မောင်မောင်စိုး ● လက်ဖက်တောင်တန်းပေါ်မှ ငြိမ်းချမ်းရေးတေးသံ


မောင်မောင်စိုး ● လက်ဖက်တောင်တန်းပေါ်မှ ငြိမ်းချမ်းရေးတေးသံ
(မိုးမခ) နိုဝင်ဘာ ၁၅၊ ၂၀၁၆

ကျောက်မဲ နမ့်ဆမ် နမ္မတူ မန်တုန် နမ့်ခမ်း မူစယ် ကွတ်ခိုင်မြို့ များပတ်ဝန်းကျင်ရှိ မြင့်မားသော တောင်တန်းများတွင် တ အန်း ပလောင်ရွာကြီးရွာငယ်များစွာရှိသည်။ ထိုတအန်းပလောင်ကျေးရွာများ၏ စီးပွားရေးအသက်သွေးကြောတခုဖြစ်သည့် စိမ်းစိုလှပသည့် လက်ဖက်ခင်းများသည် အဆိုပါတအန်း ပလောင်ဒေသ တောင်ကြောများတွင် တမျှော်တခေါ် တွေ့မြင် နိုင်ပါသည်။

လက်ဖက်ခူးချိန်တွင် လက်ဘက်ခင်းထဲရောက်နေသည့် တအန်းပျိုဖြူများကို ခပ်လှမ်းလှမ်းကပင် တွေ့မြင်နိုင်သည်။ ထိုသို့ တွေ့မြင်ရပါက တအန်းပလောင်ကာလသားတို့၏ သစ်ရွက်ပုလွေမှုတ်သံ ထွက်ပေါ်လာတတ်သည်။ အပြန်အလှန်ဆိုသလို တအန်းပျိုဖြူများထံ သစ်ရွက်ပုလွေမှုတ်သံ ပြန်လည်ထွက်ပေါ်လာတတ်သည်။ သို့နှင့် လက်ဖက်တောင်တန်းအနှံ့တွင် သစ်ရွက် ပုလွေသံသာသာတို့ ပျံ့လွင့်နေတတ်သည်။ ဆည်းဆာညနေနေရီရီတွင် စိမ်းစိုသော လက်ဖက်ခင်းများပေါ်တွင် ဖျာကျနေသော နေချည်ထွေးထွေး အေးမြမြလေပြေနှင့်အတူ ပျံ့လွင့်နေသော သစ်ရွက်ပုလွေတေးသံတို့ဖြင့် တအန်း ပလောင်တို့၏ လက်ဖက်တောင်တန်းသည် လှပ၍နေသည်။ အေးချမ်း၍နေတတ်ပါသည်။

● တအန်း ပလောင်တိုင်းရင်းသားလက်နက်ကိုင်တပ်ဖွဲ့
သို့သော်လည်း ထိုလက်ဖက်တောင်တန်းများပေါ်တွင် လက်နက်ကိုင်တိုက်ခိုက် ပုန်ကန်မှုများဖြစ်ပွားနေသည်မှာ နှစ်ပေါင်း ၅၀ ကျော်ခဲ့ပေပြီ။ အဖွဲ့အစည်းပုံစံနှင့် တိုက်ပွဲဖြစ်ပွားပုံ အတိုးအလျော့ရှိသည့်ကာလများစွာ ဖြတ်ကျော်ခဲ့ရသော်လည်း ယနေ့တိုင်တော့ သေနတ်သံမစဲနိုင်သေးဟု ဆိုရပါမည်။ လက်ရှိ လက်ဖက်တောင်တန်းပေါ်တွင် လှုပ်ရှားနေသည့် တအန်းပလောင်တိုင်းရင်းသားလက်နက်ကိုင်တပ်ဖွဲ့မှာ PSLF/TNLA ဖြစ်သည်။

