ပြည်သစ်ဟန် ● ဒိုင်ယာစပိုယာ

ပြည်သစ်ဟန် ● ဒိုင်ယာစပိုယာ
(မိုးမခ) မေ ၂၉၊ ၂၀၁၇

မင်္ဂလာပါ မိတ်ဆွေ
ပြန်တွေ့ရတာဝမ်းသာပါတယ်
အာလူးတွေ ပေါင်မုန့်တွေနဲ့
အသင့်စား အစားအစာထုပ်တချို့ကို
ကျနော်ထမ်းလာခဲ့မယ်
ခရီးဦးကြိုအနေနဲ့
ခင်ဗျားတို့သောက်တဲ့အထဲက ရေတခွက်လောက်တိုက်ပါ
ကျနော့်ရဲ့သွေးလည်ပတ်မှုတို့ သန့်ရှင်းသွားအောင်လို့ပါ။

ဘိုးဘေးတွေရဲ့ မြေကမ္ဘာထဲက
လွတ်လပ်စွာ ထွက်ခွာခဲ့ခြင်းလား
အဓမ္မရွှေ့ပြောင်းမှုနဲ့ သင်တို့တတွေ
သမုဒ္ဒရာတွေကို ဖြတ်ထားခဲ့ပြီ
ကန္တာရတွေကို ဖြတ်ထားခဲ့ပြီ
တောတောင်တွေကို ဖြတ်ခဲ့ပြီးပြီ
နောက်ထပ်ဘာတွေဖြတ်ရဦးမလဲ။

မျက်ရည်လွှမ်းတဲ့မြစ်ထဲမှာ
ကိုယ်ပူချိန်က မြင့်သထက်မြင့်လာ
တခါတရံ
ဗျူရိုကရက်ရန်ကို ကြောက်ရသေးတယ်လေ။

ဆင်းရဲမွဲတေမှုက အမြဲဦးမော့နေရင်း
ဆာလောင်မှုက
ကိုယ့်ဗိုက်ထဲမှာ မလည်ပတ်တော့ဘူး
သားလေးရဲ့အစာအိမ်ထဲမှာ
သမီးလေးရဲ့အစာအိမ်ထဲမှာ
ကိုယ်တိုင်ဝင်လည်ပတ်နေရပြီ။

အကြောက်တရားထက်ပိုတဲ့
အကြောက်တရားနဲ့ မိတ်ဖွဲ့ပြီးပါပြီ
ဘာတွေလိုအပ်ဦးမလဲ
အကြီးမားဆုံးပြသနာက လွတ်လပ်မှု
ဟုတ်တယ်လေ
လူ့အဖွဲ့အစည်းရဲ့ စိုးရိမ်ရေမှတ်အဖြစ်
"လှိုင်း"များအဖြစ်နဲ့ သရုပ်ဆောင်နေရတယ်
ဒီဇာတ်က နိဂုံးမဲ့အဖြစ်သနစ်တစ်ခုလို
ငါတို့တွေ ငြိတွယ်လို့နေရတုန်း
ကမ္ဘာနဲ့ချီပြီး တွင်​ကျယ်​နေရတုန်းပေါ့။

ငါ့မိတ်ဆွေတွေနဲ့ အပေါင်းအပါတွေလည်း
မဆုံးသောခရီးနဲ့ မသေချာတဲ့အနာဂတ်ထဲမှာ
ဒုက္ခကိုအရှိန်မြင့်ပြီး
အဆက်မပြတ်ခုတ်မောင်းနေကြရတယ်
ကိုယ်ချင်းစာတရားနဲ့-နွေးထွေးလုံခြုံတဲ့အရိပ်ထဲမှာ
ထာဝရခိုလှုံခွင့်ကို သမိုင်းအဆက်ဆက်တောင့်တရင်းပေါ့။

အို... ကမ္ဘာထဲကနေ့တွေ ငြိမ်းချမ်းပါစေ
အာရုဏ်ဦးပန်းတို့ လန်းဆန်းပါစေ
ဆည်းဆာတိမ်အုပ်တို့-လွတ်လပ်စွာရွေ့လျားနိုင်ပါစေ
အဓမ္မပြုမူမှုတို့
အာဏာနဲ့ဖိနှိမ်အုပ်ချူပ်မှုတို့အောက်မှ
လွတ်မြောက်ကြပါစေ
မြေကမ္ဘာထဲက ဒိုင်ယာစပိုရာကို
အပြီးတိုင်လက်ပြနူပ်ဆက်နိုင်ပါစေ။

မင်္ဂလာပါမိတ်ဆွေ
ကျွန်ုပ်တို့ရဲ့နှလုံးသားတွေ သန့်ရှင်းစင်ကြယ်ပါစေ။ ။

ပြည်​သစ်​ဟန်