ဟန်သစ်နိုင် - နော်လှလှစိုး ရန်ကုန်ခရိုင် စည်ပင်ရွေးကောက်ပွဲ ၀င်မည်
(မိုးမခ) နိုဝင်ဘာ ၂၂၊ ၂၀၁၄
ဒီဇင်ဘာ ၂၇ ရက်တွင် ကျင်းပမည့် မြို့တော်စည်ပင်သာယာရေး ရွေးကောက်ပွဲတွင် ရန်ကုန်မြောက်ပိုင်းခရိုင် စည်ပင်သာယာရေးကော်မတီရွေးကောက်ပွဲမှ ကိုယ်စားလှယ်လောင်းအဖြစ် ဝင်ရောက် ယှဉ်ပြိုင်မည်ဖြစ်ကြောင်း နော်လှလှစိုး (ခ) စူဇန်နာက နိုဝင်ဘာ ၂၁ရက် ရန်ကုန်မြို့ ၃၆လမ်း MJN ခမ်းမတွင် ရှင်းလင်းပွဲပြုလုပ်ခဲ့သည်။
မြို့တော်စီမံကိန်းများလုပ်ဆောင်ရာတွင် စစ်တမ်းသည်အရေးကြီးသည့်အတွက် လူဦးရေအနည်းအများအပေါ်မူတည်ပြီး စိမ်းလန်းစိုပြည်ရေးနှင့် ပန်းခြံများအရေအတွက်ကို လုပ်ဆောင်ရပြီး ကျွမ်းကျင်ပညာရှင်များနှင့် လက်တွဲရမည်ဖြစ်ကြောင်း၊ ကမ္ဘာနိုင်ငံများတွင် လူဦးရေနှင့် ကားစီးရေ သည် မြန်မာနိုင်ငံထက် ပိုများပြားသော်လည်း ကြပ်တည်းခြင်းမရှိသည့်ပုံစံမျိုး ကို ပြင်ဆင်ရမည်ဖြစ်ကြောင်း၊ ဒီဇင်ဘာ ၂၇ရက်နေ့တွင်မြို့တော်စည်ပင်သာယာရေးကော်မတီမှ ကျင်းပမည့်ရွေးကောက်ပွဲကို မြို့နယ်အဆင့်၊ ခရိုင်အဆင့်၊ မြို့တော်အဆင့်များတွင် မဲပုံးများထောင်သောအခါ မပျက်မကွက် တစ်အိမ်တစ်ယောက် မဲထည့်ကြစေချင်ကြောင်း၊ အမှိုက်များသည် ကျန်းမာရေးအတွက် အလွန်အရေးကြီးပြီး နေ့တဓူဝသွားရေးလာရေး ဒုက္ခများအတွက် ပြည်သူလူထုသည် လုပ်ဆောင်ပေးနိုင်သော ကိုယ်စားလှယ်လောင်းကို ရွေးချယ်မဲထည့်သင့်ကြောင်း အရွေးချယ်ခံမည့် ဒေါ်နော်လှလှစိုးမှပြောသည်။
ဆက်လက်ပြီး “(ဒို့မြို့ကို ဒို့ပိုင်သည်) ဒို့မြို့တော် - ဒို့မှာတာဝန်ရှိတယ် - ဒို့အားလုံး လုပ်ဆောင်ရမယ်ဆိုတဲ့ အနေအထားလေးဖြစ်တဲ့အတွက် ဒီဆောင်ပုဒ်လေးနဲ့ ကျမက မဲဆွယ်စည်းရုံးသွားမှာ ဖြစ်ပါတယ်” ဟု ဒေါ်နော်လှလှစိုးကပြောသည်။
ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ ဦးကိုကိုိကြီးကပြောရာတွင် -
