ဆောင်းဝေ ● နိမိတ်ပုံနှင်းများ

ဆောင်းဝေ ● နိမိတ်ပုံနှင်းများ
(မိုးမခ) ဇန်နဝါရီ ၁၀၊ ၂၀၁၈

သစ်ကိုင်းတွေလမ်းမပေါ်ခုတ်ချထားသလို ဖရိုဖရဲနှင်းတွေ
စားသောက်ပြီးသား အကြွင်းအကျန်တွေ လမ်းပေါ်စွန့်ပစ်ထားသလို
မြို့ကို ပေကျံနေတဲ့နှင်းတွေ
မောင်းနေရင်း ကားဘီးကျွတ်ကျန်ခဲ့သလို ရပ်တန့်နေတဲ့နှင်းတွေ
ဆောင်းရာသီရောက်ရင် နှင်းကျရမှာပဲဆိုသလို သီအိုရီထဲကနှင်းတွေ
ဇန်နဝါရီလေးရက်နေ့မှာ နှင်းကျဖို့တခုတည်းနဲ့ရောက်လာခဲ့သလို နှင်းတွေ
နှစ်ခုနစ်ဆယ်ကျော်ကြာတဲ့အထိ အလံလွှင့်တင်ပြီး မလွတ်လပ်သေးသလို နှင်းတွေ
နှင်းကျရင် ချမ်းအေးတုန်ယင်နေရမှာပဲဆိုတဲ့ ပုံစံခွက်ထဲကလို နှင်းတွေ
နှစ်တစ်နှစ်ကို နှင်းနဲ့ပဲဆုံးပြီး နှင်းနဲ့ပဲပြန်စမယ်ဆိုတဲ့ တရွေ့ရွေ့နှင်းတွေ
စစ်နဲ့ငြိမ်းချမ်းရေးကို တရွက်ထဲမှာ နှစ်မျက်နှာခွဲရေးခံထားရသလို လွဲနေတဲ့နှင်းတွေ
ငါ့ကိုမရွေးချယ်နဲ့ ငါကပဲအရာရာကိုရွေးချယ်မယ်ဆိုတဲ့ တမြေ့မြေ့နှင်းတွေ
ကော်ဖီဆိုင်များ၊ ဘဏ်များ၊ အလုပ်ရုံနဲ့မြို့တွင်းဆွဲဘတ်စ်ကားတွေပိတ်ထားလိုက်ရသလို နှင်းတွေ
အခြားနိုင်ငံတွေကိုမှီဖို့ကြိုးစားရင်း လဘက်ရည်တခွက်လျှော့သောက်နေရသလို နှင်းတွေ
ထမင်းတနပ်လျှော့စားရင်း ဟင်းတခွက်တည်းနဲ့သာစားရတေ့ာမလို နှင်းတွေ
လူကြီးလူကောင်းတွေလည်း ကျနော်တို့နဲ့အတူ ထမင်းဝင်စားစေချင်တယ်ဆိုသလို တိုင်းရင်းသားနှင်းတွေ
ရှေ့မှာတက်လမ်းဆိုလို့ အချိန်မရွေးသတ်ဖြတ်ခံရခြင်းပဲဆိုတဲ့ ငယ်ရွယ်သူသရုပ်ဆောင်လိုနှင်းတွေ
လျှောက်ခဲ့သလောက် ဘယ်မှမရောက်သေးတဲ့လမ်းတွေလို တဖွဲဖွဲနှင်းတွေ
ဘယ်ပန်းတိုင်ကိုမှလှမ်းမကိုင်နိုင်သေးတဲ့ တပတ်ပြီးတပတ်လည်နေတဲ့နာရီတွေလို နှင်းတွေ
ငယ်စဉ်ဘဝထဲက မနက်စောစောတွေမှာ ငါတို့မောင်နှမတွေ မီးဖိုဘေးမှာဝိုင်းထိုင်ရင်း
ပါးစပ်ထဲကမှုတ်ထုတ်ခဲ့ရတဲ့ အခိုးအငွေ့တွေလို နှင်းတွေ
ဘဝတလျှောက်လုံးတော်လှန်နေရတာနဲ့ပဲ ကိုယ့်ကိုယ်ကိုပြန်မဖွဲ့ဆိုခဲ့ရသလိုနှင်းတွေ
လူငယ်တွေကိုနေရာပေးပါ သူတို့ကနှင်းကျတဲ့အရွယ်တွေပါဆိုတဲ့ နှင်းတွေ
ရုပ်ရှင်ကားထဲမှာကြည့်လို့ကောင်းပြီး တကယ့်ဘဝထဲမှာ နာကျင်အေးစက်လွန်းလှတဲ့နှင်းတွေ
နံရံထဲ သံရိုက်သွင်းလိုက်သလို ဘဝထဲကအစွန်းအထင်းနှင်းတွေ
မျှော်လင့်လိုက်ပါရဲ့
မီးလင်းဖိုချစ်ခြင်းမေတ္တာ
နေရောင်ခြည်နိုင်ငံတော်။

အလည်လွန်တဲ့သားလည်း အချိန်တန်ရင်အိမ်ပြန်လာရစမြဲပဲ
နှင်းတွေဟာ တနေ့လုံးကျနေဆဲ။ ။

ဆောင်းဝေ (နတ်မောက်)
ဇန် ၄၊ ၂၀၁၈