လှကျော်ဇော ● ၂၁ ရာစုပိုးလမ်းမကြီးအကြောင်း သိကောင်းစရာများ – အပိုင်း (၄)

၂၁ ရာစု ပိုးလမ်းကြီးအကြောင်း သိကောင်းစရာများ

အပိုင်း(၄)

(မိုးမခ)၊ ဇွန် ၂၅၊ ၂၀၁၇

  

တရုတ်ပြည်ရဲ့အခြေခံရည်ရွယ်ချက်။ သေနင်္ဂဗျူဟာနဲ့ နည်းနာများ။

တရုတ်ကတည်ဆောက်ပေးတဲ့-အာဖရိက-ကင်ညာရှိ-မွန်ဘာဆာနဲ့နိုင်ရိုဘီအကြားရထားလမ်း

 ကမ္ဘာမှုပြုခြင်း (သို့မဟုတ်) ဂလိုဘယ်လာဇေးရှင်းအစကို ဗြိတိသျှအင်ပါယာအမှုးပြုတဲ့ အနောက်တိုင်းကိုလိုနီစနစ်က ၁၉ ရာစုနဲ့ ၂၀ ရာစုများ က အုတ်မြစ်ချခဲ့တယ်လို့ သမိုင်းဆရာများက ဆိုခဲ့ပါတယ်။ နောက်ပိုင်းမှာ အမေရိကန်အမှူးပြုတဲ့ နိုင်ငံစုံ-နိုင်ငံခွကျော်ကော်ပိုရေးရှင်းကြီးတွေ ရဲ့ကမ္ဘာအနှံ့ အလွန်ကြီးမားကျယ်ပြန့်လှတဲ့(အကျိုးအမြတ်လည်းကြီးလှတဲ့) ကမ္ဘာမှုပြုခြင်း ပေါ်ပေါက်လာပါတယ်။

ဒါကို ကမ္ဘာမှုပြုခြင်း ၁.၀ (globalization1.0) လို့ သတ်မှတ်ထားပါတယ်။

    ဒီနေ့ (၂၁ ရာစု-အစမှာတော့) ဒီကမ္ဘာမှုပြုခြင်းကိုစတင်ဖော်ဆောင်ခဲ့ပြီး အကျိုးအမြတ်အများကြီးရခဲ့တဲ့ နိုင်ငံများ(ဥပမာ- အမေရိကန်၊ ဗြိတိန်) အပါအဝင် နိုင်ငံအတော်များများမှာတောင် ကမ္ဘာမှုပြုခြင်းကိုဆန့်ကျင်တဲ့ (anti-globalization)  လှုပ်ရှားမှုတွေ၊ အလွန်ကျဉ်းမြောင်းတဲ့ ကိုယ်ကျိုးစီးပွားကာကွယ်ရေး (protectionism) စိတ်ဓာတ်တွေ ပေါ်ပေါက်လာနေ ပါတယ်။

    ဒီလိုကမ္ဘာကြီးရဲ့ဖွံ့ဖြိုးတိုးတက်ရေးလမ်းကြောင်းလမ်းဆုံ လမ်းခွရောက်လာတဲ့အချိန်မှာ တရုတ်ကွန်မြူနစ်များ ဘယ်လို စဉ်းစားခဲ့သလဲ။

အရင်းရှင်ကမ္ဘာရဲ့အကျပ်အတည်းများကို တရုတ်ဆိုရှယ်လစ်စနစ်အရေးတော်ပုံအတွက် အခွင့်ကောင်းများအဖြစ် ပြောင်းလဲနိုင်အောင် ကြိုးစား လာပါတယ်။ ဒီမှာတင် ၂၁ ရာစုပိုးလမ်းမစီမံကိန်း ပေါ်ပေါက်လာတာပါ။ ဒါကြောင့်ပဲ တရုတ်ကွန်မြူနစ်များက ဒီစီမံကိန်းကြီးဟာ တရုတ်ရဲ့ ကမ္ဘာဘုံ (common) ဖွံ့ဖြိုးတိုးတက်ရေးအတွက် ဆိုရှယ်လစ်လက္ခဏာဆောင်တဲ့ ဖြေရှင်းချက်တရပ်ဖြစ်ပါတယ်လို့ ဆိုကြတာဖြစ်ပါတယ်။

