စာပေတမန်- မြောက်ဘက်တောင်ကုန်းဒေသက လူရွယ်လေးတယောက်အကြောင်း( သို့မဟုတ် )

မြောက်ဘက် တောင်ကုန်းဒေသက 
လူရွယ်လေးတယောက်အကြောင်း(သို့မဟုတ် )
စာပေတမန်(မိုးမခစာအုပ်အညွှန်း)
(မိုးမခ) နိုဝင်ဘာ ၇၊ ၂၀၁၈

       
                            ( တစ် )

တခါတခါမှာ သူဟာ ကြမ်;ရှခက်ထန်နေတတ်ပြီး တခါတခါမှာတော့  သူဟာ ပျပ်ဝပ်ကျိုးနွံတဲ့ လူရွယ် တယောက် ဖြစ်နေပြန်တယ်။ တခါတလေကျတော့လည်း ချုပ်တီးမျိုသိပ်နိုင်လွန်းသောလူရွယ်လေး တယောက်အဖြစ် သူ့ကိုရှုမြင်နေရပြန်တယ်။
 
ဘာပဲပြောပြော သူ့ရဲ့အသွေးအသားထဲမှာ ယုန်တစ်ကောင်ရဲ့နူးညံ့သိမ်မွေ့မှုမျိုးနဲ့အတူ ရန်သူကို ကုတ်ခြစ် တိုက်ခိုက်ဖို့ဝန်မလေးတဲ့ နှင်းကျားသစ်တကောင်ရဲ့ ရဲရင့်အေးစက်မှုမျိုးလည်းရော ထွေးစိမ့်ဝင်နေခဲ့တာ တော့ အသေအချာ။
တွေ့ဖူးသမျှလူတွေထဲမှာ သူဟာလည်းပဲနီရိုးဘုရင်ရဲ့ ခေါင်းကိုတယောနဲ့ ရိုက်ခွဲလိုက်ချင်တဲ့ အနည်းငယ်မျှ သော လူနည်းစုထဲကတယောက်သောလူပါပဲ။

                          (  နှစ် )

အဖြစ်အပျက်တွေကို စုပ်ယူထားဖို့ အာရုံငါးပါးဟာ နိုးကြားလန်းဆန်းနေရမယ်။
အဖြစ်အပျက်တွေကို ဖောက်ချတဲ့နေရာမှာလည်းပဲ အာရုံတွေဟာ ရှင်းသန့်စင်ကြယ်နေရမယ်။ အဖြစ် အပျက်တွေဟာဖြစ်ပြီးမှ ပျက်တာလား။ ပျက်ပြီးမှ ဖြစ်တာလား။ ဖြစ်ချင်သလို ထထဖြစ်ပြီး ပျက်ချင်တဲ့ နေရာရောက်ရင် သူ့ဟာနဲ့သူပျက်ပျက်သွားတာလား။ အဖြစ်နဲ့အပျက်ကြားမှာ ဘာတွေများချိတ်ဆက်ထား တာရှိသေးလဲ။
အဖြသ်အပျက်တွေဟာ တခါတခါ သူနဲ့ အနီးဆုံးနေရာမှာ။ တခါတလေတော့ သူနဲ့သိပ်အလှမ်းကွာဝေးတဲ့ နေရာမျိုးမှာ။
တခါတခါမှာတော့ အဖြစ်အပျက်တွေထဲမှာ သူ့ကိုရှုမြင်ရလေ့ရှိပြီး တခါတလေမှာ သူဟာ အဖြစ်အပျက် တွေနဲ့ကင်းလွတ်နေတဲ့ဇုံထဲမှာ။
ဘာပဲပြောပြော အဖြစ်အပျက်တွေထဲက သူ့ရဲ့ဖြစ်တည်မှုကို စိတ်ဖြာကြည့်မယ်ဆိုရင် မူဆိုလိုနီလိုကို အား ပေးထောက်ခံခဲ့တဲ့ အက်ဇရာပေါင်းလို ကဗျာဆရာမျိုးမဟုတ်တာတော့ သေချာခဲ့။

                           (သုံး)

