အိုဘားမားနဲ့ ရက်ပေါင်း ၁၀၀
မောင်ရစ်
ဧပြီ ၃၀၊ ၂၀၀၉
အမေရိကန်သတင်းဌာန စီအင်အင်က အိုဘားမား သမ္မတ သက်တမ်း ရက်ပေါင်း ၁၀၀ စစ်တမ်း ထုတ်ပါတယ်။ သူ့ကို ဘယ်လို အမှတ်ပေးကြသလဲ လို့ ပရိသတ်ဆီက စစ်တမ်း ကောက်တာဖြစ်ပါတယ်။ အိုဘားမား ရက်ပေါင်း ၁၀၀ မှာ အမေရိကန်ပြည်ကို ၀က်တုပ်ကွေးက ၀င်တိုက်နေတဲ့ အချိန်ဆိုတော့ သမ္မတကြီးမှာ ပျော်စရာ သိပ်ရှိပုံ မရှိပါ။ သူ့ကို ယေဘုယျ အမှတ်ပေါင်း “ဘီ” ပေးလိုက်ပါတယ် တဲ့။ ဘီ ဆိုတော့ ရမှတ် ၈၀ ပေါ့။ လွန်ခဲ့တဲ့ သမ္မတကြီး ဘွတ်ခ်ျ သမ္မတ စဖြစ်တုန်းကလည်း “ဘီ” ရခဲ့ပါတယ် တဲ့။ ဒီတခါ အိုဘားမား “ဘီ” က တိုင်းပြည်ကြီး ချွတ်ခြုံကျနေချိန်မှာ ရတဲ့ အမှတ် ဆိုတော့ ပြည်သူက သူ့ကို တော်တော် အားကိုးပုံရတာပေါ့။
ထူးခြားတဲ့ သမ္မတ အနေနဲ့ ပထမဆုံး အသိအမှတ် ပြုရမှာက ဒီမိုကရက်ပါတီကို စုစည်းလိုက်နိုင်တာ၊ ပါတီတွင်းက သူ့ပြိုင်ဘက်တွေကို အစိုးရအဖွဲ့ထဲမှာ နေရာပေးပြီး ၀ိုင်း အလုပ်လုပ်ဖို့ စည်းရုံးနိုင်တာ၊ လူရွယ်တွေကို အစိုးရအဖွဲ့ထဲ ထည့်သွင်းတာ၊ ခရီးတွေ ပြည်တွင်းမှာ အများကြီး ထွက်ပြီးတော့ လူထုနဲ့ စကားပြော မပျက်တာ၊ ပြည်ပကို ထွက်တဲ့အခါမှာလည်း အားလုံးက ၀မ်းသာအားရ ကြိုဆိုကြတာ၊ အစိုးရ အဖွဲ့တွေကော ပြည်သူတွေကပါ လှိုက်လှဲတာကို တွေ့ရပါတယ်။ အံ့သြစရာ ကောင်းတာက မင်းသားကနေ သမ္မတ ဖြစ်လာလို့၊ အာဏာရလို့ ပေါ်ပြူလာဖြစ်တဲ့ ရေဂင်တို့၊ အာနိုးတို့လိုမျိုး မဟုတ်ဘဲ၊ သမ္မတအဖြစ်နဲ့ကို မင်းသားလိုမျိုး ပေါ်ပြူလာ ဖြစ်တဲ့ ခေါင်းဆောင်တဦး ဖြစ်ပါတယ်။ ကျနော်တို့ တိုင်းပြည်က အတိုက်အခံခေါင်းဆောင် ဒေါ်အောင်ဆန်းစုကြည်ကို မြန်မာပြည်သူတွေက မေတ္တာ ရှိကြတာ၊ အားကိုးတကြီး ထောက်ခံတာမျိုးနဲ့တောင် သူ့ကို နှိုင်းပြိးတော့ စဉ်းစားမိပါရဲ့။
အိုဘားမားရဲ့ လာရာလမ်းက တည်ဆောက်ခဲ့ပုံကလည်း ဖွင့်ထားတဲ့ စာအုပ်လိုမျိုး အားလုံးကို ဖွင့်ချထားတာကလည်း အခြားသမ္မတများနဲ့ မတူပြန်ပါဘူး။ သူ့စာအုပ် ၂ အုပ်က သမ္မတမဖြစ်ခင်မှာ သူ့ဘ၀၊ အတွေ့အကြုံနဲ့ အတွေးအမြင်ကို ဖော်ထုတ် ရေးသားခဲ့တာဆိုတော့ အဲဒီကနေပြီးတော့ သူ့အကြောင်းကို သူ့စိတ်ဓာတ်ကို