မောင်ရစ် - အများစုလူပြိန်းပရိသတ်ကြီးအတွက် ဖြေဆေး ဘယ်မှာ
(မိုးမခ အယ်ဒီတာ့လက်ရေး) စက်တင်ဘာ ၁၊ ၂၀၁၆
နိုင်ငံတကာအရေးကိစ္စများတွင် ရှေ့တန်းတင်ရမည်တို့မှာ ဆင်းရဲမွဲတေမှုပပျောက်ရေး ဟု ဆိုကြပါသည်။ ၎င်းနောက် ပညာဗဟုသုတ ရရှိနိုင်ရေးကိုလည်း ရှေ့သို့ ပို့ကြ၏။ ထိုအခါ လွတ်လပ်မှု၊ တရားမျှတမှု ရှိရေး၊ အာမခံချက်ရှိရေးတို့ကိုလည်း ပညာရှိများက ထောက်ပြကြ၏။ မြန်မာနိုင်ငံတွင်လည်း ဆင်းရဲမွဲတေမှု ပပျောက်ရေး၊ ပညာဗဟုသုတများ ရရှိနိုင်ရေးနှင့်အတူ လွတ်လပ်တရားမျှတမှုတို့သည် အရေးပါသည့် ရှေ့တန်းကိစ္စများ ဖြစ်နေဆဲ ဖြစ်နေပါသည်။
နိုင်ငံတကာသို့ ပြန်လည် ကြည့်ရှုသောအခါ အစွန်းရောက် ၀ါဒီများ၊ အကြမ်းဖက်သမားများနှင့် မူးယစ်ဆေးဝါး ရာဇ၀တ်ဂိုဏ်းများ၏ ပြသနာများကို ရင်ဆိုင်နေကြရသည်။ ၎င်းတို့ကြောင့် နိုင်ငံနှင့်ချီပြီး အတိဒုက္ခရောက်ကြရသည်။ လူတစု လူတဖွဲ့မှသည် နိုင်ငံများ ပြိုပျက်ခြင်း၊ နယ်နမိတ်စည်းရိုးများ ပျက်စီးခြင်းတို့အထိ ကြုံတွေ့နေရပါသည်။ အဆိုပါနိုင်ငံများသည် ပထ၀ီဒေသတခုတည်းထဲမှာ မဟုတ်မူဘဲ တောင်အမေရိကမှသည် အရှေ့အလယ်ပိုင်း ၎င်းနောက် အာရှတနံတလျားအထိ ချဲ့ထွင်လျက် ရှိနေပါသည်။ မြန်မာနိုင်ငံတွင်လည်း အစွန်းရောက်သူများ၊ အကြမ်းဖက်သမားများနှင့် မူးယစ်ဆေးဝါး ရာဇ၀တ်ဂိုဏ်းများ ကျင်လည် ကျက်စားနေကြပြီး ဖြစ်ပါသည်။
ကမ္ဘာကြီး၏ ဥစ္စာ ဓန သြဇာ လက်နက် အာဏာတို့ကို တရားဝင် ပိုင်စိုးကြကုန်သော ချမ်းသာ ကြွယ်ဝ လက်စွမ်းထက်ကြသည့် အစိုးရမင်းများ၊ အရင်းရှင်ကြီးများ၊ စီးပွားရေးကော်ပိုရေးရှင်းများ၏ ရပ်တည်ချက်နှင့် လားရာကကော ဘယ်ဆီ ဘယ်ဝယ် ဖြစ်နေသလဲ။ အရင်းများ စုဆောင်းသည်ထက် စုဆောင်းနိုင်ရေး၊ ဈေးကွက်များ ချဲ့ထွင် နယ်ချဲ့နိုင်ရေး၊ ကိုယ့်အယူအဆ သဘောထားများကို အများပြည်သူထံသို့ လွှမ်းမိုး သက်ရောက် ချယ်လှယ်နိုင်ရေးတို့ကိုသာ အာရုံဝင်စား လှုပ်ရှားလျက် ရှိသည်ဟု ဆိုနိုင်ပါသည်။ ထို့အတူ မြန်မာပြည်တွင်းမှာလည်း အာဏာရှင်များ လက်နက်ရှင်များ အရင်းရှင်ကြီးများသည် မိမိတို့ အကျိုးစီးပွားကို ကာကွယ် စောင့်ရှောက်ရေးနှင့် တိုးချဲ့ရေးကိုသာ ဆောင်ရွက်နေကြဆဲ ဖြစ်သည်ဟု ဆိုချင်သည်။
