မောင်မောင်စိုး - ၂၀၁၈ ကြားဖြတ်ရွေးကောက်ပွဲနှင့် အလေးထားသုံးသပ်ဖွယ်ရာများ

မောင်မောင်စိုး - ၂၀၁၈ ကြားဖြတ်ရွေးကောက်ပွဲနှင့် အလေးထားသုံးသပ်ဖွယ်ရာများ
(မိုးမခ) အောက်တိုဘာ ၂၆၊ ၂၀၁၈

၂၀၁၈ ခုနှစ် နှစ်ကုန်ပိုင်းတွင် မြန်မာပြည်၌ ကြားဖြတ်ရွေးကောက်ပွဲတခု ကျင်းပမည်ဖြစ်သည်။ ၂၀၁၅ ရွေးကောက်ပွဲနောက်ပိုင်း ဒုတိယအကြိမ် ပြုလုပ်သည့် ကြားဖြတ်ရွေးကောက်ပွဲဖြစ်ပြီး နေရာ ၁၃ နေရာအတွက် ရွေးကောက်ပွဲဝင်ကြမည်ဖြစ်သည်။ ထိုနေရာ ၁၃ နေရာတွင် ၂၀၁၅ ရွေးကောက်ပွဲကာလ NLD ပါတီမှ ၁၁ နေရာ အနိုင်ရထားခဲ့သည်။ ရွေးကောက်ပွဲကျင်းပ မည့် နေရာ ၁၃ နေရာမှာ အောက်ပါအတိုင်းဖြစ်ပါသည်။

၁။ အမျိုးသားလွှတ်တော် - ကချင်ပြည်နယ် မဲဆန္ဒနယ် အမှတ် ၂
၂။ ပြည်သူ့လွှတ်တော် - ကန်ပက်လက်မြို့နယ်။ မြင်းခြံမြို့နယ်။တာမွေမြို့နယ်။ လဲချားမြို့နယ်။
၃။ ပြည်နယ်လွှတ်တော် - မတူပီ ၁ ။ တမူး ၂ ။ အုတ်တွင်း ၁။ မင်းဘူး ၂။ သပိတ်ကျင်း ၁ ။ ရသေ့တောင် ၂ ။ ဆိပ်ကမ်း ၂။
၎။ ရှမ်းတိုင်းရင်းသားရေးရာဝန်ကြီး( မန္တလေးတိုင်းဒေသကြီး) တို့ ဖြစ်ပါသည်။

အဆိုပါ မဲဆန္ဒနယ် ၁၃ ခုတွင် ၂၀၁၅ ရွေးကောက်ပွဲကာလက မဲပေးခွင့်ရှိသူ၊ မဲလာပေးသူနှင့် မဲပေးသည့်ရာခိုင်နှုံး၊ အနိုင်ရသည့် ပါတီတို့မှာ အောက်ပါအတိုင်းဖြစ်ပါသည်။



စဉ်     မဲဆန္ဒနယ် .           မဲပေးနိုင်သူလူဦးရေ      မဲပေးသူဦးရေ               (၂၀၁၅) နိုင်
၁။      ကချင် အမှတ်၂   ၁၇၈,၅၇၉                     ၁၂၁,၈၉၉ (၆၈.၂၆%)       NLD

၂။      ကန်ပက်လက်        ၁၁,၄၈၄                          ၉,၆၆၃ (၈၄.၁၄%)      NLD
၃။      မြင်းခြံ                  ၂၁၁,၀၄၃                    ၁၅၆,၄၉၈ (၇၄.၁၅%)       NLD
၎။      လဲချား                   ၃၅,၁၆၅                      ၁၉,၀၂၃ (၅၄.၁၀%)        SNLD
၅။      တာမွေ                   ၉၂,၉၈၇                     ၇၀,၈၆၈ (၇၆.၂၁%)        NLD
၆။      မတူပီ ၁                 ၁၆,၄၄၅                     ၁၂,၈၆၇ (၇၈.၂၄%)         NLD
၇။      တမူး ၂                  ၃၂,၁၅၈                     ၂၂,၉၂၆ ( ၇၁.၂၉%)         NLD
၈။      အုတ်တွင်း ၁         ၅၅,၂၇၉                      ၄၂,၀၂၈ (၇၆.၀၇%)         NLD
၉။      မင်းဘူး ၂             ၆၆,၀၂၉                       ၅၃,၇၉၉  (၈၁.၄၈%)        NLD
၁၀။    သပိတ်ကျင်း ၁    ၄၇,၆၃၃                       ၃၅,၈၇၁  (၇၅.၃၁%)         NLD
၁၁။    ရသေ့တောင် ၂   ၅၀,၁၃၁                        ၃၁,၂၄၅  (၆၁.၁၁%)        ANP
၁၂။    ဆိပ်ကမ်း               ၁,၅၅၂                              ၉၆၃  (၆၂.၀၅%)       NLD
၁၃။ ရှမ်းတိုင်းရင်းသားရေးရာဝန်ကြီး( မန်း)   ၃၉,၅၉၉ ၂၃,၆၉၇ (၅၉.၈၄%) NLD