သူကိုယ်တိုင် ထုတ်ပြောတာကို ပရိသတ်က ဖတ်ရှု ရင်းနှီးပြီး ဖြစ်နေတယ်။ စာနယ်ဇင်းတွေ သတင်းတွေကတဆင့် သိရတာမျိုး မဟုတ်ဘူး။ စာအုပ်တွေက Dreams of My Father, Audacity of Hope ဖြစ်ပါတယ်။ နောက်တအုပ်ဖြစ်တဲ့ Change We Can Believe In ကတော့ သမ္မတအဖြစ်ကို ရည်မှန်းပြီး ရေးထားတာဆိုတော့ ဟိုစာအုပ်တွေက ပိုပြီး ရိုးသားတာကို တွေ့နိုင်ပါတယ်။ ပြီးတော့ သူ့အသံနဲ့ ဖတ်ထားတဲ့ အသံထွက်စာအုပ် ဆိုတော့လည်း လူတွေကြားထဲမှာ ရေပန်း အလွန်စားတာကိုလည်း တွေ့ရပါတယ်။
(ဒေါ်အောင်ဆန်းစုကြည်မှာလည်း အဲသလို စာအုပ်တွေ ရေးထားတာ ရှိပါတယ်။ သူ့စာတွေကို အကြိမ်ကြိမ် ဖတ်နေတာနဲ့တင်ကို သူ့အိပ်မက်မက်တဲ့ တိုင်းပြည်ကို ပရိသတ်က ခံစား မြင်ယောင်နိုင်ပါတယ်။ ကြုံလို့ ပြောတာပါ)
သူ့ပေါ်လစီတွေကို အကောင်အထည်ဖော်ဖို့အတွက် သူ ဆောင်ရွက်နိုင်သလား။ ခေါင်းဆောင် တဦး အနေနဲ့ အကောင်းဆုံး ပြင်ဆင်ပေးနိုင်မယ့် အဖွဲ့ဝင်တွေ၊ မိတ်ဆွေတွေနဲ့ တည်ဆောက်တာကို ရက်ပေါင်း ၁၀၀ အတွင်းမှာ မြင်ရပါတယ်။ သူရွေးတဲ့သူတွေက သူတို့ကျွမ်းကျင်ရာ နယ်မြေတွေမှာ ဒေါင်ဒေါင်မြည်တွေ ဖြစ်နေပါတယ်။ အဲသည်လူတွေကို အင်တာနက်ထဲမှာ ပြန်ရှာလို့ရပါတယ်။ သူတို့သတင်းတွေ၊ အတွေ့အကြုံတွေကို ရှာတွေ့နိုင်ပါတယ်။ အငြင်းပွားစရာတွေ ရှိတာကိုလည်း မကွယ်မဖျောက်ဘဲ ရှင်းကြ လင်းကြတာကို ပရိသတ်က စိတ်ဝင်စားတာကို တွေ့ရပါတယ်။ အရင်က သတင်းတွေက ဘယ်လိုရေးရေး ပြည်သူက အစိုးရအဖွဲ့ ဘယ်လို ခန့်ခန့် စိတ်မ၀င်စားပါဘူး။ အခုတော့ တော်တော်များများက လိုက်ဖတ်ကြ၊ လေ့လာကြပါတယ်။
နိုင်ငံရေးပုံဏ္ဌာန် အရ ယခင်အစိုးရရဲ့ လမ်းကြောင်းတွေကို ချက်ခြင်းကို ပြောင်းလဲဖို့ ကြိုးစားတာကို တွေ့ရပါတယ်။ အီရတ်က စစ်တပ်တွေ ရုတ်မယ်လို့ အတည်ပြုလိုက်တယ်။ အကြမ်းဖက်သမားတွေကို ဖမ်းဆီးထားတဲ့ ဂွမ်တာနာမို အကျဉ်းထောင်ကို ဖျက်သိမ်းဖို့ ပြင်ဆင်တယ်။ လူသားဇီဝ ဆိုင်ရာ သုတေသနြ ဖစ်တဲ့ စတန်းဆဲလဲ သုတေသန လုပ်ငန်းတွေကို အားပေးဖို့ မြှင့်တင်လိုက်တယ်။ စီအိုင်အေရဲ့ အကြမ်းဖက်သမားတွေကို နှိပ်စက် ညှင်းပန်းမှုတွေကို တားမြစ်လိုက်တယ်။ လူလတ်တန်းစား နိုင်ငံသားများရဲ့ တဦးချင်း ၀င်ငွေခွန်များနဲ့လည်း လျော့ပေါ့ပေးရန်၊ အထက်တန်းလွှာများ ထံက ၀င်ငွေခွန် လျော့ပေါ့ပေးမှုတို့ကို တင်းကြပ်ရန်တို့ကို အရေးယူ ဆောင်ရွက်ပါတယ်။ ကိုယ်ဝန်တားဆေးနဲ့ သားဆက်ခြား အကာအကွယ်တွေကို ယခင်အစိုးရက အကူအညီ အထောက်အပံ့ လျော့ချထားတာတွေကို ပြန်လည် တိုးမြှင့်လိုက်တယ်။ အာဏာရှင်နိုင်ငံများ၊ လူ့အခွင့်အရေး အားနည်းသူ အစိုးရနိုင်ငံများကို ထိပ်တိုက် ရင်ဆိုင်ထားခြင်းကနေ မိတ်ဖက်အသွင် ဆောင်ကြဖို့ကို စတင် တိုက်တွန်းဖို့ ကြိုးစားလိုက်တယ်။ စတာတွေကို တွေ့နိုင်ပါတယ်။
စီးပွားပျက်နေတဲ့ တိုင်းပြည်ကို သမ္မတကြီးအဖြစ် အမွေရလိုက်တာမှာ ဘယ်သူကိုမှ အပြစ် မတင်တာကိုလည်း အသိအမှတ် ပြုရမှာ ဖြစ်ပါတယ်။ စတင်မြူလတ်စ် ဆိုတဲ့ စီးပွားရေး အားတိုးဆေး ပေးဖို့ ကြိုးစားတယ်။ ဘီးအောက်တ် ဆိုတဲ့ စီးပွားရေး အကူအညီတွေ ပေးဖို့ လုပ်တယ်။ ပြီးတော့ သူ့သမ္မတ သက်တမ်းအတွက် အသုံးစရိတ်ကို ကြေညာလိုက်တယ်။ အဲဒီမှာ သူ အဓိက ကယ်တင်လိုက်တာက ဘတ်ဂျက် လိုငွေပြနေတဲ့ ပြည်နယ်အစိုးရတွေ၊ အရှုံးပြနေတဲ့ ဘဏ်နဲ့ ငွေကြေးလုပ်ငန်းတွေ၊ အများဆုးံ အလုပ်သမားဦးရေရှိတဲ့ အမေရိကန် ကားလုပ်ငန်းများနဲ့ နိုင်ငံရဲ့ အခြေခံ အဆောက်အအုံ လည်ပတ်မှု (ဆောက်လုပ်ရေး၊ လမ်းပန်း၊ ဆက်သွယ်ရေး၊ ကျောင်းစာရိတ်) စတာတွေမှာ သုံးစွဲလိုက်တာ ဖြစ်ပါတယ်။ လူတွေဆီကို တိုက်ရိုက်မရောက်သေးဘူး၊ အလုပ်တွေ ပြုတ်နေတာတွေကို မတားဆီးနိုင်သေးဘူး။ သို့သော် အစိုးရ အဖွဲ့အစည်းအသီးသီးနဲ့ ကော်ပိုရိတ်ကြီးများ၊ အခြေခံ အဆောက်အဦများကို ကျားကန်ထားတာကို လုပ်လိုက်နိုင်ပါတယ်။
နိုင်ငံခြားရေးမူဝါဒများမှာတော့ ဥရောပနဲ့ ညှိနှိုင်းဆဲပါပဲ။ အိုဘားမားရဲ့ အသုံးစရိတ်များ မြှင့်တင်ရေးနဲ့ ဥရောပနိုင်ငံများရဲ့ ငွေကြေးစီးဆင်းမှုတို့ စည်းကြပ်ရေးဆိုတဲ့ အချက် ၂ ခုကို ချိန်ခွင်ညှာ ညှိကြရမယ့် အနေအထားရှိပါတယ်။ အစွန်းရောက် အကြမ်းဖက်သမားများ၊ အာဏာရှင် နိုင်ငံများနဲ့ကလည်း အချိန်ယူပြီး ဆွေးနွေးနိုင်ခြင်း မရှိသေးပါဘူး။ သွေးတိုးစမ်းထားတာပဲ ရှိပါသေးတယ်။ ဥပမာ နိုင်ငံခြားရေး ၀န်ကြီး ဟီလရီကလင်တန် ပြည်ပခရီး