ဒေါ်စုကိုထိရင် မကြိုက်ဘူးတဲ့လား …
ဖိုးထက်၊ မေ ၃၁၊ ၂၀၁၂
အက်ဆေး (Essay) ကို ဆရာကြီးများက အစမ်းစာ၊ စာတမ်းငယ် စသည်ဖြင့် ဘာသာပြန်ကြသည်။ ထိုအထဲကမှ ရင်တွင်းစာဟု ဘာသာပြန်သည်ကို သဘောအတွေ့ဆုံးဖြစ်သည်။ စာတစ်ပုဒ်၊ ကဗျာတစ်ပုဒ်၊ သီချင်းတစ်ပုဒ်၊ ပန်းချီးကားတစ်ချပ် ရေးဖို့ ရင်ဘတ်အတွင်းက ခံစားမှုတစ်ခု လိုအပ်သည် မဟုတ်လား။ ဖြတ်ခနဲ့၊ ရှပ်ခနဲ့ တွေ့လို့ ကြုံလိုက်ရလို့ အူလှိုက်၊ သဲလှိုက် ခံစားလိုက်ရသော စိတ်ခံစားမှု တစ်ခုကို ဘယ်သူဖတ်ဖတ်၊ မဖတ်ဖတ် ချရေးထားမိတာ ကျနော့် အပြစ်လို့ ဆိုချင်လဲ ဆိုကြပါစေတော့။ အက်ဆေးရေးခြင်း အတတ်ပညာမှာ ဆရာကြီး မြသန်းတင့်၊ ဆရာကြီး နေ၀င်းမြင့် တို့ ခြေဖ၀ါးအောက်က ခြေမှုန်လောက်တောင် တန်ဖိုးရှိအောင် မရေးတတ်မှန်းသိပေမယ့် ရေးချင်တာကိုတော့ မတားနဲ့တော့လို့ တောင်းပန်ချင်ပါတယ်။
ပြီးတော့ ကျနော် ရေးသမျှ၊ ခံစားသမျှ၊ လျှာရှည်သမျှ မိုးမခမှ ဆရာများက မငြီးမငြူစူ၊ မပြင်မဆင်(စားလုံးပေါင်းတွေ မှားနေရင်တောင် နင့်တာဝန် နင်ယူစနစ်ဖြင့်)၊ မဖြတ်မတောက် တင်ပေးကြပါသည်။ ကျေးဇူးအလွန်တင်သလို အားတက်မိတာလဲ မရှက်တမ်းဝန်ခံချင်သည်။ ကျနော်ရေးတဲ့ အက်ဆေး၊ ဆောင်းပါး၊ တောင်မရောက် မြောက်မရောက်စာများကို ခရီးသွားဟန်လွှဲ ခလုတ်တိုက်မိပြီး ဖတ်မိသွားသော စာဖတ်သူများကိုတော့ အယူအဆတူသည်ဖြစ်စေ၊ မတူသည်ဖြစ်စေ၊ ဆဲသည်ဖြစ်စေ၊ မုန်းသည်ဖြစ်စေ ပိုလို့တောင် ကျေးဇူးတင်ပါသည်။
စာရေးသူ နှင့် စာဖတ်သူ ဆိုသည့် နှစ်ဦး နှစ်ဘက်တွင် စာရေးသူဘက်မှလဲ မိမိရေးချင်တာ ရေးလိုက်သလို စာဖတ်သူဘက်ကလဲ အပြည့်အ၀ ဝေဖန်ပိုင်ခွင့်၊ ပိုင်းခြား ဆုံးဖြတ်ပိုင်ခွင့် အပြည့်ရှိသည် မဟုတ်လား။ မရင့်ကျက်နိုင်သေးသော လူသာမန်တစ်ယောက်အနေဖြင့် ရေးသော စာများကို ချီးကျူးထောပနာ ပြုသူများ၊ မြှောက်ထိုး ပင့်ကော် လက်ခုပ်ဝင်တီးပေးသွားသော သူများကြောင့် အားတက်ရသလို အမှိုက်တွေ၊ ဘာတွေရေးမှန်းမသိ ဆိုပြီး ဆဲသွားကြသော စာဖတ်သူများကြောင့်လဲ စိတ်အားငယ်မိတာကိုလဲ ၀န်ခံပါသည်။ မည်သို့ပင်ဖြစ်စေ ကျနော့်စာကို ဖတ်ပြီဆိုတာနဲ့ကို ကျနော့်အပေါ်မှာ ပြောချင်တာပြော၊ မှတ်ချက် ကြိုက်သလို ပေးပိုင်ခွင့် ရှိကြပါသည်။
