မောင်စွမ်းရည် ● ရုရှားပညာရှင် ယီဂေါမိုဇွင်ရေးတဲ့ အောင်ဆန်း

မောင်စွမ်းရည် ● ရုရှားပညာရှင် ယီဂေါမိုဇွင်ရေးတဲ့ အောင်ဆန်း 
(မြန်မာပညာရှင် ဦးဝင်းခင် ဘာသာပြန်)
(မိုးမခ) ဇွန် ၁၆၊ ၂၀၁၈

ဗမာပြည်မှာ အောင်ဆန်းအတ္တုပ္ပတ္တိ စာအုပ်တွေ အများကြီးရှိပါတယ်။ ပြည်သူချစ်တဲ့၊ ကမ္ဘာချစ်တဲ့လွတ်လပ်ရေးတိုက်ပွဲဝင် အမျိုးသားခေါင်းဆောင်အဖြစ်နဲ့ အောင်ဆန်းအကြောင်းကို ရေးလို့မဆုံး၊ ဖတ်လို့ မဝနိုင်ကြပါ။ ပြည်သူလူထုအများစုက တော့ ဗိုလ်ချုပ်အောင်ဆန်းလို့ပဲ ဒီနေ့အထိခေါ်တွင်နေကြဆဲ ဖြစ်ပါတယ်။ အောင်ဆန်းကို မြန်မာတနိုင်ငံလုံးနဲ့ တကမ္ဘာ လုံး သိရှိကျော်ကြားသွားစေခဲ့တာက အရှေ့တောင် အာရှ ဗြိတိသျှအင်ပါယာအတွင်းမှာ နိုင်ငံငယ်လေးတခုက နယ်ချဲ့ဗြိတိသျှ ကိုရော၊ နောက်ထပ်ကျူးကျော်အပိုင်စီးလာသူ ဖက်ဆစ်ဂျပန်ကိုရော ပြောင်မြောက်စွာမောင်း ထုတ်တော်လှန်ခဲ့တဲ့ ဗမာ့မျိုး ချစ်တပ်မတော် ဗိုလ်ချုပ်အဖြစ်နဲ့မို့ပါ။ ဗမာ့တပ်မတော်သားတွေက သူတို့ခေါင်းဆောင်ကို ဗိုလ်ချုပ်လို့ခေါ်တွင်ခဲ့ရာက ဗမာ ပြည်သူလူထုတရပ်လုံးကပါ ဗိုလ်ချုပ်လို့ လေးစားချစ်ခင်စွာ ခေါ်တွင်လာခဲ့ကြတာဖြစ်ပါတယ်။ နောက်ပေါက် ဗိုလ်ချုပ်တွေနဲ့ မရောပါဘူး။

