မိုက်ခဲစိန် - မီးတူးခံလိုက်ရတဲ့ အမေရိကန်ကျားတွေ

မိုက်ခဲစိန် - မီးတူးခံလိုက်ရတဲ့ အမေရိကန်က ကျားတွေ
(မိုးမခ) ဒီဇင်ဘာ ၂၊ ၂၀၁၇

မီးတူးခံလိုက်ရတယ်ဆိုတော့ သူတို့ရိုးရာ ဘာဘီကျုး မီးဖုတ်စားရင်း မီးဟတ်သွားလို့လား ထင်နေဦးမယ်။ ဟုတ်ပါဘူး။  # Me Too လှုပ်ရှားမှုနဲ့ အမျိုးသမီးတွေက သူတို့ကို ယောကျားသားများက လိင်ပိုင်းဆိုင်ရာ ကာအိနြေ္ဒပိုင်းဆိုင်ရာ စော်ကားခဲ့ကြတာကို ထုတ်ဖော်လာကြရာမှာ အဲသည်အမှုကို ကျုးလွန်ခဲ့ကြတဲ့ အထင်ကရ ယောကျာ်းသားတွေ ဗူးပေါ်သလိုပေါ်လာကြပြီး အကျိုးနည်းကုန်ကြရတာကို ပြောချင်တာပါ။ အမေရိကန်မှာက အဲသည်အမှုတွေကို ဖုံးဖိပြီး သြဇာ အာဏာ ငွေကြေးတွေနဲ့ ဖိထား ဖျောက်ထားရာကနေ မိန်းမသားတွေဟာ ရေငုံနှုတ်ပိတ် မနေကြတော့ဘဲ ကိုယ်တိုင်ထုတ်ဖော် ပြောဆိုကြလို့ ကျုးလွန်သူတို့ အရှက်တကွဲဖြစ်ကြရတာ ဖြစ်ပါတယ်။ သူတို့ကတော့ Name and Shame - အမည်တတ်ပြီး အရှက်ရစေတယ်ပေါ့။

ဒီလှုပ်ရှားမှုက စတင်ခဲ့တာ ၁၀ နှစ်လောက် ရှိပြီ။ အမျိုးသမီးအက်တီဗစ် Tarana Burke က ၂၀၀၆ မှာ စတင်ခဲ့တယ်။ လိင်ပိုင်းဆိုင်ရာ စော်ကားခံခဲ့ရတဲ့ လူတန်းစား အလွှာစုံ အရောင်မျိုးစုံက အမျိုးသမီးများ အမျိုးသမီးငယ်များကို ကိုယ်ချင်းစာနာပြီး အားပေးနိုင်ရေးလှုပ်ရှားမှုပါ။ # Me Too - ဟက်ရ်ှတက်ဂ်မီးတူး ဆိုပြီး အင်တာနက်က ဆိုရှယ်မီဒီယာမှာ ၀ိုင်းဝန်းရပ်တည်ပေးအောင် စည်းရုံးလှုံ့ဆော်ကြပါတယ်။ အဲဒီလို လိင်ပိုင်းဆိုင်ရာ ကာအိနြေ္ဒပိုင်းဆိုင်ရာ ထိခိုက်အောင် စော်ကား နှောက်ယှက် ကျုးလွန်တာကို သူတို့က sexual harassment လို့လည်း သုံးပါတယ်။

အလုပ်ခွင်တွေ ကျောင်းကောလိပ်တွေ ဖြော်ဖြေရေးလုပ်ငန်းတွေမှာ အမျိုးသမီးတွေဟာ ယောကျာ်းတွေရဲ့ အနိုင်ကျင့် စော်ကားခြင်းကို ခံနေကြရတယ်၊ သူတို့က ထုတ်ဖော်ပြောပြန်ရင်လည်း ပရိသတ်ကြီးက နင်တို့က အနေအထိုင်မတတ်တာကိုးဆိုပြီး ပြစ်တင်ကြတယ်၊ မိန်းမတွေကို ယောကျာ်းတွေရဲ့ အဖြည့်ခံလိုမျိုး စိတ်ထားနဲ့ နှိမ်ချင်တဲ့စိတ်ကလည်း အခြေခံအားဖြင့် ရှိတယ်လို့ ဆိုပါတယ်။ မိန်းမတယောက် အနိုင်ကျင့်ခံရတိုင်းမှာ အတော်များများက မိန်းမဘက်ကို အပြစ်လို့ မြင်ကြတာကို အရင်ဆုံး တွန်းလှန်နေကြရတယ်လို့ အမျိုးသမီးအက်တီဗစ်တွေက ပြောကြပါတယ်။ အခုအချိန်မှာတော့ အမျိုးသမီးတွေရဲ့ ကာယအိနြေ္ဒကို ကာကွယ်ဖို့ လေးစားဖို့ မစော်ကားဖို့ အခွင့်အရေးမယူဖို့ကို အလုပ်ခွင် ကျောင်းတွေ ဖြော်ဖြေရေးလုပ်ငန်းတွေမှာ ပညာပေးတာ အရေးယူဖို့ ကြိုးစားတာတွေ တဖြေးဖြေးတော့ ဖြစ်လာနေပါပြီ။

