စိုးခိုင်ညိန်း ● ဆောင်း နံနက်ခင်း

စိုးခိုင်ညိန်း ● ဆောင်း နံနက်ခင်း
(မိုးမခ) ဒီဇင်ဘာ ၁၈၊ ၂ဝ၁၈

ညက ကောင်းကောင်း အိပ်မပျော်ပေမဲ့ ထုံးစံအတိုင်း မနက်စောစော အိပ်ရာမှ ထလိုက်ပါသည်။ ကိုယ်လက်သန့်ရှင်းရေးလုပ် မျက်နှာသစ်ပြီး လမ်းလျှောက်ထွက်ဖို့ ပြင်ဆင်ရသည်။ အားကစားဘောင်းဘီ၊ အနွေးထည်၊ ခေါင်းစွပ်၊ လမ်းလျှောက်ရှူးဖိနပ် တို့ကို စီးပြီး တံတားဘက် လမ်းလျှောက်ထွက်ခဲ့လိုက်သည်။ အအေးဓါတ်သည် ဆောင်းပီသစွာ မြို့အနှံ့ကို လွှမ်းခြုံထားသည်။ ဟိုနေ့က ရန်ကုန်က သူငယ်ချင်းတယောက်နဲ့စကားပြောဖြစ်၍ သူတို့ရန်ကုန်မှာတော့ အအေးဓါတ်ကောင်းကောင်းမရ သေးဟု ဆိုသည်။ ချင်းပြည်နယ်၏အစပ်မှာဖြစ်သော ဒီမြို့ကလေးမှာတော့ နိုဝင်ဘာလလောက်ကတည်းက အေးနေခဲ့ပြီ ဖြစ်သည်။

မြို့လေးထဲက လမ်းများပေါ်တွင် လူသွားလူလာ သိပ်မရှိသေး၊ လင်းနေဆဲ ဖြစ်သော လမ်းမီးရောင် လဲ့လဲ့များထဲတွင် မြူနှင်း မှုံတို့က ဝေ့ဝဲစွာ ကျနေသည်။ ဟို အရှေ့ဘက်ဆီမှ ရောင်နီသည် ပျပျလင်းနေ၏။ ကောင်းကင်တခုလုံးသည် အနည်းငယ်မျှ မှုန်မှုန်မှိုင်းမှိုင်း ဖြစ်နေသည်။ တိမ်တို့၏ အစအနကိုမှပင် မမြင်ရ။ ကောင်းကင်၏ အလင်းသည် လမ်းမီးများကို မဖုံးအုပ်နိုင် သေး။ လမ်းမီးတိုင်များသည် တတိုင်နှင့်တတိုင် အလင်းရောင်ကို လက်ဆင့်ကမ်းကာ လမ်းရှိသမျှ တိုးဝင်လျှက်ရှိသည်။ မည်းနက်နေသော ကတ္တရာလမ်းမသည် အအေးဓါတ်ဖြင့် အိပ်စက်၍ကောင်းတုန်းပဲ ရှိသေးသည်။ ရံဖန်ရံခါ သူ၏ ကျော ပေါ်မှ ဆိုင်ကယ် တစီးစ နှစ်စီးစ ဖြတ်သွားပေမဲ့လည်း သူသည် မလှုပ်မရှက် ငြိမ်သက်လျှက်ပင် ရှိသည်။

ဈေးနားတဝိုက်မှာတော့ အနည်းငယ်မျှ လှုပ်လှုပ်ရှားရှား တွေ့ရသည်။ ဆိုက်ကားအချို့သည် ပစ္စည်းအချို့ကိုတင်ကာ ဈေး ဆီသို့ နင်းလာကြသည်။ အနီးအနား ရွာတွေဆီက ဈေးရောင်းဖို့ ဟင်းသီးဟင်းရွက်များကို တောင်းထဲထည့်ကာ ရွက်လာ ကြသော အမျိုးသမီးအချို့ကိုလည်း တွေ့ရသည်။

ဈေး၏ အရှေ့ဘက် လမ်းသွယ်ကလေး၏ အကွေ့ထောင့်မှာတော့ အကြော်တဲကလေး တတဲရှိသည်။ အကြော်ဖိုမှာ အမျိုး သမီးကြီးတယောက်သည် အကြော်ကြော်လျှက်ရှိသည်။ ဖိုဘေးက စားပွဲဝိုင်းလေးမှာက ဆိုက်ကားဆရာသုံးယောက်က ရေနွေးသောက်ရင်း အကြော်စားနေကြသည်။ တရှဲရှဲကြော်နေသောအကြော်ဖို၏ အထက်မှာ အပူငွေ့နှင့် ဆီပူငွေ့တို့သည် ဝေ့ဝဲနေသည်။ ကပ်ဖြင့်မိုးထားသော အကြော်ဖို၏အမိုးသည် ကျပ်ခိုးစွဲကာ မည်းလျှက်ရှိသည်။ နွေ မိုး ဆောင်း ဖြတ် သန်းထားပြီး အကြော်တဲ၏ ဘဝသက်တမ်းတခု၏ ကြာမြင့်ချိန်ကို ဖော်ပြနေသကဲ့သို့ ရှိသည်။