ဗိုလ်ချုပ်အောင်ဆန်းကို ပုံပြင်၊ ကဗျာ၊ သီချင်း၊ ဝတ္ထု၊ အတ္ထုပ္ပတ္တိဆောင်းပါး၊ ပြဇာတ် စသည်ဖြင့်စာပေပုံစံအမျိုးမျိုးနဲ့ ရေးသားဖွဲ့ဆိုဖော်ကျူးခဲ့ကြပါတယ်။ နိုင်ငံတကာကလည်း ကမ္ဘာသိခေါင်းဆောင်တဦးအဖြစ် ဘာသာပြန်ကြ၊ သုတေသနပြု ရေး သားထုတ်ဝေကြ စသည်ဖြင့် လုပ်ခဲ့၊ လုပ်ဆဲဖြစ်ပါတယ်။ တချို့နိုင်ငံကြီးတွေက နိုင်ငံတကာခေါင်းဆောင် အတ္ထုပ္ပတ္တိစာစဉ်အဖြစ်စာအုပ်ထုတ်ဝေကြပါတယ်။ သြစတြေးလျကပြုစုထုတ်ဝေတဲ့ အောင်ဆန်းစာအုပ်တအုပ်ကို ဗမာပြည်မှာ ဒေါင်းအိုးဝေ စာပေတိုက်က ဘာသာပြန်ထုတ်ဝေခဲ့ပြီး ဖြစ်ပါတယ်။ ခု ဦးဝင်ခင်ဘာသာပြန်ပြီး မန္တလေး ကြီးပွားရေးစာအုပ်တိုက်က ထုတ် ဝေထားတဲ့အောင်ဆန်းစာအုပ်ဟာ ဆိုဗီယက်ရုရှားနိုင်ငံက နိုင်ငံခေါင်းဆောင်အတ္ထုပ္ပတ္တိစာစဉ်အဖြစ် ထုတ်ဝေထားတဲ့ စာအုပ်အမျိုးမျိုးတွေထဲက တအုပ်ဖြစ်ပါတယ်။  သူတို့ဆီမှာ ဒီလိုစာစဉ်ထုတ်ဝေတာကို ၁၉၃၃-၈ ကစတင်ခဲ့ပြီး ဒီစာအုပ် ကိုတော့ ၁၉၆၅ က ထုတ်ဝေခဲ့ပါတယ်။ ဗမာပြည်ကိုလည်း ဆိုဗီယက်သံရုံးကတဆင့် ချက်ချင်းပို့ပေးခဲ့မှာ ဖြစ်ပါတယ်။ ဒီစာအုပ်ကို ဆရာစိန်ခင်မောင်ရီက လက်ဆောင်ရခဲ့ဟန်တူပါတယ်။ ဆရာစိန်ခင်မောင်ရီနဲ့ မောင်စွမ်းရည်က အိမ်နီးချင်းပါ။ လမ်းပေါ်ထွက်ကြရင် နေ့စဉ်ကိုတွေ့ဆုံနိုင်ကြပါတယ်။ ကမာရွတ်၊ လှည်းတန်း၊ အာတီးယားလမ်းထဲမှာ တလမ်းတည်းနေကြ တာပါ။ လမ်းနာမည်က ခုတော့ ပြောင်းထားပါပြီ။ (နာမည်မမှတ်မိတော့ပါ)။ တနေ့မှာ ထုံးစံအတိုင်း ဖြတ်သွားဖြတ်လာ နဲ့တွေ့ကြလို့ သူက သူမဖတ်တတ်တဲ့ ရုရှားစာအုပ်တအုပ်ကို ကျွန်တော်ယူမလားဆိုပြီး လက်လွှဲပေးခဲ့ပါတယ်။ ကျွန်တော့် အပေါင်းအသင်းတွေထဲမှာ ရုရှားစာတတ်သူတွေ တော်တော်များများရှိနေတာကြောင့် (ကိုယ်မတတ်ပေမယ့်) ယူထားလိုက် ပါတယ်။ သူငယ်ချင်း မောင်ဝင်းခင် ရုရှားကပြန်လာတော့ သူ့ကိုပေးပြီး ဘာသာပြန်နိုင်ခဲ့တာဖြစ်ပါတယ်။

မောင်းဝင်းခင်ဆိုတာ နာမည်ရင်းက မောင်ဝင်းပါ။ တက္ကသိုလ်ရောက်မှ ခင်တလုံးတိုးနေတာ သတိထားမိပါတယ်။ သူက မြင်းခြံသားပါ။ ကျွန်တော်နဲ့ ကျောင်းနေဖက်ပါ။ မြင်းခြံမြို့မှာ အစဉ်အဆက် ဂါးဗားမင်းကျောင်းကြီးလို့ ခေါ်တွင်ခဲ့တဲ့ ကျောင်း ကြီးဟာ လွတ်လပ်ရေးရပြီးတော့ အမှတ် (၁) အစိုးရအထက်တန်းကျောင်း ဖြစ်လာပါတယ်။ ၁၉၅ဝ လောက်မှာ ဂါးဗားမင်း ကျောင်းကြီးကို သူနဲ့ကျတော်အတူတူရောက်ပြီး ပဉ္စမတန်းက စတင်တက်ရောက်ခဲ့ကြပါတယ်။ သူက မြို့ကျောင်းက ပြောင်းလာသူပါ။ ကျတော်ကတော့ ကျေးလက်ကပြောင်းလာသူပါ။ သတ္တမတန်းမှာ သင်္ချာ၊ အင်္ဂလိပ်စာ၊ သိပ္ပံ အမှတ်ကောင်း လို့ မန္တလေး အမှတ် (၁) အစိုးရအထက်တန်းကျောင်းမှာ တွဲဖက်ဖွင့်ထားတဲ့ Pre Medical Class အကြိုဆေးသင်တန်းကို တက်ရောက်ဖို့ အတူရွေးချယ် ခံရပါတယ်။ ၁၉၅၃ က ၁၉၅၅ ထိ ၂ နှစ် အတူနေခဲ့ရပါတယ်။ စာပေဝါသနာပါသူချင်း ဖြစ်လို့ မောင်ဝင်းခင်နဲ့ မောင်ဝင်းဖေ (မောင်စွမ်းရည်) တို့နှစ်ဦး အထူးတွဲဖက်မိခဲ့ကြပါတယ်။ ၁ဝ တန်းအောင်ရင် တနှစ်ကျော်ပြီး ဆေးကျောင်းကူးဖို့ဖြစ်ပေမယ့် နှစ်ယောက်လုံး စာမေးပွဲကျလို့ ပြန်ဖြေခဲ့ရပါတယ်။ ၁၉၅၆ မှာ အတူအောင်ကြပြန်လို့ မန်း တက္ကသိုလ်ကို အတူရောက်ခဲ့ပြန်ပါတယ်။ တက္ကသိုလ်ရောက်စမှာပဲ ကမ္ဘာ့ကျောင်းသားများသမဂ္ဂရဲ့ ရွေးချယ်ခံရပြီး ဝင်းခင် ဟာ ရုရှားကို ပညာသင်သွားရပါတယ်။