ယနေ့ကာလထိ ရှည်ကြာသောပြည်တွင်းစစ်ပွဲ၏ ဒဏ်ရာဒဏ်ချက်များ တိုင်းရင်းသားဒေသများရှိ နိမ့်ကျသောဖွံ့ဖြိုးတက်မှု တောင်တန်းဒေသများရှိ တိုင်းရင်းသားလူမျိုးများ၏ အမျိုးသားစိတ်မြင့်တက်မှုများကြောင့် ယခုနှစ်များအတွင်း TNLA တ အန်းပလောင်တိုင်းရင်းသားလက်နက်ကိုင်တပ်ဖွဲ့၏အင်အားသည် တစတစ တိုးပွားလာသည်ကို တွေ့ရသည်။ ထို့အတူ တပ်မတော်၏ စစ်ဆင်ရေးနယ်မြေစိုးမိုးရေး လှုပ်ရှားများသည်လည်း တိုးမြှင့်လာရာ လက်ဖက်တောင်တန်းပေါ်တွင် တိုက်ပွဲ များ ပို၍ဖြစ်ပွားလာပေတော့သည်။

လက်ရှိ ၂၁ ရာစုပင်လုံနှင့် တနိုင်ငံလုံးအပစ်ခတ်ရပ်စဲရေးတွင် လက်ဖက်တောင်တန်းများ မပါဝင်နိုင်သေးပေ။ ၂၀၁၅ ခုနှစ် NCA လက်မှတ်ရေးထိုးရာ TNLA သည် ချန်ထားခံရသည့်အဖွဲ့များတွင်ပါသည်။ ၂၀၁၅ နှစ်ကုန်ပိုင်းတွင် ဖေါ်ပြသော တပ်မ တော်၏သဘောထားဖေါ်ပြချက်အရ NCA ထိုးရန် လက်မခံဘဲ လက်နက်စွန့်ရမည်ဟု ကြေညာခဲ့သောအဖွဲ့များထဲတွင်TNLA ပါဝင်သည်။ ၂၀၁၆ ခုနှစ်အစောပိုင်းတွင် TNLA အနေနှင့် လက်နက်စွန့်ရမည်ဟု တပ်မတော်က ထုတ်ပြန်ထားသော်လည်း ပထမအကြိမ် ၂၁ ရာစုပင်လုံညီလာခံကျင်းပခါနီး ညှိနှိုင်းချက်များအရ TNA အနေနှင့် လက်နက်ကိုင်လမ်းစဉ် စွန့်လွှတ် ကြောင်း ကြေညာပါက ညီလာခံတက်ရန်ဖိတ်ကြားမည်ဟု တပ်မတော်တာဝန်ရှိသူများက ဆိုခဲ့သည်။

သို့သော် အဆိုပါညှိနှိုင်းမှု ပြေလည်မှုမရခဲ့ပေ။ သို့ရာတွင် ထိုစဉ်ကတစုံတရာ ညှိနှိုင်းမှု ရရှိပါကလည်း ဆက်လက်ပြေလည် စွာ ညှိနှိုင်းနိုင်ရေးအတွက် ခက်ခဲနိုင်ပေသေးသည်။ အဘယ်ကြောင့်ဆိုသော် ၂၁ ရာစုပင်လုံညီလာခံသို့ တက်ရောက်ခွင့်ပြု မည်ဆိုသော်လည်း အခြားတိုင်းရင်းသားလက်နက်ကိုင်အဖွဲ့များနည်းတူ ပြည်နယ်အဆင့်/ ပြည်ထောင်စုအဆင့် အပစ်ရပ် လက်မှတ်ထိုးခြင်းအပါ NCA လက်မှတ်ထိုးရေးအထိ လုပ်ငန်းစဉ်များကို မတွေ့ရှိရ၍ဖြစ်သည်။ သို့ဖြစ်ရာ တနိုင်ငံလုံး အပစ်ရပ်ရေးတွင် ပြည်နယ်အတော်များများရှိဒေသများနည်းတူ လက်ဖက်တောင်တန်းလည်း မပါဝင်နိုင်သေးပေ။

● ခပ်စိပ်စိပ်ဖြစ်လာသော တိုက်ပွဲများ
ယခုအခါ ပွင့်လင်းရာသီရောက်လာပြီဖြစ်သည့်အားလျော်စွာ စစ်ရေးလှုပ်ရှားမှုအစပြုလာပေရာ လက်ဖက်တောင်တန်းတွင် လည်း တိုက်ပွဲများခပ်စိပ်စိပ်ဖြစ်လာသည်ကို တွေ့ရပေသည်။ ၂၂၊ ၁၀၊ ၂၀၁၆ နေ့က ကျောက်မဲမြို့နယ် ပါလိုင်ကျေးရွာအနီး တွင်လည်းကောင်း၊ ၂၉၊ ၁၀၊ ၂၀၁၆ နေ့က နမ့်ဆမ်မြို့ နယ်ကုန်းသာကျေးရွာအနီးတွင်လည်းကောင်း၊ တပ်မတော်နှင့် TNKA တို့ တိုက်ပွဲများဖြစ်ပွားခဲ့ပြီး တိုက်ခိုက်ရေး ရဟတ်ယာဉ်များ ပျံသန်းမှုရှိခဲ့သည်ဟု ဆိုပါသည်။