လူစီ၊ သူနေတာက လူသူအရောက် အပေါက်ကင်းတဲ့အရပ်များမှာ...
လွင့်လွင့်မျောမျောဖြစ်နေပြီဆို အစွဲအလမ်ကြီးခဲ့တဲ့ ကဗျာတွေကိုတိုးတိုးညင်ညင် လေးရွတ် နေတတ် တဲ့ သူငယ်ချင်းတစ်ယောက် ။
သူကြိုက်လို့ ကူးရေးထားတဲ့ကဗျာလေးတွေဟာ ခပ်သော့သော့ ရေးထားတဲ့ သူ့ လက်ရေးစာလုံးတွေ အောက်မှာ ကဗျာဆန်လို့။
ရှည်မျောတွန့်လိမ်နေတဲ့ သူ့လက်ရေး သူပြန်ကြည့်ပြီး ကဗျာဟာ ကဗျာဆန်နေတာဘာဆန်းသလဲကွာ။ သူ့ဟာသူ ပြောလည်း ပြော။
ရယ်လည်းရယ်။ မှုန်တေတေမျက်နှာမျိုးနဲ့။
ကဗျာတွေအပေါ်ချစ်မက်ခဲ့တဲ့အဲဒီသူငယ်ချင်းဟာ ပျောက်ဆုံးသွားတဲ့ ကဗျာတပုဒ်လိုပဲ သူ့ဘဝထဲက ထွက်ခွာသွားခဲ့တာ ကြာမြင့်လှပေါ့။
လက်ချောင်းတွေဟာ ကြိုးကိုကုတ်နေတာမဟုတ်ဘူးကွ။ အသံတွေကို ကုတ်ဆွဲနေတာ။
သူများ အတွဲအဖက်မလုပ်တဲ့အသံတွေကို ဆွဲထုတ်နေတာ။
ဒီတယောက်ဟာဟာလည်းပဲ လွင့်မျောရီဝေသွားပြီဆိုရင် ဘေ့စ်ဂစ်တာကို ကြောက်မက်ဖွယ်အသံတွေနဲ့ တီးပြလေ့ရှိသူ။ သူ့ရဲ့ဘဝမှာအဖြစ်ချင်ဆုံးက ဘေ့စ်ဂစ်တာသမားတယောက်။ ဘဝမှာ ဘေ့စ်ဂစ်တာ တစ်လုံးရယ်၊ မိခိုင်ရယ် ၊ No 4 ရယ်ရှိနေရင် ပြီးပြည့်စုံပြီပေါ့ကွာ။ သူသေဆုံးသွားတော့  ဖြူဖပ်ဖြူရော် လက်ဖျံလှီလှီလေးမှာ စိုက်ဝင်နေတဲ့အပ်ဟာ တုန်ခါလို့။
တရွေ့ရွေ့မြစ်ရေအလျဉ်ကို ငေးရီမင်တက်နေတတ်တဲ့နောက် သူငယ်ချင်းတယောက်ကတော့ လူ တယောက်ဟာ မြစ်တစ်မြစ်ထဲကို နှစ်ခါပြန်ဆင်းလို့မရဘူးပြောခဲ့တဲ့ ဟေရာကလိုင်တပ်စ်ကို အရမ်းအရမ်း ကြွေ။

ရောက်လေရာအရပ်မှာ မြစ်တစ်စင်းစင်းကိုတွေ့ရှိသွားပြီဆိုရင်ပဲ သူဟာ ဟေရာကလိုက်တပ်စ် ဖြစ်သွားခဲ့။ ခေါင်းတဆတ်ဆတ်ညိတ်ပြီး တည်ငြိမ်လေးနက်စွာတွေးခေါ်ခဲ့။
ရန်ကုန်မြို့လယ်ကတိုက်ခန်းတခုမှာ အပ်တစ်ချောင်းတည်းနဲ့ မြွေမကြောက်ကင်းမကြောက်။ အလွင့်ကမ္ဘာ ထဲရောက်အောင် လွင့်လွင့်သွားတတ်တဲ့သူငယ်ချင်းတချို့ပါပဲ။
အနုပညာခံစားမှု အားကောင်းခဲ့သော်လည်းပဲ သူတုိ့ရဲ့ဘဝတွေဟာ ငယ်ငယ်ရွယ်ရွယ်နဲ့ အဆုံးသတ်သွားခဲ့ ကြ။ ငယ်ငယ်ရွယ်ရွယ်နဲ့ ပြီးဆုံးသွားခဲ့ကြ။ ကျွန်တော့်အတွက်တော့ သူတို့ဟာ မပွင့်ခင်ကတည်းကကြွေ လွင့်သွားခဲ့သောဆိုင် ခီပန်းပွင့်များ။
ကိုယ်တိုင်လည်း လွင့်လွင့်မျောမျောနေခဲ့ဖူးသူဖြစ်လေတော့ မြောက်ဘက်တောင်ကုန်းဒေသမှာ အထိုင်ချ ထားတဲ့သူ့ကို စောင့်ကြည့်နေခဲ့။