တကယ်တော့ ဆိုရှယ်လစ်နိုင်ငံကိုအုပ်ချုပ်နေတဲ့အကြီးဆုံးပါတီကြီးဖြစ်တဲ့ တရုတ်ကွန်မြူနစ်ပါတီအနေနဲ့ အရင်းရှင် ဂလိုဘယ်လာဇေးရှင်းကို ဆို ရှယ်လစ်ဂလိုဘယ်လာဇေးရှင်းနဲ့ အစားထိုးနိုင်မယ့်လမ်းကြောင်းသစ်ကို တီထွင်ဖန်တီးမှုရှိစွာ ဖော်ထုတ်လိုက်ခြင်းဖြစ်ပါတယ်။

(အနောက်တိုင်းပညာရှင်များကတော့ ဒါကို တရုတ်ထူးခြားချက်များနဲ့ကိုက်ညီတဲ့ ဂလိုဘယ်လာဇေးရှင်း (Globalization with Chinese charectar- istic) လို့ သညာပြုပါတယ်။ ကမ္ဘာမှုပြုခြင်း၂.၀ (globalization 2.0) လို့လည်း အမည်ပေးတာတွေ ရှိပါတယ်။

၁၉၇၈ ကစလို့ တံခါးဖွင့်ရေး၊ ပြုပြင်ပြောင်းလဲရေးပေါ်လစီများလုပ်ဆောင်ပြီး တရုတ်ထူးခြားချက်များနဲ့ကိုက်ညီတဲ့ ဆိုရှယ်လစ်စနစ် တည် ဆောက်နေ တဲ့တရုတ်နိုင်ငံဟာ အရင်းရှင်ဂလိုဘယ်လာဇေးရှင်း ရေစီးကြောင်းအတိုင်းလိုက်ရင်း အကျိုးအမြတ်တွေလည်း မြိုးမြိုးမြက်မြက် ရထား ပါတယ်။ (နိုင်ငံခြားအရန်ငွေ ဒေါ်လာ-၃-ထရီလျံရှိ)။ အရင်းရှင် နိုင်ငံများရဲ့အကျပ်အတည်းများကြောင့် တရုတ်အနေနဲ့ကလည်း သူရဲ့ ဖွံ့ဖြိုးတိုးတက် ရေးပုံစံကို ထွက်ကုန်(ပိုကုန်)အားပြုတဲ့ ပုံစံကနေ ပြည်တွင်းသုံးစွဲမှုကိုအားပေးတဲ့ပုံစံသို့ ပြင်ဖို့ လိုလာပါတယ်။ သူ့နိုင်ငံမှာပုံနေတဲ့ကုန်ပစ္စည်းတွေနဲ့ ငွေအရင်း အနှီးတွေကို တင်ပို့ဖို့လည်းလိုလာပါတယ်။ ဒါပေမဲ့ ဒါကို ပုံစံသစ်နဲ့ (Win-win-အပြန်အလှန် အကျိုးရှိရေး) လုပ်ချင်တာပါ။ ဒါ့ကြောင့်ပဲ တရုတ်ကိုတချို့ အနောက်တိုင်းပညာရှင်တွေက ကိုလိုနီဝါဒသစ်ကျင့်သုံးနေတယ် ဒုတိယကမ္ဘာစစ်အပြီး အမေရိကန်က ဥရောပပြန်လည် နာလန်ထူ ရေးအတွက်လုပ်ခဲ့တဲ့ မာရှယ်စီမံကိန်းအတိုင်းလုပ်နေတယ်လို့ စွပ်စွဲတာတွေကို တရုတ် က လက်မခံတာပါ။