၃၀၊ ၁၀၊ ၂၀၁၆ နေ့က တပ်မတော်နှင့် TNLA တို့ မိုးမိတ်မြို့ နယ် နမ့်ခွမ်ရွာအနီးတွင်၎င်း နမ့်ဆမ်မြို့နယ် ကုန်းသာရွာနှင့် ဟူး မန်းရွာကြားတွင်လည်းကောင်း၊ နမ့်ဆမ်မြို့နယ် ဟူးမန်းရွာနှင့် ပန်အလောက်ရွာကြားတွင်လည်းကောင်း၊ တနေ့တည်း တိုက်ပွဲငယ် ၃ ကြိမ် ဖြစ်ပွားခဲ့သည်ဟု ဆိုပါသည်။ ၃၁၊ ၁၀၊ ၂၀၁၆ နေ့ကလည်း နမ့်ဆမ်မြို့နယ်အတွင်း တိုက်ပွဲများပြင်းထန်ခဲ့ပြီး လက်နက်ကြီးသံများ နေ့ရောညပါ ကြားနေရသည်ဟု နမ့်ဆမ်မြို့နယ် NLD ဥက္ကဌ မိုင်ရဲကျော်သူက ဆိုပါသည်။

၁၊ ၁၁၊ ၂၀၁၆ နေ့က မန်တုန်မြို့နယ် မန်အီရွာနှင့် မန်မိုင်ရွာကြားတွင် TNLA နှင့် RCSS တပ်များ တိုက်ပွဲဖြစ်ပွားခဲ့သည်ဟုဆိုပါ သည်။ ၂၊ ၁၁၊ ၂၀၁၆ နေ့ကလည်း ကျောက်မဲမြို့ နယ်နှင့်မိုးမိတ်မြို့ နယ်အစပ်ရှိ လွယ်ခမ်းရွာ အထက်တောင်ကုန်းရှိ TNLA စခန်းအား တပ်မတော်မှ တိုက်ခိုက်ခဲ့သကဲ့သို့ ကွန်ခါကျေးရွာရှိ တပ်မတော်စခန်းအားလည်း TNLA မှ ပြန်လည်သွားရောက်တိုက်ခိုက်ခဲ့သည်ဟု ဆိုပါသည်။

၎၊ ၁၁၊ ၂၀၁၆ နေ့က နမ့်ခမ်းမြို့နယ် ဟိုပန်ရွာနှင့် ပန်ဟန်ရွာကြားတွင်၎င်း ကွတ်ခိုင်မြို့နယ် ပန်ကော်ရွာနှင့် လွယ်ယောင် ရွာကြားတွင်လည်းကောင်း၊ ကျောက်မဲမြို့နယ် ပန်မရွာအနီးတွင်လည်းကောင်း၊ တပ်မတော်နှင့် TNLA တို့ တနေ့တည်း တိုက်ပွဲ ၃ ကြိမ်ဖြစ်ခဲ့သည်ဟု ဆိုပါသည်။ ၅၊ ၁၁၊ ၂၀၁၆ နေ့ကလည်း နမ့်ဆမ်မြို့ နယ်နမ့်ခေးရွာ အနီးတွင်လည်းကောင်း၊ ကျောက်မဲမြို့နယ် မင်းကုန်းရွာနှင့် ဟိုခိုရွာကြားတွင်လည်းကောင်း တပ်မတော်နှင့် TNLA တို့ တိုက်ပွဲဖြစ်ပွားခဲ့သည်ဟု ဆိုပါသည်။

