စာအုပ်ကို http://comic.irrawaddymedia.com/ တွင် ၃ ဒေါ်လာနှုန်းဖြင့် ကြည့်ရှုနိုင်သည်။ဒေါ်စုအကြောင်း သရုပ်ဖော်ထားသည့် ဂျပန်ကာတွန်းစာအုပ် အင်္ဂလိပ်ဘာသာဖြင့်ထွက်ပြီ
ဘီဘီစီ(မြန်မာဌာန)
ဇွန် ၂၉၊ ၂၀၀၈
ဂျပန်နိုင်ငံက ကာတွန်းဆရာ Akazu Mizuha က မြန်မာနိုင်ငံက နိုဗဲလ်ငြိမ်းချမ်းရေးဆုရှင် ဒေါ်အောင်ဆန်းစုကြည်အကြောင်း သရုပ်ဖော် ရေးဆွဲထားတဲ့ ရုပ်ပြကာတွန်းစာအုပ် ထုတ်ဝေခဲ့ပါတယ်။ ဒေါ်အောင်ဆန်းစုကြည် သို့မဟုတ် ခွပ်ဒေါင်း လို့ အဓိပ္ပာယ်ရတဲ့ စာအုပ်ကို ဂျပန်လို အရင်ထုတ်ဝေခဲ့ပြီးတော့၊ အခုတော့ အင်္ဂလိပ်လို ဘာသာပြန် ထုတ်ဝေတာ ဖြစ်ပါတယ်။
အဲဒီရုပ်ပြကာတွန်းကို အခုအခါမှာ ထိုင်းအခြေစိုက် ဧရာဝတီမဂ္ဂဇင်း အင်တာနက်စာမျက်နှာကနေ ပြန်လည်ဖြန့်ဝေ ရောင်းချနေတယ်လို့ သိရတဲ့အတွက် ဧရာဝတီမဂ္ဂဇင်းက ကိုကျော်စွာမိုးကို ကိုသိန်းမြတ်က မေးကြည့်တော့ -
“နိုဗဲလ်ဆုရှင်တွေအကြောင်းကို series လိုက် ဆွဲတာဗျ။ ဒေါ်အောင်ဆန်းစုကြည်ကလည်း part of the series ပေါ့ဗျာ၊ အဲဒီထဲမှာ။ ဒီရဲ့ ကာတွန်းစာအုပ်ကို လွန်ခဲ့တဲ့ ၁၀ နှစ်ကျော်လောက်က ဒေါ်အောင်ဆန်းစုကြည် နိုဗဲလ်ဆုရပြီးနောက်ပိုင်းမှာ သူတို့ ဒီစာအုပ်ကို ထုတ်ခဲ့တယ်။ ဂျပန်လို ထုတ်တာပေါ့လေ။ ဂျပန်ပြည်သူတွေကြားမှာ တော်တော်လေးကို အောင်မြင်တယ်လို့ ပြောတယ်။ တော်တော်လေး လူကြိုက် များတယ်။ တော်တော်လေး အရောင်းသွက်တယ်ပေါ့လေ။ အဓိက ကတော့ ဒေါ်အောင်ဆန်းစုကြည်အကြောင်းပေါ့ဗျာ။”
“ဟုတ်ကဲ့။ ကိုကျော်စွာမိုးတို့ ဒီ ဧရာဝတီဝက်ဆိုက်ကနေပြီးတော့ ဒီစာအုပ်ကို တင်ပေးတယ်၊ ဖြန့်ပေးတယ် ဆိုတော့ အဲဒါက ဘယ်လိုရည်ရွယ်ချက်လဲဗျ။”
“အဓိကက သူတို့ ဒေါ်အောင်ဆန်းစုကြည် ၆၃ နှစ်မြောက်မွေးနေ့မှာ ဒီစာအုပ်ကို၊ အဲဒီမွေးနေ့မှာပဲ၊ ၁၉ ရက်နေ့မှာပဲ ထုတ်ချင်တာပဲ၊ announce လုပ်ချင်တာပဲ ကျနော်တို့ ၀က်ဆိုက်မှာ။ ဒါပေမဲ့ ပြင်ဆင်ရတာ(နဲ့) ၁ ရက် ၂ ရက် နောက်ကျသွားတယ်ဗျာ။ ဆိုတော့ ဒေါ်အောင်ဆန်းစုကြည်နဲ့ ပတ်သက်တယ်၊ မြန်မာပြည်နိုင်ငံရေးနဲ့ ပတ်သက်တယ်၊ နောက်ပြီးတော့ ဂျပန်လူထုကြားထဲမှာလည်း ကျော်ကြားပြီးသား၊ လူသိများပြီးသား စာအုပ်ပေါ့ဗျာ၊ ဒါကို အင်္ဂလိပ်ဗားရှင်းနဲ့ ရောင်းတယ် ဆိုတော့ အင်္ဂလိပ်စာဖတ်ပရိသတ်ရော၊ ဗမာတွေရော ဖတ်နိုင်အောင်ပေါ့။ သူတို့ဘက်က ကမ်းလှမ်းတာဆိုတော့ ၀မ်းပမ်းတသာနဲ့ ကျနော်တို့က လက်ခံလိုက်တယ်ပေါ့ဗျာ။”
“ဒီအခု ကာတွန်းက မူလက ဂျပန်ဘာသာနဲ့ ထုတ်ဝေခဲ့တယ်၊ အခု အင်္ဂလိပ်ဘာသာနဲ့ ထုတ်မယ်လို့ သိရတယ်။ မြန်မာဘာသာနဲ့ ထုတ်ဝေဖို့ အစီအစဉ်မျိုးရော ရှိသေးသလား။”
“လောလောဆယ်အထိတော့ မရှိသေးဘူး။ ဒါပေမဲ့ စိတ်ဝင်စားဖို့ကောင်းတဲ့ အချက်တချက်က မနေ့က ဒီကာတွန်းကို ကျနော်တို့ဝက်ဆိုက်မှာ လောင့်ခ်ျ (launch) လုပ်ပြီး၊ အခု အုပ် ၃၀ ကျော် ၄၀ နီးပါးလောက် ဒေါင်းလုတ်လုပ်တာ တွေ့ရတယ်။ ဒေါင်းလုတ်လုပ်တဲ့သူအားလုံးကို ပြန်ကြည့်တဲ့အခါ ဗမာတွေ ဖြစ်နေတာ တွေ့ရတယ်။”
ကိုကျော်စွာမိုးပြောတာ ဖြစ်ပါတယ်။ အင်တာနက်ကနေ ၁ ခါ ဒေါင်းလုတ် ကူးယူရင် ၃ ဒေါ်လာကျမှာ ဖြစ်ပါတယ်။ ရောင်းရငွေတွေကိုတော့ မြန်မာနိုင်ငံနဲ့ ပတ်သက်တဲ့ ကူညီကယ်ဆယ်ရေးလုပ်ငန်းတွေမှာ သုံးစွဲဖို့ ရှိတယ်လို့လည်း ဧရာဝတီ အင်တာနက်စာမျက်နှာမှာ ဖော်ပြထားပါတယ်။
Comments