ထွက်လိုက်တာမှာ၊ ကျူးဘားပေါ်လစီကို စဉ်းစားမယ်လို့ ပြောလိုက်တော့ ထလာတဲ့ ဂယက်ကို ကြည့်ရင် သိသာပါတယ်။ သဘောတူသူကော မတူသူတွေပါ ထပြီး ပြောဆို ဆွေးနွေးကြတာကို မြင်ရပါတယ်။ မြန်မာပြည်အပေါ် အရေးယူမှုတွေ လျော့မလား၊ မလျော့ဘူးလားနဲ့ မြန်မာတွေထဲမှာတောင် အတော်လေး ပြောလိုက်ဆိုလိုက်ကြတာ တွေ့နိုင်ပါတယ်။ အခုအချိန်မှာ မြောက်ကိုရီးယားရဲ့ နူကလီယားလက်နက်ပြပြီး ကုလသမဂ္ဂကို အကြပ်ကိုင်ထားတဲ့ အခြေအနေကိုလည်း အိုဘားမား တုံ့ပြန်ရဦးမှာ ဖြစ်ပါတယ်။
သူ့ဖက်က ကတိတွေပေးထားပြီး အကောင်အထည်ဖော်ဖို့ လိုသေးတာတွေက ကျန်းမာရေး အာမခံချက် ချွတ်ခြုံကျနေတဲ့ကိစ္စ။ လောင်စာနဲ့ စွမ်းအင်တွေမှာ အမှီအခိုကင်းစွာ ရပ်တည်နိုင်ရေး၊ ခေတ်မီ တိုးတက်လာရေး။ ပညာရေးနဲ့ သုတေသနတွေမှာ ပြန်လည် ဦးမော့လာစေဖို့ ပြုပြင်ပြောင်းလဲရေးနဲ့ ရင်းနှီး မြှုတ်နှံမှုတွေကို လုပ်ဆောင်ဖို့။ ပြီးတော့ ဗြူရိုကရေစီ ကြိုးနီစနစ်တွေက တုံ့ဆွဲနှောင့်နှေးစေတဲ့ လုပ်ထုံးလုပ်နည်းတွေကို ဖော်ထုတ်ပြီး စွန့်လွှတ်နိုင်ရေး - စတာတွေကို အိုဘားမားက သူ့ကတိအတိုင်း ဆောင်ရွက်ရမှာ ဖြစ်ပါတယ်။
အိုဘားမားရဲ့ ရက်ပေါင်း ၁၀၀ မှာ ပြည်သူတွေဆီက အများဆုံးကြားရတာကတော့ “သူ သမ္မတဖြစ်လာလို့ပေါ့၊ ငါတို့တတွေ အကောင်းမြင်တဲ့ မျှော်လင့်ချက်နဲ့ အားတင်းပြီး နေနိုင်တာ …” ဆိုတာ ဖြစ်ပါတယ်။ အဲသည်လူတွေထဲမှာ အလုပ်ပြုတ်ထားတဲ့ မြန်မာ တချို့လည်း ပါပါတယ်။ ပြီးတော့ စာရင်းဇယားများ အလိုအရ ပြည်သူတွေက အရင်တုန်းကနဲ့ မတူအောင် တိုင်းပြည်ရေးရာကို အထူး စိတ်ဝင်စားပြီး သတင်းဖတ်တယ်၊ နားထောင်တယ်၊ ကြည့်တယ်လို့ တွေ့ရပါတယ်။ စီးပွားရေး ကျဆင်းချိန် - တိုင်းပြည်ရဲ့ ၁၀ % နီးပါး အလုပ် လက်မဲ့ ဖြစ်နေချိန်၊ အိမ်ပေါင်း ၈ သိန်းကျော် ကို ပိုင်ရှင်တွေ ဆုံးရှုံးနေချိန်မှာ အမေရိကန်ပြည်က လူတွေက အကောင်း မြင်နိုင်သေးတာကိုလည်း တွေ့ရပါတယ်။ သမ္မတကြီးက သူ့အားနည်းချက်တွေကို ဗြောင်ငြင်းတာ၊ ဆင်ခြေပေးတာ မလုပ်ပါဘူး။ သူ့ စီးပွားရေး ကူငွေတွေနဲ့ ငွေကြေး လုပ်ငန်းတွေက ဘောနပ်စ်တွေ ထုတ်ယူသွားတော့ - သူက ငါမှားသွားတယ်။ ဒီကောင်တွေ အဲလို လုပ်လိမ့်မယ် မထင်မိဘူး။ ငါ ပြင်ဆင်မယ်လို့ ၀န်ခံသွားပါတယ်။