ဒီနေရာမှာ လက်ရှိတရုတ်ရဲ့ကမ္ဘာအမြင်ကို ထည့်သွင်းစဉ်းစားဖို့ လိုလာပါတယ်။

တရုတ်က လက်ရှိကမ္ဘာဟာ ငြိမ်းချမ်းရေး၊ ဖွံ့ဖြိုးတိုးတက်ရေး၊ ပူးပေါင်းဆောင်ရွက်ရေးဆိုတဲ့ လေထုက အဓိကဖြစ်နေတယ်လို့ရှုမြင်ပြီး ငြိမ်းချမ်းစွာ ဖွံ့ဖြိုးတိုးတက်ရေးဆိုတဲ့လမ်းကြောင်းကို မိမိကိုယ်တိုင်လည်းလုပ်ဆောင်နေပြီး နိုင်ငံတကာစင်မြင့်တွေမှာလည်း တိုက်တွန်းပြော ဆိုနေပါတယ်။ ဒီ အယူအဆရဲ့အခြေခံတရားကတော့ ကမ္ဘာကြီးရဲ့အရင်းအမြစ်အားလုံးကို တရားမျှတစွာခွဲဝေယူမယ်ဆိုရင် ကမ္ဘာကြီးရဲ့ လူဦးရေ (ယခု-၇-ဘီလီယံ ကျော်-)....အားလုံးအတွက်လုံလောက်တယ်ဆိုတဲ့ အမြင်ပါပဲ။ တချိန်ထဲမှာလည်း ဒုတိယကမ္ဘာစစ်ပြီးချိန်ကစလို့ တည်ရှိလာခဲ့တဲ့ နိုင်ငံတကာ နိုင်ငံရေးစည်းစနစ်တွေ်၊ နိုင်ငံတကာဘဏ္ဍာရေးစည်းစနစ်တွေဟာ အခုအချိန်မှာ သိပ်အသုံးမတဲ့တော့ဘူး။ ပြန်လည်ပြုပြင်သင့်တယ်လို့ဆိုလာပါတယ်။ (တကယ်တော့ တရားမျှတမှုမရှိဘူးနိုင်ငံကြီးတွေက လက်ဝါးကြီးအုပ်ထားတယ်လို့ ဆိုချင်တာပါ)

တကယ်တော့တရုတ်က နိုင်ငံကြီးငယ်မဟူ ပြောရေးဆိုခွင့်ရရှိတဲ့ (Multi-lateralism) ကို ရည်ညွှန်းတာပါ။

တရုတ်ပြည်-အနောက်မြောက်-စင်ကျန်ပြည်နယ်အတွင်းကအမြန်ရထားလမ်း

ဒီမှာတင်၂၁ ရာစုပိုးလမ်းမစီမံကိန်းကြီး ပေါ်လာတာပါပဲ။ ဒီနေရာမှာ တရုတ်ရဲ့ပြင်ဆင်မှုများကိုကြည့်ရင် အလွန်သိုသိပ်၊ ဘက်စုံပြီး မြန်ဆန် တာကို မြင်နိုင်ပါတယ်။ လွတ်မြောက်ရေးတိုက်ပွဲများအတွင်း တရုတ်ကွန်မြူနစ်တွေဟာ အလွန်ကျော်ကြားလှတဲ့ပြောက်ကျား စစ်များတိုက်ခဲ့ သူများပီပီတချို့ ကိစ္စတွေမှာ အလွန်ပြောက်ကျားဆန်ပါတယ်။ ဥပမာ- အာဖရိကတိုက်ကရထားလမ်းများကိစ္စ၊ ...ဘယ်သူမှ ထင်မထားတဲ့ နေရာမှာ အလွန်မြန်ဆန် လှတဲ့နှုန်းနဲ့ ရထားလမ်းတွေကို တည်ဆောက်ပစ်လိုက်တာပါ။ အဲသလိုစမ်းသပ်ကွက်အတော်များများလုပ်ပြီး တစုံ တရာအကောင်အထည် ပေါ်လာမှ လူသိရှင်ကြာ ကြေညာတာပါ။ တိန့်ရှောင်ဖင်ကလည်း ဒီလိုမှာထားခဲ့ဖူးပါတယ်။  ဆိုရှယ်လစ်နိုင်ငံ တည် ဆောက်ရေးမှာ ဘယ်သူမှအောင်မြင် အောင်မလုပ်နိုင်သေးဘူး။ ဒါ့ကြောင့် လုပ်ငန်းတွေလုပ်ဆောင်ရာမှာ မြစ်တွေချောင်းတွေထဲ ကျောက် ခဲတုံးတွေပေါ် စမ်းတ၀ါးဝါးလျှောက်ရသလို ခြေထောက်တချောင်းမြဲမှ နောက်တချောင်းကိုလှမ်း….တဲ့။ သူတို့နိုင်ငံရဲ့ တချို့စီမံကိန်းတွေဆိုရင် လည်း တရွာစ နှစ်ရွာစများမှာ စမ်းသပ်လုပ်ကိုင် ပြီး အောင်မြင်မှ ခရိုင်အဆင့်တက်၊ ပြည်နယ် အဆင့်တက်နဲ့ အလွန်စိတ်ရှည်ပြီး ဘက်စုံကျ စေ့စပ်ပါတယ်။ တခုရှိတာက သူတို့နိုင်ငံရဲ့အာဏာက တရုတ်ကွန်မြူနစ် ပါတီ တပါတီထည်းတောက်လျှောက်ကိုင်ထားတာဖြစ်လို့ အစိုးရက ချမှတ်ထားတဲ့ ပေါ်လစီတွေကို အကောင်အထည်ဖော်ရာမှာ အချိန် ကောင်းကောင်းယူပြီး တဆက်တစပ်ထဲလုပ်နိုင်တာလည်း ပါပါတယ်။ (တချို့နိုင်ငံတွေမှာတော့ အစိုးရတခါပြောင်းရင် ပေါ်လစီတွေ တခါ ပြောင်း ဖြစ်တတ်ပါတယ်။ အခု-အမေရိကန်သမ္မတထရာမ့်လုပ်နေပုံတွေပဲ ကြည့်ပါ။ အိုဘာမာ စီမံကိန်းတွေအားလုံး လိုက်ဖျက်ပစ်နေပါတယ်။)

