ငြိမ်းချမ်းရေးအဆိုနဲ့လှုပ်ရှားမှု မှန်သမျှ ပယ်ချခံရမည့် ရှေ့တော်ပြေးနိမိတ်
တူမောင်ညို
သြဂုတ် ၁၀၊ ၂၀၁၁
“အိတ်ဖွင့်ပေးစာ” ချင်း တိုးတိုက်မိကြလေသလော။
“ငြိမ်းချမ်းရေး လိုလားသူများအတွက်”ဆိုပြီး ရည်ညွန်းထားသည့် “လွှတ်တော် ကိုယ်စားလှယ်များ၏ အိတ်ဖွင့်ပေးစာ” (သြဂုတ် ၈ရက်) နေ့စွဲဖြင့်ထွက်လာသည်။
(မြန်မာ့အလင်းသတင်းစာ/၉ သြဂုတ်၊ စာမျက်နှာ ၆ တွင်ဖေါ်ပြထားသည်)
“ငြိမ်းချမ်းရေး”ကို တပြည်လုံးကလိုလားသည်။
လူမျိုးစုံပေါင်းစုံပြည်သူလူထုတစ်ရပ်လုံးကလည်း အူလှိုက်သည်းလှိုက်လိုလားသည်။ ယင်းကို သံသယ မရှိသင့်။
ထူးဆန်းသည်က ပြည်ထောင်စုဝန်ကြီး ဦးကျော်ဆန်းက ငြိမ်းချမ်းရေးနဲ့ နိုင်ငံရေးကို “အန္တရာယ်” ဆိုပြီး ရိုးမယ်ဖွဲ့နေခြင်းဖြစ် သည်။ ဦးကျော်ဆန်းက ငြိမ်းချမ်းရေးနဲ့ နိုင်ငံရေးကို “အန္တရာယ်”ဟု ပြောဆိုပြီးနောက် ဤအိတ်ဖွင့်ပေးစာပေါ်ထွက်လာခြင်းဖြစ်သည်။
“လွှတ်တော်ကိုယ်စားလှယ်များ၏ အိတ်ဖွင့်ပေးစာ”ကိုလေ့လာကြည့်ကြပါစို့။
“ကြံ့ဖွံ့ပါတီ (USDP)လွှတ်တော်အမတ်များဦးဆောင်သည့်” အိတ်ဖွင့်ပေးစာဖြစ်သည်။
လက်ရှိ ဥပဒေပြုရေး၊ အုပ်ချုပ်ရေး၊ တရားစီရင်ရေး မဏ္ဍိုင် ၃ ရပ် ကို ကြံ့ဖွံ့ပါတီဝင်များဖြင့်သာ ဖွဲ့စည်းထားခြင်းဖြစ်သည်။ သို့ပါ၍ အိတ်ဖွင့်ပေးစာပါ သဘောထားသည် လက်ရှိ အစိုးရ၏ သဘောထားကို နီးနီးကပ်ကပ်ထင်ဟပ်နေမှာသေချာသည်။
နေ့စဉ်ထုတ်သတင်းစာအားလုံးတွင် ဖေါ်ပြထားသော“အိတ်ဖွင့်ပေးစာ”လည်းဖြစ်သည်။ အခြားသော လွှတ်တော်ကိုယ်စားလှယ်များက အိတ်ဖွင့်ပေးစာထုတ်ပြန်ခဲ့လျှင် နေ့စဉ်ထုတ်သတင်းစာများတွင် ယင်းကဲ့သို့ဖေါ်ပြနိုင်ခွင့် ရှိပါသလော။
အိတ်ဖွင့်ပေးစာ၏ သဘောထားအချုပ်မှာ ဓါတ်ပြားဟောင်းပြန်ဖွင့်ပြခြင်းသာ ဖြစ်သည်။ အုပ်စိုးသူအစိုးရအဆက်ဆက်သည် ကောင်း၏။ ငြိမ်းချမ်းရေးကို လိုလား၏၊ လက်နက်ကိုင်အဖွဲ့အစည်းများသည် သံသယလွန်ကဲ၏၊ အစွန်းရောက်၏ စသဖြင့် တစ်ဖက် သတ် အပြစ်ပုံချကာရေးသားထားခြင်းဖြစ်၏။
အိတ်ဖွင်ပေးစာပါသဘောထားသည် အပြုသဘောထားမျိုးမဟုတ်။
တန်းတူရည်တူ ဆွေးနွေးဖြေရှင်း ပြေလည်လိုသည့်သဘောထား ဖေါ်ပြချက်လည်း မဟုတ်ပါ။