သူ နိုင်ငံရပ်ခြားရောက်တော့ ကျွန်တော့်ဆီ စာမပြတ်ရေးပါတယ်။ ကျွန်တော် အမျိုးသားစာပေဆုရတဲ့ အနီနဲ့အပြာ ကဗျာစာ အုပ်ထဲက ကဗျာအနည်းငယ်ကို ရုရှား ဘာသာပြန်ဆိုဖို့ တောင်းလို့ ကျွန်တော် ပို့ပေးရပါတယ်။ ရုရှားက စာနယ်ဇင်းတွေထဲမှာ ထည့်သွင်းဖော်ပြဖို့ပါ။ မောင်ဝင်းခင်ဟာ မော်စကိုမှာ နှစ်အတော်ကြာနေခဲ့ရပြီး ၁၉၇ဝ ကျော်မှ ပြန်လာခဲ့ပါတယ်။ မဟာဝိဇ္ဇာ ဘွဲ့နဲ့ညီတဲ့ ဘာသာသိပ္ပံဆိုင်ရာ ဘွဲတခုရရှိခဲ့သတဲ့။ မော်စကိုပြန်လက်ဆောင်အဖြစ် ကျွန်တော့်ဇနီးဖို့ လက်ပတ်နာရီ တလုံးပါလာခဲ့ ပါတယ်။ ကျွန်တော့်ဇနီးကလည်း သူနဲ့ကျောင်းနေဖက်ပါပဲ။ ရုရှားကပြန်လာပြီးတော့ နိုင်ငံခြားဘာသာ စကားသင်ကျောင်း (အဲဒီကာလက တက္ကသိုလ်အဆင့်မရောက်သေးပါ) မှာ ရုရှားဘာသာသင်ဆရာအဖြစ် အလုပ်ရခဲ့ပါတယ်။