သည်လိုအချိန်မှာ ၂၀၁၇ အောက်တိုဘာလမှာတော့ဖြင့် ဟောလီဝုဒ် ရုပ်ရှင်ကုမ္မဏီတွေထဲက အထင်ရှားဆုံး ၀ိုင်းစတိန်း (Weinstein) ရဲ့ လုပ်ငန်းရှင်၊ ထုတ်လုပ်သူ ဟာဗီဝိုင်းစတိန်းဟာ အမျိုးသမီးအနုပညာသည်အချို့ကို လိင်ပိုင်းဆိုင်ရာ နှောက်ယှက်စော်ကားမှုတွေ လုပ်ခဲ့ကြောင်း ကာယကံရှင်တွေက ရေငုံနှုတ်ပိတ် မနေတော့ဘဲ ထုတ်ဖော်ပြောဆိုလာခဲ့ကြတာကြောင့် အရှက်တကွဲဖြစ်ပြီး ရာထူးကနေ ထုတ်ပယ်ခြင်း ခံလိုက်ရပါတယ်။ သူက အဲသည်အမျိုးသမီးထဲက တချို့ကို ငွေကြေးလျော်ကြေးပေးပြီး စာချုပ်စာတမ်းနဲ့ ထုတ်မပြောရလို့ လုပ်ထားခဲ့တာကိုလည်း ကာယကံရှင်တွေက မလိုက်နာကြတော့ဘဲ ဖွင့်ချလိုက်ကြတာပါ။ အမေရိကန်တရားရေးစနစ်ကလည်း မတရားအလုပ်ခံရသူက တရားစွဲရင်တောင် ခုံရုံးပြင်ပ နှစ်ဘက်ကျေနပ်အောင် ညှိနှိုင်းခွင့်၊ လျော်ကြေးပေးပြီး နှုတ်ပိတ်ခွင့်တွေ ရှိတာကြောင့် ပြည်သူတွေက အမှန်ကို မသိနိုင်ခဲ့ကြတာ ဖြစ်ပါတယ်။ အခုတော့ သိလာရပါပြီ။

ဟောလီဝုဒ်က စလိုက်တဲ့ အထုပ်ဖြေမှုကြောင့် ဟောလိဝုဒ်က မင်းသားတွေထဲက ကယ်ဗင်စပေစီ (Netflix - House of Cards) တို့နဲ့တကွ အတော်များများလည်း ထိခိုက်ကုန်ကြပါတယ်။ သူတို့ရိုက်ထားတဲ့ ရုပ်ရှင်တွေ စီးရီးတွေထဲကနေ အထုတ်ခံလိုက်ရပါတယ်။ တီဗီရုပ်မြင်သံကြားထဲကဆိုရင် လူဝီစီကေ လို လူရွှင်တော်လည်း အရှက်တကွဲဖြစ်သွားရပါတယ်။ ဒါနဲ့တင်ပဲလားဆိုတော့ စာနယ်ဇင်းနယ်ပယ်ထဲက ထင်ရှားတဲ့ မီဒီယာတင်ဆက်သူတွေလည်း ဗူးပေါ်သလိုပေါ်လာလို့ သူတို့ရုပ်မြင်အစီအစဉ်တွေကနေ အနားယူလိုက်ရပါတယ်။ NBC က မက်လောအာ၊ CBS က ချားလီရို့စ်၊ ရေဒီယိုထုတ်လုပ်သူတွေ တင်ဆက်သူတွေပါ ပါဝင်ပါတယ်။ စီလီကွန်ဗယ်လီက ပုဂ္ဂိုလ်တွေထဲက ထူထောင်သူအချုိ့လည်း အစွပ်စွဲခံရလို့ တချို့ကတော့ ရာထူးကနေ ထုတ်ပေးပါတယ်။ ရောဘတ်စကိုဘဲ (Transformation Group) က တဦးအပါအ၀င်ပါ။