ယခု ၂၀၁၈ ကြားဖြတ်ရွေးကောက်ပွဲနှင့်ပတ်သက်ပြီး စိတ်ဝင်စားဖွယ်၊ေ လ့လာသုံးသပ်ဖွယ်တို့မှာ အောက်ပါတို့ဖြစ်ပါသည်။

ပထမအချက်မှာ ရွေးကောက်ပွဲဝင်မည့် ၁၃ နေရာအနက် ၁၁ နေရာမှာ ၂၀၁၅ ရွေးကောက်ပွဲကာလက NLD အနိုင်ရရှိသည့် ဒေသများဖြစ်ခဲ့သည်။

ရှမ်းပြည်နယ် လဲချား၌ SNLD အနိုင်ရခဲ့ပြီး ရသေ့တောင် ၂ တွင် ANP ပါတီမှ အနိုင်ရခဲ့သည်။ လက်ရှိ ကြားဖြတ်ရွေးကောက်ပွဲတွင်လည်း အဆိုပါ ၂ နေရာ၌ NLD အနိုင်မရနိုင်ဟု NLD ခေါင်းဆောင်ပိုင်းကပါ တွက်ဆပြီးဖြစ်သည်။

NLD အတွက် အရေးပါသည်မှာ ၂၀၁၅ တုန်းက အနိုင်ရခဲ့သည့် ကျန် ၁၁ နေရာအား NLD အနေနှင့် ဆက်ထိန်းနိုင် မထိမ်းနိုင်ဖြစ်ပေသည်။

ဒုတိယအချက်မှာ ၂၀၁၈ ကြားဖြတ်ရွေးကောက်ပွဲအား လူထုစိတ်ဝင်စားမှု နှင့် မဲလာပေးမှု ဖြစ်သည်။

၂၀၁၅ ခုနှစ် ရွေးကောက်ပွဲကာလက ပြည် နယ်များမှအပ ကျန် တိုင်းဒေသကြီးများတွင် မဲလာပေးသည့် လူဦးရေသည် ၇၀% မှ ၈၀% ကျော်အထိရှိသည်။ တိုင်းရင်းသားဒေသ /ဝန်ကြီးများနှင့် ပတ်သက်၍ မဲပေးသည့်လူဦးရေမှာ ၆၀% ဝန်းကျင်သာရှိသည်။ ၂၀၁၅ ခုနှစ်ရွေးကောက်ပွဲကာလက အပြောင်းအလဲတခုအတွက် သိုက်သိုက်ဝိုင်းဝိုင်း မဲပေးကြခြင်းနှင့် မဲပေးသူလျော့ကျ ခြင်းသည် ရွေးကောက်ပွဲရလဒ်အား မည်သို့ထိခိုက်သည်သည်ကို သေချာစွာလေ့လာ သုံးသပ်ရန်လိုသည်။ တချိန်ထဲတွင် ၂၀၁၈ ခုနှစ် ကြားဖြတ်ရွေးကောက်ပွဲအား လုထုစိတ်ဝင်စားမှု လျော့ကျ ခြင်းသည် အဆုံးအဖြတ်မပေးနိုင်သည့် ရွေးကောက်ပွဲဖြစ်၍ လျော့ကျ ခြင်းလော သို့မဟုတ် အခြားအကြောင်းလော ဆိုသည်ကို လေ့လာသုံးသပ်ရန်လိုသည်။

