လွန်းဆက်နိုးမြတ် - နှုတ်ခမ်းမွှေးစက်ရုံ

နှုတ်ခမ်းမွှေးစက်ရုံ
လွန်းဆက်နိုးမြတ် 
(မိုးမခ) စက်တင်ဘာ ၁၁၊ ၂၀၁၈

အဲဒီက ထွက်လာတဲ့ လူမှန်သမျှ 
နှုတ်ခမ်းမွှေးကိုယ်စီနဲ့။ 
အမျိုးသမီးတွေတောင်မှ။

ရူးသွပ်မှုတမျိုးပေါ့လေ 
ဝင်းဦးနောက်တယောက်လည်း 
ဖြစ်သွားနိုင်သလို
ပပဝင်းခင် နောက်တယောက်လည်း 
ဖြစ်လာနိုင်တာပဲ။
ဒါမှမဟုတ်
ကလက်ခ်ဂါဘယ်နောက်တယောက်လည်း 
ဖြစ်ချင်ရင် ဖြစ်သွားနိုင်သလို
ဇူအီဒက်စ်ကန်နယ်လ် နောက်တယောက်လည်း 
ဖြစ်ခွင့်ရှိရဲ့။

နားလည်ဖို့တော့ ခက်သား။

နေ့မှာ ဝတ်ကောင်းစားလှတွေဝတ်ဆင်
အဲဒီ့ကို လူတွေ သွားကြ
ပျော်ရွှင်ဟားတိုက်ရယ်မောပြီး 
နှုတ်ခမ်းမွှေးအသစ်နဲ့
ပြန်ထွက်လာကြ။ 

ညဆို အလောင်းကောင်လို အဝတ်အစားနဲ့
အဲဒီ့ထဲ လူတွေ ဝင်ကြ
ငြီးတွားငိုကြွေးအော်ဟစ်ပြီး 
နှုတ်ခမ်းမွှေးဖရိုဖရဲ
ပြေးထွက်လာကြ။

ဘယ်တတ်နိုင်ပါ့မလဲ။
သင့်ကိုယ်တိုင်လည်း
နှုတ်ခမ်းမွှေးနဲ့ လူတယောက်ပေါ့။

ချာလီချာပလင်ရဲ့
ပြောင်စပ်စပ်နှုတ်ခမ်းမွှေးပါတီက ထုတ်လုပ်လိုက်တဲ့ ဟာသတွေ သုံးစွဲပြီး
အဒေါ့ဖ်ဟစ်တလာရဲ့ 
အေးစက်စက်နှုတ်ခမ်းမွှေးပါတီက ညှင်းပန်းမှုတွေကျ 
မေ့လျော့နေလေတဲ့ 
နိုင်ငံငယ်တခုကပေါ့။ 

9.9.18 
10:03 pm

Comments