နိုင်ငံတကာတပ်ပေါင်းစုလုပ်ငန်းလုပ်ဆောင်ရာမှာလည်း အတော်ညက်ပါတယ်။ ဆိုဗီယက်ယူနီယံကြီးပြိုကွဲအပြီး ရုရှားတင်မက ပဲ့ထွက် ကုန်တဲ့ နိုင်ငံများကို လှမ်းမဟာမိတ်ဖွဲ့လိုက်နိုင်မှုက တရုတ်တွေအတွက် အတော်အကျိုး ရှိလိုက်ပါတယ်။ အနှစ်(၆၀)ကျော်ဆိုရှယ်လစ်စနစ်တည်ဆောက် ရာမှာ ဆိုဗီယက်ယူနီယံအနေနဲ့ငွေရေးကြေးရေးအရ ချွတ်ခြုံကျသွားပမယ့် သုတေသနလုပ်ငန်းတွေလုပ်လာနိုင်ခဲ့လို့ နယ်ပယ် အသီးသီးမှာ တပိုင်း တစလုပ်ငန်းတွေ အများကြီးရှိနေတာပါ။ လူစွမ်းအားဇာစ်မြစ်တွေလည်း အလျှံပယ်ပါ။ ဒါတွေကို အဲဒီနိုင်ငံအများအပြားက ထုတ်ရောင်းတာ၊ လူ တွေကို ဌားရမ်းပေးတာတွေ လုပ်ပါတယ်။ တရုတ်ကဝယ်လို့ရသမျှ ဝယ်တယ်။ မရောင်းတာတွေကိုငွေစိုက်ပြီး ပူးပေါင်း လုပ် ဆောင်နိုင်လို့ တရုတ်ရဲ့နယ်ပယ်ပေါင်းစုံ အထူးသဖြင့် သိပ္ပံနဲ့နည်းပညာလုပ်ငန်းတွေ စစ်ဘက်ဆိုင်ရာကာကွယ်ရေးလုပ်ငန်းတွေမှာ အများကြီးအကျိုးရှိလိုက်ပါတယ်။ ဥပမာ- ယခုနောက်ပိုင်း တရုတ်ရဲ့အာကာသလုပ်ငန်းများ တိုးတက် လာတာ၊တရုတ်ရေတပ်ကိုခေတ်မီရေး လုပ်ဆောင်ချက်များကိုကြည့်ပါ။