ထိုသို့ မှတ်ချက်ပေးသူများထဲမှ စာဖတ်သူတစ်ယောက်က ကျနော့်ကို “ဒေါ်စုကို ထိရင် မရဘူး ဆိုတဲ့ စိတ်ကလေးကို ဆင်ခြင်ပါ..ကိုဖိုးထက်” ဆိုသည့် မှတ်ချက်လေးကြောင့် ဆပွားတွေးမိသည်။ ကျနော် တစ်ကယ်ဘဲ ဒေါ်စုကို ထိရင် မခံနိုင်ဘူးဖြစ်နေသလား။ ကျနော်ရေးတဲ့ စာတွေထဲမှာ ဒေါ်စုကို ထိရင် မရဘူးကွဆိုသည့် ရန်စွယ်ငေါငေါ၊ ပုဆိုး စွန်တောင်စွဲ ရန်များ လုပ်မိနေသလား။ ဖြစ်နိုင်ပါသည်။ ကျနော်က သာမန်ပြည်သူလူထုကြီးထဲက လူသာမန်တစ်ယောက်သာ ဖြစ်ပါသည်။ ကျနော်တို့ရဲ့ လူထုခေါင်ဆောင် ဒေါ်စုကို ဝေဖန်တိုက်ခိုက်တာ တွေ့ရလျှင် သဘောမကျချင်တာတော့ ၀န်ခံပါသည်။
ဒါဆိုလျှင် ဒေါ်စုပြိုင်ဘက်တွေကို တိုက်ခိုက်တာကော အားပေးမိနေသလားဟု ကျနော့်ကို ကျနော် ပြန်မေးမိသည်။ ဒါတော့ မဟုတ်။ အလုံးစုံမှားသည်။ ဒေါ်စုကို အောက်တန်းခပ်ကျကျ၊ မိဘဆိုဆုံးမမှု အားနည်းသဖြင့် ယုတ်ယုတ်မာမာ မကြားဝံ့မနာသာ စကားများဖြင့် တိုက်ခိုက်နေတာတွေ တွေ့ရလျှင်တောင် ကျနော့်စိတ်မှာ သူတို့အတွက် စိတ်မကောင်းဖြစ်ရုံကလွဲလို့ တုံ့ပြန်ချင်စိတ် အလျှင်းမရှိ။ ထို့အတူ နိုင်ငံနှင့် လူမျိုးကို အောက်တန်းကျအောင် လုပ်ပစ်ခဲ့ကြသော၊ လုပ်နေကြသော လူများကို မချစ်နိုင်ပေမယ့် သာမန်စကားလုံးတွေဖြင့်သာ ဝေဖန်၊ ရှုံ့ချ မိသည်။ အင်တာနက်ပေါ်မှာ သူ့ကိုယ်မသိ၊ ကိုယ့်သူမသိ အခြေအနေပေမယ့် ကိုယ့်လိပ်ပြာကိုတော့ ကိုယ်လုံခြုံချင်သည်။ နိုင်ငံအတွက် လူဆိုး၊ သူခိုးများကို ဖရုဿဝါစာစကားများဖြင့် ဆဲနေသော ပြည်သူ၊ ပြည်သားများကို တားလို့မရပေမယ့် ဆန့်ကျင်ပါသည်။ နိုင်ငံအကျိုး၊ လူမျိုး အကျိုးအတွက် လူကြီးလူကောင်းဆန်ဆန် ပြောနေ၊ အလုပ် လုပ်နေကြသော သူများကိုတော့ စစ်တပ်ကဖြစ်စေ၊ ငရဲပြည်ကဖြစ်စေ၊ နတ်ပြည်က လာပစေ ကျနော်က စိတ်အားဖြင့် အားပေးသည်။ လူအားဖြင့် နောက်လိုက် ဖြစ်သည်။