“အိတ်ဖွင့်ပေးစာ” ကို ပြည်သူ့လွှတ်တော်ကိုယ်စားလှယ် (၂၀) ဦးနဲ့ အမျိုးသားလွှတ်တော်ကိုယ်စားလှယ် (၃) ဦး ပါဝင် လက်မှတ်ရေးထိုးထားသည်ဟု ဆိုသည်။
ပါဝင်လက်မှတ်ရေးထိုးကြသူများတွင် နိုင်ငံရေးပါတီ (၁၂) ပါတီ မှ (၂၂) ဦးနှင့် တသီးပုဂ္ဂလ (၁) ဦးပါဝင်ပါသည်။
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP)မှ အများဆုံးဖြစ်သည်။ (၈) ဦး ပါဝင်လက်မှတ်ထိုးပါသည်။
ရှမ်းတိုင်းရင်းသားများ ဒီမိုကရက်တစ်ပါတီ (SNDP) မှ ဒုတိယအများဆုံးဖြစ်ပြီး (၃) ဦး ပါဝင် လက်မှတ်ရေးထိုးပါသည်။ ပအိုဝ်းအမျိုးသားအဖွဲ့ချုပ်(PNO)မှ (၂) ဦး၊ ကရင်ပြည်သူ့ပါတီ မှ (၁) ဦး၊ ချင်းအမျိုးသားပါတီ မှ (၁) ဦး၊ ဖလုံစဝေါ် ဒီမိုကရက်တစ် ပါတီမှ (၁) ဦး၊ တိုင်းရင်းသားစည်းလုံးညီညွတ်ရေးပါတီ (တစည)မှ (၁) ဦး၊ အမျိုးသားဒီမိုကရေစီအင်အားစုပါတီ (NDF) မှ (၁) ဦး၊ စည်းလုံးညီညွတ်ရေးနှင့် ဒီမိုကရေစီပါတီ ကချင်ပြည်နယ်(စဒက)မှ (၁) ဦး၊ ရခိုင်တိုင်းရင်းသားများတိုးတက်ရေးပါတီမှ (၁)ဦး၊ မွန်ဒေသလုံးဆိုင်ရာဒီမိုကရေစီပါတီ မှ (၁) ဦး၊ ကရင်ပြည်နယ်ဒီမိုကရေစီနှင့် ဖွံ့ဖြိုးတိုးတက်ရေးပါတီ (ယခင် DKBA) မှ (၁) ဦး နှင့် ပုဂ္ဂလိက (၁) ဦးတို့ ပါဝင်လက်မှတ်ရေးထိုးပါသည်။ ( ဇယားတွင် ကြည့်ပါ)
ထူးဆန်းသည်ဟုပြောရမည်လားမသိ။
လွန်ခဲ့သော သြဂုတ်လ (၃) ရက်နေ့က “ညီနောင်တိုင်းရင်းသား ၅ ပါတီ”၏ သဘောထားကြေညာချက် ( ၄/၂၀၁၁) ကို သက်ဆိုင်ရာပါတီများမှ ဥက္ကဋ္ဌ(၃) ဦးး၊ ဒုဥက္ကဋ္ဌ (၁) ဦး နှင့် ဗဟိုအလုပ်အမှုဆောင် (၁) ဦးတို့က ပါဝင်လက်မှတ်ရေး ထိုးထုတ်ပြန် ခဲ့ပါသည်။
“ကြံ့ဖွံ့ပါတီ(USDP)လွှတ်တော်အမတ်များဦးဆောင်သည့်” အိတ်ဖွင့်ပေးစာ(သြဂုတ်၈)တွင်လည်း အဆိုပါ “ညီနောင် တိုင်း ရင်းသား ၅ ပါတီ”မှ လွှတ်တော်ကိုယ်စားလှယ် (၇) ဦးက ပါဝင်လက်မှတ်ရေးထိုးထားပြန်သည်။
သက်ဆိုင်ရာပါတီမှကိုယ်စားပြုပြီး ဝင်ရောက်ယှဉ်ပြိုင်အရွေးခံခဲ့ကြရသော လွှတ်တော်ကိုယ်စားလှယ်များသည် သက်ဆိုင်ရာ မိခင်ပါတီနှင့်အတူ မရပ်တည်ဘဲ ယခုကဲ့သို့ သီးခြားရပ်တည်ဆောင်ရွက်နိုင်ခွင့်ရှိ်ပါသလော။