မောင်ဝင်းခင်ဟာ နိုင်ငံခြားဘာသာစကားသင်ကျောင်း ရုရှားဘာသာစကားသင် ဆရာအဖြစ်လုပ်နေဆဲမှာ ခြေဖျား၊ လက် ဖျားတွေ သွေးမလျှောက်တဲ့ရောဂါ (Gangrene) ဖြစ်လာလို့ အလုပ်ကထွက်ပြီး မြင်းခြံကိုပြန်ပါတယ်။ မြင်းခြံမှာ သူနာ ပြုဆရာမ မမြမေနဲ့ အိမ်ထောင်ကျပါတယ်။ မမြမေက စာပေသမားပါ။ မောင်ဝင်းခင်ကိုလည်း စာပေသမားအဖြစ် လေး စားခင်မင်ရှာတာပါ။ မမြမေမှာ အလွန်ချစ်တဲ့ သူငယ်ချင်းသူနာပြုဆရာမ တယောက်ရှိပါတယ်။ သူကလည်း စာပေသမားပါပဲ။ စာတွေ၊ ဘာတွေရေးနေသူပါ။ စာရေးဆရာ မောင်စည်သူ (ကွယ်လွန်) ရဲ့ သမီးလား၊ တူမလားမသိ။ ဒဂုန်တာရာရဲ့ တူမပါ။ သူတို့အတွဲဟာ ရန်ကုန်မှာသူနာပြုသင်တန်းတက်နေစဉ်ကာလာမှာ ကဗျာ ဆရာတင်မိုးအိမ်ကို အလည်လာနေကြမို့ ကျွန် တော်နဲ့လည်း တွေ့မြင်၊ ခင်မင်နေကြသူတွေပါ။ တင်မိုးအိမ်ကို ရှမ်းပြည်ကနေပြီး ရန်ကုန်ပညာရေးတက္ကသိုလ်ကိုလာပြီး သင်တန်းတက်နေတဲ့ ကိုမောင်မောင်သန်း၊ အင်းလေး မောင်တင်မြိုင်၊ အောင်ပန်း ကိုမြင့်သန်း၊ အင်းလေး ကိုခင်မောင်အေး စတဲ့ကျောင်းသားတွေလည်း ညနေဆိုရင် လာလည်တတ်ပါတယ်။ အဲဒီထဲက ကိုမြင့်သန်းဆိုတဲ့ကျောင်းဆရာတဦးနဲ့ သင်းမြ စန္ဒီနဲ့ငြိပါတယ်။ သင်းမြစန္ဒီက ညီအစ်မနှစ်ယောက်တည်း တောင်ဥက္ကလာပ သေနတ်ပစ်ကွင်းအနီးမှာ နေကြတာပါ။ ဆရာ ဒဂုန်တာရာကလည်း ကောလိပ်ဂျင်နေဝင်းတို့အိမ်နေရာက သင်းမြစန္ဒီတို့အိမ် ပြောင်းပြီးနေလာပါတယ်။ သင်းမြစန္ဒီက အောင်ပန်း ကျောင်းဆရာကိုမြင့်သန်းရှိရာကို လိုက်ပြောင်းတော့ မမြမေကလည်း မောင်ဝင်းခင်ကို ဆေးကုရင်း ရာသီဥတု ကောင်းတဲ့ အောင်ပန်းကို လိုက်ပြောင်းပါတယ်။ မောင်ဝင်းခင်က အင်းလေးကန်တဘက်ကမ်းက ဆေးပင်တမျိုးနဲ့ ဆေးကု နေသလိုလို ကြားသိရပါတယ်။ အောင်ပန်းဆိုတော့ အင်းလေးနဲ့နီးတယ်ဆိုရမှာပေါ့။ အောင်ပန်းမှာ ဆီ၊ ဆန် စသည် အိမ် ဆိုင် လေးဖွင့်နေတာတွေ့ရပါတယ်။ ကျွန်တော်ကစာပေဟောပြောပွဲတခုသွားရင်း အောင်ပန်းကို ဆရာတာရာနဲ့တွေ့ရအောင် ဝင်တော့ မောင်ဝင်းခင်နဲ့ပါ တွေ့လာခဲ့ရတာပါ။ အဲဒီမှာ မောင်ဝင်းခင်နဲ့ကျွန်တော်တို့ ပြန်လည်ဆက်သွယ်မိကြပါတယ်။ ဒါပေမဲ့ နောက်ဆုံးတွေ့ဆုံခြင်းပါ။

မောင်ဝင်းခင်ဟာ ဇွဲကောင်းသူပါ။ သူမကျန်းမာတဲ့ကြားက အောင်ဆန်းစာအုပ်ကို ပြီးအောင်ဘာသာပြန်ခဲ့ရှာပါတယ်။ မြန်မာ စာကျွမ်းကျင်သူ စာပေသမားဆိုတော့ သူ့ဘာသာပြန်စာအရေးသားကလည်း ညက်လိုက်တာ။ အထူးပြောစရာမရှိ၊ ဦးသြ ဘာ တပည့်၊ နဖူးကြောသာကြည့်ဆိုသလိုပါပဲ။ ဘာသာပြန် အောင်ဆန်းစာမူရောက်လာတော့ ချစ်ဦးညိုရဲ့တူလေး ထုတ်ဝေ သူလုပ်နေတာရှိလို့ သူ့ကိုစာမူပေးပြီး စာအုပ်ထုတ် ခိုင်းခဲ့ပါတယ်။ ကံဆိုးချင်တော့ စစ်အစိုးရက စစ်တပ်တည်ထောင်သူ၊ တပ်မတော်ဖခင်လို့အမည်တွင်တဲ့ ဗိုလ်ချုပ်အောင်ဆန်းအကြောင်းကိုတောင် ထုတ်ဝေခွင့်မပြုတော့ပါဘူး။ နောက်ပိုင်းတော့ ဗိုလ်ချုပ်မဟုတ် မောင်စွမ်းရည်ကိုလည်း စာနယ်ဇင်းတွေမှာ နာမည်ဖော်ပြခြင်းမပြုရလို့ အမိန့်ထုတ်ခြင်းခံခဲ့ရပါတယ်။ ဒီလိုနဲ့ ဒီစာအုပ်ဟာ နှစ်ပေါင်း ၂ဝ လောက် ကြာသွားခဲ့တယ်ထင်ပါရဲ့။ စစ်အစိုးရ ၇၅ ရာနှုန်းဆုတ်သွားလို့ စာပေစိစစ် ရေးမရှိတော့ ဘူးဆိုတဲ့ကာလကျမှ မောင်ဝင်းခင်ရဲ့သားလေးကို ကွယ်လွန်သူ သူ့မိဘများက ဘယ်လိုမှာကြားခဲ့သလဲမသိ။ မောင်ဝင်းခင် ရဲ့ အောင်ဆန်း ပြန်ပေးပါ။ စာအုပ်ထုတ်မယ်လို့ အမေရိကားရှိ ကျွန်တော့်ဆီကို လှမ်းတောင်းပါတယ်။ ကျွန်တော်က ချစ်ဦး ညိုရဲ့တူလေးဆီညွှန်းလိုက်တော့၊ သူကလည်း ရိုရိုသေသေသိမ်းထားလို့ပေါ့။ ချက်ချင်းပဲ ပြန်ပေးလိုက်ပါတယ်။ ကျေးဇူးတင် စရာ ကောင်းလိုက်တာ။