သာဓကတခုအနေဖြင့် သဘာဝ ၀န်းကျင်ထိန်းသိမ်းရေး၊ ဥတုရာသီ ပြောင်းလဲမှုကို ပြင်ဆင်နိုင်ရေးတို့အတွက် နိုင်ငံတကာအသိုင်းအ၀ိုင်းက လှုံဆော် တောင်းဆိုကြသောအခါ၊ စစ်ဘေးဒဏ်နှင့် မင်းဘေးသင့် ပြည်သူတို့ ဒုက္ခသည်များအဖြစ် လက်လွတ်ထွက်ပြေးနေကြရသည်ကို ကူညီဖို့ စောင့်ရှောက်ဖို့ အများသူငှာတို့က အသနားခံ တောင်းဆိုကြသောအခါ၊ ရောဂါဘယများသည် နယ်နမိတ်များကို ဖြတ်ကျော်ပြီး ကူးစက် ပျံနှံ့နေသည့်အတွက် ကာကွယ်ကုစားနိုင်ရေး ပညာရှင်များ သုတေသီများက ၀ိုင်းဝန်းကြရန် ကူညီကြရန် သတိပေး တောင်းဆိုကြသောအခါ ဥစ္စာ ဓန သြဇာ လက်နက် အာဏာတို့ ကိုင်စိုး ပိုင်ဆိုင်ကြကုန်သည့် လူ့အထက်တန်းလွှာတို့ဆီက တက်ကြွ လေးနက်သော တုန့်ပြန် အရေးယူမှုတို့ကို ခုချိန်ထိ အားပါးတရ မတွေ့ကြရသေးဟု ဆိုချင်ပါသည်။
ထိုအခါ ဆင်းရဲမွဲတေသော ၊ ပညာဗဟုသုတနည်းပါးသော၊ လွတ်လပ်မှုနှင့် ဥပဒေစိုးမိုးမှု ယိုယွင်းနေသော ကမ္ဘာပေါ်က အများစု လူပြိန်း ပရိသတ်ကြီးမှာ ဘာတွေနှင့် ဖြေဆေးတွေ့နေကြလိမ့်မည်ဟု ဆိုချင်ပါသနည်း။ အခြားမကြည့်ပါနှင့်၊ အမေရိကန်ပြည်ထောင်စုက မကြာမီလာတော့မည့် သမ္မတရွေးကောက်ပွဲနှင့် သူ၏ မဲဆန္ဒရှင်များကို ကြည့်ပါ။ အမေရိကန်က ပြည်သူတွေလည်း ဆင်းရဲတာပါပဲ။ အတန်းပညာ မတတ်သူတွေလည်း ရှိတာပါပဲ။ တရားဥပဒေ၏ စိုးမိုးမှု မျှတမှု အရိပ်အာဝါသပျေက်နေသည့် အရပ်ဒေသများလည်း ရှိနေတာပါပဲ။ သို့အတွက်ကြောင့် နိုင်ငံရေးမဲဆွယ်ပွဲများတွင် မိမိနှင့် မတူ ကိုယ့်ရန်သူ၊ အကြမ်းဖက် ဖြေရှင်းရေး၊ တပါးသူတို့၏ အခွင့်အရေးများကို ပိတ်ဆို့ တားဆီး ချေမှုန်းရေးတို့ ၀ါဒဖြန့် တရား တွင်တွင်ဟောသည်များ ခေတ်စား ကျယ်ပြန့်လျက် ရှိသည်ကို တွေ့နေရပါသည်။