တံတားဘက်ဆီသို့ သွားသော လမ်းမပေါ်တွင် သူ့လို လမ်းလျှောက်ထွက်လာသူ သုံးလေးယောက်ကို တွေ့ရသည်။ တ ဖြည်းဖြည်း ရောင်နီသည် လင်းသထက်လင်းလာကာ လမ်းအချို့သည် အိပ်စက်ရာမှနိုးထကာ ပျင်းကြောဆန့်၍ သက်ဝင် လှုပ်ရှားစ ပြုပေပြီ။ ဟောဒီက ပဲပြုပ်ဟုအော်၍ လမ်းသွယ်တခုထဲမှ ထွက်လာသော ပဲပြုပ်သည်၏ ခြေလှမ်းတို့သည် သွက် လျှက်ရှိသည်။ သူသည် လမ်းကို ခပ်မြန်မြန်လေးလျှောက်နေမိသည်။ မကြာမီ တံတားပေါ်သို့ ရောက်လာသည်။ တံတားပေါ် တွင် လေအနည်းငယ် တိုက်နေပေမဲ့ လမ်းမြန်မြန်လျှောက်ခဲ့သဖြင့် သွေးက နွေးနေသည်။

တံတား၏ အောက်မှာက စီးဆင်းနေသော ရေသည် မရှိတော့ပေ၊ သဲသောင်ပြင်ကျဉ်းကျဉ်းနှင့် ဘေးတဖက်တချက်ဆီမှ ရိုးတံ ရှည်ရှည်နှင့် မြက်ရိုင်းပင်တွေပဲ ရှိတော့သည်။ မြို့၏ တဝက်လောက်ကို ဖြတ်စီးသွားသော ချောင်းသည် မိုးရာသီမှာပဲ ရေရှိတတ်သည်။ အခုလို ဆောင်းနှင့် နွေမှာတော့ ရေမရှိတော့။ တံတားအလယ်လောက်မှာ မတ်တတ်ရပ်ကာ ကိုယ်လက် လေ့ကျင့်ခန်း လုပ်သည်။ စီးဆင်းလာသော ချောင်း၏ လာရာအဝေးကို မျှော်ကြည့်လိုက်တော့ မြူနှင်းတို့ဖြင့် မှုံမှိုင်းနေသည်။ တဖြေးဖြေး လင်းလာသည်နှင့်အမျှ မြူနှင်းတို့က ပို၍ဝေ့ဝဲမှုံမှိုင်းလာသည်။ ဟိုအမေရိကမှာလို နှင်းတွေ အဖတ်လိုက်ဖွေး နေအောင်ကျတာမျိုးတော့မဟုတ်၊ ဝန်းကျင်တခုလုံး မြူခိုး၊ နှင်းခိုး၊ မီးခိုးတွေလို မှုံမှိုင်းလာခြင်းမျိုး ဖြစ်သည်။ ဆောင်းသည် သူ၏ လမ်းကြောင်းအတိုင်း အေးအေးချမ်းချမ်းဖြင့် ဝင်ရောက်လာနေခြင်းဖြစ်သည်။ နှင်းတွေကို လက်ဝါးနှစ်ဖက်ကို ဖြန့်ကာ ဆီကြိုလိုက်မိသည်။ သစ်ရွက်တွေလည်း ကြွေဆင်းလာပြီ။

