တရားရုံးက လက်ခံရန်ခက်ခဲမည်ဖြစ်သော်လည်း လယ်သမားများက ဦးပိုင်ကိုတရားစွဲမည်


တရားရုံးက လက်ခံရန်ခက်ခဲမည်ဖြစ်သော်လည်း လယ်သမားများက ဦးပိုင်ကိုတရားစွဲမည်
ဝင်းနန္ဒာ (Myanmar NOW) မိုးမခ၊ မေ ၁၈၊ ၂၀၁၈

 
မေ ၁၆ ရက်နေ့က ရန်ကုန်မြို့မှ သတင်းသမားများနှင့် တွေ့ဆုံပြီး လယ်သိမ်းခံရမှု နောက်ဆက်တွဲ အခြေအနေများကို ရှင်းပြသည့် အစီအစဉ်တွင် တွေ့ရသည့် ရန်ကုန်တိုင်း ဒေသကြီး ကျောက်တန်းမြို့နယ်မှ တောင်သူတချို့ (ဓာတ်ပုံ - ဝင်းနန္ဒာ/Myanmar Now)

ရန်ကုန် – စစ်တပ်ပိုင် မြန်မာ့စီးပွားရေးဦးပိုင်ကုမ္ပဏီကို တရားစွဲလျှင် တရားရုံးများက အမှုလက်ခံရန် တွန့်ဆုတ်နေမည်ဖြစ်သော်လည်း ဥပဒေနှင့်အညီ အမှုကိုခိုင်မာအောင်တည်ဆောက်ကာ တရားစွဲသွားမည်ဟု မကြာမီက ရဲတပ်ဖွဲ့ဝင်များနှင့် ပဋိပက္ခဖြစ်ပွားခဲ့သည့် သီလဝါလယ်သိမ်းခံ လယ်သမားဘက်က လိုက်ပါဆောင်ရွက်ပေးမည့် တရားလွှတ်တော်ရှေ့နေ ဦးမြင့်သွင်က Myanmar Now ကို ပြောသည်။

ပြီးခဲ့သည့် မေလ ၁၂ ရက်နေ့က ရန်ကုန်တိုင်း ကျောက်တန်းမြို့နယ် သီလဝါတွင် စစ်တပ်ပိုင် ဦးပိုင်ကုမ္ပဏီက သိမ်းဆည်းထားသည်ဆိုသော လယ်ယာမြေများပေါ်၌ မူလပိုင်ရှင်လယ်သမားများနှင့် ရဲတပ်ဖွဲ့ဝင်များ ဖြစ်ပွားခဲ့သည့် ရုန်းရင်းဆန်ခတ်မှုတွင်ရဲတပ်ဖွဲ့က ရော်ဘာကျည်ဆန်ဖြင့် ပစ်ခတ်ခဲ့သည့်အတွက် လယ်သမား နှစ်ဦး ဒဏ်ရာရကာ ဆေးရုံတက်နေရသည့်ကိစ္စနှင့် ပတ်သက်၍ လယ်သမားများက ဦးပိုင်ကို တရားစွဲရန် ပြင်ဆင်နေခြင်းဖြစ်သည်။

ထို့ပြင် နိုင်ငံတော် သမ္မတရုံး၊ ပြည်ထဲရေးဝန်ကြီးဌာနနှင့် လူ့အခွင့်အရေးကော်မရှင်တို့ထံ တိုင်ကြားစာများလည်း ပေးပို့သွားမည်ဖြစ်သည်။

ကနဦးအဆင့်အနေဖြင့် နစ်နာကြေးရလိုမှုဖြင့် တရားရုံးကိုဦးတိုက်လျှောက်ထားသွားမှာဖြစ်ပြီး တိုင်ကြားစာ ပို့ထားသော ဌာနအသီးသီး၏ အစီရင်ခံစာရရှိလာမည့်အပေါ် ထပ်မံစွဲဆိုသွားမှာ ဖြစ်ကြောင်း ဦးမြင့်သွင်က ပြောသည်။