ဒီစာအုပ်ကို ထုတ်ဝေရေးကို ကြားဝင်ကူညီသူက စာရေးဆရာ ညီစေမင်းပါ။ နာမည်ရင်းက ကျော်ဇံလှတဲ့။ မြင်းခြံသားပါ။ သူက ကိုကိုးကျွန်း အစာငတ်ခံဆန္ဒပြပွဲမှာ အသက်စွန့်သွားခဲ့သူ ကဗျာဆရာလေး ဇော် (မြင်းခြံ) ရဲ့ ညီပါ။ လေးမောင်နဲ့ မောင်ဝင်းခင် တို့က မူလတန်းကနေ တက္ကသိုလ်ထိကျောင်းနေဖက် သူငယ်ချင်းတွေပါ။ ဒါ့ကြောင့် မောင်ဝင်းခင်ရဲ့သားလေးကို မြင်းခြံသားချင်း ကူညီတာပါ။ ညီစေမင်းက လူထုကြီးပွားရေးစာအုပ်တိုက်ကို ပေးအပ်ထုတ်ဝေစေတော့ စာအုပ်ကလည်း သပ်သပ်ရပ်ရပ် ထွက်လာခဲ့ပါတယ်။ လူထုကြီးပွားရေးတိုက်က ထုတ်ဝေတာကိုများ သွားလေသူမောင်ဝင်းခင် သိရင် အလွန်ဝမ်းသာရှာမယ်။ သူငယ်ချင်းရေ ခု မင်း ဘာသာပြန်တဲ့ အောင်ဆန်း ထွက်နေပါပြီ။

အောင်ဆန်းစာအုပ်တွေကတော့ အများကြီးထွက်ဖူးခဲ့ပါပြီ။ ဒီစာအုပ်ကတော့ ထုတ်ဝေဖူးသမျှ အောင်ဆန်းစာအုပ်ပေါင်းစုံကို ဖတ်ရှုမှီငြမ်းပြီးပြုစုထားတာပါ။ ထူးဆန်းတာက အောင်ဆန်းစာအုပ်တွေ မဟုတ်တဲ့စာအုပ်တွေပါ ကိုးကာထားတာပါ။ ဥပမာ ဗမာပြည် အောင်ဆန်းဘုရင်ခံရဲ့ဇနီးရေးခဲ့တဲ့ စစ်ပြေးမှတ်တမ်း ဒိုင်ယာရီဟာမျိုးကို ကိုးကားရေးသားထားတာမျိုးတွေပါ ပါရှိပါတယ်။ ဘာသာပြန်ကလည်းကောင်းတော့ ဖတ်လို့မငြီးပါ။ ခု သူ့စာအုပ်အကြောင်းရော၊ သူ့အကြောင်းပါ သူ့သူငယ်ချင်း က ရေးနေတာကို သိရရင် သိပ်ဝမ်းသာရှာမှာ။ သူငယ်ချင်းရေ မင်း စာအုပ်ကလေးကို ငါတို့ မြင်းခြံသား ငယ်သူငယ်ချင်းတစုက ကြိုးစားထုတ်ဝေလိုက်ပါပြီ။ ဒီအတွက် ငါတို့ဂုဏ်ယူ ဝမ်းမြောက်ကြရကြောင်း ဖော်ပြကြွေးကြော်လိုက်ပါတာဟေ့။

သူငယ်ချင်း မောင်စွမ်းရည်
၂ဝ၁၈၊ ဧပြီ ၂၇

Comments