ဟန်သစ်နိုင် - မသန်စွမ်းသူများရဲ့ ခြေလှမ်း
သြဂုတ် ၅၊ ၂၀၁၄
သြဂုတ် ၅၊ ၂၀၁၄
သြဂုတ် ၅ ရက်နေ့တွင် မြန်မာနိုင်ငံ မသန်စွမ်းသူများရှေ့ဆောင်အဖွဲ့၏ “မသန်စွမ်းသူများဆိုင်ရာ စီးပွားရေးပျိုးထောင်မှုစင်တာ ဖွင့်ပွဲနှင့် မသန်စွမ်းသူများ အကျုံးဝင်စီးပွားရေးလုပ်ငန်းများ စတင်ခြင်း မိတ်ဆက်အခမ်းအနားကို ရန်ကုန်တိုင်း မရမ်းကုန်းမြို့နယ် သာယာအေး ၃ရပ်ကွက်ရှိ မသန်စွမ်းသူများ ရှေ့ဆောင်အဖွဲ့ ရုံးချုပ်တွင် ပြုလုပ်သည်။
မြန်မာနိုင်ငံ မသန်စွမ်းသူများ ရှေ့ဆောင်အဖွဲ့မှ အစီအစဉ်ဒါရိုက်တာ ဦးနေလင်းစိုးမှ ပြောကြားရာတွင် မြန်မာနိုင်ငံဖွံ့ဖြိုးတိုးတက်ရေးအတွက် ဖော်ဆောင်ကြတဲ့အခါမှာ နိုင်ငံလူဦးရေ၏ ၁.၃ သန်းခန့်ရှိသော မသန်စွမ်းသူတွေရဲ့အရေးကိစ္စကိုဆောင်ရွက်တဲ့အခါများတွင် တော် တော်များများက ဆေးကုသပေးဖို့နှင့် ကျန်းမာရေးအရ ပြုစုစောင့်ရှောက်ပေးဖို့ပဲ အဓိကထားပြီးတော့ စဉ်းစားကြောင်း၊ မသန်စွမ်းသူများ အဓိကလိုအပ်သောအရာများမှာ အလုပ်အကိုင်နဲ့ ဝင်ငွေသာဖြစ်ကြောင်း၊ အလုပ်အကိုင်ရှိလျှင် ဂုဏ်သိကာရှိပြီး လူမှုအသိုင်းအဝိုင်း များကြားမှာ အများနှင့်တန်းတူဆောင်ရွက်နိုင်မည်ဖြစ်ကြောင်း၊ မသန်စွမ်းသူများကို စဉ်းစားဆောင်ရွက်လျှင် အလုပ်အကိုင်အခွင့်လမ်း တွေသာ ပဓာန လိုအပ်လျက်ရှိကြောင်း၊ စီးပွားရေးလုပ်ငန်းများတွင် မသန်စွမ်းသူများ တစ်စတစ်စ ပိုမိုတိုးမြှင့်ပြီး ပါဝင်ဆောင်ရွက်လာနိုင်ဖို့ မသန်စွမ်းသူများဆိုင်ရာ စီးပွားရေးပျိုးထောင်မှုစင်တာကို ဖွင့်လှစ်ပြီး မသန်စွမ်းသူများကိုယ်တိုင် လုပ်ငန်းလည်ပတ်တဲ့ စီးပွားရေးလုပ်ငန်း တွေကို စတင်ကြိုးစား လေ့ကျက်ခဲ့ခြင်းရှိကြောင်းများကို ပြောပြခဲ့သည်။
ဆက်လက်ပြီး “ကိုယ့်မှာပိုက်ဆံရှိရင် ပညာသင်နိုင်မယ်၊ လူမှုရေးအပေါင်းအသင်းနယ်ပယ်မှာ ဝင်ဆံ့မယ်၊ သူငယ်ချင်းတွေနဲ့ ဆိုရှယ်ပါတီပေး ခြင်းတွေ တိုးတက်လာမယ်၊ နိုင်ငံရေးလှုပ်ရှားမှုတွေ အများ ပြည်သူတွေနဲ့သက်ဆိုင်တဲ့နေရာတွေမှာ ကျနော်တို့လည်းတန်းတူပါဝင်လာနိုင်မှာဖြစ်ပါတယ်” ဟုပြောသည်။
ရန်ကုန်တိုင်းဒေသကြီး အစိုးရအဖွဲ့လူမှုရေးဝန်ကြီး ဒေါက်တာမြင့်သိန်း၊ လူမှုဝန်ထမ်းဦးစီးဌာန ညွှန်ကြားရေးမှူးချုပ် ဦးစိုးကြည်၊ နိပွန်ဖောင် ဒေရှင်း၏ အမှုဆောင်ညွှန်ကြားရေးမှူး မစတာ ရှုအိချိအိုနို၊ မြန်မာနိုင်ငံဆိုင်ရာဂျပန်သံအမတ်ကြီး မစတာ ထတဲရှိဟိဂုရှိ၊ မြန်မာနိုင်ငံ ဆိုင် ရာ အမေရိကန်သံအမတ်ကြီး မစတာဒဲရစ်မစ်ချဲလ် စသည်တို့က ဂုဏ်ပြုဝမ်းမြောက်စကားများ ပြောကြားပေးခဲ့ပြီး နိပွန်ဖောင်ဒေးရှင်းမှ မြန်မာနိုင်ငံမသန်စွမ်းသူများ ရှေ့ဆောင်အဖွဲ့သို့ ကား (၆) စီးလွှဲပြောင်းလှူဒါန်းခဲ့သည်။