“ခြံစည်းရိုးခတ်ပြီးပိတ်လိုက်တဲ့ပြဿနာ၊ ဝင်ပြီးဆွဲရိုက်တဲ့ကိစ္စမျိုး အဓိကရုဏ်းနှိမ်နင်းတဲ့ ပုံစံမျိုးမဟုတ်ဘဲနဲ့ အကြမ်းဖက်တဲ့ဝင်ရောက်ရိုက်ခွင့်ပေးတဲ့ကိစ္စမျိုး ဒါတွေပေါ်မူတည်ပြီး ရာဇသတ်ကြီးနဲ့စွဲလို့ရသလို တရားမနစ်နာမှုတွေနဲ့လည်း စွဲလို့ရပါတယ်။ ဦးပိုင်ကျူးလွန်လည်း ဦးပိုင်၊ ရဲတပ်ဖွဲ့ကျူးလွန်လည်း ရဲတပ်ဖွဲ့။ လောလောဆယ် ကနဦးစွဲဆိုမှာ ဦးပိုင်ပဲ” ဟု ၂၀၀၇ ခုနှစ်မှစတင်ကာ သိမ်းဆည်းခံလယ်ယာမြေအရေးနှင့် လယ်သမားများအားလိုက်လံကူညီဆောင်ရွက် နေသည့် ၎င်းကပြောသည်။

တရားစွဲဆိုရာတွင် လယ်ယာမြေဥပဒေနဲ့အညီ လယ်သမားများ၏လယ်ယာမြေတန်ဖိုး တွက်ချက်မှုပေါ်မူတည်ကာ ဦးတိုက်လျှောက်မည့် တရားရုံးကို ဆုံးဖြတ်မည်ဖြစ်သည်။ တရားမမှု သဘောသဘာဝအရ ကျပ်သိန်း ၁၀၀ အထိ တောင်းဆိုသည့် အမှုကို မြို့နယ်တရားသူကြီး၊ သိန်း ၁၀၀ နှင့် သိန်း ၁၀,၀၀၀ ကြားကိုမူ ခရိုင်တရားသူကြီး၊ သိန်း ၁၀,၀၀၀ ထက်ကျော်လွန် ပါက တိုင်းဒေသကြီးတရားလွှတ်တော်က စစ်ဆေးရမည်ဖြစ်သည်။

လူ့အခွင့်ရေးကော်မရှင်နှင့်သက်ဆိုင်ရာဌာအသီးသီး၏ အစီရင်ခံစာများရရှိပါမှ နိုင်ငံသားများအနေနှင့် နစ်နာဆုံးရှုံးခဲ့ရသည့် အထောက်အထားခိုင်လုံမည်ဖြစ်ပြီး အမှုကို ဥပဒေအရခိုင်မာအောင်တည်ဆောက် သွားမည်ဖြစ် ကြောင်း ၎င်းကဆက်ပြောသည်။

“ဥပဒသမားမို့ ဥပဒေဘောင်ထဲကမရရအောင်တက်ရမှာပဲ စစ်တပ်တွေကို၊ ကုမ္ပဏီတွေကိုစွဲတယ်ဆိုရင် တရားရုံးတွေက အများအားဖြင့် သူတို့ကထောက်ပြပြီး ပြန်ပေးတယ်။ (တရား)စွဲဖို့တွန့်တယ်၊ ကြောက်တတ်တယ်။ တိုင်းအဆင့်တောင်ကြောက်တတ်တယ်။ အမှုကြန့်ကြာတာတွေလည်းရှိတတ်တယ်။ အခုလည်းပဲ ဦးပိုင်ကို စွဲရင်ရုံးတွေက (လက်တွန့်)နေဦးမှာ” ဟု ဦးမြင့်သွင်က ဆိုသည်။

စစ်တပ်ပိုင် ဦးပိုင်ကုမ္ပဏီနှင့် မြေယာအငြင်းပွားမှုဖြစ်နေသည့် ကျောက်တန်းမြို့နယ် သီလဝါကျေးရွာဟောင်းအနီး ဆိပ်ကမ်းအကွက်အမှတ် ၁၂၊ ၁၃၊ ကွင်းအမှတ် ၆၅၅ ရှိ လယ်ယာမြေများပေါ်တွင် ဦးပိုင် ကုမ္ပဏီက လာရောက်ကာ လုပ်ငန်းလုပ်ကိုင်သည့်အတွက် ရဲတပ်ဖွဲ့နှင့်အတူ လိုက်ပါလာသည့် အရပ်သားများနှင့် လယ်သမားများ အကြား တင်းမာခဲ့ကြသည့် နောက်ပိုင်း ရဲတပ်ဖွဲ့၏ ပစ်ခတ်ခံရသဖြင့် လယ်သမားနှစ်ဦး ယခုလ ၁၂ ရက်နေ့က ဒဏ်ရာရသွားခဲ့ခြင်း ဖြစ်သည်။