ယူကရိမ်းကထုတ်ရောင်းတဲ့(ရုရှားတွေစွန့်ပစ်ခဲ့တဲ့)လေယဉ်တင်သင်္ဘောကြီးကိုပေါချောင်ကောင်းဝယ်ပြီး၊ ပြုပြင် ပြင် ဆောက်လုပ်ပြီး၊ အကောင်းပကတိပြန်ဖြစ်အောင်လုပ်နိုင်ရုံမက အခုအသစ်တစီးကိုလည်း ပြည်တွင်းမှာ တည်ဆောက်လိုက်နိုင်ပြီး မကြာခင် ရေချတော့မှာ ဖြစ်ပါ တယ်။ (တချို့အဆင့်မြှင့်နည်းပညာတွေကို အမေရိကန်နဲ့ဥရောပနိုင်ငံများက လုံခြုံရေးအကြောင်းပြချက်နဲ့ တရုတ်ကိုရောင်းမပေးပါဘူး။ အခု တလော သမ္မတထရာမ့်ကအိုဘာမာရဲ့ ပဲရစ်သဘောတူ ညီချက်စာချုပ်က နှုတ်ထွက်ခဲ့ပါတယ်။ အမေရိကန်ရဲ့အလုပ်အကိုင်တွေထိခိုက်တယ်... ဆိုတဲ့အကြောင်းပြချက်နဲ့ပါ။

ဒါပေမဲ့ သန့်ရှင်းသောစွမ်းအင်(clean-energy)အတွက် လိုအပ်တဲ့အဆင့်မြင့်နည်းပညာတွေကို တခြားနိုင်ငံများကို မျှဝေပေးရမှာစိုးလို့ လို့ တချို့ပညာရှင်တွေက အမေရိကန်ကိုစွပ်စွဲနေပါတယ်။)

   ဒါ့အပြင် နိုင်ငံရေး၊ ကာကွယ်ရေး၊ စီးပွားရေးစတာတွေမှာလည်း ဒီလိုဘဲအောင်မြင်မှုတွေရနေတာ တွေ့နိုင်ပါတယ်။

၂၀၀၇ မှာ ရုရှားသမ္မတပူတင်ရဲ့စီမံကိန်းယူရေရှားစီးပွားရေးအဖွဲ့ (ယခင်ဆိုဗီယက်ယူနီယံဟောင်းနိုင်ငံများနဲ့စုပေါင်းဖွဲ့စည်းထားတာ)(Eurasia Economic Union.E.E.U)ကို၂၀၁၄ မှာတရုတ်ရဲ့ပိုးလမ်းမစီမံကိန်းနဲ့ ဆက်စပ်လိုက်နိုင်မှုပါပဲ။

ရုရှားရဲ့စီးပွားရေးဟာ စိတ်သွားတိုင်းကိုယ်မပါနိုင်တာကြောင့်ရော၊ တရုတ်ရဲ့ချဉ်းကပ်နည်းများ ပျော့ပျောင်းတာကြောင့်ရော ဒီလိုပူးပေါင်း လိုက်နိုင်တာပါ။(အစောပိုင်းက အနောက်တိုင်းပညာရှင်များက ပူတင်စီမံကိန်းနဲ့ ရှီကျင့်ဖင်စီမံကိန်းတို့ထိပ်တိုက်တွေ့လိမ့်မယ်...လို့ ဟောကိန်း ထုတ်ခဲ့တာပါ။) တရုတ်အတွက် ဒီကိစ္စဟာ အရေးကြီးတဲ့အောင်ပွဲပါ။ ပူတင်ရဲ့စီမံကိန်းကိုတရုတ်က ပိုးလမ်းမနဲ့ဆက်လိုက်နိုင်တော့ တရုတ် ပြည်က (ပိုးလမ်းမ အထွက်လမ်းကြောင်းတကြောင်းဖြစ်တဲ့) စင်ကျန်ပြည်နယ်နဲ့ (အရင် ဆိုဗီယက်ယူနီယံက) မူစလင်နိုင်ငံများ တဆက်တစပ် ထဲဖြစ်သွားပါတော့ တယ်။ တရုတ်ကသူ့နိုင်ငံ စင်ကျန် လူမျိုးတွေရဲ့အစွန်းရောက်အကြမ်းဖက်ဝါဒကိုတိုက်ဖျက်ရာမှာ (အမာနည်းဖြစ်တဲ့ တရား ဥပဒေက အရေးယူခြင်း များအပြင်) အပျော့နည်းဖြစ်တဲ့ စင်ကျန်ဒေသစီးပွားရေးတိုးတက်လာရေးကိုလည်း အတော်အာရုံထား လုပ်ဆောင်ပါ တယ်။