အဆိုပါ အစွန်းရောက်သည့် ဟောပြောမှုများသည် အကြမ်းဖက်မှုကို သွေးဆောင် ခေါ်သွင်းလာပါသည်။ ကွေ့ကောက်သော စိတ်နှလုံးတွင် အရက်သေစာများ၊ မူးယစ်ဆေးဝါး အမိုက်များ ဖုံးလွှမ်းသောအခါ ထိုလူထုပရိသတ်သည် ထိန်းမနိုင် သိမ်းမရ သွေးဆူပြီး အုံကြွနေကြပါတော့သည်။ အဆိုပါ လူတန်းစားနှင့် မိုးနဲ့ မြေလို ကွာခြားသည့် အထက်တန်းလွှာ အုပ်စိုးသူများ၊ နိုင်ငံရေးသမားများ၊ အရင်းရှင်ကြီးများကတော့ အခုကဲ့သို့ အုံကြွနေသည့် လူအုပ်စုများကို သူတို့လိုရာ မှိုင်းတိုက် မီးထိုးပြီး ရွေးကောက်ပွဲများကတဆင့် ကြိုးဆွဲနိုင်ကြလိမ့်မည်ဟု အထင်ရောက်လျက် ရှိသည်ဟု ဆိုနိုင်ပါသည်။
မြန်မာပြည်မှာဆိုရင်ကော ဘယ်လိုဖြစ်နေမယ် ထင်ပါသလဲ။ ဆင်းရဲ မွဲတေပြီး ပညာဗဟုသုတ အားနည်းသည့် လူထုအများစုမှာ လွတ်လပ်မျှတသော ဥပဒေ၏ အစောင့်အရှောက်ကို ရနိုင်ဖို့ မလွယ်ကူပါ။ သူတို့၏ စားဝတ်နေရေး ဒုက္ခဖိဆီးနေမှုများအောက်မှ ထွက်ပေါက်မှာလည်း အကန့်အသတ် ဖြစ်နေဆဲ ဖြစ်ပါသည်။ မိသားစုအတွင်း မိမိရပ်ရွာအတွင်း ဥပဒေမဲ့ တရားလက်လွတ် အကြမ်းဖက်ပြီး အဖြေရှာမှုများ ရာဇ၀တ်မှုများကို မြင်တွေ့နေကြရပါသည်။ မူးယစ်ဆေးဝါး၏ သားကောင်အဖြစ် မျိုးဆက်သစ်လူငယ်တို့ သက်ဆင်းနေကြရပါသည်။ မြို့ပြ ရပ်ရွာများမှသည် နယ်စွန် နယ်ဖြားအထိ စားဝတ်နေရေးအတွက် ရုန်းကန် ရှာဖွေ စားသောက်နေကြရသော မြန်မာနိုင်ငံသား တိုင်းရင်းသားအားလုံးမှာ ငြိမ်းချမ်းရေး၏ အရသာကို မြီးစမ်းကြပြီးပြီလားဟု မေးရက်စရာ မရှိသေးပါ။
သိသာထင်ရှားသော သာဓကများမှာ အဘယ်နည်း။ မြန်မာပြည်တွင် လူဦးရေ သန်း ၅၀ ကျော် ရှိပါသည်။ ၂၀၁၆ စာရင်းအရ လူ ၁၁ သန်းမှာ မိုဘိုင်းဖုန်း သို့မဟုတ် အင်တာနက်သို့မဟုတ် ဖေ့စ်ဘွတ် ကိုယ်စီ ရှိကြသည်။ တိုင်းပြည်၏ ၂၀% ဟု ဆိုသည်။ အစွန်းရောက် ဘာသာရေးအယူအဆများ၊ အကြမ်းဖက်မှု အားပေးသော အမုန်းစကားများ အလွယ်တကူ ပြန့်ပွားလျက်ရှိသည်။ လူတဦးနှင့်တဦး အချင်းချင်းသာမက အဖွဲ့အစည်းများ၊ အစိုးရများ၊ ခေါင်းဆောင်များနှင့် ပတ်သက်လျင်လည်း