ကျနော်တစ်ဦးတည်း ခံစားမှုအရ အမှန်အတိုင်း ရိုးသားစွာဝန်ခံရလျှင် လက်ရှိ မြန်မာနိုင်ငံရေး အခြေအနေကို မကြိုက်ပါ။ ဒေါ်စု ဗဟိုပြု၊ ဦးသိန်းစိန်ဗဟိုပြု နိုင်ငံပြုပြင်ပြောင်းလဲရေးကို မကြိုက်။ ကျနော်လိုချင်သည်က Utopia နိုင်ငံတော်။ နိုင်ငံသားအချင်းချင်း တိုက်ခိုက်မနေကြဘဲ ငြိမ်းချမ်းသာယာသည့် ပြီးပြည့်စုံသော မြန်မာနိုင်ငံတော်။ လောဘ၊ ဒေါသ၊ မောဟ များ၏ သားကောင် လူတွေကြားထဲမှာ လက်တွေ့နှင့် အလှမ်းဝေးတာကိုလဲ သိပါသည်။
မြန်မာနိုင်ငံတော်ကြီး အောက်ကျ နောက်ကျ ဘယ်လောက်နိုင်တယ်ဆိုတာကို လူတိုင်း သိကြပါသည်။ အရင်အစိုးရလူတွေက စီးပွားရေး ပိတ်ဆို့မှုကြောင့်။ ကျနော်တို့ ပြည်သူတွေက ချစားသော အစိုးရ၊ စီမံခန့်ခွဲမှု ညံ့ဖျဉ်းသော အစိုးရကြောင့်။ ကြိုက်သလောက် လေကုန်၊ လက်ညောင်းအောင် အငြင်းပွားနိုင်ကြပါသည်။ သို့သော် အဖြစ်မှန်ကတော့ တန်းတူညီမျှမှုမရှိ၊ အခွင့်ထူးခံလူတန်းစား၊ ပေါင်းစား၊ ချစားနေကြသော ခရိုနီကြီးများ၊ လိုတစ်မျိုး၊ မလိုတစ်မျိုး သားရေကွင်း တရားဥပဒေတွေကြောင့်ဘဲ ဖြစ်သည်။
နိုင်ငံအတွက် ပြုပြင်ပြောင်းလဲချင်ကြသော လူများတွင် ဒေါ်စုနှင့် ဦးသိန်းစိန်သည် အခရာအကျဆုံးဆိုတာ ကျနော်တို့ အားလုံးသိကြသည်။ ဒေါ်စုဘက်ကလဲ ပြည်သူ၊ ပြည်သားများကို နိုင်ငံရေး မျက်စိပွင့်ဖို့ အစွမ်းကုန် ကြိုးစားပြီး အစိုးရကို တည့်မတ်ဖို့ ကြိုးစားသည်။ ဦးသိန်းစိန်ကြီး ဘက်ကလဲ လုပ်ဖော်ကိုင်ဖက် လူကြီးများကို အကာအကွယ်ပေးရင်း၊ သိက္ခာရှိဖို့ ကြိုစားရင်း နိုင်ငံကို ပြင်ဖို့ ကြိုးစားနေသည်ဟုဘဲ ရိုးရိုးသားသားမြင်ပါသည်။ “ဇာတ်တိုက်ထားတဲ့ အကွက်တွေပါကွာ” ဟု ခံရတာများလို့ မယုံမကြည်ဖြစ်နေကြသော လူများကို အပြစ်မဆိုပေမယ့် ကျနော်ကတော့ ရှဉ့်လဲ လျှောက်သာ ပျားလဲစွဲသာ လမ်းကို လျှောက်လှမ်းနေတယ်လုိ့ဘဲ မြင်ပါသည်။
မပွင့်မလင်းဖြင့် နိုင်ငံပိုင် သံယံဇာတ၊ လုပ်ပိုင်ခွင့်များကို မိမိဘိုးဘွားပိုင်ပစ္စည်းလို သဘောထားခဲ့ကြသော အစိုးရအောက်မှာ ဖြတ်သန်းခဲ့ကြရသော ကျနော်တို့အတွက် ဒေါ်စုပြောသော သာမန်စကားလုံး တစ်ခုသည်ပင် အားရ၊ပါးရ ကျေနပ်စရာ စကားလုံးများပင်ဖြစ်သည်။ ဒေါ်စုက တွေးခေါ်မြှော်မြင်မှု အများကြီး မသုံးလိုက်ရဘဲ ပြောလိုက်သော စကားလုံးလေး တစ်လုံးကို နင်းပြား ကျနော်တို့က ကြက်သီးထလောက်အောင် အားပေးမိကြတာ အပြစ်လို့ မမြင်ကြစေလိုပါ။