သို့တည်းမဟုတ် “နိုင်ငံရေးပေါ်တာ” အဆွဲခံရခြင်းပင်လော။
ညီနောင်တိုင်းရင်းသားပါတီ (၅) ပါတီမှ (ပြည်သူ့ + အမျိုးသား) လွှတ်တော်ကိုယ်စားလှယ် စုစုပေါင်းသည် ၅၃ ဦးရှိပါသည်။
“ကြံ့ဖွံ့ပါတီ (USDP)လွှတ်တော်အမတ်များ ဦးဆောင်သည့်အိတ်ဖွင့်ပေးစာ” သည် “ညီနောင်တိုင်းရင်းသား ၅ ပါတီ” ၏ သဘောထားကြေညာချက် (၄/၂၀၁၁) တွင်ပါရှိသော “အပစ်အခတ်ရပ်စဲရေး၊ ငြိမ်းချမ်းရေးကော်မတီဖွဲ့စည်းရေး၊ ငြိမ်းချမ်းရေးအလုပ်ရုံ ဆွေးနွေးပွဲ ကျင်းပရေး၊ ဒုက္ခရောက်နေသောဒေသခံပြည်သူများအားကူညီရေး” စတဲ့ အဆိုပြုချက်များကို ပယ်ချလိုက်ခြင်းလည်း ဖြစ်သည်။
“ကြံ့ဖွံ့ပါတီ (USDP) လွှတ်တော်အမတ်များဦးဆောင်သည့် အိတ်ဖွင့်ပေးစာ”သည် လာမည့် သြဂုတ်လ ၂၂ ရက်နေ့ တွင် စတင်ကျင်းပမည်ဆိုသော လွှတ်တော်အစည်းအဝေးများတွင် တင်ပြလာနိုင်သည့် “ငြိမ်းချမ်းရေး” အဆိုမှန်သမျှ ပယ်ချခံရမည့် ရှေ့တော်ပြေးနိမိတ်လည်း ဖြစ်သည်။
“အိတ်ဖွင့်ပေးစာ”ကို “အိတ်ဖွင့်ပေးစာ” နဲ့တုန့်ပြန်လိုက်တာလည်း ဖြစ်နိုင်သည်။ အိတ်ဖွင့်ပေးစာချင်း ထိပ်တိုက်တွေ့ကြတာလည်း ဖြစ်နိုင်သည်။
အာဏာရအစိုးရ၏ လွှတ်တော်ကိုယ်စားလှယ်တွေ ဦးဆောင်တဲ့ တုန့်ပြန်ချက်လည်း ဖြစ်သည်။
အာဏာရအစိုးရ၏ လွှတ်တော်ကိုယ်စားလှယ်တွေ ဦးဆောင်တဲ့ လွှတ်တော်ပြင်ပတိုက်ပွဲ ဟုလည်း ပြောနိုင်သည်။
“ကြံ့ဖွံ့ပါတီ (USDP)လွှတ်တော်အမတ်များဦးဆောင်သည့်အိတ်ဖွင့်ပေးစာ”တွင်
ပါဝင်လက်မှတ်ရေးထိုးသူများ
၂၀၁၁ သြဂုတ်လ ၈ ရက်
(ဇယား ၁)
| စဉ် | အမည် | မဲဆန္ဒနယ် | ပါတီ |
| ၁။ | ဒေါ်မိယဉ်ချမ်း | ကျိုက်မရော | ပြည်ထောင်စုကြံ့ခိုင်ရေးနှင့် ဖွံ့ဖြိုးတိုးတက်ရေးပါတီ |
| ၂။ | ဒေါ်နန်းနွံ | ရှားတော | ။ |
| ၃။ | ဦးသူရိန်ဇော် | ကော့ကရိတ် | ။ |
| ၄။ | ဦးဝင်းစိန် | ကဝ | ။ |
| ၅။ | ဦးတီခွန်မြတ် | ကွတ်ခိုင် | ။ |
| ၆။ | ဦးမောင်တိုး | မင်းလှ | ။ |
| ၇။ | ဦးလှမြင့်ဦး | ပျဉ်းမနား | ။ |
| ၈။ | ဦးသန်းမြင့် | ဝမ်းတွင်း | ။ |
| ၉။ | ဦးဆောင်ဆီ | ကျောက်မဲ | ရှမ်းတိုင်းရင်းသားများဒီမိုကရက်တစ်ပါတီ |