၇၊ ၁၁၊ ၂၀၁၆ နေ့က မန်တုန်မြို့နယ် မန်မိုင်ရွာအနီးတွင် TNLA နှင့် RCSS တို့ တိုက်ပွဲဖြစ်ပွားခဲ့သည်ဆိုပါသည်။ ၈၊ ၁၁၊ ၂၀၁၆ နမ့်ဆမ်မြို့နယ်အတွင်း တပ်မတော်မှ လက်နက်ကြီးနှင့်ပစ်ခတ်မှုကြောင့် ဒေသခံများထိတ်လန့်နေသည်ဟု ပလောင် ကိုယ်ပိုင်အုပ်ချုပ်ရေးဒေသ ဦးစီးအဖွဲ့ဝင် မန်တုန်မြို့နယ်လွှတ်တော်ကိုယ်စားလည် ဦးသိန်းဇော်က ဆိုပါသည်။ ဤသို့လက် နက်ကြီးဖြင့် ပစ်ခတ်မှုများသည် နမ့်ဆမ်မြို့နယ်တွင်းသာမက နမ့်ခမ်းမြို့နယ်အတွင်းတွင်လည်းကောင်း၊ ၆ ရက် ၇ ရက် ၈ ရက်နေ့များတွင် ဖြစ်ပွားခဲ့သည်ဟု ဆိုပါသည်။ ၁၀၊ ၁၁၊ ၂၀၁၆ နေ့ကလည်း နမ့်ဆမ်မြို့နယ် မန်ဆာကျေးရွာအနီးတွင် တပ်မတော်နှင့် TNLA တို့ တိုက်ပွဲဖြစ်ပွားခဲ့သည်ဟု ဆိုပါသည်။ ၁၁၊ ၁၁၊ ၂၀၁၆ နေ့ကလည်း နမ့်ဆမ်မြို့နယ် နမ့်ခေးရွာ အနီးတွင် တပ်မတော်နှင့် TNLA တို့ တိုက်ပွဲဖြစ်ပွားခဲ့သကဲ့သို့ နမ့်ခမ်းမြို့နယ် မုန်းဝီးရှိ တပ်မတော်တပ်စခန်းအားလည်း TNLA မှ လာရောက်တိုက်ခိုက်ခဲ့ကြောင်း သိရှိရသည်။

အစောပိုင်းကာလက လက်ဖက်တောင်တန်းများပေါ်တွင်ဖြစ်ပွားနေသော တိုက်ပွဲများမှာ ပြောက်ကျားတိုက်ပွဲငယ်များဟု ဆိုနိုင်ပါသည်။ သို့သော် ယခုရက်ပိုင်းဖြစ်ပွားသော တိုက်ပွဲများတွင် အချို့ရက်များ၌ တိုက်ခိုက်ရေး ရဟတ်ယာဉ်များပါလာပြီး နေ့စဉ်လိုလို လက်နက်ကြီးများ ပစ်ခတ်တိုက်ခိုက်နေသည်ကို တွေ့ရပေရာ တိုက်ပွဲငယ်များဟု ဆို၍မရတော့ပေ။ တဖြေး ဖြေးနှင့် စစ်၏အရှိန်မြင့်တက်လာနေသည်ဟု ဆိုရပါမည်။ တိုက်ပွဲများလည်း ရက်ဆက်လို ဖြစ်ပွားလာသည်ကို တွေ့နေရပေ သည်။ နှစ်ဖက်အကျ အဆုံးစာရင်းများကို တိကျစွာမသိနိုင်ပါ။ တိုက်ပွဲတပွဲချင်းအရ ထိခိုက်ကျဆုံးမှု မများနိုင်သော်လည်း တိုက်ပွဲအားလုံးပေါင်း၏ ထိခိုက်ကျဆုံးမှုမှာ မြင့်တက်နိုင်သည်ဟု သုံးသပ်ရပါသည်။