ဂုဏ်သိက္ခာ နှင့် စည်းမစောင့်သည့် ပုတ်ခတ်ဝေဖန်မှုများကို ဖော်ဖော်သီသီ ဖြန့်ချိလျက်ရှိသည်ဟု ဆိုနိုင်သည်။ မှားယွင်းသော သတင်းများ၊ အချက်အလက်များကိုလည်း အလျင်အမြန် ကောက်ယူ ဖြန့်ချိကြသည်။ အစိုးရမင်းများ အရင်းရှင်ကြီးများ နိုင်ငံရေး ဘာသာရေး လူမှုရေး သြဇာရှင်အဖွဲ့အစည်းကြီးများကလည်း ဒါကို ကျယ်ကျယ်ပြန့်ပြန့် ထောက်ပြပြီး ပြုပြင်ရန် ပျက်ကွက်နေဆဲဟု ဆိုချင်သည်။ သူတို့တွေကကော မသိနားမလည်သည့် ဆင်းရဲသော ပညာဗဟုသုတ ချို့ယွင်းသော ဥပဒေအစောင့်အရှောက်မဲ့နေသော ကျောမွဲပြည်သူလူထုကို အမြတ်ထုတ် လိုရာဆွဲ ပုံသွင်းစရာ သတ္တ၀ါများအဖြစ်သာ သားကောင်များအဖြစ်သာ သဘောထားနေကြသလားဟု မေးခွန်း ထုတ်ချင်စရာ ဖြစ်နေပါသည်။
သဘာ၀၀န်းကျင် ထိန်းသိမ်းရေး၊ ဥတုရာသီ ပြောင်းလဲမှု ပြင်ဆင်နိုင်ရေး မပြောပါနဲ့ဦး၊ လက်ရှိမှာ အယင်စစ်အစိုးရများ လက်ချက်ဖြစ်သည့် ပွင့်လင်းမြင်သာမှုကင်းမဲ့သော စီးပွားရေးများ၊ စီမံကိန်းများ၊ ဇုံများ၊ ပိုင်ဆိုင်မှုများအကြောင်း ခုထိ ပြည်သူတို့ ရေရေရာရာ မသိရှိကြသေးပါ။ စစ်ဘေးနှင့် မင်းဘေးသင့် ပြည်သူများမှာ တရားမ၀င် ဒုက္ခသည်များ ကျုးကျော်များအဖြစ် ဆက်လက် နေထိုင်နေရဆဲ ဖြစ်ပါသည်။ ပြည်တွင်း ဒုက္ခသည်တွေ ရှိနေသ၍ ပြည်ပက ဒုက္ခသည်တွေမှာလည်း အံ့ကြိတ် ခေါင်းငုံ့နေကြရသည်ဟု ပြောချင်ပါသည်။ ရောဂါဘယများ သဘာဝဘေးအန္တရာယ်များကို ခံစားနေကြရသည့် မြန်မာပြည်သူတွေအဖို့ အားကိုးရာ မဲ့နေကြရဆဲ ဖြစ်သည်ဟု ဆိုရမည်။ လက်ရှိ ပစ္စည်း ဥစ္စာ အာဏာ လက်နက် သြဇာ ပိုင်စိုး ပိုင်ဆိုင်ကြကုန်သော လူ့အထက်တန်းလွှာတို့ ခေါင်းဆောင်ကြီးတို့က ဆင်းရဲခြင်း ပညာမဲ့ခြင်း ဥပဒေအရိပ်အာဝါသပျောက်ဆုံးခြင်းကို အရေးပေါ်အခြေအနေအဖြစ် အသိအမှတ် ပြုပြီး ရှေ့တန်းအရေးကိစ္စအဖြစ် မဖြေရှင်းသေးလျင် မြန်မာပြည်က အများစု လူပြိန်းပရိသတ်ကြီးမှာ ဆေးမြီးတိုများနဲ့ ဖြေဆေးရှာနေဆဲ ဖြစ်ရဦမည်ဟုသာ ဆိုလိုက်ချင်ပါတော့သည်။