ဘုန်းတော်ကြီးကို မြန်မာဘင်လာဒင်ဟု အမည်ပေးလိုက်သေးသည်။ ၀ီရသူက သမ္မတအိုဘားမားကို မူဆလင်သွေးနှောဟု ဆိုကြောင်း၊ အာရပ်ကမ္ဘာက ကုလသမဂ္ဂကို ပြန်ပေးဆွဲထားကြောင်း၊ မြန်မာမူဆလင်အများစုမှာ အစွန်းရောက် လူဆိုးများ ဖြစ်ကြောင်း ပြောဆိုသည်ဟု ဆိုသည်။ မူဆလင်လူမျိုးရေးအဓိကရုဏ်းမှုဖြင့် ဆရာတော် ထောင် ၇ နှစ် ကျခဲ့ကြောင်း သူမက ထောက်ပြထားသည်။ ၉၆၉ လှုပ်ရှားမှုဖြင့်လည်း ဘာသာခြားတို့ကို ဖယ်ကျဉ်ထားရန် ပြောသည်ဟု ရေးထားသည်။ မြန်မာများက ပြည်ပမူဆလင်ကမ္ဘာမှ ငွေကြေးအထောက်အပံ့များ မြန်မာမူဆလင်များထံ ၀င်ရောက်နေသည်ဟုလည်း အခြေအမြစ်မရှိပဲ စွပ်စွဲပြောဆိုခြင်း၊ လှုံဆော်ခြင်းများ လုပ်နေသည်ဟု သူမဆောင်းပါးတွင် ရေးထားသည်။

သူမက သုံးသပ်ရာတွင် ၂၀၁၁ ဒီမိုကရေစီပြောင်းလဲရေးဖြစ်စဉ် စတင်ကတည်းက စစ်တပိုင်းအစိုးရသည် အစွန်းရောက်လှုပ်ရှားမှုများကို မသိကျိုးကျင်ပြုထားကြောင်း၊ ၂၀၁၂ တွင် ဗုဒ္ဓဘာသာဝင်တို့က မူဆလင်ဘာသာဝင်တို့ကို တိုက်ခိုက်သဖြင့် လူ ၇၀ သေဆုံးကြောင်း၊ နောက်ပိုင်းတွင် ဘာသာရေးအကြမ်းဖက်မှုများကြောင့် မိထ္ထိလာတွင်လည်း မူဆလင်များ တိုက်ခိုက်ခံရကြောင်း ဆက်လက်ရေးသားထားသည်။

သူမက နိဂုံးတွင် ထိုင်းနိုင်ငံတောင်ပိုင်း ဘာသာရေးအကြမ်းဖက်မှုများကို ကောက်နုတ်ရေးသားထားသည်။ မူဆလင်အများစု နေထိုင်သော ထိုင်းတောင်ပိုင်းတွင် ဗုဒ္ဓဘာသာဝင်တို့ အတိုက်ခိုက်ခံရကြောင်း၊ ၂၀၀၄ နောက်ပိုင်း မူဆလင်များ၏ ခွဲထွက်ရေးလှုပ်ရှားမှုများ ပြင်းထန်လာသည့်အတွက် တိုက်ခိုက်မှုများ များပြားလာခဲ့ကြောင်း၊ ယခုအခါတွင် ဗုဒ္ဓဘာသာဝင်တို့မှာ လက်နက်အင်အား အသာစီးရနေပြီ ဖြစ်သဖြင့် မူဆလင်တို့မှာ အကာအကွယ်မဲ့ လူ့အခွင့်အရေးများ ချိုးဖောက်ခံနေရပြီ ဖြစ်ကြောင်း ရေးသားထားသည်။

အမေရိကန်ပြည်၏ ထင်ရှားသော တိုင်းမဂ္ဂဇင်းကြီးက မြန်မာပြည်၏ ဘာသာရေးအငြင်းပွားမှု၊ အရေးအခင်းများကို ထုတ်ဖော်ရေးသားရာတွင် ဗုဒ္ဓဘာသာ သံဃာတော်တပါးကို အကြမ်းဖက်သူ ဘင်လာဒင်အဖြစ် ကင်ပွန်းတပ်လိုက်ခြင်း၊ လူများစုတို့က လူနည်းစုတို့ကို တဖက်သတ် အကြမ်းဖက် အနိုင်ကျင့်နေသည်ဟု ကောက်ချက်ဆွဲ ရေးသားလိုက်ခြင်းမှာ နိုင်ငံတကာရှိ ဘာသာမတူသူ လူမှုအဖွဲ့အစည်းအားလုံးအတွက် တွေးစရာ၊ ပြောစရာ လှုပ်လှုပ်ရှားရှား ဖြစ်သွားစရာ ရှိသည်ဟု ဆိုနိုင်ပေသည်။

(ရည်ညွှန်း - http://www.time.com/time/covers/asia/0,16641,20130701,00.html )