| ၁၀။ | ဦးစိုင်းသီဟကျော် | မိုင်းရယ် | ။ |
| ၁၁။ | ဒေါ်နန်းဝါနု | ကွန်ဟိန်း | ။ |
| ၁၂ | ဦးခွန်မောင်သောင်း | ပင်လောင်း | ပအိုဝ်းအမျိုးသားအဖွဲ့ချုပ် (ယခင် PNO) |
| ၁၃ | ဦးနေဝင်းထွန်း | ရှမ်းပြည်နယ်၊ အမှတ် ၉ | ။ |
| ၁၄ | ဦးစောနေကော်ကြီး | သံတောင်ကြီး | ကရင်ပြည်သူ့ပါတီ |
| ၁၅ | ဦးငွန်မောင်း | ဟားခါး | ချင်းအမျိုးသားပါတီ |
| ၁၆ | ဦးစောသိန်းအောင် | လှိုင်းဘွဲ့ | ဖလုံ-စဝေါ်ဒီမိုကရက်တစ်ပါတီ |
| ၁၇ | ဦးမန်းမောင်မောင်ဉာဏ် | ပန်းတနော် | တိုင်းရင်းသားစည်းလုံးညီညွတ်ရေးပါတီ (တစည) |
| ၁၈ | ဒေါက်တာသန်းဝင်း | မြောက်ဥက္ကလာပ | အမျိုးသားဒီမိုကရေစီအင်အားစုပါတီ (NDF) |
| ၁၉။ | ဒေါ်ဒွဲဘူ | အင်ဂျန်းယန် | စည်းလုံးညီညွတ်ရေးနှင့် ဒီမိုကရေစီပါတီ ကချင်ပြည်နယ်(စဒက) |
| ၂၀။ | ဒေါ်ခင်စောဝေ | ရသေ့တောင် | ရခိုင်တိုင်းရင်းသားများ တိုးတက်ရေးပါတီ (RNDP) |
| ၂၁။ | ဒေါ်မိမြင့်သန်း | ရေး | မွန်ဒေသလုံးဆိုင်ရာဒီမိုကရေစီပါတီ |
| ၂၂။ | ဦးမန်းအောင်တင်မြင့် | ကရင်ပြည်နယ်၊ အမှတ် ၁၂ | ကရင်ပြည်နယ်ဒီမိုကရေစီနှင့် ဖွံ့ဖြိုးတိုးတက်ရေးပါတီ (ယခင် DKBA) |
| ၂၃။ | ဦးစခုန်တိန့်ယိန်း | ကချင်ပြည်နယ်၊အမှတ် ၄ | တသီးပုဂ္ဂလ |
အမှတ်စဉ် (၁၃/၂၂/၂၃) တို့သည် အမျိုးသားလွှတ်တော်ကိုယ်စားလှယ်များဖြစ်ပြီး၊ ကျန်သူများမှာ ပြည်သူ့လွှတ်တော် ကိုယ်စားလှယ်များဖြစ်သည်။
ညီနောင်တိုင်းရင်းသား ၅ ပါတီ၏ သဘောထားကြေညာချက်( ၄/၂၀၁၁) တွင်
လက်မှတ်ရေးထိုးကြသူများ
၂၀၁၁ ခုနှစ်၊ သြဂုတ်လ(၃)ရက်
(ဇယား ၂)
| စဉ် | အမည် | တာဝန် | ပါတီ |
| ၁။ | ဦးဇိုဇမ် | ဥက္ကဋ္ဌ | ချင်းအမျိုးသားပါတီ |
| ၂။ | ဦးနိုင်ငွေသိန်း | ဥက္ကဋ္ဌ | မွန်ဒေသလုံးဆိုင်ရာဒီမိုကရေစီပါတီ |
| ၃။ | ဦးစောသန်းကျော်ဦး | ဥက္ကဋ္ဌ | ဖလုံစဝေါ် ဒီမိုကရက်တစ်ပါတီ |
| ၄။ | ဦးစိုင်းထွေးမောင် | ဗဟိုအလုပ်အမှုဆောင် | ရှမ်းတိုင်းရင်းသားများဒီမိုကရက်တစ်ပါတီ |
| ၅။ | ဦးအုန်းတင် | ဒု- ဥက္ကဋ္ဌ | ရခိုင်တိုင်းရင်းသားများတိုးတက်ရေးပါတီ |
Comments