ဆောင်းလမ်း
 
ဘာအစီအစဉ်တွေရှိနေလို့
နှင်းတွေနဲ့ ဖုံးထားခဲ့တာလဲ။

ဆိုက်ပရပ်စ်လမ်းမှာ
စတော်ဘယ်ရီသီးမှာ
ကုက္ကိုရွက်မှာ
တံစက်မြိတ်မှာ။

စိတ်ရှုပ်ရှုပ်နဲ့ စွန်လွှတ်ခြင်း
ကြိုးရှည်ရှည်နဲ့ သံယောဇဉ်ကြီးခြင်း။

လောကဓံဟုဆိုသော်လည်း
ကိုယ်စိတ်နှစ်ပါးရဲ့အပူပဲ။

ဘာမှပြန်မပြောခဲ့သော်လည်း
ကိုယ်မြင်နေရပါတယ်။

နှင်းတွေကို
မင်းပဲ စောင့်ခေါ်လိုက်ပါတော့။ ။

ဝင်းမြင့်

လူဝက် ကုန်တဝက်တင်ထားသော ဒိုင်နာကားတစီးသည် တံတားပေါ်မှ ဖြတ်မောင်းသွား၍ တံတားသည် အနည်းငယ် တုန်သွားသည်။ အနီးအနားရွာတရွာမှ ဈေးကိုလာသော ကားဖြစ်မည် ထင်သည်။ နေထွက်လာပြီဖြစ်သော်လည်း နေရောင် ခြည် သည် မြူနှင်းများကို မထိုးဖောက်နိုင်သေး။ အခုအချိန်မှာတော့ မြို့လေးသည် လမ်းမတွေပေါ်မှ ပဲပြုပ်သည်တို့၏ ပဲပြုပ်အော်သံများဖြင့် တမြို့လုံး အိပ်ရာမှ နိုးနေခဲ့ပြီ ဖြစ်သည်။

သူသည် အတန်ကြာကိုယ်လက်လှုပ်ရှားမှု လုပ်ပြီး တံတား၏ တဖက်သို့ ဆက်လျှောက်ခဲ့လိုက်သည်။ တံတား၏အဆင်း လမ်း၏ ညာဖက်ဘေး တဖက်ရပ်တည်းကလေး၌ ပေါင်းတင်းဝါးများကို စီတန်းကာ ထောင်ထားပြီး မီးဖုတ်နေတာ တွေ့ရ သည်။ ဒီမြို့လေးမှာက ပေါင်းတင်းက နာမည်ကြီးသည်။ ဒီရာသီမှာ ဒီပေါင်းတင်းကိုပဲ အိမ်ပြန်လက်ဆောင်ပေးလေ့ ရှိကြ သည်။ ဒီလိုပေါင်းတင်းဖုတ်ပြီး ရောင်းသည့် ဆိုင်ကလေးတွေ ဒီမြို့က လမ်းအတော်တော်များများမှာ ရှိသည်။ ဒီဆိုင်လေးမှာ က ပေါင်းတင်းသာမက မုန့်ပေါင်းလည်း ပေါင်းရောင်းတာ တွေ့ရသည်။ သူသည် ထိုင်နေကျ လက်ဖက်ရည်ဆိုင်ဆီသို့ ဆက် လျှောက်ခဲ့လိုက်သည်။

လက်ဖက်ရည်ဆိုင်ဘေးမှာလည်း မုန့်ဟင်းခါး၊ အကြော်စုံရသည့်ဆိုင် ရှိသည်။ ကောက်ညှင်းပေါင်းလည်း ရသည်။ သူက အကြော်သုပ်တပွဲနဲ့ လက်ဖက်ရည်တခွက်မှာသောက်လိုက်သည်။ ဒီအကြော်သုပ် ကလည်း ဒီမြို့လေးမှာ နာမည်ကြီးသည်။ အကြော်စုံကို ဖွခြေပြီး ပဲမှုန့် ဆီချက် မုန့်ဟင်းခါးဖတ်တို့ဖြင့် မုန့်ဟင်းခါးရည် နည်းနည်းစမ်းကာ သုပ်ထားခြင်းဖြစ်သည်။ စား ရတာ အတော်လေး အရသာရှိပါသည်။ ဒီလိုမျိုး အကြော်သုပ်ကို ဒီမြို့ကို ရောက်မှပဲ တွေ့ဖူးစားဖူးခြင်း ဖြစ်သည်။

သူ၏ အိမ်အပြန်လမ်းကတော့ အလာတုန်းကလို ခြောက်ခြောက်သွေ့သွေ့ မဟုတ်တော့ ဆိုင်ကယ်တို့ဖြင့် အနည်းငယ် ရှုပ်ထွေးနေခဲ့ပြီ ဖြစ်သည်။ လမ်းမီးတိုင်မှ မီးတို့သည်လည်း ငြိမ်းသွားလေပြီ။ တံတားပေါ်မှာတော့ အဖိုးအိုတယောက်သည် တုတ်ကောက်တချောင်းဖြင့် လမ်းလျှောက်နေသည်။ စီးဆင်းသွားရာ ချောင်း၏အဖျား ဟိုးအဝေးဆီမှာ မီးခိုးတွေ အူတက် နေတာ မြင်ရသည်။ ဆောင်းရာသီမှာ မီးခိုးကို မြင်ရခြင်းသည် ပန်းချီကားတချပ်လိုပဲဟု စိတ်မှာထင်လိုက်မိသည်။ ရာသီသုံးပါးထဲတွင် ဆောင်း ရာသီသည် အေးစက်တိတ်ဆိတ်သော ရာသီဖြစ်မည်ထင်သည်။ နွေနဲ့မိုးကတော့ ဆောင်းလို မဟုတ် အနည်းငယ် အရိုင်းဆန်သည်ဟု ထင်သည်။