● ငြိမ်းချမ်းရေးလုပ်ငန်းစဉ်နှင့် လက်ဖက်တောင်တန်း
လက်ဖက်တောင်တန်းတွင် တအန်း ပလောင်လူမျိုးများအား ကိုယ်စားပြု တရားဝင်နိုင်ငံရေးပါတီအဖြစ် တအန်းအမျိုးသား ပါတီ TNP ရှိပါသည်။ TNP ပါတီသည် တအန်း ပလောင်ကိုယ်ပိုင်အုပ်ချုပ်ရေးဒေသတွင်သာမက အခြားမြို့နယ်များတွင်ပါ အနိုင်ရခဲ့သည့်ပါတီဖြစ်သည်။ ၂၀၁၅ ရွေးကောက်ပွဲတွင် TNP ပါတီမှ ပြည်နယ်လွှတ်တော်တွင် ၇ ဦး ပြည်သူ့လွှတ်တော်တွင် ၃ ဦး အမျိုးသားလွှတ်တော်တွင် ၂ ဦး အနိုင်ရရှိခဲ့သည်။ ရွေးကောက်ပွဲရလဒ်အရ တအန်းလူမျိုးများ၏ထောက်ခံမှု ရရှိခဲ့သည်ဟု ဆိုရပါမည်။ တအန်းကိုယ်ပိုင်အုပ်ချုပ်ရေးအဖြစ် သတ်မှတ်ထားသောဒေသတွင်သာမက တအန်းလူမျိုးတို့ပျံ့နှံ့ နေထိုင်သောဒေသများတွင်ပါ အနိုင်ရခဲ့သည်ဟုဆိုရမည်။

လက်ရှိအချိန်တွင် TNP ပါတီအနေနှင့် UPDJC တွင် ပါဝင်၍ ငြိမ်းချမ်းရေးလုပ်ငန်းစဉ်တွင် ပါဝင်၍နေသည်။ သို့သော် TNP ပါတီအနေနှင့် လက်ဖက်တောင်တန်းတွင် ငြိမ်းချမ်းရေးလုပ်ငန်းများလုပ်ဆောင်ရန် အမျိုးသားအဆင့်ဆွေးနွေးပွဲများ ပြု လုပ်ရန် မဖြစ်နိုင်သေးပေ။ အကြောင်းမှာ လက်ဖက်တောင်တန်းပေါ်တွင် လက်နက်ကိုင်စွဲတိုက်ခိုက်နေသည့် TNLA တပ်ဖွဲ့ ငြိမ်းချမ်းရေးလုပ်ငန်းစဉ်အတွင်း ပါဝင်ခွင့်မရသေး၍ ဖြစ်ပေသည်။

TNLA အနေနှင့် ငြိမ်းချမ်းရေးဆွေးနွေးပွဲများတွင် NCA သဘောတူညီချက်ရရှိသည်အထိ NCCT Nationwide Ceasefire Coordination Team နှင့်အတူတကွ ပါဝင်ခဲ့သော်လည်း သမတဟောင်း ဦးသိန်းစိန် လက်ထက်တွင် NCA လက်မှတ်ထိုးခွင့် ပြု ရန် ငြင်းပယ်ခံခဲ့ရသည့်အဖွဲ့ဖြစ်သည်။ ဆိုရလျှင် NCA ပြင်ပတွင် အချိန်ဆွဲမနေဘဲ NCA လက်မှတ်ထိုးလိုလျှင်တောင်မှထိုးခွင့်မရှိသည့် အဖွဲ့ဖြစ်၍နေပေသည်။

တနိုင်ငံလုံးအပစ်ရပ်၍ ငြိမ်းချမ်းရေးတည်ဆောက်ဖို့ဆိုလျှင် လက်နက်ကိုင်ပဋိပက္ခအတွင်း ပါဝင်နေသူအားလုံး ထိုဖြစ်စဉ် တွင်ပါဝင်ဖို့ လိုပါသည်။ လမ်းပိတ်ထား၍ မရနိုင်ပေ။ လမ်းပိတ်နေက ဖွင့်ပေးရန်လိုအပ်သည်။ လက်ဖက်တောင်တန်းတွင် ငြိမ်းချမ်းရေးတည်ဆောက်နိုင်ရန် တရားဝင်ပါတီဖြစ်သော TNP ပါတီသာမက TNLA တပ်ဖွဲ့လည်း ငြိမ်းချမ်းရေးလုပ်ငန်း စဉ်တွင် ပါဝင်ရန် မုချလိုအပ်ပေလိမ့်မည်။

လက်ဖက်တောင်တန်းပေါ်တွင် သေနတ်သံ ဗုံးသံအမြောက်သံများ တိတ်ဆိတ်၍ သစ်ရွက်ပုလွေတေးသံ ငြိမ်းချမ်းရေးတေး သံ ပျံ့လွင်စေလိုပါသည်။

မောင်မောင်စိုး (Mg Mg Soe)