“နိုင်ငံတော်အဆင့်ပြောင်းလဲရန်ကြိုးပမ်းသူများ အရေးကြီးသလို မြို့တွေဖွံ့ဖြိုးတိုးတတ်အောင်လုပ်ခြင်းသည်လည်း နိုင်ငံတော်ထူထောင်မှု အပြောင်းအလဲကို ကြီးကြီးမားမား အကျိုးသတ်ရောက်နိုင်မည်ဖြစ်ကြောင်း၊ ကိုယ်တိုင်အစိုးရ လုပ်မည့်သူများကို အားပေးမယ်ဆိုသည့် ရည်ရွယ်ချက်နှင့် ဒေါ်နော်လှလှစိုးကို မြို့တော်စည်ပင်သာယာရေးကော်မတီ ရွေးကောက်ပွဲဝင်ရန် အားပေးတိုက်တွန်း ထောက်ခံခဲ့ကြောင်း၊ အမျိုးသမီးများသည် စွမ်းရည်သတ္တိရှိပြီး အိမ်ထောင်မှုအပိုင်းတွင် စီမံခန့်ခွဲနိုင်သောကြောင့် မြို့တော်စီမံခန့်ခွဲရေးတွင်လည်း လုပ်ဆောင်နိုင်မည်ဖြစ်ကြောင်း၊ မြန်မာနိုင်ငံရဲ့အကူးအပြောင်းတွင် ပထမဆုံးဖြစ်လာသော YCDC ရွေးကောက်ပွဲသည် ကိုယ့်မြို့ကိုယ်ပိုင်ဆိုင်အောင် မှန်ကန်သောလုပ်ဆောင်မှုပေးနိုင်သောသူကို ရွေးချယ်သင့်ကြောင်း ပြောသည်။
ဆက်လက်ပြီး “တိုင်းရင်းသားစည်းလုံးညီညွှတ်ရေးလို့ ဆိုင်းဘုတ်များထောင်နေမည့်အစား တိုင်းရင်းသူ တိုင်းရင်းသားတစ်ယောက်ဟာ နိုင်ငံရဲ့ဘယ်အစိတ်ပိုင်းမှာပဲနေနေ ကျနော်တို့မှာ ဘာ ခွဲခြားဆက်ဆံမှု ကန့်သတ်မှုမှမရှိပဲ နိုင်ငံသားတစ်ယောက်ရဲ့အခွင့်အရေးကို ရန်ကုန်လိုနေရာမျိုးမှာ တိုင်းရင်းသူတစ်ယောက်ဟာ တတ်တတ်ကြွကြွနဲ့ ခံစားခွင့်ရှိတယ်၊ ယှဉ်ပြိုင်ခွင့်ရှိတယ်”ဟု ပြောသည်။
ဒေါ်နော်လှလှစိုးကို ၁၉၆၅ခုနှစ်၊ သြဂုတ် (၁၈)ရက်နေ့တွင် မွေးဖွားခဲ့ပြီး ရန်ကုန်ဝိဇ္ဇာ-သိပံ္ပ တက္ကသိုလ်မှ ၁၉၉၂ ခုနှစ်တွင် မဟာသိပံ္ပ ဘွဲ့ရရှိခဲ့သည်။ အမေရိကန်နိုင်ငံ၊ ပင်စီဗင်းနီးယား အရှေ့ပိုင်းတက္ကသိုလ်တွင် အဆင့်မြင့်ပညာကို ဆက်လက်ဆည်းပူးခဲ့ပြီး စီပွားရေးစီမံခန့်ခွဲမှုပညာဖြင့် မဟာဝိဇ္ဇာဘွဲ့ရရှိခဲ့သည်။ အမေရိကန်နိင်ငံ၊ နိုင်ငံခြားရေးဝန်ကြီးဟောင်း ဟီလာရီကလင်တန် ကိုယ်တိုင်ချီးမြှင့်သော လူမှုထူးချွန်ဆုကိုလည်း ရရှိခဲ့သည်။ ကရင်အမျိုးသမီး ဖွံ့ဖြိုးတိုးတက်ရေးအဖွဲ့တွင် စီစဉ်ညွှန်ကြားရေးမှူး၊ အမျိုးသမီးငြိမ်းချမ်းရေးရှေ့ဆောင်ကွန်ရက်တွင် ဥက္ကဌ၊ မြန်မာနိုင်ငံအမျိုးသမီးအဖွဲ့များကွန်ရက်တွင် သဘာပတိ (၂၀၁၂-၂၀၁၃)၊ ကန်ပေါက် လူမှုစီးပွားရေးအဖွဲ့တွင် စီမံကိန်းမန်နေဂျာ(၂၀၀၇-၂၀၀၉)၊ World Vision Myanmar (၁၉၉၅-၂၀၀၆) တို့တွင်လည်း လုပ်ကိုင်ခဲ့ဖူးသည်။