ဆောင်း

ပြောစရာစကားများရှားပါးလာပြီးနောက်
ဆောင်းဟာပိုအေးလာတဲ့ အကြောင်း
မြူတွေပိုကျလာတဲ့အကြောင်း
အချိန်ဟာ လူအိုတယောက်လို လေးလံနေချိန်
စိမ့်ဝင်နေတဲ့ အတွေးဟာ ပြာကျသွားတယ်။

သတိရခြင်းဟာ အပေါ်ယံကြောမှာအေးခဲပြီး
အတွင်းသားမှာ မီးစွဲနေတယ်
သစ်ရွက်ခြောက်လို ကြွပ်ဆတ်နေသော
အိမ်ပြန်လမ်းတလျှောက်
ဓါတ်တိုင်အောက်က ဖြတ်လျှောက်စဉ်မှာ
မှောက်မှားနေသူ အရိပ်တယောက်ကို မြင်တယ်
လမ်းဟာ တကိုယ်ရေမှောင်မည်းလို့
အိမ်ဟာ တစစီပြိုကျလို့
ဘယ်သူရှိခဲ့တာလဲ
ဟို အဝေးမှာ
တောမီးတွေလည်း လောင်လို့ပေါ့။ ။

အေးမင်းစော

ကလေးဘဝ ရွာမှာနေခဲ့တုန်းက အခုလို ဆောင်းတွင်းမှာ အိမ်ရှေ့ကွက်လပ်က မီးဖိုမှာ မီးလှုံရင်း ထန်းပင်မြစ်ဖုတ်စားခဲ့ရ သည်ကို အမှတ်ရလိုက်မိသည်။ အဖေ၊ အမေတို့နှင့် ညီအကို မောင်နှမတတွေ မီးဖိုကို ဝိုင်းထိုင်ပြီး စကားတပြောပြောနှင့် ထန်းပင်မြစ်ဖုတ်ကို ဆီနဲ့ ဆားနဲ့ ရောထည့်ထားသော ခွက်၌ တို့စားခဲ့ရသည်မှာ အရသာပဲဖြစ်သည်။ အခုတော့ ရွာမှာ ဆောင်းတွင်း မီးဖိုပြီး မီးလှုံကြသည့်အလေ့ပင် မရှိတော့ဘူးထင်သည်။ ရင်ထဲက ကိုယ်စီတောက်လောင်နေသော ရင် အပူတို့ဖြင့် ဆောင်း၏ အအေးဒဏ်ကို ခုခံနေကြပုံရပါသည်။ လူတွေ၏ လောဘ၊ ဒေါသအပူတွေကြောင့် ဆောင်းကပဲ အရင် ကလောက် မအေးနိုင်တာလည်း ဖြစ်နိုင်သည်။ ရွာဘေးမှာလည်း အရင်လို တောကောင်းကောင်းကလည်း မရှိတော့ပြီပဲ ဖြစ်သည်။

ကလေးဘဝတုန်းကတော့ နှင်းရည်တို့ဖြင့် စိုစွတ်နေသော မြက်ခင်းပြင်ကိုဖြတ်ကာ ယာတောအစပ်မှာ ရှိသည့် သခွပ် ပင်အောက်ကိုသွားပြီး သခွပ်ပွင့်တွေ လိုက်ကောက်ခဲ့ရတာကို ပျော်စရာလို့ ထင်သည်။ အခုတော့ ထိုသခွပ်ပင်ကြီးလည်း မရှိတော့၊ ဆောင်းမှာ အတူပျော်ခဲ့ရသည့် အဖေလည်း မရှိတော့၊ အစ်မလည်း မရှိတော့။ သူသည် လေပူတချက် မှုတ်ထုတ် လိုက်မိသည်။ ပါးစပ်ထဲမှ အငွေ့များထွက်လာကာ မြူနှင်းတွေထဲ ရောထွေးပျောက်ကွယ်သွားတာ တွေ့လိုက်ရသည်။

စိုးခိုင်ညိန်း