(တရုတ်က အကြမ်းဖက်ဝါဒကိုတိုက်ဖျက်ရာမှာ အကြမ်းဖက်ဝါဒရဲ့အရင်းအမြစ်ဖြစ်တဲ့ ဆင်းရဲမွဲတေမှုကို အဓိကထားဖြေရှင်းတာပါ။)

ဒီစီိမံကိန်း(၂)ခုကြောင့် စင်ကျန်အပြင် တခြားမူစလင်နိုင်ငံများကိုပါ စီးပွားရေးတိုးတက်လာစေပါတယ်။ ဒါတွေကြောင့် တရုတ်ပြည်မှာ အကြမ်း ဖက် ၀ါဒတိုက်ခိုက်မှုတွေ ကျဆင်းလာတာပါ။(ဒါ့ကြောင့် တရုတ်ပြည်က တနိုင်ငံထဲ တိုးတက်လို့မဖြစ်၊ ဖွံ့ဖြိုးတိုးတက်မှုတွေကို မျှဝေမျှမယ်လို့ ဆိုနေတာပါ။ မျှဝေရာမှာ သူတို့နိုင်ငံရဲ့ဖွံ့ဖြိုးတိုးတက်မှုပုံစံ(mode of development) ပါ ပါဝင်ပါတယ်။ ဒါကိုပဲ အရင်းရှင်နိုင်ငံကြီးများက မခံ မရပ်နိုင် ဖြစ်နေတာပါ။)

ဒါတင်မက တရုတ်ရဲ့ပိုးလမ်းမစီမံကိန်းအတွက်ရည်ရွယ်ထူထောင်လိုက်တဲ့ အာရှအခြေခံအဆောက်အအုံ ရင်းနှီးမြှုပ်နှံမှုဘဏ် (Asia Infrast- ructure Investment Bank-A.I.I.B) ဟာလည်း တရုတ်တွေကိုယ်တိုင် အံ့သြယူရလောက်အောင် အောင်မြင်လာတာတွေ့ရပါတယ်။ တရုတ်ရဲ့ ပစ်မှတ်ဖြစ်တဲ့ ဖွဲ့ဖြိုးဆဲနိုင်ငံများသာမက (အမေရိကန်ရဲ့ဖိအားကိုအံတုပြီး) ဥရောပက ဖွံ့ဖြိုးပြီးနိုင်ငံများ အများအပြား ပါလာတာပါ။ အခုအခါပါဝင်လာတဲ့နိုင်ငံများဟာ နိုင်ငံပေါင်း (၈၀) ကျော်သွားပါပြီ။ အခုဂျပန်ကတောင် ပါတော့မယ့်အလားအလာများ တွေ့လာနေရပါတယ်။

ဒီလိုအောင်မြင်လာရတာမှာ အကြောင်းတွေရှိပါတယ်။ တရုတ်က သူဦးစီးတည်ထောင်ပေမယ့်အားလုံးပါဝင်နိုင်ရေး ပွင့်လင်းမြင်သာမှုရှိရေး၊ အကျိုးအမြတ်ကိုညီတူမျှတူခွဲဝေရေး၊ သဘာဝပတ်ဝန်းကျင်မထိခိုက်ရေးဆိုတဲ့မူတွေအပြင်၊ သူတို့အနေနဲ့ ဗီတိုမသုံးပါဘူး။ ကုန်သွယ်ရေး လုပ်ငန်းတွေမှာ ဘုံငွေကြေးအဖြစ် အမေရိကန်ဒေါ်လာပဲသုံးမယ် တရုတ်ပြည်ရဲ့စီမံကိန်းများမပါဝင်စေရပါဘူးဆိုတဲ့ တရုတ်ရဲ့ကတိပေးချက် များကလည်း တခြားနို င်ငံတွေ (တသီးပုဂွလိက ရင်းနှီး မြှုပ်နှံသူများအပါအဝင်) ကို ဆွဲဆောင်နိုင်ခဲ့ပါတယ်။