သည်နေရာကနေ နိုင်ငံရေးနယ်ပယ်ထဲကိုပါ အမှုတွေပေါ်လာတဲ့အခါ ရီပတ်ဘလင်ကန်အမတ်တွေကော ဒီမိုကရက်တွေမှာပါ လိင်ပိုင်းဆိုင်ရာ အနိုင်ကျင့်သူတွေအဖြစ် ပေါ်ပေါက်လာပါတယ်။ ဒေါ်နယ်ထရန့်ကိုယ်တိုင် (အမေရိကန်သမ္မတ) က ယခင်တုန်းက မိန်းမတွေကို ကိုယ်ထိ လက်ရောက်ဖူးကြောင်း သတင်းထွက်ခဲ့ပေမယ့် သူကတော့ ငြင်းဆိုပြီး နောက်မဆုတ်ခဲ့ပါဘူး။ သည်တော့ အမေရိကန်နိုင်ငံရေးသမားတွေထဲက သူ့ဘက်သား ရီပတ်ဘလစ်ကန်အမတ်တွေကတော့ အစွပ်စွဲခံရတာကို မျက်နှာပြောင်တိုက်ပြီး ဆက်နေကြပါသတဲ့။ သူတို့ပြောတာက မဲဆန္ဒရှင်တွေက ဖြုတ်မချသမျှ သူတို့ကတော့ မထွက်နိုင်ပါဘူးတဲ့။ ဒီမိုကရက်ထဲက စွပ်စွဲခံရတဲ့ အမတ် ၂ဦးကတော့ သူတို့ကို လွှတ်တော်ကနေ စုံးစမ်းရေးကော်မရှင်နဲ့ စစ်ဆေးမှုခံမယ်လို့ ပြောကြားပါတယ်။

အဲသည်မှာ ထပ်မံပြီး ဗူးပေါ်လာပြန်တာက အမေရိကန်နိုင်ငံရေးမှာ အမျိုးသမီးတွေ အစော်ကားခံရတာ လွှတ်တော်သက်တမ်း အစိုးရသက်တမ်း နိုင်ငံသက်တမ်းတမျှလောက်ရှိနေပေမယ့် ဥပဒေတဖက်စောင်းနင်းနဲ့ လျော်ကြေးပေးတန်ပေး၊ နှုတ်ပိတ်တန်ပိတ်၊ အလုပ်ကနေ အမျိူးသမီးကို ထုတ်ပစ်တန် ထုတ်ပြီး ဖုံးဖိနေကျ အစဉ်အလာရှိနေတဲအကြောင်း ဖြစ်ပါတယ်။ အခြား စီးပွားရေး၊ အနုပညာ၊ လုပ်ငန်းတွေမှာကတော့ ဘုတ်အဖွဲ့တို့ လုပ်ငန်းရှင်တို့က စာရိတ္တပျက်စီးမှုအဖြစ် အရေးယူကြသော်လည်း နိုင်ငံရေးမှာကတော့ လက်တလုံးခြား ကင်းလွတ်ခွင့်ရှိနေတာကို # Me Too Movement ကြောင့် မီးမောင်းထိုးခံရပြီး ရှုတ်ချခံရသည်အထိ ထင်ရှားလာတာ လက်ရှိအမြတ်လို့ပဲ ဆိုရပါမယ်။

သမ္မတ ဘီကလင်တန်တုန်းက မော်နီကာလောဝင်စကီးနဲ့ ရှုပ်ခဲ့တာ ခုံရုံးဖွဲ့ Impeachment လုပ်ဖို့ ကြိုးစားခဲ့သော်လည်း မအောင်မြင်ခဲ့ပါ။ သမ္မတ ဘုရ်ှအကြီးလည်း အစွပ်စွဲခံရပါတယ်။ သူကတော့ လက်ရှိမှာ  အသက် ၉၃ နှစ် ရှိနေပါပြီ။ လွန်ခဲ့တဲ့ အတိတ်က လက်ရောက်မှုတွေအတွက် သူက ခုချိန်မှာ ၀မ်းနည်းကြောင်း ပြန်တောင်းပန်ခဲ့ပါသတဲ့။

