မောင်လူပေ - မြန်မာ့ မူးယစ်ရာဇာ(၁)


မောင်လူပေ - မြန်မာ့ မူးယစ်ရာဇာ(၁)
(မိုးမခ) သြဂုတ် ၂၅၊ ၂၀၁၈

ဟုတ်ကဲ့။ မူးယစ်ရာဇာပါ။ မူးယစ်ဆေးများ၏ ဘုရင်ပေါ့။ မူးရင် ရစ်တဲ့ မူးရစ်ရာဇာမဟုတ်။

မူးယစ်ရာဇာတွေက အများသား။ သူ့ခေတ်နှင့်သူ မူးယစ်ဆေးကလည်း မျိုးစုံ။ ကျွန်တော်တို့ခပ်ငယ်ငယ်ကတော့ နံပါတ်ဖိုးခေါ် ဘိန်းဖြူခေတ်။ အတော်ငွေကြေးပြည့်စုံသူမှ အနားကပ်လို့ရတဲ့ မူးယစ်ဆေး။ ဈေးကြီးသဖြင့် သာမန်လူတန်းစား မတတ်နိုင်။ နာမည်ကျော် အနုပညာရှင်တွေအများကြီး ဘိန်းဖြူသားကောင်ဖြစ်ခဲ့ကြသည်။ တစ်ချို့လည်း အဖမ်းခံရလို့ ထောင်ထဲရောက်။

ကမ္ဘာကျော် မူးယစ်ရာဇာကြီးတွေ ရှိခဲ့သည်။ ကိုလံဘီယာမှ ပါဘလို အက်စ်ကိုဘာတို့ဆိုရင် သူ့ခေတ်က ဒေါ်လာဘီလီယံပေါင်း သုံးဆယ်ကျော်အထိ ချမ်းသာခဲ့သည်။ ယခုခေတ်ဒေါ်လာနှင့်ဆိုလျှင် (၅၆)ဘီလီယံမျှရှိသည်။ ထောင်ထဲရောက်နေတဲ့ မူးယစ်ရာဇာကြီး အယ်လ်ချာပို ဆိုလည်း တစ်နှစ်ဝင်ငွေ တစ်ဘီလီယံရှိသည်တဲ့။

မြန်မာပြည်က မူးယစ်ရာဇာတွေလည်း မခေ။ မူးယစ်ရာဇာတို့၏ ထုံးစံအတိုင်း တောတွင်းလက်နက်ကိုင်တွေ။ မြန်မာ့မူးယစ်ရာဇာတို့၏ နံပါတ်ဝမ်းကြီးဖြစ်သော ဘိန်းဘုရင်လော်စစ်ဟန်ဆိုတာလည်း ကမ္ဘာကျော်ပဲ။ သူကကိုးကန့် ကာကွယ်ရေးတပ်ဖွဲ့ ဟု အမည်ရသည့် ကိုးကန့်ပြည်သူ့စစ်ခေါင်းဆောင်။ ရှမ်းပြည်ကိုအခြေစိုက်နေတဲ့ ဗကပများကို တိုက်ဖို့ ဗိုလ်ချုပ်ကြီးနေဝင်းက သူနှင့် မဟာမိတ်ပြုခဲ့ရာမှ မြန်မာ့တပ်မတော်နှင့် ရင်းနှီးခဲ့သည်။

ရှမ်းပြည်နယ် ရွှေတြိဂံဒေသဆိုတာ ဘိန်းထွက်တဲ့ နေရာ။ သူ့တပ်တွေရပ်တည်ရေးအတွက် ဘိန်းကုန်ကူးသည်။ သူအဓိက ပို့ချင်တာက အနောက်နိုင်ငံများ။ ဒီတော့ ထိုင်းကိုဖြတ်ပြီး ပို့ရသည်။ ၁၉၆၃မှ ၁၉၇၃အထိ ဆယ်နှစ်အတွင်း ဘိန်းဖြူ တန်နှစ်ဆယ်ကျော်မျှ ပို့ခဲ့သည်။နယ်မြေခံအစိုးရစစ်တပ်မှ တပ်မှူးကြီးများကို ဆက်ကြေးပေးပြီး ဖြတ်သန်း၊ ပြည်တွင်း ပြည်ပ ဖြန့်ဖြူး။

သူဘိန်းဘုရင်လုပ်ခဲ့ရတာ သွားလာရေးခက်ခဲလှသော တောင်ပေါ်ဒေသမှ ကိုးကန့်ပြည်သူများအတွက်ဟု ဆိုသည်။ ဆင်းရဲလှသောနယ်သားများ၏ ထွက်ကုန်များကို ရောင်းချနိုင်အောင် ကူညီပေးခဲ့သည်ဟု ဂုဏ်ယူခဲ့သည်တဲ့။ အမေရိကန်အစိုးရက ဖိအားပေးတော့ ထိုင်းရဲက သူ့ကိုဖမ်းပြီး မြန်မာအစိုးရလက်ကို ၁၉၇၃မှာ အပ်ခဲ့သည်။