နောက်တချက်ကတော့ လက်ရှိကျင့်သုံးနေဆဲ ဂလိုဘယ်လာဇေးရှင်းကြောင့်ဖွံ့ဖြိုးပြီးနိုင်ငံအများအပြားမှာစုဆောင်းရရှိထားတဲ့ ငေငွအရင်း အနှီးများ ဟာ (ကမ္ဘာဘဏ်ရဲ့တွက်ချက်မှုအရ) ဒေါ်လာ-ထရီလျံပေါင်း(၄၀)ရှိနေပါတယ်။ ဒါ့ကြောင့် ဒီအရင်းအနှီးများကို အကျိုးအမြတ် တစုံတရာ ရှိမဲ့ စိတ်ချ ရတဲ့ ရင်းနှီးမြှုပ်နှံမှုတွေမှာ မြှုပ်နှံချင်ကြပါတယ်။ ဒီမှာတင် တရုတ်ရဲ့ အားလုံးပါဝင်လာရေးမူကိုသဘောကျပြီး ဝိုင်း ရင်းနှီးမြှုပ်နှံလာကြခြင်း ဖြစ်ပါတယ်။

နောက် ဒီ (A.I.I.B) ရဲ့လုပ်ငန်းတွေကိုလည်း ကျန်နိုင်ငံတကာ ဘဏ္ဍာရေးဆိုင်ရာအဖွဲ့အစည်းများ(ဥပမာ-ကမ္ဘာဘဏ်၊ အိုင်-အမ်-အက်ဖ်၊ အာရှဖွံ့ဖြိုးရေးဘဏ်များ) နဲ့ ဆွဲဆက်စပ်လိုက်ပြီး လုပ်ငန်းစီမံကိန်းများ(အခြေခံအဆောက်အအုံတည်ဆောက်ရေး) မှာ ပူးတွဲလုပ်ဆောင် လာနိုင်တာပါ။ ဒီဘဏ်တည်ထောင်စဉ်က အပြိုင်အဆိုင်လုပ်လာနိုင်တယ်ဆိုပြီး သံ သယဝင်နေသူများကို တရုတ်က သူတို့အနေနဲ့-လိုအပ်တဲ့ နေရာတွေမှာ ဖြည့်ဆည်းဖို့ (complementery) သာဖြစ်ပါတယ်...လို့ပြောခဲ့တာပါ။ ဒီကတိလည်း တည်တဲ့အတွက် ယုံကြည်မှုတွေ တိုးလာ တာဖြစ်ပါတယ်။ ဒါတွေ ကြောင့်ပဲ မေလကပီကင်းမှာကျင်းပတဲ့ပိုးလမ်းမဖိုရမ်ကို ကမ္ဘာဘဏ်ဥက္ကဋ္ဌရော၊ အိုင်အမ်အက်ဖ်ကဥက္ကဋ္ဌရော တက်ရုံမက အားတက်သရော၊ ထောက်ခံအားပေးတဲ့မိန့်ခွန်းတွေတောင် ပြောခဲ့ပါတယ်။

တကယ်တော့ တရုတ်တွေအတွက် သူတို့နိုင်ငံကို ဆိုရှယ်လစ်နိုင်ငံအဖြစ်တည်ဆောက်ရာမှာ အယူဝါဒရေးရာတွေမှာ အစွဲအလန်းတွေ (ideological bias) မထားဘဲ လက်တွေ့အကျိုးရှိရေး (pragmatism) ကိုသာဦးတည်ပြီး အရင်းရှင်ဝါဒအတွင်းက ကောင်းမွန်တဲ့အချက်များကို ထုတ်နှုတ်သုံးစွဲ ကြည့်ပြီး လိုအပ်တာများကိုပြုပြင်ပြောင်းလဲပြီး ရရှိလာတဲ့အကျိုးကျေးဇူးများကိုမျှဝေရာမှာတတ်နိုင်သမျှ တရားမျှတအောင် လုပ်ဆောင်ပါတယ်။ (တနည်းပြောရရင် ဆိုရှယ်လစ်လက္ခဏာသွင်းယူတာပါ။) ဒီလိုနဲ့ ကံတူအကျိုးပေးအဖွဲ့အစည်းတရပ်(shared-destiny) တည်ထောင်ရေးတို့၊ သဟ ဇာတ ကျတဲ့လူ့အဖွဲ့အစည်း(harmonious-society)တည်ထောင်ရေးတို့ ဆိုတဲ့ တရုတ်တွေရဲ့ကြွေးကြော်သံတွေ ပေါ်ပေါက်လာတာပါ။

ဒါတွေကတော့ တရုတ်ရဲ့သေနင်္ဂဗျူဟာခြေလှမ်းများနဲ့ လုပ်ဟန်များ ဖြစ်ပါတယ်။