တတိယအချက်မှ ရွေးကောက်ပွဲဝင်မည့် ၁၃ နေရာအနက် ၆ နေရာမှာ တိုင်းရင်းသားများနှင့်ပတ်သက်နေပြီး ထို ၆ နေရာအနက် ၂ နေရာမှာ ၂၀၁၅ ရွေးကောက်ပွဲကာလထဲက NLD ရှုံးနိမ့်ထားပြီး ယခုလည်း မနိုင်နိုင်ဟု NLD ခေါင်းဆောင်များကိုယ်တိုင်သုံးသပ်ထားရာ မထူးဆန်းသော်လည်း ကျန်တိုင်းရင်းသားပြည်နယ်နှင့် တိုင်းရင်းသားဝန်ကြီးနေရာ စုစုပေါင်း ၄ နေရာအား NLD မှ ဆက်ထိမ်းထားနိုင်ခြင်း ရှိမရှိမှာ စိတ်ဝင်စားဖွယ်ဖြစ်သည်။ တိုင်း ရင်းသားပါတီများ ပေါင်းစည်းလာခြင်း၊ တိုင်းရင်းသားပြည်နယ်များနှင့် ပတ်သက်၍ NLD ၏ ပေါ်လစီအား ဝေဖန်မှု များမြင့်တက်ချိန်တွင် ဤ အချက်သည် စိတ်ဝင်စားဖွယ်ဖြစ်သည်။

စတုတ္ထ အချက်မှာ ပထမအချက်တွင် ဖေါ်ပြထားသည့် မဲပေးမှု နှင့် စိတ်ဝင်စားမှု ကျဆင်းမှု နှင့်သက်ဆိုင်ပါသည်။ ဤသို့ကျဆင်းပါက ၂၀၁၅ က NLD အနိုင်ရထားသည် ၁၁ နေရာအနက် စစ်ကိုင်းတိုင်းဒေသကြီး ပြည် နယ်လွှတ်တော် တမူးမြို့နယ် အမှတ် ၂ နှင့် ရန်ကုန်တိုင်းဒေသကြီး ဆိပ်ကမ်းမြို့နယ် အမှတ် ၂ တို့တွင် NLD သည် USDP အား မဲမတိမ်းမယိမ်းနှင့် အနိုင်ရထားသည်ဖြစ်ရာ မဲပေးသူလျော့ကျပါက NLD အား ထိခိုက်နိုင်ခြင်းရှိမရှိ စိတ်ဝင်စားဖွယ်ဖြစ်သည်။

ပဉ္စမအချက်မှာ ရသေ့တောင် ပြည်နယ်လွှတ်တော်အမှတ် ၂ ၌ NLD သော်၎င်း ၊ USDP သော်၎င်း ပြည်မမှပါတီများ တိုးမပေါက်သော်လည်း ရခိုင်တိုင်းရင်းသားပါတီများ အပြိုက်အဆိုင် အကြိတ်အနယ် ယှဉ်ပြိုင်နေသည်ကိုတွေ့ရသည်။ ၂၀၁၈ ခုနှစ် ရသေ့တောင် ကြားဖြတ်ရွေးကောက်ပွဲရလဒ်သည် ရခိုင်နိုင်ငံရေးပါတီများအတွင်း ကြီးစွာသက်ရောက်မှု ရှိနိုင်သည်ဟု သုံးသပ်ရပါသည်။

ဆဌမအချက်အမှာ ပြည်မရှိ တိုင်းဒေသကြီး နေရာများတွင် NLD အနေနှင့် ဆက်လက်အနိုင်ရမည်ဟု တွက်ဆထားကြပြီး စိတ်ဝင်စားဘွယ်ရှိသည်မှာ မဲပေးသည့်ရာခိုင်နှုံးနှင့် ထောက်ခံသည့်ဦးရေဖြစ်ပေလိမ့်မည်။

ရွေးကောက်ပွဲနှင့်ဒီမိုကရေစီအပြောင်းအလဲအခြေအနေတွင် ၂၀၁၈ ကြားဖြတ်ရွေးကောက်ပွဲရလဒ်သည် ၂၀၂၀ ရွေးကောက်ပွဲအတွက်၎င်း မြန်မာ့နိုင်ငံရေးအနာဂါတ်အား တွက်ဆရာတွင်၎င်း အရေးပါနေပေလိမ့်မည်။


မောင်မောင်စိုး