အထူးအားဖြင့် အလွင့်ကမ္ဘာထဲကလူတွေအကြောင်း။ အလွင့်ကမ္ဘာထဲကရုန်းထွက်လာခဲ့တဲ့လူတွေ ကြောင်း။ အလွင့်ကမ္ဘာထဲမှာပဲ လွင့်မျောပြီးဆုံးသွားခဲ့တဲ့လူတွေအကြောင်း။ အထူးအားဖြင့်  အနာဂတ် ပျောက်ဆုံးနေသောလူငယ်လေးတွေရဲ့ ဖြစ်ကြောင်းရယ်ကုန်စင်။
ပြီးတော့ မှော်ထဲက လူတွေ၊ ဘဝတွေ၊ အဖြစ်အပျက်တွေ၊ ညမွှေးပန်းတွေ၊ လီလီပန်းတွေ....
ပြီးတော့ ပစ်သံခတ်သံ၊ လက်နက်ကြီးကျည် ကျကွဲသံ၊ ပြေးလွှား အော် ဟစ်သံ တွေ ညိုးညံနေတဲ့ မပြီးဆုံးသေးသောစစ်ပွဲတွေအကြောင်း..
ပြီးတော့ ......
ပြီးတော့ .......
ပြီးတော့ .......
မြောက်ဘက်တောင်ကုန်းဒေသမှာ အလံတော်တခုလွှင့်ထူထားတဲ့ သူ့ဆီကနေတခြားဘာများရနိုင်သေးလဲ မသိ။
ကျွန်တော်ကတော့ ထင်ပါသည်။
ငြိမ်းချမ်းရေးတခုကလွဲလို့ ကျန်တာတွေ အားလုံးရနိုင်လိမ့်မည်ဟု........

                          ( လေး )

အရေးအသားတွေဟာ နာကျင်မှုထဲကနေ ထွက်ကျလာတာလား။ သက်သောင့်သက်သာ ဖြစ်မှုကနေ လွယ်လင့်တကူရရှိလာတာလား။
ဒါမှမဟုတ် အ ရွေ့တခုဆီပြောင်းလဲသွားစေချင်တဲ့စိတ်ခံစားမှုမျိုးကပဲ ဟန်ချက်ပျက်နေတဲ့လူ့အဖွဲ့အစည်း ထဲကိုတိုးဝင်သွားဖို့လှုံဆော် အားပေးခဲ့တာလား။

မျက်ဝန်းနက်နက်၊ ပိပြားသေသပ်သော နှုတ်ခမ်းတစ်စုံ၊ မြင့်မားသော သူ့ရဲ့ကိုယ်နေဟန်ပန်။ တီရှပ်တစ်ထည်နဲ့လီဗိုင်းဂျင်းဘောင်းဘီကောက်ဝတ်လိုက်ရုံနဲ့ သူဟာ ခေတ် ပြိုင် လူရွယ်တယောက် ဖြစ် သွားခဲ့ပြီ။
အဲဒီခေတ်ပြိုင်လူရွယ်လေးဟာ ပျော်ရွှင်ခြင်းနိုင်ငံတော်သစ်ဆီ ရွေ့လျားနေတဲ့လူလား။ ကိုယ်ပေါ်မှာ ဗုံး တစ်လုံးချည်နှောင်ပြီး လူအုပ်ကြီးထဲမှာ ဝုန်းခနဲဖောက်ခွဲပစ်လိုက်မယ့်အစွန်းရောက် ဝါဒီတယောက်လား ။ နူးညံ့သိမ်မွေ့တဲ့လူ့အဖွဲ့အစည်းမျိုးကို အလိုရှိနေတဲ့ လူသားအနွယ်ဝင်လား။ အလကားနေ ခလုတ်ဆွဲညှစ် ဖို့ လက်တယားယားဖြစ်နေတဲ့ စစ်သွေးကြွတယောက်များလား။
သူ့ရဲ့နှစ်သုံးဆယ်ထဲက  ကျွန်တော်ရရှိလာခဲ့သော မိုးတစိမ့်စိမ့်အ မေးပုစ္ဆာများ။

                             ( ငါး )

ပြောမယ်ဆိုရင်ပေါ့။ သူဟာလည်း စက်တင်ဘာကျည်ဆန်တွေကိုသိမှီကြုံတွေ့လာခဲ့တဲ့လူရွယ်တယောက်။ တခုသောစက်တင်ဘာမှာ သွေးဆာနေတဲ့ကျည်ဆန်တွေဟာ သူနဲ့အနီးကပ်ဆုံးနေရာမှာ အော်ဟစ်ပျံသန်း လာခဲ့တာ ။"ရှစ် လေးလုံး" ကိုသိမီခဲ့တဲ့ စာရေးဆရာ၊ ကဗျာဆရာတွေရဲ့ စိတ်ခံစားမှုထဲမှာ ရှစ်လေးလုံးရဲ့ အရိပ်တွေ၊အရောင်တွေ၊ အသံဗလံတွေဟာ ဘယ်သောအခါမှ ပြန်ထွက်တော့မှာမဟုတ်တဲ့နစ်ဝင်ခြင်းမျိုး နဲ့ရော ထွေးစိမ့်ဝင်နေခဲ့တာ။ ရှစ်လေးလုံးရဲ့ထင်ရှားတဲ့အမှတ်အသားဖြစ်တဲ့ နာကျင်မှုဟာ သူ့ရဲ့အရေး အသားထဲမှာ တစ်နေရာမဟုတ် တစ်နေရာရာမှာ သွား ပေါ်နေတတ်တာ။