နိုင်ငံရေး ပါတီ တခု အနေနဲ့ ပြိုင်ဘက် ရီပတ်ဘလီကင်ပါတီကို အတတ်နိုင်ဆုံး လက်ကမ်းပြီး တွဲ ကစားပြခဲ့ပါတယ်။ ကွန်ဂရက်မှာ၊ ဆီးနိတ်မှာ အသာစီး ရထားတဲ့ ကြားကပဲ လူနည်းစု ပါတီ ဖြစ်တဲ့ ရီပတ်ဘလီကင်တွေကို ညှိနှိုင်း ဆွေးနွေးတာကို တွေ့ရပါတယ်။ သမ္မတသက်တမ်း ၈ နှစ် အပြီး အကြီးအကျယ် အရှုံးပြသွားတဲ့ ရီပတ်ဘလီကင် ပါတီဝင်များနဲ့ ခေါင်းဆောင်များဖက်က ခုချိန်အထိ အနာ မကျက်နိုင်သေးတဲ့ အတွက် အိုဘားမား လုပ်သမျှကို အကောင်း မမြင်နိုင်သေးတာကိုလည်း မြင်တွေ့ရပါတယ်။
ရက်ပေါင်း ၁၀၀ နဲ့ တိုက်တိုက် ဆိုင်ဆိုင်ပဲ မက္ကစီကိုက ၀က်တုပ်ကွေး ထကြွလိုက်လို့ ခုဆိုရင် နိုင်ငံမှာ ကျန်းမာရေး အရေးပေါ် အခြေအနေကို ရင်ဆိုင်တွေ့နေရပြီ ဖြစ်ပါတယ်။ အဲသည်မှာ အိုဘားမား အစိုးရ အဖွဲ့က နေ့စဉ်ကို စာနယ်ဇင်းသမားများ၊ အဖွဲ့အစည်းများနဲ့ တွေ့ဆုံ ရှင်းလင်းပြီး အသိပေးနေတာကို မြင်နေရတော့ သဘာဝဘေး၊ ရောဂါကပ်ဘေးတွေကို တိုက်ရိုက်မဖြေရှင်းဘဲ နေတတ်တဲ့ တိုင်းပြည်ကလာတော့ ကိုယ့်ဖာသာကိုယ် ကြိတ်ပြီး ဆေးကုတတ်တဲ့ မောင်ရစ်တို့ မိသားစု အတွက်ကတော့ အံ့သြစရာ ဖြစ်ရပါတယ်။ ဒီသမ္မတနဲ့ကွာ … အလုပ်မရှိဘူးနဲ့ တူတယ်။ နေရာတကာ အကုန်လုံး သူချည်း ပါနေတော့တာပဲ။ အေးအေးနေပြီး တပ်မတော်နေ့ကျမှ မိန့်ခွန်း ထွက်ပြောပါတော့လား လို့ … ဂရုဏာဒေါသော ဖြစ်မိပါရဲ့။
ဒီစာကို ရေးရင်းနဲ့ ဒီမှာပဲ အခုရပ်တော့မယ်။ ဒီ အိုဘားမားနဲ့ ပတ်သက်ပြီး ရေးမိတဲ့ စာတွေ မနည်းဘူး။ သမ္မတ မဖြစ်ခင်တုန်းကလည်း မဖြစ်လို့။ ဖြစ်လာတော့လည်း ဖြစ်လာလို့နဲ့။ တော်ကြာ အိုဘားမားခရေဇီများ ဖြစ်နေသလား ဆိုပြီး လူတွေက မခေါ်ချင် မပြောချင် ဖြစ်ကုန်ကြလိမ့်မယ်နဲ့ တူပါရဲ့။ အိုဘားမားခရေဇီ မဟုတ်ပါဘူးဗျာ။ တိုင်းပြည်ကြီးကို နိုင်ငံရေး ခေါင်းဆောင် တဦးက ဘယ်လိုမျိုး ဦးဆောင်မှု ပေးသလဲ ဆိုတဲ့ လောကဇာတ်ခုံ ကြုံဆုံနေရပုံကို သတင်းပို့တာပါ။ ဘယ့်နှယ် ဗိုလ်သန်းရွှေကြီး လုပ်တတ်လိုက်တာ ဆိုပြီး ကြံဖန် ရှာဖွေ ရေးသားတဲ့ အသက်တော့ မမွေးပါရစေနဲ့။
Comments