အမျိုးသမီးတွေဟာ အမျိုးသားတွေနဲ့ တန်းတူအခွင့်အရေး ရရှိရမယ်လို့ လှုပ်ရှားမှုဟာ သမိုင်းနဲ့ ချီခဲ့ပါပြီ။ အမျိုးသမီးတွေ မဲပေးခွင့်၊ အလုပ်လုပ်ခွင့်၊ လုပ်ခလစာ တန်းတူခွင့် စတာတွေနဲ့ တိုက်ပွဲဝင် တောင်းဆိုခဲ့ကြဆဲ။ ဆက်လက်လည်း ရုန်းကန်နေဆဲပါပဲ။ အခုတခါကတော့ မိန်းမတွေရဲ့ ကာယအိနြေ္ဒကို လေးစားဖို့ မစော်ကားဖို့ အနိုင်မကျင့်ကြဖို့ ဆက်လက်တောင်းဆိုနေကြပါတယ်။ ခေတ်အဆက်ဆက် လုပ်ငန်းခွင် အိမ်ထောင် ကျောင်း အနုပညာ နိုင်ငံရေး နယ်ပယ်အတွင်းမှာ သူတို့တွေကို လိင်ပိုင်းဆိုင်ရာ အနိုင်ကျင့် စော်ကားမှုတွေ မလုပ်ကြဖို့ကို မီးမောင်းထိုးပြတဲ့ အချိန်ကို ရောက်လာတဲ့ သဘောပါပဲ။

မြန်မာပြည်မှာလည်း သည်လိုမျိုး လှုပ်ရှားမှုတွေ ဆွေးနွေးမှုတွေ ရှိလာကြပါတယ်။ မြန်မာပြည်မှာ လက်တွေ့မှာ အမျိုးသမီးအခန်းကဏ္ဍကို ဘယ်လိုများ ရှိနေလဲဆိုတာ သုံးသပ်ကြည့်သင့်ပါတယ်။ အနည်းဆုံး ထင်ရှားတဲ့ ဥပမာကို ထုတ်ပြရရင် မြန်မာ ရုပ်ရှင် ရုပ်သံ ဇာတ်လမ်းတွေမှာ အမျိုးသားတွေက အမျိုးသမီးတွေကို အော်ဟစ် နောက်ပြောင် အနှောက်အယှက်ပေးတဲ့ အခန်းတွေ၊ အရက်သောက် မူးယစ်သူ ယောကျာ်းတွေက အမျိုးသမီးတွေကို စော်ကားတဲ့ အခန်းတွေ မြင်တွေ့ရလေ့ရှိပါတယ်။ အမျိုးသမီးတွေက ကယ်တင်ရှင် သူရဲကောင်းအမျိုးသားတွေကို စောင့်မျှော်ပြီး ကယ်တင်ရှင်ရှာနေရတဲ့ ဇာတ်ကွက်တွေ များပါတယ်။ အမျိူးသမီးတွေရဲ့ ခွန်အား၊ အားမာန်၊ ရုန်းကန် ရင်ဆိုင် တိုက်ပွဲဝင်မှုတွေ များများစားစား မမြင်ရသေးဘူးလို့ ဆိုရပါမယ်။ မြန်မာပြည်မှာ လိင်ပိုင်းဆိုင်ရာ အစော်ကား ကျုးလွန်ခံရသူများအတွက် အကာအကွယ်ပေးမှုတွေ၊ အပြစ်ကျုးလွန်သူကို ထိရောက်တဲ့ အပြစ်ပေးအရေးယူမှုတွေ ဆောင်ရွက်ကြဖို့ အစိုးရအဆင့် လွှတ်တော်အဆင့်မှာလည်း ဆက်လက် ဆောင်ရွက်နေကြဆဲ ဖြစ်တာကို မြင်တွေ့နေရပါတယ်။ လူထု လူတန်းစားအဆင့်တိုင်းမှာလည်း awareness သိမြင်မှု ရေချိန် မြင့်သည်ထက် မြင့်ဖို့ အားပေးကြစေလိုကြောင်း တိုက်တွန်းလိုက်ပါတယ် ခင်ဗျား။