                      (  ခြောက် )

ရှာရင် တွေ့လိမ့်မယ်၊ သုခမြို့တော်ထဲက ဟာစရီပါးလို၊ တော်တီလာဖလက်ထဲက ကောင်ကြီး ဂျိုးလို၊ မိုဗီဒစ်ကို ရေဆုံးရေဖျားလိုက်ရှာနေတဲ့ ကပ္ပတိန်အေဟက်လို။
ဘီတယ်လ်ထဲက ဂျွန်လင်နွန်လို။ ပင်လယ်ပြာနဲ့ တံငါအိုထဲက စင်တီယာဂိုလို။ လူနာဆောင်အမှတ် ၆ ထဲက နီကီတာလို။ နေ့စဉ်ဘဝတွေထဲမှာ။ အရေးအသားတွေထဲမှာ။
 
သူနဲ့ပတ်သက်ပြီ အမှတ်ထင်ထင်ဖြစ်နေတာတခုတော့ရှိ။ သူရဲ့အရေအသားထဲမှာ ဖရန်စစ်ဖူကူယားမား မပါဘူး။ ဆင်မြူယယ်ဟန်တင်တန်မပါဘူး။ အီလျာအာရင်းဘတ်မပါဘူး။ ဟိုဟိုဒီဒီတွေ အနည်းငယ်မျှလောက်ပင်မပါဝင်တဲ့  "သူ့" ကို "သူ" အဖြစ်နဲ့ မြင်တွေ့နေရတာကိုက ကျွန်တော်တို့အတွက် ပျော်ရွှင်စရာကောင်းသွားခဲ့ပြီ။
အရေးကြီးဆုံးအချက်ကလည်။ "သူ"  ဟာ "သူ"  ဖြစ်နေ့ဖို့ပဲမဟုတ်လား။
အဲဒီ " သူ "  ဟာ .....
အစဉ်အလာတွေထဲက ဖြဲထွက်လာချင်တဲ့လူလား။ နီတိတွေထဲမှာပဲ လေးလံပိတ်မိတဲ့လူလား။ လစ်ဘရယ် သမားလား။ အ ရွေ့တခုဆီ ပြောင်းလဲသစ် ဆန်းသွားစေချင်တဲ့လူတယောက်လား။
......................လား။
......................လား။
......................လား။

နှစ်သုံးဆယ်ဟာ လူတွေ ၊ ဘဝတွေ၊ အဖြစ်အပျက်တွေ နှစ်ကာလတွေနဲ့ လက်ကျန်မုတ်သုံမိုးရေစက်တွေ ကို သယ်ဆောင်ပြီး မြောက်ဘက်တောင်ကုန်းဒေသကနေ တငြိမ့်ငြိမ့်စီးဆင်းလာခဲ့ပြီ။                              
                                          ( နိုင်     ဝင်း    သီ )

စိတ်ကူးချိုချိုရဲ့ စိမ်းမြပူနွေးတဲ့ စိတ်ကူးစိတ်သန်းတခုဖြစ်ပြီး သြဂုတ်လရဲ့မိုးရေစက်တွေအောက်မှာ ရဲရင့် လန်းဆန်းစွာ ပွင့်ဖူးခဲ့တဲ့အက်ဆေးစာအုပ်တစ်အုပ်ဖြစ်ပါတယ် ။
အဖုံးပန်းချီနဲ့ အတွင်းသရုပ်ဖော်ပုံတွေဟာ အခု အမေရိကကိုရောက်ရှိနေတဲ့ပန်းချီဆရာ သန်းဌေးမောင်ရဲ့ စုတ်ချက်တွေအောက်မှာ သက်ဝင်ရုန်းကြွလို့ နေပါတယ် ။
စာအုပ်တန် ဖိုး ၂၅၀၀ ကျပ် နဲ့ ၂၀၁၈ ခုနှစ်  သြဂုတ်လထဲမှာ စိတ်ကူးချိုချိုစာအုပ်တိုက်ကနေ ဖြန့်ချိပေး ထားပါတယ်ဆိုတဲ့အကြောင်း...။
                                              ( စာပေတမန် )

                                           
0