အဆိုပါနေ့က ရဲတပ်ဖွဲ့နှင့်အတူပါလာသော အရပ်သားများမှာ ဦးပိုင်ကုမ္ပဏီဘက်က အနီးအနား ဒေသခံများအား တစ်ယောက်လျှင် ကျပ် ၅၀၀၀ နှုန်းဖြင့် ငှားရမ်းခေါ်ယူလာခဲ့ပြီး ၎င်းတို့ထံတွင် ဓားများလည်း ကိုင်ဆောင်လာသည်ဟု မေလ ၁၆ ရက်နေ့က ရန်ကုန်၌ပြုလုပ်သည့် သတင်းစာရှင်းလင်းပွဲတွင် ရှင်းလင်းပွဲပြုလုပ်သူများက ပြောသည်။

“အရှေ့ဆုံးက ခေါ်လာတဲ့မိန်းမတွေကို ထားတယ်။ အလယ်မှာ ယောက်ျားတွေ နောက်ဆုံးကရဲတွေက သူတို့ရဲ့ ဒိုင်းတွေနဲ့ကာထားတယ်။ ကျွန်မတို့ကိုဝိုင်းထားပြီး ရဲတွေကအနောက်ကနေတွန်းတော့ အဲ့ဒီမိန်းမတွေနဲ့ ကျွန်မတို့တွေ ချကုန်တယ် အဲ့ဒီမှာ သူတို့ငှားလာတဲ့လူထဲက ယောက်ျားတစ်ယောက်က ခါးထဲက ဓားမြှောင်ကိုထုတ်ပြီး အခုဆေးရုံတက်နေရတဲ့ အစ်မကို လှမ်းထိုးတယ်။ မမိလိုက်ဘဲ ဝတ်ထားတဲ့အင်္ကျီ တောက်လျှောက်ကွဲသွားတယ်” ဟု ထိုနေ့က ပြဿနာရာတွင် ပါဝင်ခဲ့သည့် လယ်သမားတစ်ဦးဖြစ်သူ မသီတာအေးက ပြောသည်။

ဦးပိုင်က ငွေပေးခေါ်လာခဲ့သည်ဆိုသည့် အရပ်ဝတ်လူများကို လူအုပ်ထဲမှားမပစ်မိစေရန် လည်ဆွဲအနီရောင် ကြိုးများ ဝတ်ဆင်ထားကြောင်း၊ ထိုအရပ်ဝတ်များမှာ သန်လျင် GTC ဂိတ်ဟောင်းအနီးတစ်ဝိုက်ရှိ ရွာများမှ ဖြစ်ကြောင်း လယ်သမားရေးကူညီဆောင်ရွက်ပေးနေသည့် အရှေ့ပိုင်းတက္ကသိုလ်ကျောင်းသားများသမဂ္ဂမှ ပြင်ပဆက်ဆံရေးတာဝန်ခံ ကိုမင်းသွေးသစ်ကပြောသည်။

“(အခင်းဖြစ်တဲ့နေ့တုန်းက) ရပ်ကွက်ထဲကခြေစလက်စရှိတဲ့သူတွေကို လိုက်စုနေပြီဆိုပြီး ကျွန်တော့်အဖွဲ့ထဲက ကျောင်းသားလေးတွေကပြောတယ်။ တစ်ယောက် ကျပ် ၅၀၀၀ နဲ့ လူအင်အားလိုလို့ဆိုပြီး ခေါ်တယ်။ ဦးပိုင်ဘက်ကခေါ်တာလို့သိရတယ်ဗျ။ အဲ့ဒီလူတွေထဲမှာ ဓါးပါလာတဲ့တစ်ယောက်ကို ရွာသူတစ်ယောက်က မြင်တော့ ‘ဓါးပါလာတယ် ဖြေရှင်းပေးပါ’ ပြောတော့ ရဲကဘာမှပြန်မပြောဘူး” ဟု ၎င်းကဆိုသည်။

