နှစ်လုံးထီ လောင်းကစား ဖမ်းဆီးနေ
မိုးမခ အထောက်တော်၊ ရန်ကုန်
ဇူလိုင် ၃၁၊ ၂၀၀၉
လွန်ခဲ့သည့် ရက်ပိုင်းအတွင်း မြန်မာနိုင်ငံ၏ မြို့ကြီးများဖြစ်သည့် ရန်ကုန်၊ မန္တလေးနှင့် မော်လမြိုင်မြို့တို့တွင် တရားမ၀င် ၂လုံး၊ ၃လုံးထီ (ချဲထီ) လောင်းကစား သူများကို စီမံချက်ဖြင့် ထောက်လှမ်းဖမ်းဆီးနေကြောင်း ရန်ကုန်မြို့ရှိ လောင်းကစား ဒိုင်နှင့် ထိုးသားများက ပြောဆိုသည်။
ယခုရက်ပိုင်းအတွင်း တယ်လီဖုန်းများဖြင့် အလောင်းအစား လက်ခံလျက်ရှိသည့် ဒိုင်များမှာ ရဲနှင့် ရဲထောက်လှမ်းရေးများက တယ်လီဖုန်း ကြားဖြတ်နားထောင်ပြီး ဖမ်းဆီးနေသည်ကို ကြောက်ရွံ့ကာ ရပ်နားထားကြသည် ဟုလည်း သိရှိရသည်။ ပုံမှန်ကာလများတွင် မိုဘိုင်းဖုန်းများဖြင့် လောင်းကြေးလက်ခံကာ တပတ်ကုန်ပြီးမှ အိမ်တိုင်ရာရောက် ငွေပေးငွေယူလုပ်သည့် စနစ်ဖြင့် လုပ်ကိုင်ခြင်းမှာ အန္တရာယ် သိပ်မရှိသော်လည်း ယခုအခါ တယ်လီဖုန်းကြား ဖြတ်နားထောင်သည့် နည်းလမ်းဖြင့် ဖမ်းဆီးနေခြင်းကြောင့် စိုးရိမ်နေကြခြင်း ဖြစ်သည်ဟုလည်း သိရသည်။
ပြီးခဲ့သည့် သီတင်းပတ်မှ စတင်ကာ မသင်္ကာသူများကို ချဲထီလောင်းကြေး စာရွက်များ၊ အတိတ်စာရွက်များ ပါရှိခြင်း ရှိမရှိစစ်ဆေးရန် ညွှန်ကြားထားပြီး၊ ယခင်က ကြိုးတယ်လီဖုန်းနှင့် မိုဘိုင်းတယ်လီဖုန်းများတွင် နိုင်ငံရေး ကိစ္စရပ်များကိုသာ ကြားဖြတ် နားထောင်လျက်ရှိသော်လည်း ယခုအခါ ချဲထီနှင့် ပတ်သက်သည်များလည်း ကြားဖြတ်နားထောင်ပြီး ဖမ်းဆီးရန် ညွှန်ကြားထားသည်ဟု ရန်ကုန်ကန်တိုင်း ရဲတပ်ဖွဲ့မှ တပ်ဖွဲ့ဝင်တဦးက ပြောဆိုသည်။
မြန်မာနိုင်ငံတွင် ထိုင်းနိုင်ငံ တီဗီ လိုင်းမှ နေ့စဉ် စတော့ရှယ်ယာ ဈေးကွက် အညွှန်းကိန်း ဂဏန်းများကို အမှီပြုပြီး တရက်လျင် ၂ကြိမ် အလောင်းအစား လုပ်နေကြသည်ကို ၂လုံးထီဟု ခေါ်ဆိုပြီး ထိုင်းနိုင်ငံမှ ၁၅ရက်တကြိမ် ဖွင့်သည့် အစိုးရထီ၏ နောက်ဆုံး ဂဏန်း ၃လုံးကို အလောင်းအစားပြုသည်ကို ၃လုံးထီဟု ခေါ်ဆိုသည်။
မည်သည့် အကြောင်းကြောင့်ထိုသို့ ဖမ်းဆီးလျက်ရှိသည်ကို မသိရှိရသော်လည်း မကြာမီ ရက်ပိုင်းအတွင်း နိုင်ငံတကာ မီဒီယာ အချို့နှင့် ပြည်ပမြန်မာ သတင်းဌါနများမှ ချဲထီအကြောင်း ရေးသား လွှင့်ထုတ်ခဲ့ခြင်းကြောင့် ဖြစ်နိုင်သည်ဟူသည့် ယူဆမှုများလည်း ထွက်ပေါ်နေသည်ကို ကြားသိရ၏။
မြန်မာတနိုင်ငံလုံးနှင့် ကမ္ဘာတ၀ှမ်းမှ အစိုးရများ၊ ခေါင်းဆောင်များက စိတ်ဝင်စားလျက်ရှိသည့် မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို စွဲဆိုထားသည့် မတရားမှု အမိန့်ချရန် နီးကပ်နေသည့် ကာလနှင့် ချဲထီနှိမ်နှင်းမှု စစ်ဆင်ရေးတို့ တိုက်ဆိုင်နေသည်ကိုလည်း တွေ့ရှိရသည်။ ချဲထီသည် ရဲနှင့် ထောက်လှမ်းရေး အစရှိသည့် လုံခြုံရေး အာဏာပိုင်များအတွက် ပုံမှန် ၀င်ငွေရလမ်း တခုဖြစ်ပြီး နာမည်ရှိပြီး ထင်ရှားသည့် ချဲဒိုင်ကြီးများမှာ သက်ဆိုင်ရာမြို့နယ်၊ တိုင်းရဲမှူးများ၊ ရဲအရာရှိများကို ပေါင်းသင်းပေးကမ်း ထားကြရသည်ဟု ရန်ကုန်မြို့မှ အလတ်စားချဲဒိုင်တဦးက ပြောဆိုသည်။
(Photo - Internet)
Comments