သူ့ကိုဖမ်းပြီး အမှုစစ်တော့ မြန်မာ့တပ်မတော်ကို ပေးကမ်းခဲ့ရသမျှ ဘူးပေါ်သလိုပေါ်တော့ တပ်မှူးကြီးတွေ တစ်ယောက်ပြီးတစ်ယောက်ပြုတ်ကြသည်။ ပထမပိုင်းမှာ သတင်းစာက အမှုအကြောင်း ဖေါ်ပြခဲ့သော်လည်း မြန်မာ့တပ်မတော်မှ တပ်မှူးများ ပတ်သက်နေ၍ နောက်ပိုင်းတွင် သတင်းစာမှာ မထည့်တော့။ သေဒါဏ်ကျခံစေအမိန့်ချခဲ့သည်။ သို့သော် တပ်မတော်နှင့် မကင်းရာမကင်းကြောင်းလည်းဖြစ်၊ ဗကပကို ဆန့်ကျင်သူလည်းဖြစ်၊ တိုင်းရင်းသားတပ်တစ်ခု၏ ခေါင်းဆောင်လည်း ဖြစ်နေလေတော့ ၁၉၈၀လောက်မှာ လွတ်ငြိမ်းချမ်းသာခွင့်နှင့် ပြန်လွှတ်ပေးခဲ့သည်။

၁၉၈၈ အရေးတော်ပုံကြီးအပြီး ၁၉၈၉ မှာ ဗကပပြိုကွဲဖို့ သူက အများကြီး ကူညီခဲ့သူပါပဲ။ ကိုးကန့်ခေါင်းဆောင်ကြီး ဖြစ်ခဲ့သူမို့ သြဇာရှိလေတော့ လက်ရှိကိုးကန့်တပ်၏ခေါင်းဆောင် ဦးဖုန်ကျားရှင်ကို နားချပြီး ဗကပမှခွဲထွက်စေသည်။ ဝခေါင်းဆောင် ဘိန်းဘုရင်တွေကလည်း သူ့အကူအညီနှင့်ပင် ဗကပနှင့်ခွဲထွက်ကာ တပ်မတော်နှင့် ပူးပေါင်းကြသည်။ ဒီလိုဖြစ်လာဖို့ ဗိုလ်ချုပ်အောင်ကြီးက ကြားဝင် စေ့စပ်ပေးခဲ့သည်တဲ့။

မြန်မာ့တပ်မတော်နှင့် ဘိန်းဘုရင်ကြီး ဦးလော်စစ်ဟန်တို့၏ ပတ်သက်မှုက အကြီးကြီး။ သူ့အကူအညီတွေက ဤမျှသာမဟုတ်။ အာဏာသိမ်းစ ငွေကြေးအခက်တွေ့နေသော စစ်ခေါင်းဆောင်တွေအတွက်လည်း သူပိုင်သောငွေများနှင့် ကူညီခဲ့သည်။ ကြီးမားသော ရင်းနှီးမြှုတ်နှံမှုတွေ လုပ်ခဲ့သည်။ ၁၉၉၀မှာ ထင်ပေါ်လာတဲ့ "အေးရှားဝေါ" ကုမ္ပဏီကြီးက သူ၏ အင်ပါယာကြီးပါပဲ။ ဘိန်းမှရသောငွေများကို တိုင်းပြည်တိုးတက်ရေးအတွက် ကူညီခဲ့သည့် သူ့ကျေးဇူးတွေကို မြန်မာ့တပ်မတော်ကြီးကလည်း မမေ့ခဲ့ပါ။ အခမ်းအနားကြီးတွေမှာ သူ့ကိုဖိတ်ခေါ်ဂုဏ်ပြုခဲ့ပါသည်။ သူကလည်း ဗိုလ်ချုပ်ကြီးတွေကို စီးပွားရေးအကြံဉာဏ်တွေ အများကြီး ပေးကာကူညီခဲ့သည်။

ဒီလိုနှင့်ပင် အမေရိကန်အစိုးရ၏ FBI Most wanted list တွင် နံပါတ်လေးနေရာအထိ ဖေါ်ပြခံခဲ့ရဖူးသော၊ အပြည်ပြည်ဆိုင်ရာမှ အထူး ဖမ်းဆီးလိုလှသော မြန်မာ့ဘိန်းဘုရင်ကြီးမှာ မြန်မာ့တပ်မတော်နှင့် အကျိုးစီးပွားခြင်းထပ်တူညီမှုကြောင့် ဘေးမသီ ရန်မခပဲ အေးချမ်းစွာ နေထိုင်နိုင်ခဲ့သည်။ ၂၀၁၃ရောက်မှ လူကြီးရောဂါဖြင့် ရန်ကုန်မြို့တွင် ကွယ်လွန်ခဲ့ပါသည်။
0