လက်ရှိ နိုင်ငံအနေအထားက လူဟောင်းများ ဖောက်နေသော လမ်းကြီးပေါ်မှာ လူဟောင်းတွေ ခေါင်းဆောင်ရာနောက်သို့ လိုက်နေရဆဲဖြစ်သည်။ နိုင်ငံကို မျက်လှည့်ပြသလို အုံဖွ၊ အပ်ချလောင်းဆိုပြီး တိုးတက်အောင် သိကြားမင်းကြီး လာလုပ်ပေးရင်တောင် မဖြစ်နိုင်သော နိုင်ငံအနေအထား။ လုပ်စရာ အလုပ်တွေက တစ်ပုံတစ်ခေါင်း။ ဆယ်စုနှစ်ပေါင်းများစွာ ပြင်ယူရအုံးမည့် ပညာရေး၊ စိတ်နေ၊ စိတ်ထား။ သူများ နိုင်ငံ၊ လူမျိုးတွေ ဘယ်လိုဆိုတာ သိနေကြသော ကျနော်တို့အတွက် ပါးစပ်ပြောတွေနဲ့ဘဲ အချိန်ကုန်နေတာကို အားမရတာ အပြစ်လို့ မတင်ကြစတမ်းပေါ့ဗျာ။
ဒေါ်စု (lady first သဘောအရ ရှေ့က ရေးပါသည်)၊ ဦးသိန်းစိန် တို့ အသက်တွေ ပြန်ကြည့်တော့ ၆၀ ကို အတော်ကျော်ကြပြီ။ ကျန်းမာရေး ဒေါင်ဒေါင်မြည်တွေ မဟုတ်ကြ။ မပြောကောင်း မဆိုကောင်း ကွေးသောလက် မဆန့်ခင်၊ ဆန့်သောလက် မကွေးခင် တစ်ခုခု ဖြစ်သွားကြပါပြီတဲ့။ အောက်တန်းကျနေသော ရွှေပြည်ကြီး ရှေ့ရေးကို ရင်လေးမိပါသည်။ ကျနော်တို့ လိုချင်တာက ကိုယ့် အသက်မွေး ၀မ်းကျောင်းနှင့်ကိုယ် လူမွှေးလူရောင် ပြောင်အောင် အသက်မွေးလို့ရသော မြန်မာနိုင်ငံသားဘ၀။ သမ္မတမှ အစ လမ်းဘေး မြေတူးသူအဆုံး ကိုယ်စိုက်ပျိုးသမျှ ကိုယ်ရိတ်သိမ်းခွင့်ရှိသော ဘ၀များ။ ကျနော်တို့အပေါ်တွင် စိတ်ကောင်း၊ စေတနာရှိသော အုပ်ချုပ်သူများ။ ကျနော်တို့ကို ပညာတတ်စေချင်သော၊ ၀မ်းဝ၊ ခါးလှစေချင်သော အစိုးရ လူတန်းစား။
တစ်ဦး တစ်ယောက်၊ အဖွဲ့အစည်း တစ်ခုအပေါ်မှာ အားကိုးနေရသော နိုင်ငံသား ဘ၀တွေကနေ အမြန်ကျွတ်လွတ်ချင်ပါသည်။ အားလုံး တန်းတူညီမျှ ငြိမ်းချမ်းသာယာသော နိုင်ငံတစ်ခုဖြစ်လာပြီဆိုလျှင် ဒေါ်စုကို မေ့လိုက်ပါမည်။ ဦးသိန်းစိန်ကို မေ့လိုက်မည်။ ဦးနေ၀င်း၊ ဦးသန်းရွှေ သမိုင်းစာမျက်နှာထဲမှာ ချန်ထားခဲ့မည်။ လက်ရှိ အခြေအနေမှာတော့ ကျနော်လို လူအတွက် ဒေါ်စုကို ထိရင် မကြိုက်ချင်ဘူးဆိုသည့် အပြောကို ခံယူရုံကလွဲလို့ မတတ်နိုင်ပါ ခင်ဗျာ။
Comments