ယင်းနောက် ရဲတပ်ဖွဲ့မှ သေနတ်တစ်ချက်ကို မိုးပေါ်သို့ထောင်ပစ်ကာ ရုန်းရင်းဆန်ခတ်ဖြစ်နေစဉ် လူအုပ်ထဲသို့ ဒူးထောက် ချိန်ရွယ်ကာ သုံးချက်ပစ်ဖောက်ခဲ့သည်ဟု မသီတာအေးက ပြောသည်။

သီလဝါကျေးရွာဟောင်းအနီး ကွင်းအမှတ် ၆၉၉ ရှိ လယ်သမား ၁၄ ဦးပိုင် လယ်မြေများကို ၁၉၉၆ ခုနှစ်တွင် မြန်မာ့ ဆိပ်ကမ်းအာဏာပိုင်က တစ်ဧကလျှင် ကျပ် ၂၀,၀၀၀ နှုန်းဖြင့် သိမ်းယူခဲ့ကြောင်း၊ မည်သည့်အတွက် သိမ်းသည်ကို မသိရကောင်း၊ သိမ်းပြီးနောက် မည်သည့်စီမံကိန်းမှမလုပ်ဘဲ ကုမ္ပဏီအဆင့်ဆင့် လက်လွှဲပေးခဲ့ပြီး ယခု စစ်တပ်ပိုင် ဦးပိုင်ကုမ္ပဏီက ရယူထားကြောင်း လယ်သိမ်းခံလယ်သမားတစ်ဦးဖြစ်သူ ဦးသန်းဝင်းက ပြောသည်။

၂၀၁၂ ခုနှစ်က ပြဋ္ဌာန်းခဲ့သည့် လယ်ယာမြေဥပဒေအရ သိမ်းဆည်းပြီးမြေတွင် လေးနှစ်အကြာထိ မည်သည့် စီမံကိန်းမျှ စတင်ခြင်းမရှိပါက မူလပိုင်ရှင်သို့ပြန်လည်အပ်နှံရမည်ဟု ဥပဒေပါပြဌာန်းထားသည်။

အဆိုပါမြေယာအငြင်းပွားမှုကို ကျောက်တန်းမြို့နယ် လယ်ယာမြေနှင့်အခြားမြေများ သိမ်းဆည်းခံရမှုများပြန်လည် စိစစ်ရေးအဖွဲ့က စစ်ဆေးနေပြီး ရဲတပ်ဖွဲ့၏ လုပ်ဆောင်ချက်အပေါ် “အင်မတန်စိတ်ပျက်မိ”ကြောင်း ကျောက်တန်းမြို့နယ် ပြည်သူလွှတ်တော်ကိုယ်စားလှယ် ဒေါ်အေးမြမြမျိုးက Myanmar Now ကိုပြောသည်။

“လူတွေကို ၅၀၀၀၊ ၈၀၀၀ နဲ့ငှားနေပြီဆိုကတည်းက အချေအတင်ဖြစ်တော့မယ်ဆိုတာ သိတယ်။ အဲ့လိုတွေဖြစ်ကတည်းက ကျွန်မမြို့နယ်မှူးကိုတွေ့တယ်။ သူတို့တွေဒီလိုတွေငှားရမ်းလာကြပြီ။ သူတို့ဆီမှာ ဓါးတွေလည်းပါတယ်ပြောတယ်။ ဒါပေမယ့် မြို့နယ်မှူးက လုပ်ငန်းသုံးပစ္စည်းပါဆိုပြီးပြောတယ်။ ဖြစ်သွားတာတော့ ညနေပိုင်းပေါ့ ကြိုးစားခဲ့ပေမယ့် ကျွန်မလည်းမတတ်နိုင်လိုက်ဘူး” ဟု ၎င်းကပြောသည်။

မြန်မာနိုင်ငံရဲတပ်ဖွဲ့သည့် ထိုဖြစ်စဉ်နှင့်တစ်နေ့တည်းဖြစ်ပွားခဲ့သည့် တာမွေလမ်းဆုံ ငြိမ်းချမ်းရေးဆန္ဒပြပွဲတွင် လည်း အရပ်ဝတ်များကိုသုံးကာ ဆန္ဒပြသူများကို ရိုက်နှက်ဖမ်းဆီးခဲ့ခြင်းကြောင့် ဝေဖန်ခံနေရသည်။
0